|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການໂລກກິລາ. ໃນລາຍການພາກນີ້, ຂ້າພະເຈົ້າຈະສະເໜີຂ່າວກິລາປະມວນໜຶ່ງສູ່ທ່ານຟັງ.
ວັນທີ 28 ມີນາ, ຜູ່ຮັບຜິດຊອບກອງບັນຊາການໂຄງການງານກິລາໂອລິມປິກປັກກິ່ງປີ 2008 ເຜີຍໃຫ້ຮູ້ວ່າ, ປີ 2006 ນີ້ຈະແມ່ນປີຂໍກະແຈຂອງການກໍ່ສ້າງສະໜາມກິລາກາງແຈ້ງແລະມີຫົ່ມຂອງງານກິລາໂອລິມປິກປັກກິ່ງ, ຄາດວ່າຮອດກາງປີນີ້ ຈະເປັນກະແສສູງຂອງການກໍ່ສ້າງ. ສະໜາມກິລາກາງງານກິລາໂອລິມປິກປັກກິ່ງ ສູນລອຍນ້ຳແຫ່ງຊາດແລະສະໜາມກິລາມີຫົ່ມແຫ່ງຊາດເປັນຕົ້ນທີ່ໄດ້ຮັບຄວາມສົນໃຈເປັນຢ່າງຍິ່ງ ຈະສຳເລັດການກໍ່ສ້າງໂຄງປະກອບຕົ້ນຕໍໃນປີນີ້.
ວັນທີ 1 ເມສາ, ໂຄງການດັດແປງສິ່ງກໍ່ສ້າງສູນກິລາໂອລິມປິກແຫ່ງຊາດປັກກິ່ງທີ່ບໍລິການງານກິລາໂອລິມປິກປີ 2008 ເລີ່ມລົງມືກໍ່ສ້າງ. ກະວ່າ ໂຄງການດັດແປງສູນກິລາດັ່ງກ່າວຈະສຳເລັດລົງໃນເດືອນສິງຫາປີ 2007. ເມື່ອໂຄງການດັດແປງສຳເລັດແລ້ວ, ສິ່ງກໍ່ສ້າງກິລາຕ່າງໆຂອງສູນກິລາດັ່ງກ່າວ ເຊັ່ນ ສະໜາມກິລາກາງແຈ້ງ ສະໜາມກິລາມີຫົ່ມແລະສູນລອຍນ້ຳເປັນຕົ້ນ ຈະຕ້ອນຮັບງານກິລາໂອລິມປິກປັກກິ່ງປີ 2008 ດ້ວຍໂສມໜ້າໃໝ່ອ່ຽມ. ໃນນັ້ນ ສະໜາມກາງແຈ້ງທີ່ດັດແປງແລ້ວນັ້ນ ສາມາດບັນຈຸຜູ່ຊົມ 4 ໝື່ນຄົນ, ສະໜາມກິລາມີຫົ່ມທີ່ດັດແປງແລ້ວ ສາມາດບັນຈຸຜູ່ຊົມ 7000 ຄົນ. ສູນກິລາໂອລິມປິກແຫ່ງຊາດຕັ້ງຢູ່ພາກເໜືອນະຄອນປັກກິ່ງ, ໃນໄລຍະຈັດງານກິລາໂອລິມປິກປັກກິ່ງ, ຈະຈັດການແຂ່ງຂັນບານເຕະ ບານມື ບານນ້ຳແລະ 5 ລາຍການຍຸກປັດຈຸບັນເປັນຕົ້ນຢູ່ສູນດັ່ງກ່າວ.
