|
ສະບາຍດີທ່ານຜູ່ຟັງທີ່ໂຄລົບ, ຫວ່າງມໍ່ໆນີ້, ງານແຂ່ງຂັນລອຍນ້ຳໄລຍະສັ້ນຊີງຊະນະເລີດໂລກຄັ້ງທີ 8 ທີ່ຈັດຂຶ້ນຢູ່ທີ່ຊຽງໄຮ້ ໄດ້ສິ້ນສຸດລົງ. ໃນງານແຂ່ງຂັນເທື່ອນີ້, ທີມຈີນຊີງໄດ້ຫຼຽນຄຳຫຼາຍໆຫຼຽນ, ເວົ້າສຳລັບທີມລອຍນ້ຳຈີນທີ່ມີມານະຈິດຊີງເອົາຜົນງານດີເດັ່ນໃນງານກິລາໂອລິມປິກປັກກິ່ງແລ້ວ, ນີ້ແມ່ນຂ່າວດີຢ່າງບໍ່ຕ້ອງສົງໄສ. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ທີມລອຍນ້ຳຈີນໄດ້ສ້າງຄວາມໝັ້ນໃຈຈາກງານແຂ່ງຂັນລອຍນ້ຳໄລຍະສັ້ນຊີງຊະນະເລີດໂລກ.
ທຳມະດາແລ້ວ ລາຍການລອຍນ້ຳເປັນລາຍການມີຫຼຽນຄຳຫຼວງຫຼາຍໃນງານກິລາໂອລິມປິກ, ແຕ່ໃນຫຼາຍປີມານີ້ ຜົນງານທີ່ນັກກິລາລອຍນ້ຳຈີນຊີງໄດ້ນັ້ນເປັນທຳມະດາ. ໃນງານກິລາໂອລິມປິກອາແຕນປີ 2004, ນັກກິລາລອນນ້ຳຈີນຊີງໄດ້ຫຼຽນຄຳແລະຫຼຽນເງິນຢ່າງລະຫຼຽນ. ໃນງານແຂ່ງຂັນລອຍນ້ຳຊີງຊະນະເລີດໂລກປີ 2005, ນັກກິລາຈີນບໍ່ໄດ້ຫຼຽນຄຳຈັກຫຼຽນ. ແຕ່ໃນງານແຂ່ງຂັນຊີງຊະນະເລີດຄັ້ງທີ 8 ທີ່ຫາກໍ່ສິ້ນສຸດລົງນັ້ນ, ນັກກິລາຈີນຊີງໄດ້ຫຼຽນຄຳ 5 ຫຼຽນ ຫຼຽນເງິນ 1 ຫຼຽນ ແລະຫຼຽນທອງ 6 ຫຼຽນ, ໄດ້ຮັບໄຊຊະນະໃຫຍ່. ນີ້ບໍ່ຕ້ອງສົງໄສເລີຍວ່າ ໄດ້ເພີ່ມຄວາມຫວັງໃຫ້ແກ່ພວກເຂົາເຈົ້າໄປຊີງເອົາຜົນງານອັນມີລັກສະນະບຸກທະລຸໃນງານກິລາໂອລິມປິກປັກກິ່ງປີ 2008.
ໃນງານແຂ່ງຂັນລອຍນ້ຳຊີງຊະນະເລີດໂລກເທື່ອນີ້, ຈີນມີນັກກິລາ 43 ຄົນເຂົ້າຮ່ວມການແຂ່ງຂັນ, ໃນນັ້ນມີກວ່າເຄິ່ງໜຶ່ງແມ່ນນັກກິລາໜຸ່ມ. ເຖິງວ່ານັກກິລາໜຸ່ມທີ່ເຂົ້າຮ່ວມງານແຂ່ງຂັນລະດັບໂລກເປັນຄັ້ງທຳອິດເຫຼົ່ານີ້ຊີງເອົາຫຼຽນລາງວັນບໍ່ໄດ້ຕາມຄວາມຫວັງກໍ່ຕາມ, ແຕ່ພວກເຂົາເຈົ້າໄດ້ສະແດງກຳລັງບົ່ມຊ້ອນທີ່ດີງາມ. ຕົວຢ່າງຄື ທ້າວຫວາງສິນທີ່ລອຍແບບກົບແລະທ້າວຈ່າງຊິນທີ່ລອຍແບບປະສົມເປັນຕົ້ນ ລ້ວນແຕ່ແມ່ນຄວາມຫວັງຂອງທີມລອຍນ້ຳຈີນໃນປີ 2008.
