|
ປັດຈຸບັນນີ້,ການເຮັດໃຫ້ຊີວິດການເປັນຢູ່ສະດວກສະບາຍກວ່າເກົ່າພວມກາຍເປັນສິ່ງສະແຫວງຂອງຄົນຈີນນັບມື້ນັບຫຼາຍ,ການສ້າງເຮືອນຢູ່ທີ່ສະດວກສະບາຍກໍບໍ່ພຽງແຕ່ອາໄສການຕົກແຕ່ງຢ່າງລະອຽດທໍ່ນັ້ນ.ລະບົບເຮືອນຢູ່ແບບອັດຕະໂນມັດທີ່ຈະເລີນໃໝ່ພວມກາຍເປັນຜູ້ກຳກັບວຽກເຮືອນໃໝ່ຂອງຄົນຈີນ,ເຮັດໃຫ້ຊີວິດການເປັນຢູ່ຂອງຄົນທັງຫຼາຍສະດວກສະບາຍກວ່າເກົ່າ.
ທ່ານວາງຢາວແມ່ນຜູ້ຈຳໜ່າຍຂອງບໍລິສັດເຄຫະແລະຕາດິນແຫ່ງໜຶ່ງ.ລາວຂຸ້ນນຳວຽກທຸກມື້,ສິ່ງທີ່ທ່ານປາຖະໜາທີ່ສຸດກໍແມ່ນພໍເມືອຮອດເຮືອນ,ກໍສາມາດກິນເຂົ້າຮ້ອນວູ່ໆໃນທັນທີໄດ້ແລະອາບນ້ຳຢ່າງສະບາຍໃນທັນທີໄດ້.ຈົນຮອດເຄື່ອງປັບອາກາດໃນເຮືອນທ່ານກໍຢາກເປີດກ່ອນດ້ວຍການບັນຊາຈາກທາງໄກ.ທ່ານເວົ້າວ່າ:"ໃນລະດູຮ້ອນ,ອາກາດຮ້ອນຫຼາຍ,ໃນເຮືອນຕ້ອງເປີດແອ.ແຕ່ຖ້າເປີດຕະຫຼອດ24ຊົ່ວໂມງ,ເຖິງຈະເຢັນ,ແຕ່ກໍເປືອງໄຟຟ້າຫຼາຍ.ກ່ອນເລີກການ,ໃຊ້ໂທລະສັບມືຖືເປີກໄວ້ແອກ່ອນ,ເມື່ອເຂົ້າເຮືອນແລ້ວ,ກໍຈະຮູ້ສຶກເຢັນສະບາຍໃນທັນທີ."
ປະຈຸບັນນີ້,ຄວາມຫວັງຂອງທ່ານວາງຢາວບໍ່ແມ່ນຄວາມໄຝ່ຝັນອີກແລ້ວ.ທະແນມແຕ່ຕີໂທລະສັບໄປຫາຜູ້ກຳກັບວຽກເຮືອນເອເລັກໂຕຼນີກໃນເຮືອນ,ແລະອອກຄຳສັ່ງຕໍ່ມັນ,ເມື່ອເມືອຮອດເຮືອນແລ້ວ,ພວກເຮົາກໍສາມາດຊົມໃຊ້ທຸກສິ່ງທຸກຢ່າງທີ່ຜູ້ກຳກັບວຽກເຮືອນຢູ່ນີ້ກຽມໃຫ້.
ທີ່ຈິງແລ້ວ,ຜູ້ກຳກັບວຽກເຮືອນເອເລັກໂຕຼນິກກໍໝາຍເຖິງເຮືອນຢູ່ອັດຕະໂນມັດທີ່ປັນຍາ.ເວົ້າງ່າຍໆ,ກໍຄືລະບົບອິນເຕີເນັດໃຊ້ໃນເຮືອນ.ມັນສາມາດເຮັດໃຫ້ຄອມພິວເຕີເຊື່ອມຕໍ່ກັບເຄື່ອງໄຟຟ້າໃຊ້ໃນເຮືອນທັງໝົດ.ຖ້າເອົາລະບົບດັ່ງກ່າວເຊື່ອມຕໍ່ກັບອິນເຕີເນັດ,ພວກເຮົາມີແຕ່ໃຊ້ໂທລະສັບມືຖືທີ່ເຂົ້າອິນເຕີເນັດໄດ້,ແລະຕິດຕັ້ງຊອຟແວດທີ່ສົມຄູ່ກັນໃສ່ໃນໂທ ລະສັບມືຖື,ກໍສາມາດນຳໃຊ້ໂທລະສັບມືຖືບັນຊາເຄື່ອງໄຟຟ້າໃຊ້ໃນເຮືອນຈາກທາງໄກໄດ້.
