|
ຕາມຂ່າວCRI: ວັນທີ 18 ພຶດສະພາຢູ່ທີ່ປັກກິ່ງ, ທ່ານສິນຕ້າເຫີ ຫົວໜ້າກົມອຸຕຸນິຍົມຈີນກ່າວວ່າ, ຈີນຈະພະຍາຍາມສ້າງລະບົບບໍລິການອຸຕຸນິຍົມທັນສະໄໝທີ່ມີລະດັບກ້າວໜ້າຂອງໂລກ.
ທ່ານສິນຕ້າເຫີແມ່ນໃຫ້ທັດສະນະດັ່ງກ່າວໃນເວລາເຂົ້າຮ່ວມ "ກອງປະຊຸມວິທະຍາສາດເຕັກໂນໂລຊີອຸຕຸນິຍົມທົ່ວປະເທດ" ທີ່ຈັດຂຶ້ນໃນມື້ດຽວກັນ. ທ່ານສະເໜີວ່າ, ໄພອຸຕຸນິຍົມທີ່ເກີດຢູ່ຈີນມີຫຼາຍຊະນິດ, ປະຊາກອນທີ່ຖືກຜົນກະທົບຈາກໄພອຸຕຸນິຍົມ ເຊັ່ນ ລົມພາຍຸ ຝົນຕົກໜັກແລະໄພນ້ຳຖ້ວມເປັນຕົ້ນໃນແຕ່ລະປີມີເຖິງ 400 ລ້ານເທື່ອຄົນ, ໄດ້ສ້າງຄວາມເສຍຫາຍທາງເສດຖະກິດບັນລຸເຖິງ 200 ກວ່າຕື້ຢວນ, ສ່ວນລະດັບວິທະຍາສາດເຕັກໂນໂລຊີດ້ານອຸຕຸນິຍົມຍັງຕ່ຳເມື່ອທຽບກັບລະດັບກ້າວໜ້າຂອງໂລກ.
ທ່ານກ່າວວ່າ, ຈີນຈະເພີ່ມງົບປະມານເຂົ້າໃນພາລະກິດອຸຕຸນິຍົມ, ເລັ່ງລັດນຳໃຊ້ແລະເຜີຍແຜ່ໝາກຜົນວິທະຍາສາດເຕັກໂນໂລຊີດ້ານອຸຕຸນິຍົມ; ຄົ້ນຄວ້າແລະຜະລິດອຸປະກອນສັງເກດວັດແທກອຸຕຸນິຍົມແບບໃໝ່ແລະອຸປະກອນເຮັດວຽກສົ່ງຜົນສະທ້ອນຕໍ່ດິນຟ້າອາກາດ; ພ້ອມກັນນັ້ນ ກໍເພີ່ມທະວີການຄົ້ນຄວ້າພື້ນຖານອຸຕຸນິຍົມ, ຍົກສູງອັດຕາຖືກຕ້ອງແລະອັດຕາທັນເວລາໃນການພະຍາກອນອາກາດເຕືອນໄພລ່ວງໜ້າແລະອື່ນໆ.
|
