|
ຫວ່າງກ່ອນນີ້ບໍ່ດົນ,ນາງມາລີ ໄຟດາ ມິດລາຍການຂອງວິທະຍຸພວກເຮົາ ທີ່ຢູ່ແຂວງຫຼວງພະບາງໄດ້ຝາກຈົດໝາຍມາຍັງພວກເຮົາໂດຍຂຽນວ່າ:ນ້ອງຢາກຮູ້ກ່ຽວກັບກົດໝາຍຈີນວ່າດ້ວຍການແຕ່ງງານລະຫວ່າງພົນລະເມືອງຈີນກັບຄົນຕ່າງປະເທດມີຄືແນວໃດ,ຕ້ອງປະກອບເອກະສານຫຍັງແດ່？ກ່ຽວກັບບັນຫາດັ່ງກ່າວ,ເຖິງວ່າປັດຈຸບັນ ໃນກົດໝາຍວ່າດ້ວຍການສົມລົດຂອງຈີນຍັງບໍ່ທັນມີການກຳນົດຢ່າງຄັກແນ່ກໍຕາມ,ແຕ່ໃນຊີວິດການເປັນຢູ່ຕົວຈິງ,ຖ້າພົບກັບເລື່ອງແຕ່ງງານລະຫວ່າງພົນລະເມືອງຈີນກັບຄົນຕ່າງປະເທດ, ທຳມະດາແລ້ວກໍຕ້ອງປະຕິບັດຕາມຂໍ້ກຳນົດທີ່ກ່ຽວຂ້ອງ.ໃນລາຍການມື້ນີ້,ພວກເຮົາກໍ່ຂໍແນະນຳການກຳນົດໃນດ້ານນີ້:
ກ່ອນອື່ນ,ພວກເຮົາຄວນຊອກຮູ້ວ່າພົນລະເມືອງຈີນແຕ່ງດອງກັບຄົນຕ່າງປະເທດຄວນໄປຂຶ້ນທະບຽນຢູ່ໃສ.
ພົນລະເມືອງຈີນແຕ່ງດອງກັບຄົນຕ່າງປະເທດຢູ່ໃນແດນຈີນຄວນໄປຮ້ອງຂໍຂຶ້ນທະບຽນຢູ່ອົງການຂຶ້ນທະບຽນສົມລົດທຳມະດາແລ້ວແມ່ນອົງການການປົກຄອງແລະປະຊາສົງເຄາະທີ່ກຳນົດໂດຍອົງການປົກຄອງປະຊາຊົນຂອງແຂວງ,ເຂດປົກຄອງຕົນເອງແລະກຳແພງນະຄອນທີ່ສຳມະໂນຄົວຂອງຝ່າຍພົນລະເມືອງຈີນຢູ່ນັ້ນ.ຖ້າສອງຝ່າຍທີ່ແຕ່ງງານນັ້ນເຫັນດີນຳກັນຮ້ອງຂໍຂຶ້ນທະບຽນແຕ່ງງານຢູ່ອົງການຂຶ້ນທະບຽນສົມລົດຂອງຝ່າຍພົນລະເມືອງຕ່າງປະເທດກໍ່ໄດ້ຄືກັນ.
ຖ້າພົນລະເມືອງຈີນຮ້ອງຂໍຂຶ້ນທະບຽນແຕ່ງງານກັບຄົນຕ່າງປະເທດ,ສອງຝ່າຍຕ້ອງມີໜັງສືຢັ້ງຢືນຫຍັງແດ່？
ສຳລັບພົນລະເມືອງຈີນແລ້ວ,ຕ້ອງມີເອກະສານດັ່ງລຸ່ມນີ້ຄື:
1.ໜັງສືຢັ້ງຢືນສຳມະໂນຄົວຂອງຜູ່ດ່ຽວ,ລາມທັງໜັງສືຜ່ານແດນແລະບັດປະຈຳຕົວ.
2.ໜັງສືຢັ້ງຢືນສະພາບການສົມລົດຂອງຜູ່ກ່ຽວທີ່ອົງການປົກຄອງປະຊາຊົນ ຂັ້ນເຂດແລະເມືອງຂຶ້ນໄປຂອງບ່ອນທີ່ຢູ່ຜູ່ກ່ຽວແລະໜ່ວຍງານອອກໃຫ້ ພ້ອມດ້ວຍຈົດໝາຍທີ່ແນະນຳວ່າຈະແຕ່ງງານກັບໃຜ.
