|
|
 |
| (GMT+08:00)
2006-05-16 09:51:49
|
 |
|
ຈັດພິທີແຕ່ງດອງທີ່ຕ່າງໝູ່
cri
ໃນຫຼາຍປີມານີ້,ສັງຄົມຈີນໄດ້ພັດທະນາຢ່າງວ່ອງໄວ,ພິທີແຕ່ງດອງຂອງຄົນຈີນກໍຄ່ອຍໆມີຫຼາຍຢ່າງຫຼາຍແນວ.ຊາວໜຸ່ມຫຼາຍຄົນມັກສະແດງໃຫ້ເຫັນບຸກຄະລິກລັກສະ ນະຂອງຕົນ,ຈຶ່ງໄດ້ອອກແບບພິທີແຕ່ງດອງທີ່ມີສີສັນພິເສດ,ເພື່ອໃຫ້ຕົນເອງ ຄູ່ສົມ ລົດແລະແຂກບໍ່ລືບຈັກເທື່ອ.
ຫວ່າງກ່ອນນີ້ບໍ່ດົນ,ໝູ່ຂອງນັກຂ່າວໄດ້ຈັດພິທີແຕ່ງດອງຢູ່ໂຮງແຮມຫ້າດາວແຫ່ງໜຶ່ງທາງພາກຕາເວັນຕົກນະຄອນປັກກິ່ງ.ພໍເລີ່ມຈັດພິທີ,ກໍໄດ້ສາຍວິດີໂອທີ່ເຈົ້າບ່າວເຈົ້າສາວຄູ່ນີ້ຍ່າງຫຼິ້ນຢູ່ຕາມແຄມທະເລ,ຮູບພາບເຕັມໄປດ້ວຍອາລົມອົບອຸ່ນ,ສຽງຄື້ນທະເລກະທົບກັນເປັນບາງຄັ້ງບາງຄາວ,ເຮັດໃຫ້ແຂກທັງຫຼາຍຮູ້ສຶກເຖິງຄວາມໂຣມັງຕິກຂອງເຈົ້າບ່າວເຈົ້າສາວຄູ່ນີ້.ຫຼັງຈາກນັ້ນ,ໃນຫ້ອງໃຫຍ່ໄດ້ໄຕ້ທຽນໄຂ,ໃນແສງທຽນ,ເຈົ້າບ່າວເຈົ້າສາວຄູ່ນີ້ໄດ້ພິທີເຄັ່ງຂຶມກວ່າຍາມໃດໝົດໃນຊີວິດ.
ພິທີແຕ່ງດອງເທື່ອນີ້ເຮັດໃຫ້ນັກຂ່າວມີພາບປະທັບໃຈອັນເລິກເຊິ່ງຈົນບໍ່ລືມຈັກເທື່ອ.ທ່ານສີຄັ່ງນີງ ຜູ້ອຳນວຍການໃຫຍ່ສະມາຄົມຈັດພິທີແຕ່ງດອງຈີນບອກນັກຂ່າວວ່າ,ໃນແຕ່ກ່ອນ ຊາວໜຸ່ມໄດ້ເອົາໃຈໃສ່ນຳດ້ານວັດຖຸຫຼາຍກວ່າ,ເຊັ່ນຈັດງານລ້ຽງແນວໃດ,ໃຊ້ລົດຫຍັງໄປຮັບເຈົ້າສາວເປັນຕົ້ນ,ດຽວນີ້,ໄດ້ປ່ຽນມາເອົາໃຈໃສ່ນຳຄວາມໝາຍຕົວຈິງຂອງພິທີແຕ່ງດອງຫຼາຍກວ່າ.ທ່ານເວົ້າວ່າ,ປັດຈຸບັນຄົນທັງຫຼາຍນັບມື້ນັບເອົາໃຈໃສ່ທາງດ້ານຈິດໃຈຂອງພິທີແຕ່ງດອງ.ເຊັ່ນ,ເອກະລັກແລະຮູບການຂອງພິທີ,ຈະຈັດຕາມພິທີເກົ່າແບບຈີນຫຼືໄປຈັດຢູ່ໂບດ,ຫຼືຈັດແບບທັນສະໄໝເປັນຕົ້ນ.
