|
ຢູ່ຈີນ ອາຫານກຽມໄວແບບຝ່າຍຕາເວັນຕົກຄື ແມັກດອນໂນແລະ KFCເປັນຕົ້ນນັບມື້ນັບໄດ້ຮັບຄວາມຊົມເຊີຍຈາກຄົນທັງຫຼາຍ,ພ້ອມກັນນັ້ນ,ສຽງຄັດຄ້ານກໍນັບມື້ນັບດັງຂຶ້ນ.ໂດຍແນໃສ່ບັນຫາສຸຂະພາບດ້ານການກິນດື່ມຍ້ອນອາຫານກຽມ ໄວແບບຝ່າຍຕາເວັນຕົກ,ຄົນຈີນຈຳນວນໜຶ່ງໄດ້ເລີ່ມມີຄວາມວິຕົກກັງວົນ,ພວກເພິ່ນຮຽກຮ້ອງໃຫ້ໃຊ້ວິທີອັນຈຳເປັນກ່ຽວພັນການແຜ່ຂະຫຍາຍຂອງອາຫານໄວແບບຝ່າຍຕາເວັນຕົກ.
ໃນຮ້ານກິນດື່ມແມັກດອນໂນແຫ່ງໜຶ່ງທີ່ຕັ້ງຢູ່ພາກຕາເວັນຕົກນະຄອນປັກກິ່ງ,ນັກຂ່າວໄດ້ເຫັນວ່າ,ລູກຄ້າສ່ວນຫຼາຍທີ່ມາກິນອາຫານຢູ່ແຫ່ງນີ້ແມ່ນເດັກ ນ້ອຍ.ນັກຂ່າວໄດ້ສຳພາດຕໍ່ເດັກນ້ອຍສອງຄົນໂດຍບໍ່ໄດ້ຕັ້ງໃຈເລືອກ.ເດັກນ້ອຍເວົ້າວ່າ,ຫຼານມັກໃຫ້ພໍ່ພາໄປກິນຢູ່ຮ້ານແມັກດອນໂນ ເພາະວ່າອາຫານຮ້ານນີ້ທັງຫອມ ທັງຫວານທັງແຊບຫຼາຍ,ຍັງແຖມເຄື່ອງຫຼິ້ນນຳອີກ.
ມັກຫຼາຍ!ເພາະວ່າເນີຍແລະປີກໄກ່ແຊບຫຼາຍ.
ນອກຈາກລູກຄ້ານ້ອຍເຫຼົ່ານີ້ແລ້ວ,ຊາວໜຸ່ມທີ່ມີຊີວິດຈັງຫວະໄວກໍມັກໄປຮ້ານອາຫານກຽມໄວແບບຝ່າຍຕາເວັນຕົກຄືແມັກດອນໂນ KFC ເລື້ອຍໆ. ນັກຮຽນມັດທະຍົມ ນັກສືກສາແລະຄູ່ຮັກຈຳນວນໜຶ່ງມັກນັດກັນໄປກິນເຂົ້າແລະ ນັດພົບກັນຢູ່ໃນຮ້ານອາຫານກຽມໄວເຫຼົ່ານີ້,ສະນັ້ນຮ້ານອາຫານກຽມໄວແບບຝ່າຍຕາເວັນຕົກຫຼວງຫຼາຍຢູ່ຈີນຈຶ່ງຂາຍດິບຂາຍດີທີ່ສຸດ.
ສະຖິຕິສະແດງໃຫ້ເຫັນວ່າ,ນັບມາຮອດທ້າຍປີກາຍນີ້,ຢູ່ຈີນໄດ້ເປີດຮ້ານແມັກດອນໂນ700ຮ້ານແລ້ວ.KFCກໍໄດ້ລື່ນກາຍ1200ຮ້ານແລ້ວມາຮອດທ້າຍປີ2004.ຮ້ານຂະໜົມພິຊຊາ ເຊັ່ນ ພິຊຊາຮັດແລະໂອລິຈີນນານເປັນຕົ້ນກໍພວມເພີ່ມຂຶ້ນຢ່າງບໍ່ຢຸດຢັ້ງ.
