|
ທຳມະດາແລ້ວ,ເຮືອນຖ້ຳສູງ3ແມັດປາຍ,ກວ້າງປະມານ3ແມັດ,ເລິກທີ່ສຸດຈະເຖິງ20ແມັດ.ປະຕູຖ້ຳອວ່າຍໜ້າໄປສູ່ທິດໃຕ້,ຈື່ງສາມາດຮັບເອົາແສງແດດຢ່າງສະດວກ.ເຮືອນຖ້ຳທີ່ງ່າຍກວ່າໝູ່ແມ່ນຂຸດດິນໂດຍກົງແລ້ວຈໍ່ຕົວເປັນຖ້ຳ.ຖ້າໃຊ້ຫີນປັບປຸງໃຫ້ໝັ້ນຄົງກໍກາຍເປັນເຮືອນຖ້ຳຫິນ.ຖ້າປັບປຸງດ້ວຍດິນຈີ່ກໍ່ແມ່ນເຮືອນຖ້ຳດິນຈີ່ແລ້ວ.ຮູບນອກຂອງເຮືອນຖ້ຳດິນຈີ່ຂ້ອນຂ້າງງາມກວ່າ.
ເຮືອນຖ້ຳຂອງລຸງຈ່າງຈື້ຈຸ້ນລວມມີ8ຖ້ຳ,ສ້າງຂຶ້ນຢູ່ເທິງເປີ້ນພູໂດຍແບ່ງເປັນສາມຊັ້ນ.ຊັ້ນເທິງແມ່ນຖ້ຳດິນສອງຖ້ຳ,ສ້າງຂຶ້ນໂດຍພໍ່ຂອງລຸງຈ່າງຈື້ຈຸ້ນເມື່ອປີ1962,ຈົນຮອດປັດຈຸບັນຍັງຮັກສາຮູບເກົ່າແກ່.ຊັ້ນກາງມີສາມຖ້ຳ,ສ້າງຂຶ້ນໃນປີ1964,ເມື່ອບໍ່ເທົ່າໃດປີກ່ອນໄດ້ດັດສ້າງເປັນຖ້ຳດິນຈີ່,ປັດຈຸບັນ,ລຸງຈ່າງພ້ອມປ້າແລະຄອບຄົວຂອງລູກຊາຍຫຼ້າອາໄສຢູ່ຊັ້ນນີ້,ຊັ້ນລຸ່ມມີສາມຖ້ຳຫິນ,ມໍ່ກັບຕີນພູ,ແມ່ນສ້າງຂຶ້ນໃນ20ກວ່າປີກ່ອນ,ປັດຈຸບັນຄອບຄົວຂອງລູກຊາຍກົກຂອງລຸງຈ່າງອາໄສຢູ່ຫັ້ນ.ເດີນຕາມເສັ້ນທາງເທິງພູ,ພວກເຮົາໄດ້ຍ່າງເຂົ້າເຮືອນຖ້ຳດິນຈີ່ຂອງລຸງຈ່າງ,ເຮືອນຖ້ຳນີ້ກວ້າງ20ກວ່າແມັດຕາ,ແສງແດດໄດ້ສ່ອງເຂົ້າຈາກປ່ອງຢ້ຽມພະນັກໄມ້,ເຮັດໃຫ້ເຮືອນຖ້ຳແຈ້ງສະຫວ່າງຫຼາຍ.ຢູ່ທາງໃນເຮືອນຖ້ຳມີຕຽງໃຫຍ່ຕິດກັບແທ່ນເຕົາໄຟ,ແມ່ນບ່ອນດັງໄຟແຕ່ງກິນ.ສິ່ງທີ່ປະຈັກຕາຄົນເປັນພິເສດແມ່ນຢູ່ຝາສາມດ້ານອ້ອມຕຽງ,ໄດ້ຕິດຮູບຕັດເຈ້ຍແລະຮູບອື່ນໆທີ່ສວຍງາມຈຳນວນໜຶ່ງ.