|
|
 |
| (GMT+08:00)
2006-04-21 18:07:47
|
 |
|
ນາງສູຢູ້ຮວາ ລາຊີນີໝາກເສິກສາກົນລະດັບໂລກຜູ້ທີສາມຂອງຈີນ(ສຽງ)
cri
Author: shuo
|
ຫວ່າງກ່ອນນີ້ບໍ່ດົນ,ງານແຂ່ງຂັນໝາກເສິກສາກົນຊີງຊະນະເລີດເພດຍິງໂລກປີ2006ໄດ້ ສິ້ນສຸດລົງ,ນາງສູຢູ້ຮວາ ນັກຫຼິ້ນໝາກເສິກສາກົນຂອງຈີນໄດ້ເອົາຊະນະຄູ່ແຂ່ງຂັນຜູ້ດີເລີດຂອງປະເທດຕ່າງໆຊີງໄດ້ແຊມປຽນເລີຍ,ນາງເປັນລາຊີນີໝາກເສິກສາກົນລະດັບໂລກຜູ້ທີສາມຂອງຈີນ,ເຊິ່ງຖັດຈາກນາງເຊ້ຈຸ່ນແລະນາງຈູ່ເຊິນ.ວັນທີ25ມີນາ,ຄົນທັງຫຼາຍໄດ້ເປັນສັກຂີພິຍານທີ່ໄດ້ເຫັນລາຊີນີໝາກເສິກສາກົນໂລກຜູ້ໃໝ່ກຳເນີດຂຶ້ນຢູ່ເອຄາເຕລິນບວກຂອງຣັດເຊຍ.ໃນງານແຂ່ງຂັນໝາກເສິກສາກົນເພດ ຍິງໂລກປີ2006,ນາງສູຢູ້ຮວາໄດ້ເອົາຊະນະຄູ່ແຂ່ງຂັນຜູ້ດີເລີດໃນໂລກ6ຄົນຢ່າງລຽນຕິດ,ແລ້ວຊິງໄດ້ແຊມປຽນ.ເລື່ອງທີ່ຕ້ອງກ່າວເຖິງແມ່ນ,ໃນເວລານີ້,ນາງສູຢູ້ຮວາໄດ້ຖືພາ4ເດືອນປາຍແລ້ວ,ການໄດ້ແຊມປຽນຂອງນາງໄດ້ເພີ່ມຕື່ມສີສັນອັດສະຈັນຫຼາຍກວ່າເກົ່າ.
ຄືກັນກັບຫຼາຍນາງສາວຫຼວງຫຼາຍຂອງຈີນ,ນາງສູຢູ້ຮວາທີ່ເກີດຢູ່ແຂວງເຈີ້ຈ່ຽງ ພາກຕາເວັນອອກສຽງໃຕ້ຂອງຈີນມີນິໄສໃຈຄໍສະຫງົບງຽບ,ເໝາະຫິ້ຼນໝາກເສິກສາກົນທີ່ສຸດ.ໃນຍາມອະຍຸ13ປີ,ນາງໄດ້ເຂົ້າຮ່ວມທີມຝຶກອົບຮົມແຫ່ງຊາດຈີນ.ນາງສູຢີ້ຮວາເຫັນວ່າ,ໄຊ ຊະນະຂອງຕົນໄດ້ພົວພັນກັບພໍ່ທີ່ໃຫ້ນາງຫຼິ້ນໝາກເສິກສາກົນແຕ່ຍາມນ້ອຍ.ນາງເວົ້າວ່າ:"ເມື່ອອະຍຸ6ປີ,ຂ້ອຍກໍໄດ້ຮຽນຫຼິ້ນໝາກເສິກສາກົນແລ້ວ,ພໍ່ຂອງຂ້ອຍເປັນຜູ້ສອນຂ້ອຍຫຼິ້ນໝາກເສິກສາກົນຜູ້ທຳອິດ."
