|
ຫວ່າງກ່ອນນີ້,ພວກເຮົາໄດ້ຮັບຈົດໝາຍຂອງທ້າວສົມລິດ ບຸບຜາປັນຍາທີ່ຢູ່ແຂວງຫຼວງພະບາງ,ໃນຈົດໝາຍຂອງເພິ່ນ,ໄດ້ຖາມພວກເຮົາກ່ຽວກັບຄວາມເປັນມາຂອງບັນຫາໄຕ້ຫວັນຂອງຈີນ,ແລະປະຈຸບັນ,ຢູ່ໄຕ້ຫວັນມີປະຊາກອນເທົ່າໃດ,ສະນັ້ນ,ໃນລາຍການພາກນີ້,ພວກເຮົາກໍມາສະເໜີຄວາມເປັນມາຂອງບັນຫາດັ່ງກ່າວພ້ອມດ້ວຍເຈດຈຳນົງແລະແນວຄຶດພື້ນຖານຂອງລັດຖະບານຈີນໃນການແກ້ໄຂບັນຫາໄຕ້ຫວັນ.ພວກເຮົາຫວັງວ່າ,ຜ່ານຈາກການອະທິບາຍຂອງພວກເຮົາ,ທ່ານຈະເຂົ້າໃຈບັນຫາໄຕ້ຫວັນຂອງຈີນຢ່າງແຈ່ມແຈ້ງກວ່າເກົ່າແລະຕິດແທດຕົວຈີງກວ່າເກົ່າ.
ບັນຫາໄຕ້ຫວັນເລີ່ມກຳເນີດຂຶ້ນໃນປີ 1949,ແຕ່ຖ້າຢາກເວົ້າບັນຫານີ້ຢ່າງແຈ່ມແຈ້ງ,ຍັງຕ້ອງຫວນຄືນໄປເຖິງໄລຍະສົງຄາມໂລກຄັ້ງທີ 2.ໃນຄາວນັ້ນ,ພັກກອມມູນິດຈີນກັບພັກກົກມີນຕັງຈີນເຄີຍເກາະແຂນຮ່ວມມືກັນຕໍ່ຕ້ານກອງທັບຍີ່ປຸ່ນທີ່ເຂົ້າມາຮຸກຮານຈີນ.ປີ 1945,ພາຍຫຼັງສົງຄາມໂລກຄັ້ງທີ 2 ແລະສົງຄາມຕໍ່ຕ້ານຍີ່ປຸ່ນຂອງຈີນໄດ້ສິ້ນສຸດລົງແລ້ວ,ພັກກົກມີນຕັງຈີນທີ່ຖືທ່ານຈຽງໄຄເຊັກເປັນຫົວໂປ່ປະຕິເສດສ້າງລັດຖະບານປະສົມກັບພັກກອມມູນິດຈີນ,ແລ້ວກໍ່ເສິກກາງເມືອງໃນປີ 1946,ຫວັງຢາກດັບສູນພັກກອມມູນິດຈີນ,ສ້າງອຳນາດການປົກຄອງທີ່ປົກຄອງໂດຍພັກດຽວ.ຜ່ານເສິກກາງເມືອງເປັນເວລາ 3 ປີ,ພັກກອມມູນິດຈີນທີ່ເສຍປຽບດ້ານການທະຫານແຕ່ໄດ້ຮັບການສະໜັບສະໜູນຈາກປະຊາຊົນນັ້ນໄດ້ເອົາຊະນະພັກກົກມີນຕັງ.
ວັນທີ 1 ມັງກອນປີ 1949,ພັກກອມມູນິດຈີນທີ່ໄດ້ຮັບໄຊຊະນະໄດ້ສ້າງຕັ້ງສາທາລະນະລັດປະຊາຊົນຈີນ.ຫຼັງຈາກນັ້ນບໍ່ດົນ,ອິດທິພົນຂອງພັກກົກມີນຕັງໄດ້ຖອນອອກຈາກແຜ່ນດິນໃຫຍ່ຈີນຢ່າງຮອບດ້ານ,ແລ້ວຍຶດຄອງເກາະໄຕ້ຫວັນທີ່ຢູ່ພາກຕາເວັນອອກສຽງໃຕ້ຂອງຈີນ.