3.ຮູບຖ່າຍວ່າຂອງຜູ່ກ່ຽວກັບຄູ່ໝັ້ນ.
ສຳລັບພົນລະເມືອງຕ່າງປະເທດ,ຕ້ອງມີໜັງສືຢັ້ງຢືນດັ່ງລຸ່ມນີ້ຄື:
1.ໜັງສືຢັ້ງຢືນສັນຊາດ,ລວມທັງໜັງສືຜ່ານແດນ ບັດປະຈຳຕົວ,ຫຼືໜັງສືຢັ້ງຢືນທີ່ສາມາດຢັ້ງຢືນຖານະຂອງຜູ່ກ່ຽວ.
2.ຊາວຕ່າງປະເທດທີ່ເຮັດວຽກຢູ່ຈີນຕ້ອງມີບັດປະຈຳຕົວຊາວຕ່າງປະເທດທີ່ອົງການປ້ອງກັນຄວາມສະຫງົບຂອງຈີນອອກໃຫ້,ຫຼືໜັງສືຢັ້ງຢືນການຢູ່ຈີນຊົ່ວຄາວ,ຫຼືໜັງສືຢັ້ງຢືນທີ່ອົງການພົວພັນກັບຕ່າງປະເທດອອກໃຫ້.
3.ໜັງສືຢັ້ງຢືນສະພາບການສົມລົດທີ່ສະຖານທູດຫຼືສະຖານກົງສູນຂອງຕ່າງປະເທດປະຈຳຈີນອອກໃຫ້,ຫຼືໜັງສືຢັ້ງຢືນທີ່ສຳນັກງານທະນາຍຄວາມປະເທດທີ່ກ່ຽວຂ້ອງອອກໃຫ້ເຊິ່ງຕ້ອງໄດ້ຮັບການຮັບຮອງໂດຍກະຊວງການຕ່າງປະເທດຫຼືອົງການທີ່ກະຊວງການຕ່າງປະເທດນັ້ນມອບສິດໃຫ້ແລ້ວ,ໃຫ້ສະຖານທູດຫຼືສະຖານກົງສູນຈີນປະຈຳປະເທດທີ່ກ່ຽວຂ້ອງຮັບຮອງ.
ໃນການແຕ່ງດອງກັບຊາວຕ່າງປະເທດ,ຖ້າພົນລະເມືອງຈີນກັບຊາວຕ່າງດ້າວຮ້ອງຂໍຂຶ້ນທະບຽນແຕ່ງງານຢູ່ຈີນ,ຊາວຕ່າງດ້າວຕ້ອງມີໜັງສືຢັ້ງຢືນດັ່ງລຸ່ມນີ້ຄື:
1.ໜັງສືຜ່ານແດນຫຼືໜັງສືຢັ້ງຢືນທີ່ສາມາດຢັ້ງຢືນຖານະແລະສັນຊາດຂອງຜູ່ກ່ຽວ,ຖ້າແມ່ນຜູ້ບໍ່ມີສັນຊາດກໍບໍ່ຕ້ອງ.
2.ບັດປະຈຳຕົວຂອງຊາວຕ່າງປະເທດທີ່ອົງການປ້ອງກັນຄວາມສະຫງົບເຊັນໃຫ້ເບີກ.
ສິ່ງທີ່ຕ້ອງການຊີ້ອອກນັ້ນຄື,ສອງຝ່າຍທີ່ຮ້ອງຂໍແຕ່ງງານ,ຍັງຕ້ອງມີໜັງສືຢັ້ງຢືນສຸຂະພາບກ່ອນແຕ່ງງານທີ່ອອກໂດຍໂຮງໝໍທີ່ອົງການຂຶ້ນທະບຽນສົມລົດກຳນົດນັ້ນ.
ຕາມຂໍ້ກຳນົດທີ່ກ່ຽວຂ້ອງກຳນົດວ່າ,ບໍ່ແມ່ນພົນລະເມືອງຈີນຜູ້ໃດກໍຮ້ອງຂໍແຕ່ງງານກັບຊາວຕ່າງປະເທດໄດ້,ຄັນຊັ້ນພົນລະເມືອງປະເພດໃດແດ່ທີ່ບໍ່ອະນຸຍາດໃຫ້ແຕ່ງງານກັບຊາວຕ່າງປະເທດ?ພົນລະເມືອງເຫຼົ່ານີ້ກໍຄື: ທະຫານປະຈຳການ,ຜູ່ປະຕິບັດງານການຕ່າງປະເທດ,ຜູ້ປ້ອງກັນຄວາມສະຫງົບ,ບຸກຄົນເຮັດວຽກປິດລັບທີ່ສຳຄັນແລະບຸກຄົນທີ່ກຳຄວາມລັບສຳຄັນອື່ນໆພ້ອມທັງຜູ່ທີ່ກຳລັງຖືກດັດສ້າງດ້ວຍການອອກແຮງງານແລະບຸກຄົນຜູ້ຕິດຄຸກຢູ່.
