|
|
 |
| (GMT+08:00)
2006-05-08 21:09:59
|
 |
|
ອ່ານປື້ມໝື່ນເຫຼັ້ມແລະເດີນທາງໝື່ນລີ້
cri
Author: min
|
ທ່ານເຊຄົຟ ນັກປະພັນຣັດເຊຍເຄີຍເວົ້າວ່າ: ຄົນເຮົາມີ 3 ສະໝອງ, ຄື ສະໝອງທີ່ໄດ້ມາແຕ່ເກີດ, ສະໝອງທີ່ໄດ້ມາຈາກປື້ມໜັງສື, ແລະສະໝອງທີ່ໄດ້ມາຈາກຊີວິດການເປັນຢູ່.
ຄົນເຮົາເກີດມາແຕ່ລະຄົນກໍຕ່າງກັນ. ດຳລາບອກສອນຂອງຄອບຄົວຕະກຸນອຽນຊຶ່ງເປັນໜັງສືບູຮານຈີນຂຽນວ່າ: ຜູ້ສະຫຼາດ, ບໍ່ສອນກໍ່ເປັນ, ຜູ້ໂງ່, ສອນກໍ່ບໍ່ເປັນ, ສ່ວນຄົນປານກາງນັ້ນ, ບໍ່ສອນແມ່ນບໍ່ຮູ້. ຢູ່ໃນຊີວິດຕົວຈິງ, ຜູ້ເກັ່ງທີ່ມີພອນສະຫວັນມາແຕ່ເກີດແລະຄົນປັນຍາອ່ອນແມ່ນມີໜ້ອຍທີ່ສຸດ. ພວກເຮົາສ່ວນຫຼາຍແມ່ນຄົນທຳມະດາທີ່ມີປັນຍາທຳມະດາ. ສະໝອງທີ່ພໍ່ແມ່ໃຫ້ມານັ້ນແມ່ນປ່ຽນແປງບໍ່ໄດ້ແລ້ວ, ແຕ່ວ່າ, ກໍຄືທ່ານເຊຄົຟເວົ້ານັ້ນວ່າ, ນອກຈາກສະໝອງທີ່ໄດ້ມາຈາກພໍ່ແມ່ຕັ້ງແຕ່ເກີດແລ້ວ, ຄົນເຮົາຍັງສາມາດຮັບເອົາທາດບຳລຸງຈາກປື້ມໜັງສຶແລະຊີວິດການເປັນຢູ່ຢ່າງບໍ່ຢຸດຢັ້ງໄດ້, ພວກເຮົາສາມາດຍົກສູງຄວາມຮູ້ແລະສ້າງຕົນເອງໃຫ້ສົມບູນຂຶ້ນເລື້ອຍໆດ້ວຍຄວາມພະຍາຍາມໃນພາຍລຸນ.
ບູຮານຈີນມີຄວາມເວົ້າຄວາມໜຶ່ງວ່າ: ອ່ານປື້ມໝື່ນເຫຼັ້ມ, ເດີນທາງໝື່ນລີ້. ຄວາມເວົ້າສອງຄວາມນີ້ກໍ່ແມ່ນລະດົມໃຈໃຫ້ຄົນທັງຫຼາຍອ່ານປື້ມຫຼາຍໆ, ດຳລົງຊີວິດຢ່າງຕັ້ງໜ້າ, ຊອກຫາຄວາມຮູ້ຈາກການອ່ານປື້ມແລະໃນຊີວິດຕົວຈິງ, ຍົກຄຸນນະທາດຂອງຕົນໃຫ້ສູງຂຶ້ນ.
ກ່ອນອື່ນ, ຂໍລົມເລື່ອງກ່ຽວກັບການອ່ານປື້ມ. ທ່ານເຊັກສເປຍ ນັກວັນນະຄະດີຜູ້ຍິ່ງໃຫຍ່ຂອງອັງກິດເວົ້າວ່າ: ປື້ມໜັງສືແມ່ນສິ່ງໃຫ້ທາດບຳລຸງແກ່ມວນມະນຸດ.