ໃນຫຼາຍປີມານີ້, ກິລາລອຍນ້ຳຈີນໄດ້ປະກົດມີສະພາບການທີ່ນັກກິລາຍິງເກັ່ງກວ່ານັກກິລາຊາຍໂດຍຕະຫຼອດ, ແຕ່ໃນງານແຂ່ງຂັນເທື່ອນີ້, ນັກກິລາຊາຍຈີນໄດ້ມີທ່ວງທ່າທີ່ບຸກທະລຸເປັນໝູ່ເປັນຝູງ: ເຖິງວ່າກະດູກຕີນຂອງທ້າວອູເຜິງໄດ້ບາດເຈັບ ແຕ່ລາວກ້າສູ້ຊົນ ຍັງຊີງໄດ້ຫຼຽນຄຳໃນການລອຍແບບແມງກະເບື້ອ 200 ແມັດ, ແລະທັງທຳລາຍສະຖິຕິງານແຂ່ງຂັນຊີງຊະນະເລີດໂລກອີກ, ນີ້ແມ່ນນັກກິລາຊາຍຈີນຊີງໄດ້ຫຼຽນຄຳເປັນຄັ້ງທຳອິດໃນງານແຂ່ງຂັນລະດັບໂລກໃນເກືອບ 10 ປີມານີ້. ທ້າວຈ່າງລິນຊີງໄດ້ຫຼຽນທອງໃນການລອຍແບບເສລີ 1500 ແມັດ, ນີ້ແມ່ນນັກກິລາຊາຍຈີນຊີງໄດ້ຫຼຽນລາງວັນເປັນຄັ້ງທຳອິດໃນລາຍການລອຍໄລຍະຍາວຂອງງານແຂ່ງຂັນລະດັບໂລກ. ຄວາມກ້າວໜ້າຂອງນັກກິລາຊາຍຈີນແມ່ນພົ້ນເດັ່ນ, ນີ້ກໍ່ໄດ້ເຮັດໃຫ້ພວກເຂົາເຈົ້າໄດ້ເຫັນຄວາມຫວັງຂອງຕົນໄປຊີງເອົາຫຼຽນລາງວັນໃນງານກິລາໂອລິມປິກປັກກິ່ງ. ທ້າວອູເຜິງເວົ້າວ່າ: ເປົ້າໝາຍໄລຍະຍາວກໍ່ແມ່ນງານກິລາໂອລິມປິກປີ 2008, ຈົນຮອດປັດຈຸບັນ ຜົນງານດີທີ່ສຸດ
ອງລາຍການລອຍນ້ຳເພດຊາຍຈີນພຽງແຕ່ເປັນທີ 4 ທໍ່ນັ້ນ, ສະນັ້ນ ພວກຂ້າພະເຈົ້າຕ້ອງພະຍາຍາມສູ້ຊົນຈົດສຸດຂີດ ໄປຊີງຊີງເອົາຫຼຽນລາງວັນ.
