|
ຕາມຂ່າວສານຊິນຮວາ: ໃນຫຼາຍມື້ມານີ້, ອົງການຈັດຕັ້ງສັງຄົມຊາວຈີນຕ່າງດ້າວແລະສື່ມວນຊົນພາສາຈີນຂອງບາງປະເທດໄດ້ສືບຕໍ່ກ່າວຄຳປາໄສແລະພິມບົດຄວາມ, ຕີລາຄາສູງຕໍ່ຂໍ້ສະເໜີ 4 ຂໍ້ທີ່ທ່ານຫູຈິນທາວ ເລຂາທິການໃຫຍ່ສູນກາງພັກກອມມູນິດຈີນສະເໜີອອກມາໃນວັນທີ 16 ເມສາ ເພື່ອຊຸກຍູ້ໃຫ້ການພົວພັນລະຫວ່າງສອງຝັ່ງຊ່ອງແຄບໄຕ້ຫວັນຂະຫຍາຍຕົວໂດຍສັນຕິແລະໝາກຜົນຂອງເວທີປາໄສເສດຖະກິດການຄ້າລະຫວ່າງສອງຝັ່ງຊ່ອງແຄບໄຕ້ຫວັນ.
ວັນທີ 21 ເມສາ, ທ່ານຫວາງຈື້ໝິນ ປະທານສະມາຄົມຊຸກຍູ້ການໂຮມຈີນເຂົ້າເປັນເອກະພາບກັນໂດຍສັນຕິຂອງໄທກ່າວວ່າ, ສະມາຄົມດັ່ງກ່າວເດັດດ່ຽວສະໜັບສະໜູນຂໍ້ສະເໜີ 4 ຂໍ້ດັ່ງກ່າວ. ທ່ານເຊື່ອວ່າ, ທະແນມແຕ່ປະຊາຊົນສອງຝັ່ງເກາະແຂນກັນພັດທະນາໂດຍສັນຕິ, ເຮັດໃຫ້ເສດຖະກິດສອງຝັ່ງຈະເລີນຮຸ່ງເຮືອງແລ້ວ, ວັນເວລາແຫ່ງການຟື້ນຟູຄວາມຈະເລີນອັນຍິ່ງໃຫຍ່ຂອງປະຊາຊາດຈີນຍ່ອມຈະມາເຖິງຢ່າງແນ່ນອນ.
ວັນທີ 20 ເມສາ, ສະມາຄົມຊຸກຍູ້ການໂຮມຈີນເຂົ້າເປັນເອກະພາບກັນຂອງມາດາກາສກາກ່າວວ່າ, ຂໍ້ສະເໜີ 4 ຂໍ້ດັ່ງກ່າວໄດ້ສະແດງໃຫ້ເຫັນຄວາມຈິງໃຈແລະຄວາມຕັດສິນໃຈຂອງແຜ່ນດິນໃຫຍ່ທີ່ທຳຄວາມພະຍາຍາມທຸກຢ່າງເພື່ອໂຮມສອງຝັ່ງເຂົ້າເປັນເອກະພາບ, ຈະມີຜົນສະທ້ອນອັນເລິກເຊິ່ງຍາວໄກຕໍ່ການປົກປັກຮັກສາສັນຕິພາບແລະສະຖຽນລະພາບຂອງຊ່ອງແຄບໄຕ້ຫວັນ ຊຸກຍູ້ການແລກປ່ຽນແລະການຮ່ວມມືລະຫວ່າງສອງຝັ່ງຊ່ອງແຄບໄຕ້ຫວັນ.
ໜັງສືພິມຊາວໜຸ່ມເອີລົບເຊິ່ງແມ່ນໜັງສືພິມພາສາຈີນລາຍສັບປະດາຂອງລູມານີສະບັບວັນທີ 22 ເມສາໄດ້ພິມບົດຄວາມໂດຍຂຽນວ່າ, ມາດຕະການ 15 ລາຍເພື່ອຊຸກຍູ້ການແລກປ່ຽນແລະການຮ່ວມມືລະຫວ່າງສອງຝັ່ງທີ່ຝ່າຍແຜ່ນດິນໃຫຍ່ປະກາດອອກມານັ້ນລະອຽດແລະຕິດແທດຕົວຈິງທີ່ສຸດ.
|
