|
|
 |
| (GMT+08:00)
2006-04-25 23:10:09
|
 |
|
ງານວາງສະແດງແຜ່ນແພຈີນໃນລະດູໃບໄມ້ປົ່ງ
cri
Author: da
|
ໃນຫຼາຍປີມານີ້ ຂະແໜງການແຜ່ນແພອາພອນຂອງຈີນໄດ້ພັດທະນາໄວຫຼາຍ,ຜະລິດຕະພັນຈຳນວນຫຼວງຫຼາຍໄດ້ຮັບຄວາມນິຍົມຊົມຊອບຈາກຜູ້ບໍລິໂພກຢູ່ຈີນແລະຕ່າງປະເທດ.ແຕ່ວ່າທ່ານອາດຈະບໍ່ຮູ້ວ່າ,ໃນລະດູໃບໄມ້ປົ່ງທຸກປີ,ຂະແໜງການແຜ່ນແພຈີນລ້ວນແຕ່ໄດ້ຈັດງານສະແດງແຜ່ນແພອາພອນຢູ່ປັກກິ່ງຢ່າງລຽນຕິດ,ເພື່ອໂຮມສູນວາງສະແດງຝ້າຍເສັ້ນ ແຜ່ນແບບແລະເຄື່ອງນຸ່ງ ເຊິ່ງເປັນຂອດຕ່າງໆໃນຕ່ອງໂສ້ອຸດສາຫະກຳແຜ່ນແພອາພອນ.ຖ້າທ່ານຢາກຊື້ແຜ່ນແພ,ງານວາງສະແດງເຫຼົ່ານີ້ຈະສະໜອງຂໍ້ມູນຂ່າວສານອັນພຽງພໍໃຫ້ທ່ານ,ຈະເລືອກຊື້ຜະລິດຕະພັນທີ່ພໍໃຈ.
ວັນທີ 26 ມີນາ,ສັບປະດາແຟຊັນສາກົນຈີນປີ 2006 ທີ່ຖືກເອີ້ນເປັນ"ລູກສອນບອກ"ການປ່ຽນແປງໃນຕະຫຼາດອາພອນຂອງຈີນໄດ້ຈັດຂຶ້ນຢູ່ປັກກິ່ງ,ເຊິ່ງເປັນການເປີດສາກງານວາງສະແດງແຜ່ນແພອາພອນໃນລະດູໃບໄມ້ປົ່ງ.ໃນໄລຍະສັບປະດາໜຶ່ງ,ບົນເວທີຮູບ T ນັກເດີນແບບໄດ້ສະແດງສິ່ງປະພັນແຟຊັນຫຼ້າສຸດຂອງພວກຊ່າງອອກແບບເຄື່ອງນຸ່ງຍີ່ຫໍ້ຊື່ດັງຂອງຈີນແລະຕ່າງປະເທດ.ໃນສິ່ງປະພັນເຫຼົ່ານີ້,ທ່ານຈະໄດ້ຮູ້ແງ່ຂະຫຍາຍຂອງອາພອນທີ່ນິຍົມກັນຢູ່ທົ່ວໂລກໃນປີນີ້ແລະປີໜ້າ.ສີເຄື່ອງນຸ່ງຜູ້ຍິງແມ່ນສີແດງ ສີໝາກກ້ຽງ ສີບົວ ສີຂາວແລະສີຄຳເປັນຕົ້ນຕໍ,ໃນຂະນະໃຫ້ເນັ້ນໜັກເຄື່ອງນຸ່ງອອນຊອນຕານັ້ນຈະຍິ່ງສ່ອງແສງລັກສະນະສຸພາບບໍລິສຸດຂອງຜູ້ຍິງ.ສີແຈ້ງສະຫວ່າງຂອງຜູ້ຊາຍຈະເປັນແຟຊັນ,ສີເຫຼືອງ ສີບົວແກ່ແລະສີໝາກກ້ຽງເປັນຕົ້ນຈະກາຍເປັນສີນິຍົມຂອງຜູ້ຊາຍໃນລະດູຮ້ອນປີນີ້,ຮູບເຄື່ອງນຸ່ງກໍຈະມີລັກສະນະນຸ່ງສະບາຍແລະລັກສະນະທົ່ວໄປ.