ຜູ້ຮູ້ກັບນາງສູຢູ້ຮວາເຫັນວ່າ,ນາງມັກຫຼິ້ນໝາກເສິກສາກົນຈົນເຖິງຂັ້ນມົວເມົາເອົາແທ້ເອົາວ່າ,ນີ້ກໍແມ່ນມູນເຫດທີ່ນາງຍຶດໝັ້ນໄປແຂ່ງຂັນໃນເວລາຖືພາແລ້ວ.
ນິໄສສະຫງົບງຽບແມ່ນຈຸດພິເສດອັນໜຶ່ງຂອງນາງສູຢີ້ຮວາ.ທ່ານລິວຈິ່ງ ຜົວຂອງນາງກໍແມ່ນນັກຫຼິ້ນໝາກດ້າມທີ່ຊື່ດັງຂອງຈີນ.ແຕ່ຄວາມນິຍົມຂອງສອງຜົວເມຍຄູ່ນີ້ຊ້ຳພັດຕ່າງກັນຫຼາຍ,ທ່ານລິວຈິ່ງມີນິໄສຟົດຟື້ນ,ມັກຫຼິ້ນກິລາດຸເດືອດ ຄື ບານເຕະແລະບານ ບ້ວງເປັນຕົ້ນ.ສ່ວນວິທີຫັດກາຍທີ່ນາງສູຢູ້ຮວາມັກນັ້ນແມ່ນການແລ່ນຊ້າໃນຍາມເຊົ້າແລະຫັດໂຢກາ.
ເມື່ອທຽບໃສ່ນາງເຊ້ຈຸ່ນແລະນາງຈູ່ເຊິນ ເຊິ່ງເປັນລາຊີນີໝາກເສິກສາກົນໂລກຂອງຈີນ ກ່ອນເພິ່ນ,ນາງສູຢູ້ຮວາມີອຸປະນິໄສຕ່າງກັບພວກເຂົາເຈົ້າສອງຄົນຫຼວງຫຼາຍ.ນາງເຊ້ຈຸ່ນ ລາຊີນີໝາກເສິກສາກົນໂລກຜູ້ທຳອິດຂອງຈີນໄດ້ຮັບຄຄວາມນິຍົມຊົມຊອບຫຼາຍຈາກປະ ຊາຊົນຈີນອັນໄພສານ,ຍ້ອນມີທ່າທີກິລິຍາວາຈາອັນອ່ອນຫວານ.ສ່ວນນາງຈູ່ເຊິນໄດ້ສ້າງພາບພົດເປັນສາວຫົວໄວຊ່າງປາກຊ່າງເວົ້າແກ່ຄົນທັງຫຼາຍ,ສື່ມວນຊົນກໍມັກສຳພາດນາງ.ສ່ວນນາງສູຢູ້ຮວາພັດບໍ່ມັກປາກມັກເວົ້າ.ທີ່ຈິງແລ້ວ,ນາງສູຢູ້ຮວາໄດ້ຍຶດໝັ້ນຂຽນບົດ,ໄດ້ບັນທຶກຄວາມຄິດຂອງຕົນເປັນຕົວໜັງສື,ທັງໄດ້ຕັ້ງຄໍລຳພິເສດຂອງຕົນໃສ່ໜັງສືພິມແລະວາລະສານຫຼາຍສະບັບ.ທ່ານເຢ້ຈ່ຽງຊ່ວນ ຄູຝຶກໃຫຍ່ຂອງທີມໝາກເສິກສາກົນຈີນໄດ້ຮ່ວມມືກັບນາງສູຢູ້ຮວາຫຼາຍປີແລ້ວ,ການຕີລາຄາຂອງເພິ່ນແມ່ນຕິດແທດຕົວຈິງທີ່ສຸດ. ທ່ານເວົ້າວ່າ:"ນາງສູຢູ້ຮວາເກີດໃນຄອບຄົວນັກຮຽນຮູ້,ພໍ່ເປັນຄູອາຈານຄູສອນ.ຂ້າພະເຈົ້າເຫັນໄດ້ວ່າ,ນາງສູຢູ້ຮວາບໍ່ຊ່າງປາກຊ່າງເວົ້າ,ແຕ່ຂຽນບົດເກັ່ງຫຼາຍ,ແມ່ນນັກກິລາທີ່ມີຄວາມຮູ້ເດິກໃນ."