ວັນທີ 31 ມີນາຢູ່ທີ່ປັກກິ່ງ, ຄະນະກຳມະການຈັດງານກິລາໂອລິມປິກປັກກິ່ງປະກາດວ່າ, ເລີ່ມແຕ່ວັນທີ 31 ມີນາເປັນຕົ້ນໄປ, ຈະຂໍຄຳຂວັນຜູ່ອາສາສະໝັກງານກິລາໂອລິມປິກປັກກິ່ງປີ 2008 ໂດຍອວ່າຍໜ້າໄປສູ່ທົ່ວໂລກຢ່າງເປີດເຜີຍ, ເນື້ອໃນຄຳຂວັນຜູ່ອາສາສະໝັກງານກິລາໂອລິມປິກປັກກິ່ງມີດັ່ງນີ້: ສັງເຂບໃນລະດັບສູງກ່ຽວກັບທັດສະນະຄະຕິການບໍລິການອາສາສະໝັກແຫ່ງ "ການບໍລິການຢູ່ເໜືອທຸກສິ່ງທຸກຢ່າງ ຄວາມກົມກຽວກັນຢູ່ເໜືອທຸກສິ່ງທຸກຢ່າງ", ໂຮມສູນສະແດງໃຫ້ເຫັນນິຍາມທີ່ວ່າ "ໃບໜ້າຍິ້ມຂອງຜູ່ອາສາສະໝັກແມ່ນນາມບັດດີ ກວ່າໝູ່ຂອງນະຄອນປັກກິ່ງ". ການຂໍຄຳຂວັນຜູ່ອາສາສະໝັກງານກິລາໂອລິມປິກປັກກິ່ງເທື່ອນີ້ຈະໝົດກຳນົດໃນວັນທີ 31 ສິງຫາປີ 2006, ກ່ອນເວລາດັ່ງກ່າວ, ຜູ່ເຂົ້າຮ່ວມສາມາດສົ່ງບົດປະພັນໂດຍທາງໄປສະນີຫຼືທາງອິນເຕີເນັດ, ລາຍລະອຽດກ່ຽວກັບການຂໍຄຳຂວັນເທື່ອນີ້ຂໍໃຫ້ອ່ານໃນເວັບໄຊ www.beijing2008.com ເຊິ່ງແມ່ນເວັບໄຊຝ່າຍທາງການຄະນະກຳມະການຈັດງານກິລາໂອລິມປິກປັກກິ່ງ.
ວັນທີ 29 ມີນາຢູ່ທີ່ປັກກິ່ງ, ທ່ານເຝິງຈ້ຽນຈົ່ງ ຮອງຫົວໜ້າກົມໃຫຍ່ກິລາແຫ່ງຊາດຈີນກ່າວວ່າ, "ໂຄງການອອກກຳລັງກາຍສ້າງສຸຂະພາບຂອງຊາວກະສິກອນ" ເຊິ່ງຖືການກໍ່ສ້າງສິ່ງກໍ່ສ້າງກິລາສາທາລະນະຢູ່ຊົນນະບົດອັນໄພສານຂອງຈີນເປັນເນື້ອໃນຕົ້ນຕໍນັ້ນ ຈະເລີ່ມດຳເນີນໄປໃນປີນີ້, ໂຄງການດັ່ງກ່າວໄດ້ວາງແຜນໄວ້ວ່າ, ພາຍໃນເວລາ 5 ປີ ຈະເຮັດໃຫ້ໝູ່ບ້ານໃນທົ່ວປະເທດຈີນ 1/6 ມີສິ່ງກໍ່ສ້າງກິລາສາທາລະນະທີ່ໄດ້ມາດຖານ.