ປື້ມໜັງສືແມ່ນການບັນທຶກປະຫວັດສາດປະຈຳປີຂອງມວນມະນຸດ, ແມ່ນການສະສົມບົດຮຽນອຸດົມສົມບູນຈົນນັບບໍ່ຖ້ວນຂອງມວນມະນຸດ, ແລະໄດ້ຮັກສາໄວ້ໃນຖານເປັນຊັບສົມບັດຂອງມວນມະນຸດ, ປື້ມໜັງສືທີ່ດີເລີດແມ່ນນ້ຳນົມອັນປະເສີດທີ່ຫຼໍ່ລ້ຽງບຸກຄົນຜູ້ມີພູມປັນຍາດີເດັ່ນ, ຮັບໃຊ້ການພັດທະນາຂອງມວນມະນຸດ, ກໍ່ຄື່ານມັກຊິມ ກອກກີ ນັກວັນນະຄະດີຜູ້ມີຊື່ສຽງຂອງຣັດເຊຍເວົ້າວ່າ: ປື້ມໜັງສືແມ່ນຂັ້ນໃດແຫ່ງການກ້າວໜ້າຂອງມວນມະນຸດ.
ອ່ານປື້ມເຮັດໃຫ້ຄົນກ້າວໜ້າ, ອຸດົມໄປດ້ວຍສະຕິປັນຍາ, ແຕ່ອ່ານປື້ມກໍ່ຕ້ອງມີວິທີ. ສັງຄົມມະນຸດວິວັດທັດທະນາມາຮອດປະຈຸບັນ, ໄດ້ມີປື້ມໜັງສືຫຼາຍຈົນນັບບໍ່ຖ້ວນ, ຄົນຜູ້ໜຶ່ງໃຊ້ຊີວິດທັງໝົດອ່ານໄດ້ແຕ່ສ່ວນນ້ອຍໆທໍ່ນັ້ນ, ສະນັ້ນ, ອ່ານປື້ມຕ້ອງເລືອກອ່ານ. ກ່ອນອື່ນ, ຄວນເລືອກອ່ານປື້ມທີ່ນຳເອົາຄວາມມ່ວນຊື່ນມາໃຫ້ຕົວເອງ, ອ່ານປື້ມທີ່ໃຫ້ຄວາມມ່ວນຊື່ນແກ່ຕົນ, ການອື່ານປື້ມຈຶ່ງເປັນເລື່ອງມ່ວນຊື່ນ, ແລະຈຶ່ງສາມາດເຮັດໃຫ້ພວກເຮົາໄດ້ຮັບສິ່ງທີ່ເປັນປະໂຫຍດຢ່າງແທ້ຈິງຈາກປື້ມອ່ານ. ສອງ, ຕ້ອງເລືອກອ່ານປື້ມທີ່ເໝາະກັບຕົນເອງ, ບົດນິພົນທີ່ມີຊື່ລືນາມທີ່ຄົນທັງຫຼາຍຍ້ອງຍໍນັ້ນບໍ່ແນ່ວ່າຈະເໝາະສຳລັບເຈົ້າເອງ, ຕ້ອງເລືອກເອົາປື້ມທີ່ເໝາະກັບອົງປະກອບຄວາມຮູ້ແລະລະດັບຄວາມເຂົ້າໃຈຂອງຕົນເອງ, ນີ້ກໍ່ຄືກັບການຂະຫຍາຍຕົວຂອງແມ່ນ້ຳ, ຕອນຢູ່ຍ່ານເໜືອ, ມັນຍ່ອມເປັນສາຍນ້ຳນ້ອຍໆ, ແຕ່ເມື່ອຮອດຍ່ານກາງແລະຍ່ານໃຕ້ແລ້ວດ ມັນຈະກວ້າງອອກປັນຈຸໄດ້ຫຼາຍສິ່ງຫຼາຍຢ່າງກວ່າ. ນອກນີ້, ຈຸດໜຶ່ງທີ່ສຳຄັນຫຼາຍແມ່ນ: ຕ້ອງເລືອກເອົາປື້ມດີທີ່ມີລັກສະນະຄຳພີ, ອ່ານປື້ມໜ້ອຍຫຼືຫຼາຍປານໃດບໍ່ໄດ້ພິສູດຫຍັງໝົດ, ມີແຕ່ປື້ມດີໆທີ່ໄດ້ບັນທຶກແນວຄິດອັນດີເລີດຂອງມວນມະນຸດເຫຼົ່ານັ້ນ, ຈຶ່ງສາມາດເຮັດໃຫ້ຄົນກ້າວໜ້າ, ປື້ມທີ່ບໍ່ດີບໍ່ພຽງແຕ່ບໍ່ສາມາດເຮັດໃຫ້ຄົນສະຫຼາດຮູ້ເຫດຮູ້ຜົນ, ບາງເທື່ອ, ຍັງອາດຈະພາໃຫ້ໄດ້ຜົນກົງການຂ້າມອີກຊ້ຳ.