ເຄື່ອງນຸ່ງຜູ້ຊາຍຍິ່ຫໍ້"ຫົງຊ່ານຊູ້"ໄດ້ສະແດງ 100 ກວ່າຊຸດທີ່ມີເອກະລັກຕ່າງກັນໃນງານສັບປະດາແຟຊັນ.ທ່ານນາງຈ້າວ ຊ່າງອອກແບບເຄື່ອງນຸ່ງຂອງຍິ່ຫໍ້ນີ້ໄດ້ແນະນຳຈຸດພິເສດຂອງສິ່ງປະພັນຂອງຕົນວ່າ:
"ຂ້າພະເຈົ້າໄດ້ປະສົມປະສານປັດໄຈຕ່າງກັນໃຫ້ເຂົ້າກັນ,ເຊັ່ນແຜ່ນແພບາງກັບໜັງຫຍິບເຂົ້າກັນ,ຝ້າຍກັບປານ,ໄໝກັບຝ້າຍເປັນຕົ້ນ,ໃຫ້ປັດໄຈຕ່າງກັນຢູ່ນຳກັນເພື່ອໃຫ້ມີຜົນສະທ້ອນຕ່າງກັນ.ໃນຊຸດພັກຜ່ອນ ຂ້າພະເຈົ້າໄດ້ໃຊ້ວິທີດັດຫຍິບເຄື່ອງແບບຫຼາຍຢ່າງ,ສ່ວນເຄື່ອງແບບພັດໄດ້ໃຊ້ສີມືຕັດຫຍິບຊຸດພັກຜ່ອນຈຳນວນໜຶ່ງ.ຂ້າພະເຈົ້າຫວັງໃຫ້ຜູ້ຊາຍບໍ່ຕ້ອງນຸ່ງເຄື່ອງຕາຍຕົວ,ໃຫ້ມີການປ່ຽນແປງຫຼາຍ."
ຖ້າສັບປະດາແຟຊັນສາກົນແມ່ນແທ່ນສຳລັບໃຫ້ທ່ານຮູ້ທ່ວງທ່ານິຍົມຂອງວົງການແຟຊັນໃນອະນາຄົດ,ສ່ວນງານເອັກສ໌ໂປອາພອນແລະເຄື່ອງເອ້ສາກົນຈີນທີ່ຈັດຂຶ້ນໃນໄລຍະດຽວກັນກັບສັບປະດັນແຟຊັນນັ້ນ ຈະເຮັດໃຫ້ທ່ານໄປເລາະຢູ່ທະເລອາພອນ.ງານເອັກສ໌ໂປປີນີ້ໄດ້ເອົາຍິ່ຫໍ້ອາພອນແລະເຄື່ອງເອ້ພັນກວ່າຢ່າງຂອງ 18 ປະເທດແລະເຂດແຄວ້ນມາວາງສະແດງ,ຟົດຟື້ນຄຶກຄື້ນທີ່ສຸດ.ພໍ່ຄ້າຂອງຕ່າງປະເທດຜູ້ໜຶ່ງເວົ້າວ່າ,ຢູ່ແຫ່ງນີ້,ທ່ານຈະຮູ້ສຶກເຖິງຈຸດພິເສດຂອງອາພອນຈີນທີ່ມີຊະນິດຄົບຖ້ວນແລະລາຄາພໍດ້າມພໍດີຢ່າງແທ້ຈິງ.
