|
ຕາມຂ່າວCRI: ມື້ນີ້, ວັນທີ 22 ເມສາ ແມ່ນ "ວັນໜ່ວຍໂລກຂອງໂລກ" ເທື່ອທີ 37, ໃນການເຄື່ອນໄຫວລະລຶກທີ່ຈັດຂຶ້ນຢູ່ປັກກິ່ງ, ທ່ານລູ້ຊິ່ນເຊີ້ ຮອງລັດຖະມົນຕີກະຊວງທີ່ດິນແລະຊັບພະຍາກອນທຳມະຊາດຈີນເວົ້າວ່າ, ໃນສະເພາະໜ້າແລະໃນໄລຍະຍາວນານຂ້າງໜ້າ, ແມ່ນໄລຍະທີ່ການສະໜອງກັບຄວາມຕ້ອງການດ້ານຊັບພະຍາກອນຈີນມີຄວາມຂັດແຍ່ງກັນພົ້ນເດັ່ນ. ດ້ວຍເຫດນີ້, ລັດຖະບານຈີນໄດ້ສະເໜີໃຫ້ຖືການປະຢັດຊັບພະຍາກອນເປັນນະໂຍບາຍແຫ່ງຊາດພື້ນຖານ, ພັດທະນາເສດຖະກິດໝູນວຽນ, ແລະອະນຸລັກສິ່ງແວດລ້ອມຊີວະພາບ. ທ່ານຊີ້ອອກວ່າ, ພົນລະເມືອງໝົດທຸກຄົນລ້ວນແຕ່ຄວນຫວງແຫນຊັບພະຍາກອນ, ພະຍາຍາມພັດທະນາເສດຖະກິດແລະສັງຄົມແບບຍືນຍົງ, ເຮັດໃຫ້ມວນມະນຸດກັບທຳມະຊາດຢູ່ຮ່ວມກັນຢ່າງກົມກຽວກັນ.
ຕາມການແນະນຳ, ຈີນໄດ້ກຳນົດຫົວຂໍ້ຂອງ "ວັນໜ່ວຍໂລກຂອງໂລກ" ປີນີ້ແມ່ນ "ປະຕິບັດຕໍ່ໜ່ວຍໂລກໃຫ້ດີ——ຫວງແຫນຊັບພະຍາກອນ, ພັດທະນາແບບຍືນຍົງ". ໃນໂອກາດວັນໜ່ວຍໂລກ, ແຫ່ງຕ່າງໆຂອງຈີນໄດ້ຈັດການເຄື່ອນໄຫວລະລຶກດ້ວຍຮູບການຕ່າງໆ, ຄື ການວາງສະແດງ, ການສະແດງເປັນຕົ້ນ.
|