ຄ່ຳວ່າໃຫ້ "ອ່ານປື້ມໝື່ນເຫຼັ້ມ" ແມ່ນຄຳເຕືອນໃຫ້ຄົນທັງຫຼາຍອ່ານປື້ມໃຫ້ຫຼາຍ, ສ່ວນຄຳວ່າ "ຍ່າງທາງໝື່ນລີ້" ກໍ່ແມ່ນໃຫ້ໄປທ່ຽວຊົມຫຼາຍໆບ່ອນ, ນີ້ແມ່ນສອງດ້ານທີ່ຂາດດ້ານໃດກໍບໍ່ໄດ້ໃນການສະແຫວງຫາຄວາມຮູ້. ພຽງແຕ່ອ່ານປື້ມແມ່ນບໍ່ພໍເທື່ອ, ຍັງຕ້ອງດຳລົງຊີວິດຢ່າງຕັ້ງໜ້າດ ເປີດຫູເປີດຕາ, ເພີ່ມຄວາມຮູ້ເຫັນ, ຮໍ່າຮຽນໃນຊີວິດການເປັນຢູ່. ຊີວິດກໍ່ແມ່ນພຶດຕິກຳ, ເອົາສິ່ງຮຽນຮູ້ຈາກປື້ມໃຊ້ເຂົ້າໃນພຶດຕິກຳ, ສາມາດພິສູດຄວາມຮູ້ທີ່ຮຽນໄດ້ຈາກປື້ມ, ພ້ອມກັນນັ້ນ, ກໍເອົາຄວາມຮູ້ທີ່ຮຽນໄດ້ຈາກປື້ມອ່ານມາພິຈາລະນາການປ່ຽນແປງແລະມູນເຫດຂອງເລື່ອງລາວ, ປັບຕົນເອງເລື້ອຍໆ, ຄ່ອຍໆກາຍເປັນໂລກະທັດຂອງຕົນເອງ, ມີແຕ່ຜູ້ທີ່ໄດ້ພຽບພ້ອມໄປດ້ວຍຄວາມຮູ້ອັນພຽງພໍແລະປະສົບການອຸດົມສົມບູນທໍ່ນັ້ນ, ຈຶ່ງຈະມີສາຍຕາອັນກວ້າງຂວາງ, ເປັນຄົນໃຈກວ້າງ. ເມື່ອມີພື້ນຖານແບບນີ້ແລ້ວ, ກໍເອົາຄວາມຮູ້ແລະທິດສະດີທີ່ຮຽນມາໄດ້ໃຈຊີວິດນັ້ນໄປໃຊ້ເຂົ້າໃນພຶດຕິກຳ, ແນ່ນອນຍ່ອມສາມາດປະກອບສ່ວນອັນໃຫຍ່ຫຼວງໃຫ້ແກ່ສັງຄົມ, ພ້ອມທັງບັນລຸຄຸນຄ່າຂອງຕົນແລະໄດ້ຮັບຜົນງານຢ່າງໃດຢ່າງໜຶ່ງ.
ທ່ານຜູ້ຟັງທີ່ຮັກແພງ, ໃນລາຍການພາກນີ້, ພວກເຮົາໄດ້ລົມເລື່ອງ "ອ່ານປື້ມໝື່ນເຫຼັ້ມແລະເດີນທາງໝື່ນລີ້", ຫວັງວ່າ, ຄົງຈະມີການຊີ້ແນະແງະໄງ້ເປີດຊ່ອງແນວຄິດໃຫ້ແກ່ທ່ານບໍ່ຫຼາຍກໍ່ໜ້ອຍ!
|
|
|