ນອກຈາກອາພອນສຳເລັດຮູບແລ້ວ,ບັນດາງານວາງສະແດງຂອງຂະແໜງການແຜ່ນແພນອາພອນໃນລະດູໃບໄມ້ປົ່ງຍັງລວມທັງງານເອັກສ໌ໂປວິຊາສະເພາະຂະໜາດນ້ອຍທີ່ສະແດງຜະລິດຕະພັນຂັ້ນຕົ້ນເຊັ່ນແຜ່ນແພ.ໃນງານເອັກສ໌ໂປທີ່ຖືແຜ່ນແພເປັນຫົວຂໍ້ນັ້ນ,ໂຮງງານຜ້າກຳມະຍີ່ເມືອງຊ່ຽນຖາວແຂວງຫູປາຍ ພາກກາງຂອງຈີນໄດ້ສະແດງຜ້າກຳມະຍີ່ທີ່ມີເນື້ອຜ້າແລະສີຕ່າງກັນຈົນຫຼາຍຮ້ອຍຊະນິດ.ທ່ານຈັ່ງຊ່ຽນລ້ຽງ ຫົວໜ້າໂຮງງານດັ່ງກ່າວແນະນຳຕໍ່ນັກຂ່າວວ່າ:
"ປີໃດພວກຂ້າພະເຈົ້າກໍໄດ້ຜະລິດຜະລິດຕະພັນໃໝ່ຈຳນວນໜຶ່ງເພື່ອຕອບສະໜອງຄວາມຕ້ອງການຂອງຕະຫຼາດທີ່ຕ່າງກັນ.ເຊັ່ນ:ຕະຫຼາດຢູ່ພາກເໜືອ,ດິນຟ້າອາກາດແຫ້ງ,ຕ້ອງປ້ອງກັນບໍ່ໃຫ້ເກີດມີໄຟຟ້າສະຖິດ,ພວກຂ້າພະເຈົ້າເອົາໃຍນຳໄຟຟ້າປົນໃສ່;ດຽວນີ້ ພວກຂ້າພະເຈົ້າເອົາໃຈໃສ່ນຳການອະນຸລັກສິ່ງແວດລ້ອມ,ໄດ້ບຸກເບີກເຕັກນິກດັບແມ່ພະຍາດ.ດຽວນີ້ ຜະລິດຕະພັນຂອງພວກຂ້າພະເຈົ້າໄດ້ມີຊື່ລືນາມໃນສ່ວນໃດສ່ວນໜຶ່ງຢູ່ຕ່າງປະເທດແລ້ວ,ການສົ່ງອອກມີປະມານ 40%,ຕົ້ນຕໍແມ່ນສົ່ງໄປຂາຍຢູ່ເອີລົບແລະຍີ່ປຸ່ນ."
ເສັ້ນຊະນິດຕ່າງໆທີ່ປະກົດຕົວໃນງານວາງສະແດງລະດູໃບໄມ້ປົ່ງປີນີ້,ມີເສັ້ນປ່ານ,ເສັ້ນຝ້າຍ,ມີໃຍທາດໂປຼຕິນຂອງໝາກຖົ່ວເຫຼືອງ,ຍັງມີໃຍທາດໂປຼຕິນນົມງົວຊະນິດໃໝ່.ທ່ານເຈິ້ງອື ຮອງຜູ້ອຳນວຍການບໍລິສັດເຈີ້ງເຈ່ຍຊຽງໄຮ້ວິທະຍາສາດເຕັກນິກນົມງົວຈຳກັດເວົ້າວ່າ,ເສັ້ນໃຍທາດໂປຼຕິນນົມງົວທີ່ພວກເຂົາເຈົ້າຜະລິດນັ້ນ ລຽບມື່ນໝືອນຜີວໜັງຄົນເຮົາ. ທ່ານເວົ້າວ່າ:
"ນີ້ແມ່ນວັດຖຸດິບແຜ່ນແພຊະນິດໃໝ່,ມີພາບອະນາຄົດອັນກວ້າງຂວາງ.ແມ່ນກັ່ນເອົາຈາກທາດໂປຼຕິນຂອງນົມງົວ.ເມື່ອທາດໂປຼຕິນຂອງນົມງົວປ່ຽນເປັນໃຍແລ້ວ,ຈະມີລັກສະນະດູດອ່າວສູງ,ໄດ້ປົວແປງລັກສະນະຕິດຜີວໜັງຂອງໃຍທຳມະດາ,ຖ້າສຳຜັດກັບຜີວໜັງຈະມີທາດບຳລຸງຫຼາຍກວ່າ."
