|
ຂ່າວສຸຂະພາບປະຈຳອາທິດ: ການຮິຂອງກິນຫຼືເລືອກກິນແຕ່ອາຫານທີ່ມັກຈະເຮັດໃຫ້ເດັກນ້ອຍສາຍຕາສັ້ນແລະເປັນພະຍາດຜິວໜັງ
ຕາມຜົນການຄົ້ນຄວ້າທີ່ສະຖາບັນຄົ້ນຄວ້າອະນະຊົນເຍົາວະຊົນຂອງສູນຄົ້ນຄວ້າຊາວໜຸ່ມເຍົາວະຊົນຈີນປະກາດໃນຫວ່າງມໍ່ໆນີ້ບອກໃຫ້ຮູ້ວ່າ, ເດັກນ້ອຍທີ່ຮິຂອງກິນຫຼືເລືອກກິນແຕ່ອາຫານທີ່ມັກຈະພາໃຫ້ເດັກນ້ອຍສາຍຕາສັ້ນແລະເປັນພະຍາດຜິວໜັງ.
ທ່ານນາງຈ້າວເຊຍທີ່ຮັບຜິດຊອບການຄົ້ນຄວ້າລາຍນີ້ຊີ້ອອກວ່າ, ໃນຊີວິດຕົວຈິງ, ຍ້ອນຖືກຜົນກະທົບຈາກປັດໄຈຕ່າງໆເຊັ່ນລະດູການ, ວິທີປຸງແຕ່ງ, ຄວາມຊິນເຄີຍດ້ານການກິນດື່ມໃນທ້ອງຖິ່ນຕ່າງໆ, ຄົນທັງຫຼາຍຈະເຮັດຫ້ອາຫານການກິນມີທາດບຳລຸງດຸນດ່ຽງກັນແມ່ນເລື່ອງທີ່ຍາກຫຼາຍ, ຖ້າຮິຂອງກິນແລະເລືອກກິນອາຫານແຮ່ງຈະພາໃຫ້ທາດບຳລຸງບາງປະເພດຫຼາຍໂພດບາງປະເພດພັດບໍ່ພໍ. ການຄົ້ນຄວ້າສະແດງໃຫ້ເຫັນວ່າ, ການຂາດຈຸນລະທາດຕ່າງໆເຊັ່ນ: ສັງກະສີ, ໂກຼມ, ທອງ, ເຊເລນິອົມເປັນຕົ້ນຍ້ອນຮິຂອງກິນແມ່ນສາຍເຫດໜຶ່ງທີ່ພາໃຫ້ເດັກນ້ອຍສາຍຕາສັ້ນຫຼືເປັນພະຍາດຕາແນວອື່ນ.
ນອກນີ້, ຮິຂອງກິນຈະພາໃຫ້ຂາດວິຕາມິນ, ທັງຍັງອາດຈະເຮັດໃຫ້ເດັກນ້ອຍເປັນພະຍາດຜິວໜັງ. ຕົວຢ່າງຄື, ຂາດວິຕາມິນເອ, ອາດຈະເຮັດໃຫ້ຕ່ອມໄຂມັນຕາມຜິວໜັງແລະຕ່ອມເຫື່ອຫົດຫູ່, ເຮັດໃຫ້ຜິວໜັງຫຍາບຊາ, ເປັນຕຸ່ມຄືໜັງໄກ່, ຜົມແຫ້ງ, ຜິວໜັງບໍ່ມີສີມີໄວ, ເລັບມືກໍແຕກງ່າຍຫັກງ່າຍແລະປ່ຽນຮູບ; ຂາດວິຕາມິນເບ6, ຍັງອາດຈະພາໃຫ້ຜິວໜັງແດງ, ບວມມີໄຂມັນຊຶມອອກເປັນຕົ້ນ; ຂາດວິຕາມິນເບ2, ພາໃຫ້ປາກເປື່ອຍ; ສ່ວນເດັກນ້ອຍທີ່ຂາດວິຕາມິນເຊຍັງຈະເປັນພະຍາດຜິວຫຍາບ.
ເພື່ອດັດນິດໄສເດັກທີ່ຮິຂອງກິນ, ທ່ານນາງຈ້າວເຊຍສະເໜີວ່າ, ກ່ອນອື່ນພໍ່ແມ່ຕ້ອງບໍ່ຮິຂອງກິນ; ຕ້ອງເອົາໃຈໃສ່ວິທີປຸງແຕ່ງອາຫານ, ແຕ່ລະຄາບຕ້ອງໃຫ້ມີຜັກມີຊີ້ນຢ່າງເໝາະສົມ; ຢ່າໃຫ້ເດັກນ້ອຍກິນເຂົ້າໜົມູກ່ອນກິນເຂົ້າ; ຢ່າດ່າວ່າຫຼືຕີເດັກນ້ອຍໃນຍາມກິນເຂົ້າ; ຖ້າເດັກນ້ອຍຮິຂອງກິນຫຼືເລືອກກິນແຕ່ຂອງມັກ, ພໍ່ແມ່ຕ້ອງບອກສອນດ້ວຍຄວາມພຽນໃຈ, ຕ້ອງມີຄວາມອົດທົນຈະໃຈຮ້ອນບໍ່ໄດ້.
|