ໃນຂະນະທີ່ອາຫານກຽມໄວແບບຝ່າຍຕາເວັນຕົກເຫຼົ່ານີ້ຂາຍດິບຂາຍດີຢູ່ຈີນນັ້ນ,ຜູ້ຄັດຄ້ານແມັກດອນໂນກໍນັບມື້ນັບຫຼາຍຂຶ້ນ.ທ່ານຈ່າງຈຽວ ເລຂາທິການຄະນະກຳມະການສູນກາງສະມາຄົມສ້າງຊາດປະຊາທິປະໄຕເຊິ່ງເປັນໜຶ່ງໃນພັກການເມືອງທີ່ເຂົ້າຮ່ວມວຽກງານການປົກຄອງຂອງຈີນ ກຳມະການສະພາ ປຶກສາການເມືອງປະຊາຊົນແຫ່ງຊາດຈີນແລະທ່ານນາງຢາງເຢ້ຊິ່ນ ຮອງເລຂາທິການສະມາຄົມໂພຊະນາການຂອງຈີນກໍແມ່ນຜູ້ຄັດຄ້ານ.
ທ່ານຈ່າງຈຽວເລີ່ມເອົາໃຈໃສ່ນຳອາຫານກຽມໄວແບບຝ່າຍຕາເວັນຕົກໃນຕົ້ນປີ2003,ເວລານັ້ນທ່ານໄດ້ເຫັນເລື່ອງຈິງຂອງເດັກຍິງຜູ້ໜຶ່ງຈາກໂທລະພາບ. ເພື່ອຢາກໄດ້ລາງວັນຂອງຮ້ານແມັກດອນໂນ,ເດັກຍິງຜູ້ນີ້ໄດ້ກິນແຮັມເບີເກີເດືອນໜຶ່ງເຕັມໆ.ທ່ານຈ່າງຈຽວເວົ້າວ່າ,
ວິທີທີ່ຈະໄດ້ຮັບລາງວັນຂອງຮ້ານອາຫານກຽມໄວດັ່ງກ່າວ,ແມ່ນເຈົ້າ ຕ້ອງຊື້ອາຫານຂອງຮ້ານນີ້ລວມເປັນຈຳນວນເງິນຈຳນວນໜຶ່ງ,ແລ້ວທ່ານຈະໄດ້ສາຍໂມງ ເສັ້ນໜຶ່ງ.ເມື່ອໄດ້ສາຍໂມງຈັກເສັ້ນຈັກເສັ້ນເຈົ້າກໍໄປແລກເອົາໂມງໜ່ວຍໜຶ່ງໄດ້.ເດັກນ້ອຍຜູ້ນີ້ຢາກໄດ້ໂມງນີ້ຫຼາຍ,ຈຶ່ງໄດ້ພະຍາຍາມກິນແຮມເບີເກີ.ແຕ່ໃນທີ່ສຸດ,ນາງມີແຕ່ໄດ້ສາຍໂມງເປັນກຳບໍ່ໄດ້ໂມງຈັກໜ່ວຍ,ນາງຜິດຫວັງທີ່ສຸດ.ແລະໃນເດືອນນັ້ນ,ນາງໄດ້ຕຸ້ຍຂຶ້ນ10ກວ່າກິໂລ.
ສ່ວນທ່ານນາງຢາງເຢ້ຊິ່ນໄດ້ຄົ້ນຄວ້າວິທະຍາສາດໂພຊະນະການມາຫຼາຍປີແລ້ວເຫັນວ່າ,ທີ່ຈິງແລ້ວ,ອາຫານກຽມໄວແບບຝ່າຍຕາເວັນຕົກກໍແມ່ນອາຫານຂີ້ເຫຍື້ອ.ທ່ານນາງເວົ້າວ່າ,ການທີ່ເວົ້າວ່າມັນແມ່ນຂີ້ເຫຍື້ອ,ແມ່ນຍ້ອນວ່າໃນອາຫານກຽມໄວປະເພດແມັກດອນໂນ KFCແລະພິຊຊາຮັດເປັນຕົ້ນ,ມີກາໂລຣີສູງເກີນຄວນ ມີໄຂມັນແລະໂປຼຕີນຫຼາຍໂພດ.ກິນຫຼາຍເທົ່າໃດກໍຕຸ້ຍຂຶ້ນ.
