ຕາມຂ່າວCRI: ວັນທີ 22 ເມສາ ໃນພິທີໄຂກອງປະຊຸມປະຈຳປີ 2006 ຂອງເວທີປາໄສອາຊີປໍອາວ, ທ່ານເຈິ່ງຊິ້ງຫົງ ຮອງປະທານປະເທດຈີນກ່າວວ່າ,ຈີນປະຕິບັດແຜນກຳນົດພັດທະນາເສດຖະກິດແລະສັງຄົມໄລຍະ 5 ປີຂ້າງໜ້າຈະສະໜອງໂອກາດໃໝ່ຫຼາຍກວ່າເກົ່າແຫ່ງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດໃຫ້ແກ່ໂລກ ໂດຍສະເພາະແມ່ນພາກພື້ນອາຊີ.
ທ່ານເຈິ່ງຊິ້ງຫົງແມ່ນໃຫ້ທັດສະນະດັ່ງກ່າວໃນເວລາຕອບຄຳຖາມຂອງຜູ່ແທນຮ່ວມໂດຍບໍ່ໄດ້ກະກຽມພາຍຫຼັງກ່າວປາຖະກະຖາທີ່ມີຫົວຂໍ້ສະເພາະໃນພິທີເປີດເວທີປາໄສ.ທ່ານເຈິ່ງຊິ້ງຫົງກ່າວວ່າ, ຈີນຈະເດີນໄປຕາມເສັ້ນທາງພັດທະນາໂດຍສັນຕິຢ່າງໝັ້ນໜຽວບໍ່ປ່ຽນແປງ.ຫຼັງຈາກພັດທະນາເປັນເວລາ 5 ປີແລ້ວ, ຄື ຮອດປີ 2010,GDP ທີ່ສະເລ່ຍຕາມຫົວຄົນຂອງຈີນຈະເພີ່ມຂຶ້ນຫຼາຍກວ່າປີ 2000 ຄົບເທົ່າ, ຍອດປະລິມານເສດຖະກິດຈະລື່ນກາຍ 3000ຕື້ໂດລາສະຫະລັດ, ພ້ອມກັນນັ້ນ ຈະຫຼຸດປະລິມານສິ້ນເປືອງພະລັງງານຕໍ່ຫົວໜ່ວຍໃຫ້ໜ້ອຍລົງ20%,ການລະບາຍສິ່ງເຊື່ອມພິດຈະຫຼຸດລົງ 10%.
ທ່ານເຈິ່ງຊິ້ງຫົງຍັງກ່າວວ່າ, ແຕ່ເວທີປາໄສອາຊີປໍອາວສ້າງຕັ້ງຂຶ້ນເປັນເວລາ 5 ປີມານີ້, ພາຍໃຕ້ຄວາມພະຍາຍາມພ້ອມກັນຂອງບັນດາຝ່າຍ, ເວທີປາໄສໄດ້ກາຍເປັນແທ່ນສຳຄັນແຫ່ງການແລກປ່ຽນແລະການຮ່ວມມືຂອງອາຊີ,ແລະກາຍເປັນເວທີປາໄສສຳຄັນທີ່ຢູ່ຮ່ວມກັນຢ່າງກົມກຽວກັນແລະຢູ່ຮ່ວມກັນກັບບັນດາປະເທດໃນໂລກໂດຍສັນຕິ.
|