ພົນລະເມືອງຈີນແຕ່ງງານກັບຊາວຕ່າງປະເທດ,ຊາວຈີນຕ່າງດ້າວຫຼືພີ່ນ້ອງຮ່ວມຊາດໄຕ້ຫວັນ,ກົງຮົງແລະມາກາວຍັງຕ້ອງມີເງື່ອນໄຂດັ່ງລຸ່ມນີ້ຄື:
1.ພົນລະເມືອງຈີນແຕ່ງງານກັບຊາວຕ່າງປະເທດ,ຊາວຈີນຕ່າງດ້າວຫຼືພີ່ນ້ອງຮ່ວມຊາດໄຕ້ຫວັນ,ຮົງກົງແລະມາກາວຕ້ອງສອດຄ່ອງກັບຂໍ້ກຳນົດທີ່ລະບຸໄວ້ໃນກົດໝາຍວ່າດ້ວຍການສົມລົດແຫ່ງສາທາລະນະລັດປະຊາຊົນຈີນ.
2.ຝ່າຍູຊາຍອາຍຸເຕັມ25ປີ,ຝ່າຍູຍິງອາຍຸເຕັມ22ປີ.
3.ສອງຝ່າຍຕ້ອງບໍ່ແມ່ນຜູ້ເປັນພະຍາດຂີ້ທູດທີ່ຍັງປົວບໍ່ຫາຍຫືຼເປັນພະຍາດອື່ນທີ່ແພດສາດຖືວ່າບໍ່ຄວນແຕ່ງງານ.
4.ສອງຝ່າຍຕ້ອງໄປຂຶ້ນທະບຽນຢູ່ອົງການຂຶ້ນທະບຽນການສົມລົດໂດຍຕົນເອງ.
5.ຖ້າຝ່າຍໜຶ່ງເປັນຊາວຕ່າງປະເທດ,ໃຕ້ປະຖົມປັດໄຈທີ່ບໍ່ລະເມີດຫຼັກການຂອງກົດໝາຍສົມລົດຂອງຈີນ,ຈະພິຈາລະນາຕາມກົດໝາຍຂອງປະເທດຜູ່ກ່ຽວກໍ່ໄດ້.
ທ່ານຜູ້ຟັງທີ່ຮັກແພງທີ່ທ່ານໄດ້ຟັງມານັ້ນແມ່ນຂໍ້ກຳນົດກ່ຽວກັບການແຕ່ງດອງກັບຊາວຕ່າງປະເທດຂອງຈີນ.
ນັບແຕ່ຈີນດຳເນີນການປະຕິຮູບແລະເປີດປະຕູສູ່ພາຍນອກມານີ້ມີຊາວຈີນແຕ່ງດອງກັບຊາວຕ່າງປະເທດນັບມື້ນັບຫຼາຍແລະພວມປ່ຽນແປງຢູ່ເລື້ອຍໆ,ຢູ່ເມືອງຊຽງໄຮ້ຂອງຈີນ,ເມື່ອ20ປີກ່ອນ,ຜູ້ແຕ່ງດອງກັບຊາວຕ່າງປະເທດສ່ວນຫຼາຍແມ່ນ"ຜູ້ສາວຊຽງໄຮ້ເອົາຜົວຕ່າງປະເທດ",ແຕ່ໃນຫຼາຍປີມານີ້,ລະເລ່ຍແລ້ວ,ມີຜູ້ຊາຍ300ກວ່າຄົນໄດ້ເອົາເມຍເຈົ້າສາວຕ່າງປະເທດ.ຢູ່ເມືອງກວາງໂຈ່ວ,ເຈົ້າບ່າວເປັນຄົນຈີນກໍມີເກືອບ30%ແລ້ວ.ແຕ່ປີ1999ຮອດປີ2001,ຜູ້ຊາຍຈີນທີ່ເອົາເມຍຕ່າງປະເທດໄດ້ຈາກເພິ່ມຂຶ້ນ8,5%ຮອດ11,3%ຂອງຍອດຈຳນວນການສົມລົດທີ່ພົວພັນກັບຊາວຕ່າງດ້າວໃນທົ່ວປະເດທແລ້ວ.