ເຖິງວ່າກ່ອນໜ້ານີ້ຊື່ສຽງຂອງນາງສູຢູ້ຮວາບໍ່ດັງທໍ່ນາງເຊ້ຈຸ່ນແລະນາງຈູ່ເຊິນກໍຕາມ,ແຕ່ຜົນສຳເລັດທີ່ນາງຍາດໄດ້ນັ້ນພັດບໍ່ດ້ອຍກວ່າສອງຄົນ.ພາຍຫຼັງນາງສູຢູ້ຮວາຊິງໄດ້ແຊມປຽນໃນງານແຂ່ງຂັນຊິງຊະນະເລີດໂລກເທື່ອນີ້ແລ້ວ,ນາງໄດ້ກາຍເປັນນັກຫຼິ້ນໝາກເສິກສາກົນຈີນຜູ້ທຳອິດທີ່ຊິງໄດ້ແຊມປຽນໃນງານແຂ່ງຂັນໝາກເສິກສາກົນສຳຄັນທຸກປະເພດຂອງໂລກ.ກ່ອນໜ້ານີ້,ປິ2000,ນາງສູຢູ້ຮວາກໍໄດ້ເປັນແຊມປຽນເພດຍິງຂອງງານແຂ່ງຂັນໝາກເສິກສາກົນຊິງຂັນໂລກ,ສອງປີຕໍ່ມາ,ນາງໄດ້ຄອງຂັນໂລກໜ່ວຍນີ້ອີກຄັ້ງໜຶ່ງ.ນາງສູ ຢູ້ຮວາຍັງເຄີຍເປັນສະມາຊິກທິມເພດຍິງຈີນ ເຊິ່ງໄດ້ເປັນແຊມປຽນໃນການແຂ່ງຂັນໝູ່ຄະ ນະຂອງງານແຂ່ງຂັນໝາກເສິກສາກົນໂອລິມປິກໂລກສາມຄັ້ງລຽນຕິດ.
ອາດຈະແມ່ນຖືກຜົນສະທ້ອນຈາກພໍ່,ໃນຂະນະທີ່ຫຼິ້ນໝາກເສິກສາກົນ,ນາງສູຢູ້ຮວາກໍຍຶດ ໝັ້ນຮ່ຳຮຽນ.ປະຈຸບັນນີ້,ນາງໄດ້ຮຽນຈົບຫຼັກສູດປະລິນຍາຕີຂອງວິຊາກົດໝາຍໃນມະຫາວິ ທະຍາໄລປັກກິ່ງ,ຈະຮຽນຫຼັກສູດປະລິນຍາໂທຂອງວິຊາພາສາຈີນ.ຈະຊຳລະການພົວພັນລະຫວ່າງການເຂົ້າຮຽນກັບການຫຼິ້ນໝາກເສິກສາກົນແນວໃດ,ນາງສູຢູ້ຮວາມີຄິດຂອງຕົນ, ນາງເຫັນວ່າ,ການຫິ້ຼນໝາກເສິກສາກົນກັບການເຂົ້າຮຽນບໍ່ຂັດກັນ.