ຕັ້ງແຕ່ສະໄໝບູຮານມານີ້,ໄຕ້ຫວັນກໍ່ແມ່ນພາກສ່ວນໜຶ່ງຂອງຜືນແຜ່ນດິນຈີນ,ລະຫວ່າງເກາະໄຕ້ຫວັນກັບແຜ່ນດິນໃຫຍ່ຈີນມີຊ່ອງແຄບສາຍໜຶ່ງ,ບ່ອນໃກ້ກວ່າໝູ່ລະຫວ່າງສອງຝັ່ງມີແຕ່ 130 ກິໂລແມັດເທົ່ານັ້ນ.ພາຍຫຼັງໄດ້ຖອນໄປຍຶດຄອງເກາະໄຕ້ຫວັນແລ້ວ,ໃຕ້ການສະໜັບສະໜູນຂອງອາເມລິກາ,ພັກກົກມີນຕັງຈີນສືບຕໍ່ເປັນປໍລະປັກກັບສາທາລະນະລັດປະຊາຊົນຈີນທີ່ໄດ້ເປັນຕົວແທນທີ່ຊອບກົດໝາຍຂອງຈີນ.ແຕ່ນັ້ນມາ,ໄຕ້ຫວັນກັບແຜ່ນດິນໃຫຍ່ຈີນກໍ່ໄດ້ຕົກຢູ່ໃນສະພາບແຕກແຍກກັນ,ນັບມາຮອດປະຈຸບັນ,ໄດ້ມີເກືອບ 56 ປີແລ້ວ.
ຄວາມຕັດສິນໃຈຂອງລັດຖະບານຈີນໃນການແກ້ໄຂບັນຫາໄຕ້ຫວັນນັ້ນແມ່ນສະເໝີຕົ້ນສະເໝີປາຍ,ແຕ່ໃນຫຼາຍສິບປີມານີ້,ທິດທາງແກ້ໄຂບັນຫາກໍ່ໄດ້ມີການປ່ຽນແປງ.ກ່ອນປີ 1979,ລັດຖະບານຈີນກ່າວຕະຫຼອດມາວ່າ,ຈະປົດປ່ອຍໄຕ້ຫວັນດ້ວຍກຳລັງອາວຸດ,ໃນຄາວນັ້ນ,ສອງຝັ່ງກໍ່ຕົກຢູ່ໃນສະພາບບໍ່ໄປມາຫາສູ່ກັນຢ່າງເຖິງຖອງ.ຫຼັງປີ 1979,ລັດຖະບານຈີນສະເໜີອອກມາວ່າ,ຍາດແຍ່ງແກ້ໄຂບັນຫາສອງຝັ່ງດ້ວຍສັນຕິວິທີ.ແຕ່ແນໃສ່ທິດການເຄື່ອນໄຫວຂອງອິດທິກຳລັງແບ່ງແຍກພາຍໃນເກາະໄຕ້ຫວັນທີ່ຢາກແບ່ງແຍກໄຕ້ຫວັນອອກຈາກຈີນແລະເຈດຕະນາຂອງອິດທິກຳລັງຕ່າງປະເທດທີ່ຢາກແຊກແຊງການໂຮມຈີນເຂົ້າເປັນເອກະພາບກັນນັ້ນ,ລັດຖະບານຈີນກໍ່ກ່າວວ່າ,ບໍ່ໃຫ້ຄຳໝັ້ນສັນຍາວ່າ,ຈະປະລະການໂຮມຈີນເຂົ້າເປັນເອກະພາບກັນດ້ວຍກຳລັງອາວຸດ.