ຕາມບົດລາຍງານຂອງກະຊວງສາທາລະນະສຸກຈີນ,ອັດຕາຄົນຕຸ້ຍຢູ່ຈີນສູງຂຶ້ນຊັກໄຊ້.ຕາມຖະໜົນຫົນທາງນະຄອນປັກກິ່ງ,ຈະເຫັນເດັກນ້ອຍຕຸ້ຍໆເລື້ອຍໆ, ຍ່າງໂກ່ງໂກະໂກ່ງໂກ້ຍ.ທ່ານນາງຢາງເຢ້ຊິ່ນເປັນຫ່ວງວ່າ,ອາຫານກຽມໄວແມັກດອນໂນຈະເກີດຜົນສະທ້ອນຕໍ່ຄວາມຊິນເຄີຍດ້ານອາຫານການກິນຂອງຊາວໜຸ່ມເຍົາວະຊົນຕະຫຼອດຊີວິດ,ແລະອາດຈະເຮັດໃຫ້ເດັກນ້ອຍເຫຼົ່ານີ້ດຳລົງຊີວິດຢູ່ໃນ ເງົາມືດຂອງພະຍາດອ້ວນພີຕະຫຼອດໄປ.
ປີ1995,ທ່ານນາງຢາງເຢ້ຊິ່ນໄດ້ປະກາດບົດຄວາມບົດທຳອິດທີ່ສະແດງຄວາມສົງໄສຕໍ່ອາຫານກຽມໄວແບບຝ່າຍຕາເວັນຕົກ,ຮອດປັດຈຸບັນ11ປີໄດ້ຜ່ານໄປແລ້ວ,ທ່ານນາງໄດ້ຍຶດໝັ້ນທັດສະນະທີ່ວ່າ,ອາຫານກຽມໄວແບບຝ່າຍຕາເວັນຕົກເປັນໂທດຕໍ່ສຸຂະພາບໂດຍຕະຫຼອດ.ແຕ່ເມື່ອທຽບກັບການໂຄສະນາປານນ້ຳນອງຖ້ວມບ້ານຂອງອາຫານກຽມໄວດັ່ງກ່າວແລ້ວ,ສຽງຂອງທ່ານນາງທີ່ຍຶດ ໝັ້ນມາໄດ້11ປີນັ້ນແມ່ນອ່ອນທີ່ສຸດ.
ທ່ານນາງຢາງເຢ້ຊິ່ນເຫັນວ່າ,ຖ້າຢາກສະກັດກັ້ນບາດກ້າວແຜ່ຂະຫຍາຍຂອງອາຫານກຽມໄວແບບຝ່າຍຕາເວັນຕົກກໍມີແຕ່ອາໄສການສ້າງກົດໝາຍເທົ່ານັ້ນ. ທ່ານນາງໄດ້ຊອກຮູ້ວ່າ,ຢູ່ອົສຕຼາລີແລະອັງກິດລ້ວນແຕ່ໄດ້ປະກາດໃຊ້ກົດໝາຍ, ຫ້າມບໍ່ໃຫ້ໂທລະພາບໂຄສະນາອາຫານກຽມໄວທີ່ມີກາໂລຣີສູງໄຂມັນຫຼາຍເກີນຄວນໃນໄລຍະເວລາທີ່ມີຜູ້ຊົມຫຼາຍ.ແຕ່ຢູ່ຈີນ,ການໂຄສະນາຂອງບໍລິສັດອາຫານກຽມໄວແບບຝ່າຍຕາເວັນຕົກຍັງບໍ່ໄດ້ຖືກຈຳກັດໃດໆ.ທ່ານນາງເວົ້າວ່າ,ຂອງເປິຂອງເປື້ອນກິນແລ້ວຈະພາໃຫ້ເປັນພະຍາດ,ຈະຖອກທ້ອງ,ທັງນີ້ໄດ້ມີກົດໝາຍກົດບັນຍັດຄວບຄຸມແລ້ວ.ແຕ່ວ່າບັນດາທາດບຳລຸງບໍ່ດຸນດຽງດ້ານກັນຫຼືອາຫານທີ່ທາດບຳລຸງບໍ່ເໝາະສົມນັ້ນ,ບໍ່ມີຄົນຫົວຊາ,ສະນັ້ນຄວນສ້າງກົດໝາຍໃນດ້ານນີ້.