ປັດຈຸບັນ,ພິທີແຕ່ງດອງມີຫຼາຍຮູບຫຼາຍແບບແທ້,ມີຈັດພິທີແຕ່ງດອງຢູ່ກາງອາກາດ ຢູ່ພື້ນທະເລ ເທິງເດີ່ນຫຍ້າແລະທາງອິນເຕີເນັດເປັນຕົ້ນ.ຫວ່າງກ່ອນນີ້ບໍ່ດົນ,ຢູ່ຊີ່ງຕາວ ເມືອງແຄມທະເລຂອງແຂວງສ່ານຕົ່ງພາກຕາເວັນອອກຂອງຈີນ,ກໍມີເຈົ້າບ່າວເຈົ້າສາວຄູ່ໜຶ່ງໄດ້ຈັດພິທີແຕ່ງດອງຢູ່ພື້ນທະເລ.
ພິທີແຕ່ງດອງພື້ນທະເລແມ່ນຈັດຂຶ້ນຢູ່ໃນສວນສາທາລະນະພື້ນທະເລຊີ່ງຕາວທີ່ສ້າງຢູ່ແຄມທະເລ,ເຈົ້າບ່າວຊື່ອູເຫວີຍ ເຈົ້າສາວຊື່ລິນເທິງ,ເມື່ອເລີ່ມຈັດພິທີກໍເຫັນເຈົ້າບ່າວເຈົ້າສາວຄູ່ນີ້ທີ່ນຸ່ງຊຸດດຳນ້ຳເຂົ້າໃນນ້ຳ,ທຳອິດຈັບມືກັນ,ແລ້ວກອດກັນແລະກົ້ມຫົວຄຳນັບຕໍ່ກັນ.ພິທີແຕ່ງດອງໄດ້ສຳເລັດພາຍໃນເວລາ16ນາທີ,ທັງໄວທັງກະຕຸ້ນໃຈຄົນ.ຜູ້ຈັດພິທີແຕ່ງດອງຢູ່ພື້ນທະເລຕ້ອງຊ່າງດຳນ້ຳ.ປັດຈຸບັນ,ຊາວໜຸ່ມທີ່ສາມາດຈັດພິທີແຕ່ງດອງແບບນີ້ຢູ່ເມືອງຊິ່ງຕາວຍັງບໍ່ຫຼາຍປານໃດ,ສ່ວນນາງລິນເທິງກັບທ້າວອູເຫວີຍທີ່ເຕີບໃຫຍ່ຢູ່ແຄມທະເລກໍກາຍເປັນຄູ່ໜຶ່ງທີ່ມີໂຊກດີ.ຫຼັງຈາກຈັດພິທີແລ້ວ,ນາງລິນເທິງຜູ້ເປັນເຈົ້າສາວອົດກັ້ນຄວາມກະຕຸ້ນໃຈບໍ່ໄດ້,ນາງບອກນັກຂ່າວວ່າ,
ຂ້າພະເຈົ້າກັບອູເຫວີຍເຕີບໃຫຍ່ຢູ່ແຄມທະເລ,ພວກເຮົາມັກດຳນ້ຳແລະລອຍນ້ຳທັງສອງ,ມີອາລົມພິເສດຕໍ່ທະເລ.ການເລືອກພິທີແຕ່ງດອງຢູ່ພື້ນທະເລທະເລໄດ້ສົມກັບຄວາມປາຖະໜາຮ່ວມຂອງພວກເຮົາສອງຄົນ,ທັງປະຢັດກວ່າພິທີແຕ່ງດອງທຳມະດາ.ສິ່ງທີ່ສຳຄັນກວ່າໝູ່ກໍແມ່ນ,ໃນ16ນາທີອັນສັ້ນໆ,ໄດ້ບັນທຶກເວລາພັບຕາດຽວອັນຖາວອນຂອງພວກເຮົາ.
ຢູ່ບາງເມືອງພາກໃຕ້ຂອງຈີນ,ພວມນິຍົມຈັດພິທີແຕ່ງດອງເທິງອິນເຕີເນັດໃນຊັ້ນຄົນຄໍເສື້ອຂາວໃນຕົວເມືອງ.ພິທີແຕ່ງດອງແບບນີ້ບໍ່ຈັດງານລ້ຽງ,ບໍ່ຮັບຂອງຂວັນ,ພຽງແຕ່ສ້າງເວັບໄຊແຕ່ງດອງເວັບໄຊໜຶ່ງ,ຄ່ອຍໆກົດມາວສ໌ກໍຈະໄດ້ເຫັນຮູບຖ່າຍນຸ່ງຊຸດສົມລົດເປັນໃບໆ,MTVທີ່ເຕັມໄປດ້ວຍຄວາມຮັກຄວາມແພງ,ເປັນການຫວນຄືນຄວາມຮັກ,ເຮັດໃຫ້ຄົນຮູ້ສຶກເຖິງຄວາມສຸກຂອງເຈົ້າບ່າວເຈົ້າສາວ.
