|
ໜຶ່ງ ກ່ອນຈະຈືນປາແລະຊີ້ນ, ຕ້ອງໃຊ້ໄຟແຮງໃຫ້ໝໍ້ຮ້ອນຂຶ້ນ ໃຫ້ນ້ຳມັນລະບາຍກ່ອນ, ແລ້ວຈຶ່ງໃສ່ປາແລະຊີ້ນລົງໄປ, ຫຼັງຈາກຈືນໃຫ້ສອງເບື້ອງເປັນສີເຫຼືອງແລ້ວ ຜ່ອນໄຟອ່ອນແລ້ວຈືນຕໍ່. ປາແລະຊີ້ນທີ່ຈືນແບບນີ້ຈະຫອມກວ່າ.
ສອງ ນ້ຳຟົດແລ້ວຈຶ່ງໃສ່ຊີ້ນລົງໄປ, ຊີ້ນທີ່ຕົ້ມຄືແນວນີ້ມີລົດຊາດດີ, ແຕ່ລົດແກງຈະບໍ່ແຊບປານໃດ; ຕົ້ມຊີ້ນຕ່ອນໃຫຍ່ຈະມີລົດຊາດແຊບກວ່າຕົ້ມຊີ້ນຕ່ອນນ້ອຍ.
ເຮັດແກງແລະຕຸ໋ນຊີ້ນໃຊ້ໄຟອ່ອນດີກວ່າ. ເມື່ອຕົ້ມຟົດແລ້ວ ມັກຈະມີຝອດ, ຖ້າຝອດເຫຼົ່ານີ້ຕັກອອກຍາກ, ສາມາດເພີ່ມນ້ຳເຢັນໜ້ອຍໜຶ່ງໃສ່ແກງ, ຝອດກໍ່ຈະຟູຂຶ້ນໜ້ານ້ຳແກງແລະຕັກອອກໄດ້ງ່າຍ.
ເວລາຕົ້ມແກງຊີ້ນ ຖ້າໃສ່ໃສ່ຫົວບົ່ວໃຫຍ່ໜ້ອຍໜຶ່ງ ນ້ຳແກງຈະປ່ຽນເປັນສີເຫຼືອງຄຳ.
ສາມ ຖ້າໃຊ້ເຕົາອົບໄຟຟ້າມາປິ້ງຊີ້ນ, ຢູ່ໃນເຕົາຕ້ອງວາງຈານໃສ່ນ້ຳເຢັນຈານໜຶ່ງ, ອາຍນ້ຳຈະຮັບປະກັນໃຫ້ຊີ້ນບໍ່ຖືກປິ້ງຈົນແຫ້ງ. ພ້ອມກັນນັ້ນ ຄວນສາດນ້ຳຮ້ອຍຫຼືແກງຊີ້ນໃສ່ຊີ້ນປີ້ງ, ຖ້າສາດນ້ຳເຢັນໃສ່ຈະເຮັດໃຫ້ຊີ້ນແຂງຂຶ້ນ. ເອົາໝູແຮມແຂງໃສ່ຈານທີ່ມີນົມງົວເຢັນ, ໃຊ້ເວລາ 30 ນາທີທໍ່ນັ້ນ ໝູແຮມກໍ່ຈະອ່ອນລົງ. ຊີ້ນແຊ່ແຂງບໍ່ຄວນແຊ່ໃນນ້ຳເພື່ອ ໃຫ້ມັນລະບາຍ, ທີ່ຈິງແລ້ວ ໃສ່ໃນພາຊະນະທີ່ມີຝາປະມານ 2-3 ຊົ່ວໂມງ ມັນກໍ່ຈະລະບາຍເອົາເອງແລ້ວ ທັງຍັງຮັກສາລົດຊາດເດີມໄວ້ໄດ້.
ສີ່ ໃນເວລາຕຸ໋ນຊີ້ນງົວ, ໃຫ້ຫຍິບຖົງຜ້ານ້ອຍຖົງໜຶ່ງໄວ້ ເອົາໃບຊາໜ້ອຍໜຶ່ງໃສ່ໃນຖົງ, ມັດປາກຖົງໃຫ້ແໜ້ນ, ແລ້ວໃສ່ໃນໝໍ້ຕຸ໋ນກັບຊີ້ນງົວ, ຊີ້ນງົວຈະເປື່ອຍງ່າຍ ທັງຮັກສາລົດຊາດເດີມໄວ້ໄດ້ອີກດ້ວຍ.
ຖ້າໂຮຍຜົງມູຕາດໃສ່ຊີ້ນງົວກ່ອນແລ້ວຈຶ່ງຕົ້ມ, ຊີ້ນງົວຈະສຸກໄວ. ແຕ່ກ່ອນຈະຕົ້ມ ຄວນລ້າງໃນນ້ຳເຢັນໃຫ້ສະອາດເສຍກ່ອນ. ຖ້າໂຮຍຜົງມູຕາດແລ້ວປະໄວ້ຫຼາຍຊົ່ວໂມງຈຶ່ງເອົາໄປອົບ, ຈະເຮັດໃຫ້ຊີ້ນງົວທັງເຜັດທັງຫອມ.
ສຳລັບຊີ້ນປະເພດມີກິ່ນຄາວ, ໃນເວລາຕຸ໋ນຊີ້ນ ໃຫ້ໃສ່ຂີງ ຜັກບົ່ວຫຼືຫົວຜັກທຽມ, ຈະກຳຈັດກິ່ນຄາວໄດ້. ຕົວຢ່າງຄື ໃນເວລາຕຸ໋ນຊີ້ນແກະ, ໃຫ້ໃສ່ຕ່ອນຂີງແລະຝານໝາກນາວ, ລົດຊາດຈະດີກວ່າ. ຖ້າໃສ່ຖົ່ວຂຽວໜ້ອຍໜຶ່ງ, ຈະກຳຈັດກິ່ນຄາວໄດ້.
ໃນເວລາຂົ້ວຊີ້ນງົວ ຊີ້ນແກະຫຼືຊີ້ນມັນ, ເພີ່ມໃສ່ໝາກກະທັນຫຼາຍລູກ, ຊີ້ນຈະສຸກເປື່ອຍໄວ.
ກ່ອນຕົ້ມຊີ້ນງົວ, ເອົາໄມ້ຄ້ອນຫຼືສັນພ້າມາທຸບຕີ, ໃນເວລາຂົ້ວ ໃຫ້ໃສ່ນ້ຳສົ້ມຈັກ 2-3 ບ່ວງ, ກໍ່ຈະສຸກໄດ້ໄວ.
ໃນເວລາຊອຍຊີ້ນງົວ ຄວນຊອຍທາງຂວາງລາຍຊີ້ນ. ໃນເວລາຂົ້ວ ຄວນໃສ່ນ້ຳມັນຫຼາຍ ໄຟຕ້ອງແຮງ, ເອົາຂຶ້ນໃສ່ຈານໃນເວລາສັ້ນ, ຊີ້ນງົວຈຶ່ງຈະທັງອ່ອນທັງຫອມ.
|