ທ່ານຫູຈີນທ່າວ ປະທານປະເທດຈີນໄດ້ສະເໜີຂໍ້ສະເໜີ 4 ຂໍ້ກ່ຽວກັບການຂະຫຍາຍການພົວພັນລະຫວ່າງສອງຝັ່ງ.ຄື:ຍຶດໝັ້ນຫຼັກການປະເທດຈີນດຽວຢ່າງບໍ່ຫວັ່ນໄຫວຄອນແຄນ,ບໍ່ປະລະຄວາມພະຍາຍາມທີ່ຍາດແຍ່ງໃຫ້ໂຮມຈີນເຂົ້າເປັນເອກະພາບກັນໂດຍສັນຕິຢ່າງເດັດຂາດ,ການຜັນຂະຫຍາຍທິດທາງຝາກຄວາມຫວັງໄວ້ນຳປະຊາຊົນໄຕ້ຫວັນນັ້ນຈະບໍ່ປ່ຽນແປງຢ່າງເດັດຂາດ,ການຄັດຄ້ານການເຄື່ອນໄຫວແບ່ງແຍກໃຫ້ໄຕ້ຫວັນເປັນເອກະລາດນັ້ນຈະບໍ່ຜ່ອນສັ້ນຜ່ອນຍາວຢ່າງເດັດຂາດ.ທ່ານເວົ້າວ່າ,ທະແນມແຕ່ແມ່ນສິ່ງທີ່ມີຜົນດີຕໍ່ພີ່ນ້ອງຮ່ວມຊາດໄຕ້ຫວັນ,ທະແນມແຕ່ແມ່ນສິ່ງທີ່ມີຜົນດີຕໍ່ການຊຸກຍູ້ການແລກປ່ຽນລະຫວ່າງສອງຝັ່ງ,ທະແນມແຕ່ແມ່ນສິ່ງທີ່ມີຜົນດີຕໍ່ການຮັກສາສັນຕິພາບຂອງຊ່ອງແຄບໄຕ້ຫວັນ,ທະແນມແຕ່ແມ່ນສິ່ງທີ່ມີຜົນດີຕໍ່ການໂຮມປະເທດຊາດເຂົ້າເປັນເອກະພາບກັນໂດຍສັນຕິນັ້ນ,ລັດລ້ວນແຕ່ຈະທຳຄວາມພະຍາຍາມສຸດຂີດໄປເຮັດ,ແລະຍ່ອມຈະພະຍາຍາມເຮັດໃຫ້ດີ.ນີ້ແມ່ນຄຳໝັ້ນສັນຍາອັນເຄັ່ງຂຶມຂອງລັດຕໍ່ພີ່ນ້ອງຮ່ວມຊາດອັນໄພສານຂອງໄຕ້ຫວັນ.
ໃນໄລຍະມໍ່ໆມານີ້,ສະຖານະການອັນເຄັ່ງຕຶງລະຫວ່າງສອງຝັ່ງໄດ້ປະກົດມີວີແວວຜ່ອນຄາຍລົງຢ່າງໃດຢ່າງໜຶ່ງ,ນັກທຸລະກິດໄຕ້ຫວັນເໝົາຍົນໃນຍາມບຸນກຸດຈີນໄດ້ປະກົດເປັນຈີງ,ບັນຫາຜະລິດຕະພັນກະສິກຳຂອງໄຕ້ຫວັນມາຂາຍຢູ່ແຜ່ນດິນໃຫຍ່ຈີນກໍ່ພວມໄດ້ຮັບຄວາມຄືບໜ້າ.ຝ່າຍແຜ່ນດິນໃຫຍ່ຈີນຈະສືບຕໍ່ໃຊ້ມາດຕະການ,ຮັດແໜ້ນການພົວພັນດ້ານເສດຖະກິດລະຫວ່າງສອງຝັ່ງ,ສົ່ງເສີມແລະຊຸກຍູ້ການແລກປ່ຽນແລະການຮ່ວມມືລະຫວ່າງສອງຝັ່ງໃນດ້ານການສຶກສາ ວິທະຍາສາດເຕັກນິກ ວັດທະນະທຳ ສາທາລະນະສຸກແລະກິລາເປັນຕົ້ນ,ພະຍາຍາມສ້າງອານາຄົດອັນສະຫວ່າງສະໄຫວໃຫ້ການພົວພັນຂອງສອງຝັ່ງຂະຫຍາຍຕົວໂດຍສັນຕິ.
ເຂດໄຕ້ຫວັນມີປະຊາກອນຫຼາຍ,ມີດິນໜ້ອຍ,ປະຊາກອນໜາແໜ້ນ.ນັບມາຮອດທ້າຍປີ 2001,ຍອດຈຳນວນປະຊາກອນຂອງໄຕ້ຫວັນມີ 22 ລ້ານ 4 ແສນຄົນ,ໃນນັ້ນ,ມີຜູ້ຊາຍ 11 ລ້ານ 4 ແສນ 4 ໝື່ນຄົນ,ຜູ້ຍິງ 10 ລ້ານ 9 ແສນ 6 ໝື່ນຄົນ,ຄວາມໜາແໜ້ນຂອງປະຊາກອນແມ່ນ 619 ຄົນຕໍ່ຕາຕະລາງກິໂລແມັດ.
|