ລະບົບເຮືອນຢູ່ອັດຕະໂນມັດທີ່ມີປັນຍາບໍ່ພຽງແຕ່ມີສັບພະຄຸນທີ່ບັນຊາຈາກທາງໄກທໍ່ນັ້ນ.ໃນລະບົບນີ້,ຍັງມີສູນຊຳລະອັນໜຶ່ງ,ສາມາດຄວບຄຸມເຄື່ອງໄຟຟ້າໃຊ້ໃນເຮືອນຕ່າງໆ ເຊັ່ນດອກໄຟ ເຕົາຕ່າງໆ ເຄື່ອງສຽງແລະເຄື່ອງວິດີໂອເປັນຕົ້ນຢ່າງເປັນເອກະພາບກັນ,ພວກເຮົາໃຊ້ຣິໂໝດໜ່ວຍດຽວ,ກໍສາມາດຄວບຄຸມເຄື່ອງໄຟຟ້າໃຊ້ໃນເຮືອນທັງໝົດໄດ້.ທ່ານຊິ່ວເຟີ່ງຊຽງເຮັດວຽກຕິດຕັ້ງລະບົບເຮືອນຢູ່ອັດຕະໂນມັດທີ່ມີປັນຍາ,ທ່ານໄດ້ແນະນຳຄວາມສະດວກຂອງລະບົບເຮືອນຢູ່ອັດຕະໂນມັດໃຫ້ນັກຂ່າວຊາບ,ໂດຍເອົາການເບິ່ງຮູບເງົາໃນເຮືອນເປັນຕົວຢ່າງ.
ທ່ານເວົ້າວ່າ:"ຖ້າຢາກເບິ່ງຮູບເງົາໃນເຮືອນ,ແຕ່ເດີມຕ້ອງເປີດເຄື່ອງໄຟຟ້າໃຊ້ໃນເຮືອນຫຼາຍເຄື່ອງ.ຕົວ ຢ່າງຄື ໂທລະພາບ,ເຄື່ອງDVDເປັນຕົ້ນ,ຍັງຕ້ອງປັບແສງໄຟໃຫ້ອ່ອນລົງ.ທັງໝົດເຫຼົ່ານີ້ລ້ວນແຕ່ຕ້ອງກົດຣີໂໝດແຕ່ລະໜ່ວຍ.ແຕ່ວ່າຖ້າມີລະບົບເຮືອນຢູ່ແບບອັດຕະໂນມັດທີ່ມີປັນຍາແລ້ວ,ພວກເຮົາສາມາດປັບບັນຍາກາດທີ່ຕ້ອງການໃນການເບິ່ງຮູບເງົາໃນເຮືອນໃຫ້ດີລ່ວງໜ້າ,ຫຼັງຈາກນັ້ນ,ມີແຕ່ກົດປຸ່ມດຽວ,ເຄື່ອງໄຟຟ້າເຫຼົ່ານີ້ກໍຈະເປີດຢ່າງອັດຕະໂນມັດແລະປັບໃຫ້ດີ."
ທ່ານຊິ່ວເຟີ່ງຊຽງເວົ້າວ່າ,ການປັບຕົວແບບກໍລະນີຕ່າງກັນແມ່ນການບໍລິການທີ່ຮູ້ຈິດຮູ້ໃຈກັນທີ່ສຸດຂອງລະບົບເຮືອນຢູ່ແບບອັດຕະໂນມັດ.ຕົວຢ່າງຄືດອກໄຟ ເຄື່ອງໄຟຟ້າໃຊ້ໃນເຮືອນທີ່ທຳມະດາທີ່ສຸດ,ໃນເວລາເຈົ້າເຮືອນເບິ່ງໂທລະພາບ,ກໍສາມາດປັບລະບົບເຮືອນຢູ່ອັດຕະໂນມັດໃຫ້ເປັນຕົວແບບເບິ່ງໂທລະພາບ,ເຊິ່ງສາມາດປັບແສງໄຟໃຫ້ຄ່ອຍໆມືດລົງ,ສ້າງບັນຍາກາດທີ່ສະບາຍໃຫ້ເຈົ້າເຮືອນພັກຜ່ອນຢ່ອນອາລົມ;ໃນເວລາເຈົ້າເຮືອນອອກຈາກເຮືອນ,ກໍບໍ່ຕ້ອງໄປກວດເບິ່ງວ່າໄດ້ມອດໄຟທຸກຫ້ອງແລ້ວບໍ່,ມີແຕ່ເລືອກເອົາຕົວແບບມອດໝົດກໍໄດ້ແລ້ວ.
