|
ຕາມຂ່າວສານຊິນຮວາ:, ເວທີປາໄສລັດຖະມົນຕີຂໍ້ມູນຂ່າວສານແລະໂທລະຄົມຂອງສັບປະດາໂທລະຄົມຈີນອາຊຽນຄັ້ງທີ 2 ແລະການເຄື່ອນໄຫວສັບປະດາໂທລະຄົມຈີນອາຊຽນທີ່ຈັດຂຶ້ນຢູ່ເມືອງປິນັງມາເລເຊຍໄດ້ສິ້ນສຸດລົງໃນວັນທີ 21 ເມສາ. ລັດຖະມົນຕີຂໍ້ມູນຂ່າວສານແລະໂທລະຄົມຂອງຈີນແລະອາຊຽນໄດ້ອອກຖະແຫຼງການຮ່ວມ ໂດຍກ່າວລື້ມວ່າ, ຈີນແລະອາຊຽນຈະສືບຕໍ່ເພີ່ມທະວີການພົວພັນຄູ່ຂາຍຸດທະສາດໃນຂົງເຂດອຸດສາຫະກຳຂໍ້ມູນຂ່າວສານ, ປະກອບສ່ວນເຂົ້າໃນການພັດທະນາແລະຄວາມຈະເລີນຮຸ່ງເຮືອງຂອງພາກພື້ນແຫ່ງນີ້.
ຖະແຫຼງການຊີ້ອອກວ່າ, ປີນີ້, ຈີນແລະອາຊຽນຈະຄົ້ນຄວ້າແລະວາງ "ຂອບປະສານງານການຮັບມືສຸກເສີນດ້ານຄວາມປອດໄພຂອງອິນເທີເນັດແລະຂໍ້ມູນຂ່າວສານຈີນອາຊຽນ", ເພື່ອຊຸກຍູ້ການຮ່ວມມືໃນຂົງເຂດອຸດສາຫະກຳຂໍ້ມູນຂ່າວສານລະຫວ່າງຈີນກັບອາຊຽນຕື່ມອີກ. ຈີນແລະອາຊຽນຍັງເຫັນດີເລັ່ງລັດກໍ່ສ້າງທາງດ່ວນຂໍ້ມູນຂ່າວສານຂອງມະຫາພາກພື້ນແມ່ນ້ຳຂອງ.
ຖະແຫຼງການຍັງໄດ້ຢືນຢັນບົດບາດຂອງວິສາຫະກິດເອກະຊົນຂອງຈີນແລະອາຊຽນທີ່ໄດ້ເສີມຂະຫຍາຍໃນການຮ່ວມມືໃນຂົງເຂດອຸດສາຫະກຳຂໍ້ມູນຂ່າວສານ.
|
