|
ແພດສາດອຸຍອູວແມ່ນແພດສາດຊົນເຜົ່າທີ່ປະດິດສ້າງໂດຍເຜົ່າອຸຍອູທີ່ດຳລົງຊີວິດຢູ່ເຂດຊິນຈ່ຽງເຜົ່າອຸຍອູປົກຄອງຕົນເອງ ພາກຕາເວັນຕົກສຽງເໜືອຂອງຈີນ,ແພດສາດອຸຍອູວມີປະຫວັດສາດ2000ກວ່າປີແລ້ວ.ໃນຂະບວນການພັດທະນາຂອງແພດສາດອຸຍອູວ,ໄດ້ປະກົດມີຜູ່ຊ່ຽວຊານແພດສາດທີ່ດີເລີດເປັນງວດໆ.ພາຍໃຕ້ການຊຸກຍູ້ຂອງພວກທ່ານ,ແພດສາດອຸຍອູວເລີ່ມກ້າວອອກຈາກເຂດຊິນຈ່ຽງ,ກ້າວໄປສູ່ໂລກ.
ທ່ານມາຍມາຍຕີ ຮາຊີມູ ປີນີ້ອາຍຸ55ປີ,ທ່ານເກີດຢູ່ໃນຄອບຄົວຕະກຸນແພດສາດແລະຢາຊົນເຜົ່າຂອງເມືອງຢຸທຽນ ເຂດຊິນຈ່ຽງ, ແຕ່ຍາມຍັງນ້ອຍ,ທ່ານໄດ້ເກີດມີຄວາມສົນໃຈອັນເຂັ້ມຂຸ້ນຕໍ່ແພດສາດອຸຍອູວ.ທ່ານເວົ້າວ່າ:
"ອາວຂ້າພະເຈົ້າແມ່ນນາຍໝໍເຜົ່າອຸຍອູທີ່ມີຊື່ສຽງໃນບ້ານເກີດຂອງຂ້ອຍ,ຕອນຂ້າພະເຈົ້າເຂົ້າຮຽນປະຖົມ,ເມື່ອເລີກຮຽນແລ້ວ,ຂ້ອຍກໍໄປຄຼິນິກຂອງອາວ,ເບິ່ງອາວກວດພະຍາດແລະຂຽນໃບສັ່ງຢາແນວໃດ.ລາງເທື່ອ,ຂ້າພະເຈົ້າກໍຊ່ອຍເພິ່ນບົດຢາ.ໃນເວລານັ້ນ,ຂ້າພະເຈົ້າກໍໄດ້ມີຄວາມຮັບຮູ້ເບື້ອງຕົ້ນຕໍ່ແພດສາດ ອຸຍອູວແລ້ວ."
ຍ້ອນໄດ້ຮັບຜົນສະທ້ອນຈາກອາວ,ທ່ານມາຍມາຍຕີ ຮາຊີມູໄດ້ເກີດມີຄວາມຄິດທີ່ຢາກເປັນນາຍໝໍພາຍຫຼັງເຕີບໃຫຍ່ຂຶ້ນ.ເມື່ອຮຽນຈົບຊັ້ນມັດທະຍົມປາຍແລ້ວ,ທ່ານໄດ້ກາຍເປັນນາຍໝໍໃນບ້ານຂອງຕົນ.ກາງເວັນ,ທ່ານກວດພະຍາດໃຫ້ຄົນເຈັບ,ຄ່ຳມາ,ທ່ານກໍອ່ານເອກະສານແພດສາດ.ຍ້ອນມີຄວາມຮັກຫອມຕໍ່ແພດສາດ,ບວກກັບທ່ານດຸໝັ່ນຂະຫຍັນພຽນ,ລະດັບການປິ່ນປົວຂອງທ່ານມາຍມາຍຕີໄດ້ຍົກສູງຂຶ້ນຢ່າງໜັກແໜ້ນ.
ໃນເວລາອາຍຸ25ປີ,ທ່ານມາຍມາຍຕີຖືກຈັດໄປເຮັດວຽກຢູ່ໂຮງໝໍອຸຍອູວທີ່ມີຊື່ສຽງແຫ່ງໜຶ່ງໃນເຂດຊິນຈ່ຽງ.ທ່ານໄດ້ໝູນໃຊ້ຄວາມຮູ້ດ້ານແພດສາດຂອງຕົນເຂົ້າໃນວຽກງານຕົວຈິງ.ທ່ານເຄີຍໄດ້ນຳໜ້າໝູ່ດັດແປງຢຸກຢາ.ໃຊ້ວິທີສະໄໝໃໝ່ຄົ້ນຄວ້າແລະຜະລິດຢາຫຼາຍແບບເຊັ່ນຢາສັກ,ຢາເມັດ,ຢາຝຸ່ນເປັນຕົ້ນ,ອັນໄດ້ປ່ຽນແປງໂສມໜ້າຫຼ້າຫຼັງຂອງຢຸກຢາອຸຍອູວ.
ນອກນີ້,ທ່ານມາຍມາຍຕີ ຮາຊີມູຍັງໄດ້ທຸ່ມເທກຳລັງເຂົ້າໃນການຄົ້ນຄວ້າການປິ່ນປົວຕົວຈິງຢ່າງຕັ້ງໜ້າ,ທ່ານໄດ້ແຕ່ງບົດຄົ້ນຄວ້າແພດສາດຫຼາຍບົດ,ບາງບົດຍັງໄດ້ລົງພິມໃນວາລະສານແພດສາດສາກົນ.ທ່ານໄດ້ນຳເອົາແພດສາດເຜົ່າອຸຍອູປະສານສົມທົບກັບແພດສາດຈີນ,ແລະແພດສາດເອີລົບ,ຊອກຄົ້ນວິທີປົວພະຍາດທີ່ປົວຍາກ.10ກວ່າປີມານີ້,ໃນດ້ານການເອົາຢາອຸຍອູວປົວພະຍາດເລືອດດັນສູງແລະພະຍາດເບົາຫວານ,ທ່ານໄດ້ດຳເນີນການຊອກຄົ້ນອັນມີຜົນປະໂຫຍດ,ແລະໄດ້ຮັບຜົນຢ່າງຈະແຈ້ງ.
1 2
|