ທ່ານວາງເຊີນເຮັດວຽກຢູ່ໃນຂະແໜງການIT,ເມື່ອຫຼາຍປີກ່ອນ,ທ່ານກໍໄດ້ສ້າງເວັບໄຊສ່ວນຕົວຂອງຕົນແລ້ວ,ເມື່ອຫຼາຍມື້ກ່ອນ,ທ່ານກັບແຟນໄດ້ຫາລືກັນແລ້ວຈັດພິທີແຕ່ງດອງເທິງອິນເຕີເນັດ.ທ່ານວາງເຊີນເວົ້າວ່າ,
ຍ້ອນວ່າຂ້າພະເຈົ້າກັບແຟນແມ່ນຄົນຕ່າງຖິ່ນທີ່ມາສ້າງພາລະກິດຢູ່ເມືອງກວງໂຈ່ວ, ຍາດຕິພີ່ນ້ອງແລະໝູ່ເພື່ອນສ່ວນຫຼາຍກໍບໍ່ຢູ່ກວາງໂຈ່ວ,ຖ້າຢາກເຊີນພວກເຂົາເຈົ້າມາກວາງໂຈ່ວ,ຄືຊິເປັນເລື່ອງຍາກ,ເວລາກໍບໍ່ທັນ,ແຕ່ເວັບໄຊແຕ່ງດອງພັດສາມາດໃຫ້ພີ່ນ້ອງໝູ່ເພື່ອນຍິ່ງຫຼາຍຮູ້ສຶກເຖິງຄວາມສຸກຂອງພວກເຮົາ.
ເວັບໄຊແຕ່ງດອງທີ່ທ່ານວາງເຊີນອອກແບບນັ້ນມີບ່ອນຄຼິກໃນເວັບໄຊສ່ວນຕົວຂອງຕົນ,ຮູບຊົງຂອງເວັບໄຊແມ່ນອອກແບບຕາມຄວາມນິຍົມຊົມຊອບຂອງສອງຜົວເມຍ.ພວກເຂົາເຈົ້າໄດ້ຈັດໃຫ້ມີຫຼາຍຄໍລຳ,ເຊັ່ນ ຮູບຖ່າຍຊຸດແຕ່ງດອງ,ການທ່ອງທ່ຽວໃນຮັນນີມູນ,ປະສົບການຂອງພວກເຮົາເປັນຕົ້ນ,ໃຫ້ພີ່ນ້ອງໝູ່ເພື່ອນຮູ້ວ່າ,ເຂົາເຈົ້າຮູ້ຈັກກັນເຂົ້າໃຈກັນຕະຫຼອດຮອດຮັກກັນແນວໃດ.ທ່ານວາງເຊີນແນະນຳວ່າ,ການສ້າງເວັບໄຊແຕ່ງດອງ,ເສຍເງິນພຽງແຕ່300ຫາ500ຢວນໄປຮ້ອງຂໍຊື່ເວັບໄຊກໍລົງມືອອກແບບໄດ້ໂລດ.
ປັດຈຸບັນ,ຖ້າທ່ານເປີດເວັບໄຊສະບັບພາສາຈີນຫຼາຍເວັບໄຊ,ກໍຈະໄດ້ເຫັນເວັບໄຊແຕ່ງດອງຫຼາຍບໍ່ຢອກ,ເວັບໄສເຫຼົ່ານີ້ສ່ວນຫຼາຍໃສ່ສີບົວ ສີມ່ວງອ່ອນແລະສີອື່ນໆທີ່ເປັນສີອຸ່ນອົກອຸ່ນໃຈ,ແລະໄດ້ປະດັບປະດາດ້ວຍຮູບດອກກຸຫຼາບ ດອກແປະຫະ ແລະຮູບຫົວໃຈ ຮູບດາວຢ່າງຫຼວງຫຼາຍ.ພິທີແຕ່ງດອງເທິງອິນເຕີເນັດ,ໄດ້ເພີ່ມສີສັນຄວາມຈິງແລະສິລິມຸງຄຸນໃຫ້ແກ່ໂລກອິນເຕີເນັດທີ່ອຸປະໂຫຼກ.