ທ່ານວາງເຄີ້ເວີນ ຜູ້ຄົ້ນຄວ້າຂອງຫໍສິລະປະມະຫາຊົນເມືອງອຽນອ່ານແຂວງສ້ານຊີ່ທີ່ຕິດຕາມນັກຂ່າວໄດ້ຊີ້ໃຫ້ເຫັນຮູບເຫຼົ່ານີ້ແລະເວົ້າວ່າ,ນີ້ທັງແມ່ນສິ່ງປະດັບ,ທັງສາມາດຫຼີກເວັ້ນບໍ່ໃຫ້ຜ້າຫົ່ມເທິງຕຽງຕິດກັບຝາເຮືອນໂດຍກົງ.ທ່ານເວົ້າວ່າ,
ເປັນເວລາດົນນານມານີ້,ພາກເໜືອແຂວງສ້ານຊີ່ໄດ້ມີສິລະປະເຮືອນຖ້ຳ,ເວົ້າສຳລັບແຕ່ລະຄົນແລ້ວ,ເຮືອນຖ້ຳກໍ່ແມ່ນໂລກນ້ອຍໆຂອງຕົນ.ແມ່ຍິງຂອງພາກເໜືອສ້ານຊີ່ລ້ວນແຕ່ມັກງາມ,ສະນັ້ນພວກເຂົາເຈົ້າຈຶ່ງຄິດຮອດທຸກວິທີປະດັບປະດາເຮືອນຂອງຕົນ,ຫວັງໃຫ້ງາມກວ່າແລະສະບາຍກວ່າ.
ຖ້ຳທີ່ເປັນເຮືອນແບບເກົ່າແກ່ແລະສິລະປະເຮືອນຖ້ຳທີ່ກຳເນີດເກີດຂຶ້ນໃນຊີວິດການເປັນຢູ່ຂອງປະຊາຊົນທ້ອງຖິ່ນເປັນເວລາດົນນານມານີ້,ກໍ່ໄດ້ດຶງດູດເອົາແຂກທ່ອງທ່ຽວຕ່າງຖິ່ນຈົນກະທັ້ງຄົນຕ່າງປະເທດໄປທ່ຽວຊົມແລະອາໄສນັບມື້ນັບຫຼາຍ.ປັດຈຸບັນ,ຄອບຄົວຂອງລຸງຈ່າງກໍໄດ້ຈັດວາງຫຼາຍຖ້ຳບໍລິການການທ່ອງທ່ຽວແລະຕ້ອນຮັບແຂກທ່ອງທ່ຽວດ້ວຍເຮືອນຖ້ຳແລະອາຫານທີ່ມີຈຸດພິເສດຂອງທ້ອງຖິ່ນ.ລຸງຈ່າງເວົ້າວ່າ,
ຜູ່ທ່ອງທ່ຽວມາກັນຫຼາຍ.ເມື່ອຄົນຕ່າງຖິ່ນມານັ່ງຢູ່ເທິງຕຽງໃນເຮືອນຖ້ຳຫີນພວກເຮົາ,ພວກເຂົາເຈົ້າເວົ້າວ່າ,ດີຫຼາຍ,ງາມອີຫຼີ.ຕ້ອນຮັບພວກເຂົາເຈົ້າ,ກໍໃຊ້ເຄື່ອງປ່າຂອງດົງໃນແຫ່ງນີ້.ພວກເຮົາຍັງສະແດງການຟ້ອນຢ່າງເກີພາກເໜືອສ້ານຊີ່.ຊາວຕ່າງປະເທດບາງຄົນມັກຮູບຕັດເຈ້ຍ,ລູກໄພ້ກົກກໍ່ເຄີຍສະແດງການຕັດເຈ້ຍໃຫ້ເປັນຮູບ.