ຕໍ່ການສະແດງຂອງທີມຈີນໃນງານແຂ່ງຂັນເທື່ອນີ້, ທ່ານຈ່າງຢ້າຕົ່ງ ຄູຝຶກໃຫຍ່ຜູ່ໃໝ່ຂອງທີມລອຍນ້ຳຈີນໄດ້ສະແດງຄວາມເພິ່ງພໍໃຈ. ທ່ານເຫັນວ່າ, ເມື່ອສັງເກດຈາກງານກິລາໂອລິມປິກທຸກຄັ້ງທີ່ຜ່ານມາແລ້ວເຫັນວ່າ, ຍ້ອນໃຈຮ້ອນແລະບໍ່ມີຄວາມໝັ້ນໃຈ, ນັກກິລາຈີນຜູ່ມີລະດັບສູງສົມຄວນຈຳນວນໜຶ່ງພັດບໍ່ໄດ້ຫຼຽນລາງວັນຊ້ຳ. ແຕ່ໃນງານແຂ່ງຂັນຊີງຊະນະເລີດໂລກເທື່ອນີ້, ບໍ່ວ່ານັກກິລາອາວຸໂສຫຼືວ່ານັກກິລາໜຸ່ມ, ທີມຈີນໄດ້ສະແດງຄວາມໝັ້ນໃຈອັນເຕັມປ່ຽມ, ທ່ານຈ່າງຢ້າຕົ່ງເຫັນວ່າ, ນີ້ແມ່ນໝາກຜົນໃຫຍ່ກວ່າໝູ່ທີ່ທີມລອຍນ້ຳຈີນໄດ້ຮັບໃນງານແຂ່ງຂັນເທື່ອນີ້. ທ່ານເວົ້າວ່າ: ເວົ້າສຳລັບການແຂ່ງຂັນແລ້ວ, ຂ້າພະເຈົ້າຮູ້ສຶກວ່າ ສິ່ງທີ່ຕ້ອງຍ້ອງຍໍນັ້ນ ກໍ່ແມ່ນຄວາມໝັ້ນໃຈສັງລວມຂອງພວກຂ້າພະເຈົ້າໄດ້ຍົກສູງຂຶ້ນ. ເຖິງວ່າ ພວກຂ້າພະເຈົ້າຍັງຜິດໂຕນກັບລະດັບຂອງນັກກິລາເອີລົບອາເມລິກາຫຼາຍ ແລະຍັງຜິດໂຕນກັບເປົ້າໝາຍທີ່ມີການບຸກທະລຸຮອບດ້ານໃນງານກິລາໂອລິມປິກຫຼາຍກໍ່ຕາມ, ແຕ່ທະແນມແຕ່ພວກຂ້າພະເຈົ້າມີຄວາມໝັ້ນໃຈ, ພະຍາຍາມຢ່າງບໍ່ລົດລະແລ້ວ, ໄປອີກສອງປີ, ພວກຂ້າພະເຈົ້າຈະຊີງໄດ້ຜົນງານດີຢ່າງແນ່ນອນ.
ຜົນງານທີ່ຍາດມາໄດ້ຫຼວງຫຼາຍນັ້ນ ບໍ່ພຽງແຕ່ເຮັດໃຫ້ນັກກິລາທັງຫຼາຍມີຄວາມໝັ້ນໃຈເພີ່ມຂຶ້ນໃນການຊີງເອົາຫຼຽນລາງວັນໃນງານກິລາໂອລິມປິກປັກກິ່ງທໍ່ນັ້ນ, ແລະກໍ່ເຮັດໃຫ້ບຸກຄົນວິຊາການໃນວົງການລອຍນ້ຳສາກົນຕີລາຄານັກກິລາຈີນດ້ວຍສາຍຕາໃໝ່. ທ່ານລາຟາວຸຍ ປະທານສະຫະພັນລອຍນ້ຳສາກົນເຊື່ອໝັ້ນວ່າ, ນັກກິລາລອຍນ້ຳຈີນຄົງຈະຊີງໄດ້ຜົນງານທີ່ເຮັດໃຫ້ຄົນເພິ່ງພໍໃຈໃນງານກິລາໂອລິມປິກປັກກິ່ງ. ທ່ານເວົ້າວ່າ: ຂ້າພະເຈົ້າເຊື່ອວ່າ, ໃນງານກິລາໂອລິມປິກປັກກິ່ງ, ນັກກິລາລອຍນ້ຳຈີນຈະມີການສະແດງທີ່ເຮັດໃຫ້ຄົນເພິ່ງພໍໃຈທີ່ສຸດ, ເພາະວ່າ ພວກເຂົາເຈົ້າມີຄວາມສາມາດແລະມີຄວາມຕັດສິນໃຈຊີງໄດ້ໄຊຊະນະໃນປະເທດຕົນ.
|
