ຕາມຂ່າວສານຊິນຮວາ: ວັນທີ 4 ພຶດສະພາ, ທ່ານຈິນເຢິນຊິ້ງ ລັດຖະມົນຕີກະຊວງການເງິນຈີນທີ່ພວມເຂົ້າຮ່ວມກອງປະຊຸມລັດຖະມົນຕີການເງິນອາຊຽນກັບຈີນ ຍີ່ປຸ່ນແລະສ.ເກົາຫຼີຄັ້ງທີ 9 ຢູ່ເມືອງໄຮເດຣາບັດອິນເດຍກ່າວວ່າ, ຈີນຍິນດີພ້ອມກັນກັບປະເທດອື່ນຄື "10 ບວກ 3" ທຳຄວາມພະຍາຍາມ, ຊຸກຍູ້ຄວາມຈະເລີນຮຸ່ງເຮືອງແລະການພັດທະນາຂອງທົ່ວອາຊີ.
ໃນກອງປະຊຸມທີ່ຈັດຂຶ້ນໃນມື້ດຽວກັນ, ທ່ານຈິນເຢິນຊິ້ງໄດ້ແນະນຳສະຖານະການເສດຖະກິດມະຫາພາກຂອງຈີນໃນສະເພາະໜ້ານີ້ແລະເນື້ອໃນສຳຄັນຂອງແຜນກຳນົດ "ແຜນການ 5 ປີຄັ້ງທີ 11" ຂອງຈີນ.
ທ່ານຈິນເຢິນຊິ້ງກ່າວວ່າ, ບັນດາປະເທດອາຊີຕາເວັນອອກຄວນເພີ່ມຄວາມໄວ້ເນື້ອເຊື່ອໃຈກັນຕື່ມອີກ, ຊຸກຍູ້ການຮ່ວມມືທາງການເງິນແລະການທະນາຄານຂອງອາຊີຕາເວັນອອກຢ່າງໜັກແໜ້ນ. ບັນດາປະເທດຄວນເພີ່ມທະວີການສົນທະນາດ້ານນະໂຍບາຍເສດຖະກິດແລະການແລກ ປ່ຽນບົດຮຽນແຫ່ງການພັດທະນາຕື່ມອີກ, ເພີ່ມທະວີການຫາລືກັນຕື່ມອີກໃນວຽກງານເສດຖະກິດທົ່ວໂລກ, ກາຍເປັນກຳລັງແຮງດຽວກັນ, ພ້ອມກັນຮັບມືກັບການທ້າທາຍຂອງທົ່ວໂລກແລະຂອງພາກພື້ນ.
ກ່ຽວກັບບັນຫາອັດຕາແລກປ່ຽນເງິນຢວນຈີນ, ທ່ານຈິນເຢິນຊິ້ງກ່າວວ່າ, ຈີນຈະໃຊ້ທ່າທີຮັບຜິດຊອບໃນລະດັບສູງ, ຊຳລະບັນຫາອັດຕາແລກປ່ຽນເງິນຢວນຈາກມຸມທີ່ມີຜົນດີຕໍ່ການພັດທະນາເສດຖະກິດຈີນ ເສດຖະກິດອາຊີແລະເສດຖະກິດຂອງໂລກ. ທ່ານກ່າວເນັ້ນວ່າ, ຈີນຍິນດີພ້ອມກັນກັບປະເທດອື່ນປຶກສາຫາລືກັນເພື່ອແກ້ໄຂບັນຫາເສດຖະກິດໂລກທີ່ບໍ່ດຸນດ່ຽງກັນ ຕາມຫຼັກການທີ່ປຶກສາຫາລືກັນດ້ວຍໄມຕີຈິດສະເໝີພາບແລະຕ່າງຝ່າຍຕ່າງມີຜົນປະໂຫຍດ.
|