"ຂ້າພະເຈົ້າເຫັນວ່າ,ການເຂົ້າຮຽນອາດຈະຂັດກັບການຫຼິ້ນໝາກເສິກສາກົນແຕ່ກໍມີການຊ່ອຍເຫຼືອກັນ,ສຳຄັນແມ່ນວ່ານັກຫຼິ້ນຈະແບ່ງປັນເວລາແນວໃດແລະປະສົມປະສານສອງເລື່ອງນີ້ແນວໃດ.ຄືໃນຍາມຂ້າພະເຈົ້າຮ່ຳຮຽນຢູ່ມະຫາວິທະຍາໄລປັກກິ່ງ,ເຖິງວ່າທຸກຍາກລຳບາກຫຼາຍ,ເພາະວ່າຮຽນຫຼັກສູດຂອງມະຫາວິທະຍາໄລປັກກິ່ງເມື່ອຍແທ້,ຈົນເຖິງຂັ້ນ ຂ້າພະເຈົ້າກໍບໍ່ຕ່າງກັນກັບນັກສຶກສາທຳມະດາຜູ້ອື່ນ,ຕ້ອງຮຽນໝົດຫຼັກສູດແລ້ວຈຶ່ງຈົບໄດ້,ສະນັ້ນຂ້າພະເຈົ້າໄດ້ໃຊ້ເວລາ5ປີຈຶ່ງຮຽນສຳເລັດ.ຖ້າວ່າຂ້າພະເຈົ້າບໍ່ໃຊ້ເວລາຕອນນີ້ໄປຮ່ຳຮຽນ,ກໍຈະໃຊ້ເພື່ອເລື່ອງອື່ນ.ສະນັ້ນ,ຜ່ານການຮ່ຳຮຽນ,ຂ້າພະເຈົ້າຈຶ່ງຮຽນຮູ້ວ່າຈະໃຊ້ເວລາແນວໃດມາເສີມສ້າງຄວາມສາມາດຂອງຕົນ."
ຍ້ອນຖືພາແລ້ວ,ນາງສູຢູ້ຮວາຈະບໍ່ຕາງໜ້າທິມເພດຍິງຈີນໄປເຂົ້າຮ່ວມການແຂ່ງຂັນໝູ່ຄະນະໂອລິມປິກໝາກເສິກສາກົນໂລກທີ່ຈະຈັດຂຶ້ນໃນປີນີ້,ແຕ່ວ່າ,ຍ້ອນເປັນລາຊີນີໝາກເສິກສາກົນລະດັບໂລກຜູ້ໃໝ່,ຕໍ່ໄປພາຍໜ້າ,ນາງສູຢູ້ຮວາຈະໄດ້ຮັບຄວາມເອົາໃຈໃສ່ຈາກຄົນທັງຫຼາຍນັບມື້ນັບຫຼາຍ.ຕໍ່ຜົນງານແລະຄວາມຍ້ອງຍໍ,ນາງສູຢູ້ຮວາມີອາລົມຈິດສະຫງົບງຽບທີ່ສຸດ.
"ຂ້າພະເຈົ້າຄິດວ່າ,ຍັງຮັກສາຊີວິດການເປັນຢູ່ທີ່ຄືກັນກັບແຕ່ກ່ອນຊິດີກວ່າ,ບໍ່ຕ້ອງປ່ຽນແປງແບບແຜນຊີວິດການເປັນຢູ່ຂອງຕົນພາຍຫຼັງເປັນແຊມປຽນແລ້ວ.ຂ້າພະເຈົ້າຍັງສະເຫວີຍຄວາມມ່ວນຊື່ນທີ່ມາຈາກການຫຼິ້ນໝາກເສິກສາກົນຄືແຕ່ກ່ອນ.ຂ້າພະເຈົ້າກໍບໍ່ຫວັງໃຫ້ຕົນເອງຖືກກະທົບກະເທືອນຈາກສິ່ງໃດສິ່ງໜຶ່ງພາຍນອກ,ຍັງຮັກສາຄວາມສະຫງົບໃນໃຈກໍພໍແລ້ວ,ຊີວິດການເປັນຢູ່ຍິ່ງທຳມະດາເທົ່າໃດກໍຍິ່ງດີເທົ່ານັ້ນ"
|
|
|