ບຸກຄົນວົງການອາພອນຈີນມັກເວົ້າວ່າ: "ປັກກິ່ງໃນເດືອນມີນາງາມກວ່າໝູ່",ນີ້ຍ້ອນວ່າ ງານວາງສະແດງແຜ່ນແພອາພອນຂະໜາດໃຫຍ່ແລະຂະໜາດນ້ອຍໄດ້ປະດັບປະດາປັກກິ່ງ,ເຮັດໃຫ້ປັກກິ່ງມີແຟຊັນສວຍງາມ.ທ່ານຊຸ່ນເຫວີຍປິ່ນ ໂຄສົກຖະແຫຼງຂ່າວງານສຳມະນາອຸດສາຫະກຳແຜ່ນແພຈີນເວົ້າວ່າ,ການຈັດງານວາງສະແດງແຜ່ນແພອາພອນໃນລະດູໃບໄມ້ປົ່ງ,ແມ່ນເພື່ອໃຫ້ວິສາຫະກິດຈະຊື້ຜະລິດຕະພັນທຸກຊະນິດຢູ່ປັກກິ່ງໄດ້,ຮູ້ທ່ວງທ່າແຟຊັນ;ພ້ອມກັນນັ້ນ,ເພີ່ມທະວີການແລກປ່ຽນແລະການຮ່ວມມືກັບຂະແໜງການດຽວຢູ່ພາຍໃນປະເທດຈີນແລະຕ່າງປະເທດ.ທ່ານຊຸ່ນເວົ້າວ່າ:
"ມັນແມ່ນງານວາງສະແດງຢ່າງເປັນລະບົບ,ພ້ອມກັນນັ້ນໄດ້ສ່ອງແສງທົ່ວຂະແໜງການແຜ່ນແພຢູ່ຍ່ານເໜືອກັບຍ່ານໃຕ້ຕິດຕໍ່ເຂົ້າກັນ.ໃຫ້ຂະແໜງການຕ່າງໆຢູ່ຍ່ານເໜືອກັບຍ່ານໃຕ້ວາງສະແດງແລະແລກປ່ຽນກັນຢູ່ບ່ອນດຽວໃນໄລຍະດຽວ,ເພື່ອສະແດງໃຫ້ເຫັນສະເໜ,ຍິ່ງກວ່ານັ້ນແມ່ນເພື່ອຊຸກຍູ້ຕ່ອງໂສ້ອຸດສາຫະກຳໃຫ້ເຊື່ອມໂຍງເຂົ້າກັນ,ເຮັດໃຫ້ທົ່ວອຸດສາຫະກຳເລື່ອນຂັ້ນ.ເພາະວ່າ ງານວາງສະແດງເຫຼົ່ານີ້ມີລະດັບສາກົນອ່າວສູງ,ນັກທຸລະກິດຕ່າງປະເທດມາເຂົ້າຮ່ວມງານວາງສະແດງກໍຫຼາຍ.ນີ້ແມ່ນຄວາມຄິດຫົວທີຂອງພວກຂ້າພະເຈົ້າທີ່ຈັດງານວາງສະແດງຂະໜາດໃຫຍ່ຢ່າງເປັນລະບົບ."
ໃນຫຼາຍປີມານີ້,ງານວາງສະແດງຂອງຂະແໜງການແຜ່ນແພໃນລະດູໃບໄມ້ປົ່ງຂອງນະຄອນປັກກິ່ງໄດ້ດຶງດູດນັກທຸລະກິດຕ່າງປະເທດຫຼວງຫຼາຍມາຈັດຊື້ຜະລິດຕະພັນ.ທ່ານຊາເຈ ມັກແຕງ ຂອງບໍລິສັດໂນວາລິນຈຳກັດວິສາຫະກິດຕ່ຳແຜ່ນຊື່ດັງຝຣັ່ງບອກນັກຂ່າວວ່າ,ບໍລິສັດພວກເຂົາເຈົ້າມາເຂົ້າຮ່ວມງານວາງສະແດງທຸກປີ,ເພື່ອແລກປ່ຽນແລະຮ່ວມມືກັບຂະແໜງການດຽວກັນຂອງຈີນ.ທ່ານເວົ້າວ່າ:
"ນີ້ແມ່ນໂອກາດດີທີ່ແລກປ່ຽນກັບຂະແໜງການດຽວກັນຂອງຈີນ,ຢູ່ນີ້ ຂ້າພະເຈົ້າມີໝູ່ເພື່ອນຈຳນວນຫຼວງຫຼາຍ.ຕາບໃດໄດ້ເຫັນຜະລິດຕະພັນທີ່ເໝາະສົມແລ້ວ,ພວກຂ້າພະເຈົ້າກໍເຊັນຂໍ້ຜູກພັນຊື້ເອົາໂລດ,ພ້ອມກັນນັ້ນ ພວກຂ້າພະເຈົ້າກໍຈະຂາຍຜະລິດຕະພັນໃຫ້ລູກຄ້າທີ່ເໝາະສົມ."
|
|
|