ປັດຈຸບັນ,ຢູ່ເມືອງອຽນອ່ານທີ່ລຸງຈ່າງຈື້ຈຸ້ນອາໄສຢູ່ນັ້ນມີຫຼາຍຄອບຄົວໄດ້ຮັບຮູ້ຄຸນຄ່າຂອງເຮືອນຖ້ຳທີ່ອາໄສມາຫຼາຍເຊັ່ນຄົນ,ແລະນຳໃຊ້ເຮືອນຖ້ຳມາພັດທະນາການທ່ອງທ່ຽວ,ປົວແປງຊີວິດການເປັນຢູ່ຂອງຕົນ.ເມືອງອຽນອ່ານກໍ່ໄດ້ບຸກເບີກແຫຼ່ງທ່ອງທ່ຽວທີ່ຖືເຮືອນຖ້ຳເປັນຫົວຂໍ້,ສະແດງຄວາມມີສະເໜຂອງເຮືອນຖ້ຳຕໍ່ພາຍນອກ.ໂຮງແຮມຖ້ຳຫີນອຽນອ່ານຊຸມສິ່ງກໍ່ສ້າງເຮືອນຖ້ຳທີ່ໃຫຍ່ກວ່າໝູ່ໃນໂລກຕັ້ງຢູ່ພູຢາງເຈ່ຍລິງ,ປັດຈຸບັນໄດ້ກາຍເປັນຈຸດຮຸ່ງໃໝ່ຂອງການທ່ອງທ່ຽວເມືອງອຽນອ່ານ.ໂຮງແຮມນີ້ແມ່ນສ້າງຂຶ້ນເທິງພູ,ລວມມີ300ຖ້ຳຈັດເປັນ8ແຖວທີ່ສູງຕ່ຳຕ່າງກັນ.ຢູ່ເທິງຝາຖ້ຳໄດ້ແຂວນຮູບພາບທີ່ແຕ້ມໂດຍຊາວກະສິກອນທ້ອງຖິ່ນ.ຢູ່ປ່ອງຢ້ຽມພະນັກໄມ້ໄດ້ຕິດຮູບຕັດ ເຈ້ຍ,ຢູ່ເທິງແທ່ນປ່ອງຢ້ຽມໄດ້ວາງດອກໄມ້ສົດ.ຢູ່ໜ້າປະຕູເຮືອນຖ້ຳທຸກຊັ້ນມີໂມ້ຫີນ,ເຄື່ອງບົດຫີນແລະໂຕະຫີນຕັ່ງຫີນເປັນຕົ້ນ,ປ່ຽມລົ້ນໄປດ້ວຍບັນຍາກາດຂອງຄອບຄົວຊາວກະສິກອນ.ເພື່ອໃຫ້ສອດຄ່ອງກັບຄວາມຕ້ອງການທີ່ຕ່າງກັນຂອງແຂກທ່ອງທ່ຽວ,ຢູ່ບາງເຮືອນຖ້ຳໄດ້ວາງຕຽງ,ຍຸກປັດຈຸບັນ.ຢູ່ອີກບາງເຮືອນຖ້ຳພັດໄດ້ວາງຕຽງແບບດັ້ງເດີມ.ຢູ່ໃນເຮືອນຖ້ຳຍັງມີຫ້ອງນ້ຳອີກດ້ວຍ,ມີຂອງໃຊ້ປະຈຳວັນຄົບຖ້ວນ,ທັງສະອາດທັງເປັນລະບຽບຮຽບຮ້ອຍ.
ແຕ່ວ່າ,ໃນຂະນະທີ່ຄົນຕ່າງຖິ່ນຫຼວງຫຼາຍມາສຳຜັດຊີວິດໃນເຮືອນຖ້ຳນັ້ນ,ຊາວກະສິກອນບາງຄົນຂອງທ້ອງຖິ່ນໄດ້ຮຽນນຳໄທເມືອງຍ້າຍອອກຈາກເຮືອນຖ້ຳ,ປຸກເຮືອນຊັ້ນດຽວຫຼືສອງຊັ້ນທີ່ກວ້າງຂວາງ.ໃນເວລາເອົາຂ່າວຢູ່ເມືອງອຽນອ່ານ,ນັກຂ່າວໄດ້ເຫັນເຮືອນຢູ່ແບບໃໝ່ຫຼາຍຫຼັງຢູ່ຊົນນະບົດ,ສະຫຼັບຊັບຊ້ອນກັນກັບເຮືອນຖ້ຳແບບດັ້ງເດີມຢູ່ເທິງເປີ້ນພູຫຼັງເຮືອນແບບໃໝ່.
1 2
|