ສັບພະຄຸນເຫຼົ່ານີ້ຂອງລະບົບເຮືອນຢູ່ແບບອັດຕະໂນມັດທີ່ມີປັນຍາແມ່ນບັນລຸຜົນເປັນຈິງໄດ້ແນວໃດ?ທ່ານຊິ່ວເຟີ່ງຊຽງເວົ້າວ່າ,ປະຈຸບັນນີ້,ຢູ່ຈີນ,ລະບົບເຮືອນຢູ່ແບບອັດຕະໂນມັດຕົ້ນຕໍມີສອງປະເພດ ຄືລະບົບມີສາຍແລະລະບົບບໍ່ມີສາຍ.ລະບົບມີສາຍແມ່ນເອົາເສັ້ນຄວບຄຸມສາຍໜຶ່ງເຊື່ອມຕໍ່ກັບເຄື່ອງໄຟຟ້າທີ່ຕ້ອງການຄວບຄຸມ,ເວົ້າສຳລັບເຮືອນຢູ່ທີ່ໄດ້ຕົກແຕ່ງແລ້ວໆ,ຮູບການດັ່ງກ່າວມ້າງເສັ້ນໄຟຟ້າທີ່ມີຢູ່ແລ້ວແລະແລ່ນສາຍໄຟຟ້າຄືນໃໝ່,ລາຄາກໍແພງສົມຄວນ.ສ່ວນຮູບການບໍ່ມີສາຍແມ່ນໃຊ້ຣີໂໝດສົ່ງສັນຍານຊະນິດໜຶ່ງເພື່ອອອກຄຳສັ່ງ.ທະແນມແຕ່ເຄື່ອງໄຟຟ້າໃຊ້ໃນເຮືອນຮັບເອົາສັນຍານແອງຟຼາຣູດໄດ້,ກໍສາມາດຄວບຄຸມດ້ວຍເຄື່ອງປັບສັນຍານໄດ້.
ທ່ານຊິ່ວເຟີ່ງຊຽງແນະນຳວ່າ:"ເຄື່ອງໄຟຟ້າຫຼາຍຊະນິດ ເຊັ່ນໂທລະພາບແມ່ນຮັບເອົາສັນຍານRFບໍ່ໄດ້,ມີແຕ່ຮັບເອົາສັນຍານແອງຟຼູາຣູດໄດ້.ພວກເຮົາຕ້ອງປັບສັນຍານRFເປັນສັນຍານແອງຟຼາຣູດໂດຍຜ່ານຈາກສູນຄວບຄຸມແອງຟຼາຣູດ.ນອກນີ້,ສັນຍານແອງຟຼາຣູດແມ່ນມີທິດ,ໝາຍຄວາມວ່າຖ້າຢາກຄວບຄຸມໂທລະພາບ,ຕ້ອງເອົາຣີໂໝດຫັນໜ້າໄປສູ່ໂທລະພາບ.ແຕ່ຖ້າທ່ານໃຊ້ຣີໂໝດRFກໍບໍ່ມີບັນຫານີ້ແລ້ວ,ເພາະວ່າສັນຍານRFແມ່ນສັນຍານທີ່ກີດຂວາງບໍ່ໄດ້ໃນ360ອົງສາ,ຢູ່ຫ້ອງຊັ້ນລຸ່ມກໍຄວບຄຸມຫ້ອງຊັ້ນເທິງໄດ້."