ການປ່ຽນແປງອີກອັນໜຶ່ງແມ່ນສະພາບ"ຜົວເຖົ້າເມຍສາວ"ໄດ້ນັບມື້ນັບໜ້ອຍລົງ.ຕົວຢ່າງຄືຢູ່ເມືອງຊຽງໄຮ້,ໃນ6ເດືອນຕົ້ນປີ2002,ໃນການສົມລົດກັບຊາວຕ່າງປະເທດ,ສະເລ່ຍແລ້ວ,ອາຍຸຂອງຜົວເມຍຫຼຸດກັນ5ປີ,ມີຄົນນັບມື້ນັບຫຼາຍເມື່ອແຕ່ງງານແລ້ວສອງຜົວເມຍກໍຍັງອາໄສຢູ່ຈີນ,ໃນຄູ່ສົມລົດເຫຼົ່ານີ້,ຝ່າຍຍິງພໍໃຈນຳຄຸນສົມບັດ,ຄວາມຮູ້ແລະນິໄສໃຈຄໍຂອງຝ່າຍຊາຍສັນຊາດຕ່າງປະເທດນັ້ນໄດ້ສູງເຖິງ80%ແລ້ວ.
ບາງຄົນຊີ້ອອກວ່າ,ໃນຫຼາຍປີມານີ້,ຈີນໄດ້ພັດທະນາຂຶ້ນຢ່າງວ່ອງໄວ,ຄວາມທຸກຄວາມຮັ່ງຜິດໂຕນກັບຕ່າງປະເທດໜ້ອຍລົງ,ອັນໄດ້ເຮັດໃຫ້ທັດສະນະຄະຕິການສົມລົດຂອງຊາວຈີນເກີດມີການປ່ຽນແປງ,ເງື່ອນໄຂເສດຖະກິດ,ແລະຖານະສັນຊາດຕ່າງປະເທດນັ້ນບໍ່ຈູງໃຈແລ້ວ,ຢູ່ຈີນການສົມລົດທີ່ທັງມີຄວາມຮັກທັງມີການຮັບປະກັນທາງຊີວິດການເປັນຢູ່ ລວມທັງການສົມທີ່ພົວພັນກັບຊາວຕ່າງປະເທດນັ້ນ,ໄດ້ນັບມື້ນັບຫຼາຍຂຶ້ນ.
ຜູ້ຊ່ຽວຊານທີ່ກ່ຽວຂ້ອງຊີ້ອອກວ່າ,ໃນການສົມລົດທີ່ພົວພັນກັບຊາວຕ່າງປະເທດຂອງຈີນນັ້ນ,ຖ້າວ່າຄູ່ຜົວເມຍແຕ່ຮູ້ຈັກກັນຮອດສ້າງຄອບຄົວ,ແມ່ນຍ້ອນສອງຝ່າຍຕ່າງຖືກໃຈກັນ, ຊົມເຊີຍເຊິ່ງກັນແລະກັນ,ແລະຕ່າງເຊື່ອມໂຍງເຂົ້າກັນແລ້ວ,ແມ່ນຈະມີຜົນດີຫຼາຍທີ່ສຸດຕໍ່ການພັດທະນາຂອງວັດທະນະທຳຫຼາຍເຄົ້າຂອງຈີນ.
ກ່ຽວກັບບັນຫາການສົມລົດທີ່ພົວພັນກັບຊາວຕ່າງປະເທດຂອງຈີນກໍ່ຂໍແນະນຳພຽງທໍ່ນີ້ກ່ອນ,ຂອບໃຈນາງມາລີ ໄຟດາແລະເພື່ອນມິດຜູ້ຟັງທັງຫຼາຍຮັບຟັງລາຍການຂອງພວກເຮົາ,ຍິນດີຕ້ອນຮັບທ່ານສືບຕໍ່ຝາກຈົດໝາຍມາຍັງພວກເຮົາ,ສຸດທ້າຍນີ້,ພວກເຮົາຈົ່ງພ້ອມກັນມາຟັງເພງ"ຂໍໃຫ້ສາຍຕາເຮົາພົບກັນໃນດວງຈັນທາ,ຂັບຮ້ອງໂດຍນາງວາງເຟ່.
|
