|
|
 |
| (GMT+08:00)
2006-05-15 11:13:06
|
 |
|
ຂໍໃຫ້ນ້ຳບໍ່ແຫ່ງຊີວິດຈົ່ງໄຫຼລິດໆບໍ່ສຸດສ້ຽງ
cri
Author: min
|
ຊີວິດກໍ່ເໝືອນດັ່ງການໂຍນຮັບໝາກບານ 5 ໜ່ວຍພ້ອມກັນບາດດຽວ. ໝາກບານ 5 ໜ່ວຍນີ້ກໍຄື: ວຽກງານ, ຄອບຄົວ, ສຸຂະພາບ, ມິດຕະພາບແລະຈິດໃຈ. ທ່ານອາດຈະປະກົດເຫັນວ່າ: ໃນໝາກບານ 5 ໜ່ວຍນີ້, ມີແຕ່ວຽກງານແມ່ນໝາກບານຢາງ, ຕົກລົງດິນມັນຍັງເດັນຂຶ້ນມາໄດ້, ສ່ວນໝາກບານອີກ 4 ໜ່ວຍພັດແມ່ນໝາກບານແກ້ວ, ຄັນຕົກລົງດິນມັນກໍ່ຈະເປັນແປ້ວ, ມີຮອຍແຕກ, ຫຼືມຸ່ນອອັບຍອັບ, ຈັ່ງໃດກໍເອົາຄືນບໍ່ໄດ້ແລ້ວ. ສະນັ້ນຈຶ່ງເຫັນໄດ້ວ່າ, ການໂຍນຮັບໝາກບານ 5 ໜ່ວຍພ້ອມກັນແມ່ນສິລະປະຊະນິດໜຶ່ງແທ້ໆ.
ຄັນຊັ້ນເຮັດແນວໃດຈຶ່ງຈະຮັບໄດ້? ໃນລາຍການພາກນີ້, ອຸດົມຈະສະເໜີຄວາມເຫັນບາງຢ່າງ, ທ່ານອາດຈະບໍ່ເຫັນດີນຳທັງໝົດ, ແຕ່ພວກເຮົາຍັງຫວັງວ່າ, ຄວາມເຫັນເຫຼົ່ານີ້ຄົງເປັນຜົນປະໂຫຍດຕໍ່ຊີວິດຂອງທ່ານ.
ຢ່າເອົາຕົວເອງໄປທຽບກັບຜູ້ອື່ນເລື້ອຍໆ, ເພາະວ່າແຮ່ງເຮັດແບບນີ້ກໍ່ແຮ່ງຮູ້ສຶກວ່າຕົນເອງບໍ່ມີຄ່າ, ທີ່ຈິງແລ້ວດ ທຸກໆຄົນກໍ່ຄືກັບລາຍນິ້ວມື, ລາຍນິ້ວມືຂອງແຕ່ລະຄົນບໍ່ມີໃຜຄືກັນ, ລ້ວນແຕ່ແມ່ນໜຶ່ງບໍ່ມີສອງໃນໂລກ.
ຢ່າຄຶດວ່າ, ສິ່ງທີ່ມີຢູ່ໃນກະໂຕເຮົາເອງນັ້ນແມ່ນມີມາແຕ່ເກີດ, ເຊັ່ນ, ຄຸນສົມບັດອັນດີງາມ, ນິດໄສໃຈຄໍໜ້າຮັກເປັນຕົ້ນ, ຢ່າຄຶດວ່າ, ມັນຄືກັບນ້ຳກ໋ອກປາກໄດ້ຍາມໃດກໍເປີດເອົາໂລດ. ຕ້ອງຮັກສາຄຸນສົມບັດເຫຼົ່ານີ້ຄືກັບຮັກສາແກ່ນຕາຂອງຕົນ, ຖ້າສູນເສຍສິ່ງເຫຼົ່ານີ້, ເຈົ້າກໍ່ຈະກາຍເປັນຂອນຜີທີ່ມີຫົວໃຈແຕ່ບໍ່ມີວິນຍານ.
ຢ່າຊູ່ດຳລົງຊີວິດແບບຟ້າວຟັ່ງ, ຈົນກະທັ້ງລືມວ່າຕົນເອງມາແຕ່ໃສ່, ແລະຈະໄປໃສ. ຊີວິດບໍ່ແມ່ນການເສັງແລ່ນໄວດ ຫາກແມ່ນໄລຍະທາງທີ່ຕ້ອງຍ່າງໄປເທື່ອລະກ້າວ, ໃນຂະນະທີ່ພະຍາຍາມມຸ່ງໜ້າກ້າວເດີນຢ່າງບໍ່ລົດລະນັ້ນ, ຢ່າລືມມອງເບິ່ງຕາເວັນລົງແລງເລື້ອຍໆ, ແລະຍີ້ມໃສ່ຜູ້ທີ່ຢູ່ອ້ອມຂ້າງເຮົານັ້ນແດ່.
ບໍ່ຄວນໝົກຈົມຢູ່ແຕ່ໃນມື້ວານນີ້ຫຼືມື້ອື່ນ, ແລ້ວປະປ່ອຍໃຫ້ມື້ນີ້ຜ່ານໄປຢ່າງບໍ່ຮູ້ສຶກຕົວ. ເກີດເປັນມື້ມາກໍ່ຕັ້ງໃຈດຳລົງຊີວິດມື້ນັ້ນ, ເຮົາກໍຈະບໍ່ພາດເວລາທຸກໆມື້ໃນຊີວິດ. ຄຸນຄ່າຂອງຊີວິດບໍ່ແມ່ນຊັ່ງຊາຕາມຈຳນວນຂອງມື້, ຫາກແມ່ນຊັ່ງຊາຕາມຄຸນນະພາບຂອງຊີວິດ.