ລະບົບເຮືອນຢູ່ແບບອັດຕະໂນມັດທີ່ມີປັນຍາບໍ່ພຽງແຕ່ສາມາດເຮັດໃຫ້ຊີວິດຂອງຄົນເຮົາສະດວກສະບາຍກວ່າເກົ່າທໍ່ນັ້ນ,ຫາກຍັງສາມາດເຮັດໃຫ້ເຮືອນຢູ່ປອດໄພກວ່າເກົ່າ.ບໍລິສັດວິທະຍາສາດເຕັກນິກອີ້ເຈ່ຍປັກກິ່ງຈຳກັດແມ່ນບໍລິສັດທີ່ອອກແບບແລະຕິດຕັ້ງລະບົບ ເຮືອນຢູ່ແບບອັດຕະໂນມັດທີ່ມີປັນຍາແຫ່ງໜຶ່ງ.ທ່ານສືຊົ້ງ ຜູ້ຈັດການພະແນກຈຳໜ່າຍຂອງບໍລິສັດດັ່ງກ່າວບອກນັກຂ່າວວ່າ,ສັບພະຄຸນປ້ອງກັນຄວາມປອດໄພຂອງຜະລິດຕະພັນລະບົບເຮືອນຢູ່ແບບອັດຕະໂນມັດທີ່ມີປັນຍາຂອງບໍລິສັດພວກເຂົາເຈົ້າສາມາດເຮັດໃຫ້ຂະໂມຍທີ່ເຂົ້າເຮືອນລັກຂອງນັ້ນຢ້ານກົວຈົນໜີໄປ.
ທ່ານເວົ້າວ່າ:"ພວກເຮົາມີຕົວແບບຄືກົນອຸບາຍໄຂປະຕູເມືອງເປົ່າ.ຕົວຢ່າງຄື,ໃນເວລາເຈົ້າເຮືອນໄປເຮັດການຢູ່ຕ່າງຖິ່ນ,ກໍສາມາດເປີດໂທລະພາບຕາມເວລາກຳນົດເປີດຜ້າກັ້ງປ່ອງຕາມເວລາກຳນົດ ເປີດແລະມອດໄຟຕາມເວລາກຳນົດໄດ້,ເຮັດໃຫ້ໝົດທຸກຄົນເຫັນວ່າ ເຮືອນນີ້ມີຄົນຢູ່.ພວກເຮົາຍັງມີຕົວແບບນາບຂູ່,ຖ້າມີຂະໂມຍເຂົ້າເຮືອນລັກຂອງ,ແສງໄຟຈະເຫຼື້ອມມາບໆ,ເຄື່ອງໄຟຟ້ານາໆຊະນິດກໍເປີດແລ້ວ,ນາບຂູ່ຂີ້ລັກໃຫ້ໜີໄປ."
ທ່ານສືຊົ້ງແນະນຳວ່າ,ທະແນມແຕ່ຕິດຕັ້ງກ້ອງຖ່າຍຮູບນ້ອຍໆໜຶ່ງຢູ່ໃນເຮືອນ,ເມື່ອມີຂີ້ລັກເຂົ້າເຮືອນແລ້ວ,ລະບົບເຮືອນຢູ່ແບບອັດຕະໂນມັດທີ່ມີປັນຍາກໍເປີດກ້ອງຖ່າຍຮູບ,ເຈົ້າ ເຮືອນກໍຈະເຫັນການກະທຳຂອງຂີ້ລັກໂດຍຜ່ານຈາກໂທລະສັບມືຖືຫຼືຄອມພິວເຕີທີ່ເຂົ້າອິນເຕີເນັດໄດ້,ແລະບັນຊາຈາກທາງໄກໃຫ້ປິດປະຕູແລະແຈ້ງໃຫ້ຜູ້ປ້ອງກັນຄວາມປອດໄພໃນຄຸ້ມເຮືອນຢູ່ຊາບ,ແລ້ວກໍຈະໄດ້ຈັບຕົວຂີ້ລັກກັບທີ່.
ຜູ້ບໍລິໂພກບາງຄົນອາດຈະຄິດວ່າ,ລະບົບເຮືອນຢູ່ທີ່ມີປັນຍາແບບນີ້ຕ້ອງແພງຫຼາຍ.ບຸກຄົນໃນຂະແໜງການເຜີຍໃຫ້ຮູ້ວ່າ,ລາຄາຂອງລະບົບເຮືອນຢູ່ແບບອັດຕະໂນມັດທີ່ມີປັນຍາມີແພງມີຖືກຕາມສັບພະຄຸນໜ້ອຍຫຼາຍ,ປະຈຸບັນນີ້ຢູ່ຈີນ,ພຽງແຕ່ເສຍເງິນປະມານ 5000ຢວນທໍ່ນັ້ນກໍສາມາດຕິດຕັ້ງລະບົບເຮືອນຢູ່ອັດຕະໂນມັດທີ່ມີປັນຍາອັນພື້ນຖານຊຸດໜຶ່ງໄດ້ແລ້ວ.
|