ເຖິງວ່າພິທີແຕ່ງດອງເທິງອິນເຕີເນັດ,ແຕ່ພັດເຮັດໃຫ້ຄົນຮູ້ສຶກບໍ່ເປັນທາງການ.ສະນັ້ນ,ກໍມີຄົນທັງຈັດພິທີແຕ່ງດອງເທິງອິນເຕີເນັດທັງຈັດງານລ້ຽງ,ຮູບການນີ້ເຮັດໃຫ້ໝົດທຸກຄົນເພິ່ງພໍໃຈ,ນາງເຊີນຈື້ຈື້ວາທີເຈົ້າສາວຂອງປັກກິ່ງບອກນັກຂ່າວວ່າ,ນາງໄດ້ເລືອກເອົາວັນເວລາທີ່ຈັດພິທີແຕ່ງດອງແລ້ວ.ພ້ອມກັນນັ້ນ,ນາງຍັງຈະສົ່ງວິດີໂອຂອງພິທີແຕ່ງ ດອງໄປສູ່ເວັບໄຊແຕ່ງດອງຂອງຕົນ.
ການນິຍົມພິທີແຕ່ງດອງແບບໃໝ່ກໍຊຸກຍູ້ໃຫ້ບໍລິສັດຈັດພິທີສົມລົດມີທຸລະການເພີ່ມຂຶ້ນຫຼາຍຢ່າງຫຼາຍແນວ.ບໍລິສັດເຫຼົ່ານີ້ບໍ່ພຽງແຕ່ບໍລິການພິທີແຕ່ງດອງ,ແລະຍັງ ອອກແບບພິທີແຕ່ງດອງຫຼາຍຮູບຫຼາຍແບບຕາມຄວາມຮຽກຮ້ອງຕ້ອງການຂອງລູກຄ້າ.ຢູ່ຫຼາຍຕົວເມືອງ,ບໍລິສັດຊະນິດນີ້ທຸລະກິດຄຶກຄັກຫຼາຍ.
ຜູ້ຊ່ຽວຊານວິເຄາະວ່າ,ການນິຍົມພິທີແຕ່ງດອງທີ່ມີບຸກຄະລິກລັກສະນະໄດ້ສ່ອງແສງໃຫ້ເຫັນວ່າຊາວຈີນຍິ່ງເອົາໃຈໃສ່ນຳຄຸນນະພາບການແຕ່ງດອງ.ປັດຈຸບັນ,ຄົນທັງຫຼາຍມີເງິນແລ້ວຈຶ່ງຢາກຈັດພິທີແຕ່ງດອງໃຫ້ຕ່າງໝູ່ເພື່ອເປັນການເລີ່ມຕົ້ນຂອງຊີວິດຄອບຄົວແບບໃໝ່ໆແລະຮຸ່ງເຮືອງ.ສະນັ້ນ,ການປ່ຽນແປງຊະນິດນີ້ກໍໄດ້ສ່ອງແສງໃຫ້ເຫັນຄວາມກ້າວໜ້າຂອງສັງຄົມຈີນຈາກດ້ານໜຶ່ງ.ທ່ານນາງວາງເຈີ້ນຢູ ສາສະດາຈານຂອງສະພາບັນດິດວິທະຍາສາດສັງຄົມຈີນທີ່ໄດ້ຄົ້ນຄວ້າສະພາບສົມລົດຂອງຈີນ ມາຫຼາຍປີແລ້ວນັ້ນເວົ້າວ່າ,
ຮູບການຈັດພິທີແຕ່ງດອງມີຫຼາຍຮູບຫຼາຍແບບຂັ້ນ,ໄດ້ສະແດງໃຫ້ເຫັນການປ່ຽນແປງຂອງຍຸກສະໄໝນີ້ທີ່ຫັນຈາກແບບດັ້ງເດີມໄປສູ່ແບບທັນສະໄໝ,ກໍຄືຫັນຈາກເຄົ້າດຽວໄປສູ່ຫຼາຍເຄົ້າ.ເພາະວ່າພິທີແຕ່ງດອງແມ່ນເລື່ອງສິລິມຸງຄຸນແລະເລື່ອງເອກອ້າງ, ເວົ້າໄດ້ວ່າໄດ້ສ່ອງແສງເຖິງການປ່ຽນແປງໃນດ້ານນີ້ຢ່າງເດັ່ນຊັດທີ່ສຸດ.
|
|
|