ຖ້າເຈົ້າຍັງມີເຫື່ອແຮງຢູ່, ກໍ່ຢ່າປະປ່ອຍຢ່າງງ່າຍດາຍ, ຈົນກວ່ານາທີສຸດທ້າຍທີ່ນຳເປັນຕ້ອງຢຸດເຊົາທຳຄວາມພະຍາຍາມ, ເພາະດຽວນີ້, ອັນໃດກໍ່ຍັງບໍ່ໄດ້ສິ້ນສຸດລົງຢ່າງແທ້ຈິງເທື່ອ.
ຢ່າຢ້ານຮັບຮູ້ຄວາມບໍ່ສົມບູນຂອງຕົນເອງ, ທຸກຄົນຍ່ອມມີຂໍ້ຂາດຕົກບົກພ່ອງ. ຕ້ອງຊ່າງເບິ່ງເຫັນຈຸດດີຂອງຕົນເອງ, ແລ້ວເສີມຂະຫຍາຍຈຸດດີເຫຼົ່ານີ້ຢ່າງເຕັມສ່ວນ, ພ້ອມກັນນັ້ນ, ກໍພະຍາຍາມດັດແກ້ຂໍ້ຂາດຕົກບົດພ່ອງຂອງຕົນຢ່າງບໍ່ຢຸດຢັ້ງ.
ຢ່າຢ້ານປະເຊີນກັບຄວາມສ່ຽງ, ພວກເຮົາທຸກຄົນໃຜກໍລ້ວນແຕ່ຮຽນຮູ້ກ້າຫານແລະກ້າວໄປສູ່ຄວາມສຸກງອມຫຼັງຈາກທີ່ເຄີຍເສຍໄຊແລະລົ້ມແຫຼວ, ລອງຖືການສ່ຽງໄພທຸກເທື່ອເປັນການທົດສອບຕົນເອງ, ຫັນໜ້າສູ້ດ້ວຍຄວາມທຸ່ນທ່ຽງ, ປະກົບການເຫຼົ່ານີ້ຈະກາຍເປັນຊັບສົມບັດແຕ່ບໍ່ແມ່ນຄວາມບໍ່ເປັນຈັ່ງບຸນໃນຊີວິດຂອງເຮົາ.
ຢ່າເວົ້ານຳຕົນເອງວ່າຊອກຫາຄວາມຮັກບໍ່ພົບ, ແລ້ວປິດປະຕູແຫ່ງຄວາມຮັກຂອງຕົນຈົນເທົ່າໃດ. ວິທີທີ່ພາໃຫ້ໄດ້ຮັບຄວາມຮັກໄວທີ່ສຸດນັ້ນແມ່ນໃຫ້ຄວາມຮັກແກ່ຜູ້ອື່ນ, ວິທີທີ່ເຮັດໃຫ້ສູນເສຍຄວາມຮັກໄວທີ່ສຸດກໍ່ແມ່ນເຮັດຄືກັບເອົາເງິນຫຼຽນໃສ່ໄວ້ໃນຖົງແລະກຳໄວ້ແໜ້ນໆ, ສ່ວນວິທີດີທີ່ສຸດທີ່ຈະຮັກສາຄວາມຮັກໄວ້ນັ້ນກໍ່ແມ່ນໃຫ້ມັນມີປີກບິນຢ່າສງເສລີ.
ຢ່າລືມວ່າດ ຄວາມຕ້ອງການຫຼາຍທີ່ສຸດທາງດ້ານຈິດອາລົມຂອງຄົນຜູ້ໜຶ່ງແມ່ນຄວາມເຂົ້າໃຈຂອງຜູ້ອື່ນ, ຖ້າບໍ່ມີຜູ້ອື່ນແບ່ງບັ້ນນຳ, ຜົນສຳເລັດຈະໃຫຍ່ຫຼວງປານໃດກໍ່ບໍ່ສົມບູນປານໃດ.
ຢ່າຢ້ານຮຽນສິ່ງໃໝ່ໆ. ຄວາມຮູ້ບໍ່ມີນ້ຳໜັກ, ມັນແມ່ນຊັບສົມບັດອັນປະເສີດທີ່ເອົາຕິດຕົວໄປໄດ້ທຸກເວລາ, ບໍ່ມີໃຜຈະຮູ້ສຶກວ່າ, ມັນໜັກຈົນເອົາບໍ່ໄຫວ, ກົງກັນຂ້າມຄວາມຮູ້ແຮ່ງຫຼາຍເຈົ້າກໍ່ແຮ່ງຮູ້ສຶກອິດສະຫຼະ.
ມື້ວານນີ້ແມ່ນປະຫວັດສາດ, ມື້ອື່ນແມ່ນຄຳທວາຍ, ສ່ວນມື້ນີ້ພັດແມ່ນຂອງຂວັນ, ສະນັ້ນ, ໃນພາສາອັງກິດ, ເຂົາເຈົ້າເອີ້ນມື້ນີ້ເປັນ "ເພຼເຊັນ" (present), ເຊິ່ງມີຄວາມໝາຍວ່າ: ຂອງຂວັນ!
|
|
|