ວັນທີ 31 ມີນາ, ພິທີເກັບມັດໄຟງານກິລາແຫ່ງຊາດຈີນຄັ້ງທີ 3 ໄດ້ຈັດຂຶ້ນຢູ່ເມືອງຊູໂຈ່ວ ທາງພາກຕາເວັນອອກຂອງຈີນ ໃນພິທີເກັບມັດໄຟ, ທ່ານອຽນລີ້ ເຈົ້າຄອງເມືອງຊູໂຈ່ວ ເມືອງເຈົ້າພາບງານກິລາແຫ່ງຊາດຄັ້ງທີ 3 ໄດ້ໄຕ້ກັບມັດໄຟ, ມັດໄຟດັ່ງກ່າວຈະຖືກໃຊ້ມາໄຕ້ທວນໄຟສະໜາມກິລາກາງໃນພິທີເປີດງານກິລາແຫ່ງຊາດຈີນຄັ້ງທີ 3. ງານກິລາແຫ່ງຊາດຈີນຄັ້ງທີ 3 ຈະຈັດຂຶ້ນຢູ່ເມືອງຊູໂຈ່ວແຕ່ວັນທີ 20 ຫາວັນທີ 30 ພຶດສະພາປີນີ້, ຄາດວ່າຈະມີນັກກິລາ 6000 ກວ່າຄົນເຂົ້າຮ່ວມການແຂ່ງຂັນ. ລາຍການທີ່ຈັດໃຫ້ມີໃນງານກິລາແຫ່ງຊາດລ້ວນແຕ່ແມ່ນລາຍການທີ່ບໍ່ມີການແຂ່ງຂັນໃນງານກິລາໂອລິມປິກ, ພ້ອມກັນນັ້ນ ກໍ່ແມ່ນລາຍການທີ່ມວນຊົນຈີນມັກຫຼິ້ນມັກຊົມທົ່ວໄປ. ວັດຖຸປະສົງຂອງການຈັດງານກິລາແຫ່ງຊາດແມ່ນຊຸກຍູ້ກິລາຫັດກາຍບໍລິຫານທົ່ວປວງຊົນຈີນ.
ງານແຂ່ງຂັນໄຕ່ສະເກັດໄລຍະສັ້ນປີ 2006 ທີ່ຈັດຂຶ້ນຢູ່ເມືອງມິນເນຍໂປລິສແຫ່ງອາເມລິກາ ໄດ້ສິ້ນສຸດລົງໃນວັນທີ 2 ເມສາ, ໃນງານແຂ່ງຂັນເທື່ອນີ້, ທີມຈີນຊີງໄດ້ຫຼຽນຄຳ 2 ຫຼຽນ, ໃນນັ້ນ ນາງຫວາງເໝິງຊີງໄດ້ຫຼຽນຄຳລາຍການໄຕ່ສະເກັດໄລຍະ 500 ແມັດ, ທີມເພດຍິງຈີນຊີງໄດ້ຫຼຽນຄຳລາຍການແຂ່ງຂັນໄຕ່ສະເກັດຕໍ່ແຮງໄລຍະ 3000 ແມັດ. ນອກນີ້, ທີມຈີນຍັງຊີງໄດ້ຫຼຽນເງິນ 6 ຫຼຽນໃນງານແຂ່ງຂັນເທື່ອນີ້. ໃນຕາລາງຫຼຽນລາງວັນ, ທີມສ.ເກົາຫຼີເປັນທີໜຶ່ງດ້ວຍຫຼຽນຄຳ 5 ຫຼຽນ ຫຼຽນເງິນ 3 ຫຼຽນ ຫຼຽນທອງ 2 ຫຼຽນ, ທີມການາດາເປັນທີສອງ, ທີມຈີນເປັນທີສາມ.
ງານແຂ່ງຂັນຍິງປືນຊີງຂັນໂລກນັດເມືອງກວາງໂຈ່ວໄດ້ສິ້ນສຸດລົງໃນວັນທີ 1 ເມສາ, ການແຂ່ງຂັນໄດ້ດຳເນີນເປັນເວລາ 8 ມື້, ນັກກິລາຈີນຊີງໄດ້ຫຼຽນຄຳ 3 ຫຼຽນ ແລະຫຼຽນເງິນ 3 ຫຼຽນ, ໃນນັ້ນ ນາງລິວປໍ່ຊີງໄດ້ຫຼຽນຄຳລາຍການຍິງປືນເລັກຍາວ 3 ຄູນ 20 ໄລຍະ 50 ແມັດເພດຍິງ, ນາງເຢິນເຈຊີງໄດ້ຫຼຽນຄຳລາຍການຍິງປືນພົກອັດລົມ 10 ແມັດເພດຍິງ.
|
