|
|
 |
| (GMT+08:00)
2006-04-25 17:17:10
|
 |
|
ຮອງນາຍົກລັດຖະມົນຕີ ທັງເປັນລັດຖະມົນຕີການຕ່າງປະເທດຂອງລາວແລະເອກອັກຄະລັດຖະທູດຈີນປະຈຳລາວຕີລາຄາສູງຕໍ່ການພົວພັນລະຫວ່າງຈີນກັບລາວໃນ 45 ປີມານີ້
cri
Author: da
ຕາມຂ່າວCRI: ມື້ນີ້,ວັນທີ 25 ເມສາແມ່ນວັນລະລຶກຈີນລາວສ້າງສາຍສຳພັນການທູດຄົບຮອບ 45 ປີ.ຫວ່າງມໍ່ໆນີ້ ໃນເວລາໃຫ້ສຳພາດຕໍ່ນັກຂ່າວCRIພວກເຮົາ,ທ່ານສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ທັງເປັນລັດຖະມົນຕີການຕ່າງປະເທດຂອງລາວ,ແລະທ່ານລິວຢົງຊິງ ເອກອັກຄະລັດຖະທູດຈີນປະຈຳລາວເວົ້າວ່າ,ການພົວພັນລະຫວ່າງຈີນກັບລາວໃນປະຈຸບັນພວມຢູ່ໃນໄລຍະທີ່ດີທີ່ສຸດໃນປະຫວັດສາດ.
ທ່ານສົມສະຫວາດ ເລັ່ງສະຫວັດເວົ້າວ່າ,ໃນ 45 ປີມານີ້,ມິດຕະພາບອັນເປັນມູນເຊື້ອແລະການພົວພັນຮ່ວມມືດ້ວຍໄມຕີຈິດຖານບ້ານໃກ້ເຮືອນຄຽງທີ່ດີຕໍ່ກັນລະຫວ່າງຈີນກັບລາວ,ໄດ້ມີການຂະຫຍາຍຕົວຢ່າງຫຼວງຫຼາຍ.ໂດຍສະເພາະແມ່ນແຕ່ທ່ານຈ່ຽງເຈີມິນ ປະທານປະເທດຈີນກັບທ່ານຄຳໄຕ ສີພັນດອນ ປະທານປະເທດລາວໄດ້ຢ້ຽມຢາມກັນຢ່າງເປັນປະຫວັດການເມື່ອປີ 2000ມານີ້,ການພົວພັນລະຫວ່າງຈີນກັບລາວໄດ້ກ້າວຂຶ້ນສູ່ຂັ້ນສູງໃໝ່,ຄວາມໄວ້ເນື້ອເຊື່ອໃຈກັນທາງການເມືອງລະຫວ່າງສອງປະເທດໄດ້ເລິກເຊິ່ງກວ່າເກົ່າ,ການແລກປ່ຽນແລະການຮ່ວມມືລະຫວ່າງສອງຝ່າຍໃນຂົງເຂດການເມືອງ ເສດຖະກິດການຄ້າ ວັດທະນະທຳແລະການສຶກສາເປັນຕົ້ນໄດ້ມີການເພີ່ມທະວີຂຶ້ນຢ່າງບໍ່ຢຸດຢັ້ງ.
ທ່ານລິວຢົງຊິງເວົ້າວ່າ,ໃນຫຼາຍປີມານີ້,ຜູ້ນຳພັກ ລັດຂອງທັງສອງປະເທດຈີນລາວໄດ້ຮັກສາການຢ້ຽມຢາມກັນ,ເສດຖະກິດການຄ້າລະຫວ່າງຈີນລາວໄດ້ມີການຂະຫຍາຍຕົວຢ່າງວ່ອງໄວ,ການພົວພັນລະຫວ່າງຈີນລາວໃນປະຈຸບັນພວມຢູ່ໃນໄລຍະທີ່ດີທີ່ສຸດໃນປະຫວັດສາດ,ແລະກໍແມ່ນໄລຍະທີ່ມີອະນາຄົດພັດທະນາດີທີ່ສຸດ.
ຕາມໄດ້ຊາບ,ບໍລິມາດການຄ້າລະຫວ່າງຈີນກັບລາວໄດ້ລື່ນກາຍ 100 ລ້ານໂດລາສະຫະລັດ3ປີລຽນຕິດແລ້ວ,ເພີ່ມຂຶ້ນຫຼາຍກວ່າ 10 ປີກ່ອນເກືອບ3ເທົ່າ.ສັນຍາຮ່ວມມືທາງເສດຖະກິດການຄ້າຫຼາຍລາຍທີ່ຜູ້ນຳສອງປະເທດເຊັນກັນໃນຫວ່າງມໍ່ໆນີ້ ສ່ວນຫຼາຍໄດ້ຫຼືພວມຜັນຂະຫຍາຍປະຕິບັດ,ການກໍ່ສ້າງທາງຫຼວງຄຸນມິງບາງກອກຕອນ1ສ່ວນ3ຢູ່ລາວທີ່ຝ່າຍຈີນຫາບແບກນັ້ນຈະສ້າງສຳເລັດໃນເດືອນມິຖຸນາປີນີ້ຕາມເວລາກຳນົດ.ໂຄງການງວດໜຶ່ງທີ່ຝ່າຍຈີນຊ່ອຍສ້າງເຊັ່ນ:ຫໍວັດທະນະທຳແຫ່ງຊາດລາວ ໂຮງໝໍຫຼວງພະບາງ ສວນຫຼວງປະຕູໄຊແລະໂຮງງານຊີມັງວັງວຽງເປັນຕົ້ນໄດ້ເສີມຂະຫຍາຍປະສິດທິຜົນທາງເສດຖະກິດແລະສັງຄົມເປັນຢ່າງດີຢູ່ລາວ.
|
|
|