ບໍ່ພຽງແຕ່ທໍ່ນັ້ນໃນສອງປີມານີ້,ຢູ່ຈີນອາຫານກຽມໄວແບບຝ່າຍຕາເວັນຕົກມີບັນຫາຕ່າງໆທີ່ພົວພັນເຖິງຄວາມປອດໄພຂອງອາຫານ,ຄື ມັນຝຣັ່ງຈືນຂອງແມັກດອນໂນອາດຈະມີທາດທີ່ພາໃຫ້ເປັນໂຣກມະເຮັງ,ໃນອາຫານເຜັດຂອງKFCໄດ້ໃສ່ເຄື່ອງປຸງແຕ່ງທີ່ອາດຈະພາໃຫ້ເປັນໂຣກມະເຮັງແລະອື່ນໆ.ເຫດການເຫຼົ່ານີ້ເຮັດໃຫ້ບຸກຄົນຄືທ່ານນາງຢາງເຢ້ຊິ່ນແລະທ່ານຈ່າງຈຽວນັບມື້ນັບຫຼາຍຂຶ້ນເອົາໃຈໃສ່ນຳບັນຫາອາຫານກຽມໄວແບບຝ່າຍຕາເວັນຕົກຫຼາຍກວ່າເກົ່າ.
ທ່ານຈ່າງຈຽວ ກຳມະການສະພາປຶກສາການເມືອງປະຊາຊົນແຫ່ງຊາດຈີນເວົ້າວ່າ,ຕໍ່ອາຫານກຽມໄວແບບຝ່າຍຕາເວັນຕົກທີ່ອາດຈະເປັນໂທດຕໍ່ສຸຂະພາບຂອງຊາວໜຸ່ມເຍົາວະຊົນຢ່າງໜັກໜ່ວງ,ພາກສ່ວນລັດຖະບານຄວນເພີ່ມທະວີການຕິດຕາມຄຸ້ມຄອງ.ທ່ານເວົ້າວ່າ,ອາຫານກຽມໄວແບບຝ່າຍຕາເວັນຕົກມີຜົນຮ້າຍຕໍ່ຊາວໜຸ່ມເຍົາວະຊົນ,ພວກເຮົາຕ້ອງເອົາໃຈໃສ່ໃນລະດັບສູງ,ໂດຍສະເພາະແມ່ນພາກສ່ວນຄຸ້ມຄອງຂອງລັດຖະບານຕ້ອງວາງນະໂຍບາຍລ່ວງໜ້າກ່ຽວກັບບັນຫາດັ່ງກ່າວ.ກ່ອນອື່ນຕ້ອງເພີ່ມທະວີການຄຸ້ມຄອງ,ນອກນັ້ນຕ້ອງກວດກາແລະໃຫ້ມີຂໍ້ສະຫຼຸບໂດຍໄວຕໍ່ສ່ວນປະກອບທີ່ອາດຈະເປັຍໂທດຕໍ່ຮ່າງກາຍຄົນເຮົາໃນອາຫານກຽມໄວແບບຝ່າຍຕາເວັນຕົກ,ແລະຈຳກັດອານຫານກຽມໄວເຫຼົ່ານີ້.
ປີນີ້,ທ່ານຈ່າງຈຽວໄດ້ເລີ່ມຜ່ານຈາກລະບົບເຂົ້າຮ່ວມການປົກຄອງແລະຫາລື ການເມືອງຂອງລັດຖະບານຈີນ,ຮຽກຮ້ອງໃຫ້ບູລະນະການສ້າງກົດໝາຍຄວາມປອດໄພຂອງອາຫານໂດຍໄວ,ພ້ອມທັງບູລະນະບັນດາອົງການກວດກາຄຸນນະພາບແລະຄວາມປອດໄພຂອງອາຫານໃຫ້ສົມບູນຂຶ້ນ.
ຕາມນັກຂ່າວຮູ້ວ່າ,ປັດຈຸບັນ,ວຽກງານດັດແກ້ກົດໝາຍວ່າດ້ວຍອະນາໄມຂອງອາຫານພວມເລັ່ງລັດດຳເນີນຢູ່.ຮ່າງກົດໝາຍສະບັບດັດແກ້ດັ່ງກ່າວມີຫວັງຈະສະເໜີໃຫ້ອົງການນິຕິບັນຍັດຂອງຈີນນຳໄປສຳຫຼວດພິຈາລະນາໃນເດືອນທັນວາປີນີ້.
|
