|
ທ່ານຜູ້ຟັງທີ່ໂຄລົບ,ຫວ່າງມໍ່ໆນີ້,ຫຼາຍກະຊວງແລະຄະນະກຳມະການທຽບເທົ່າຂອງລັດຖະບານຈີນໄດ້ອອກປະກາດແຈ້ງການຮ່ວມຮຽກຮ້ອງວ່າ,ຖ້າແມ່ນຄອມພິວເຕີທີ່ຜະລິດແລະຈຳໜ່າຍຢູ່ໃນແດນຈີນ,ຕ້ອງຕິດຕັ້ງລະບົບຄຸມຈັກແລະຊອຟແວແບບແທ້.ດັ່ງນັ້ນ,ຫຼາຍວິສາຫະກິດທີ່ຜະລິດຄອມພິວເຕີທີ່ໃຫຍ່ກວ່າໝູ່ຂອງຈີນໄດ້ເຊັນຂໍ້ຜູກພັນທີ່ມີມູນຄ່າຫຼາຍຮ້ອຍລ້ານໂດລາສະຫະລັດກັບບໍລິສັດMicrosoftຂອງອາເມລິກາກ່ຽວກັບການຊື້ລະບົບຄຸມຈັກwindows.ແຕ່ວ່າ,ໃນເວລາວິສາຫະກິດຊອຟແວຂອງຈີນແລະຕ່າງປະເທດໄຊໂຍໂຮຮ້ອງເພື່ອມາດຕະການໃໝ່ຂອງລັດຖະບານຈີນ,ວິສາຫະກິດຜ້ານກາງແລະໜ້ອຍພ້ອມດ້ວຍຜູ້ບໍລິໂພກສ່ວນບຸກຄົນຂອງຈີນຜັດໄດ້ອຸກອັ່ງຂຶ້ນຍ້ອນຕົ້ນທຶນຊື້ຄອມພິວເຕີເພີ່ມຂຶ້ນ.ບໍ່ຕ້ອງສົງໄສເລີຍວ່າປະຈຸບັນ,ຈີນຊຸກຍູ້ໃຫ້ໃຊ້ຊອຟແວແບບແທ້ຢ່າງຮອບດ້ານຍັງແມ່ນໜ້າທີ່ໜັກໜາບົນເສັ້ນທາງຍາວໄກ.ໃນລາຍການຈີນປະຈຸບັນພາກນີ້, ພວກເຮົາກໍຂໍລົມເລື່ອງນີ້ສູ່ທ່ານຟັງ.
ຫວ່າງມໍ່ໆນີ້,ລັດຖະບານຈີນໄດ້ປະກາດໃຊ້ມາດຕະການໃໝ່ເພື່ອເຜີຍແຜ່ຊອຟແວແບບແທ້ເຊິ່ງກ່ຽວພັນເຖິງດ້ານຕ່າງໆ:ສຳລັບຄອມພິວເຕີຂອງຂະແໜງການອົງການປົກຄອງທຸກຂັ້ນແລະວິສາຫະກິດຂະໜາດໃຫຍ່,ລັດຖະບານກາງຮຽກຮ້ອງໃຫ້ພວກເຂົາເຈົ້າຕ້ອງຈັດຊື້ຄອມພິວເຕີທີ່ໄດ້ຕິດຕັ້ງລະບົບຄຸມຈັກແບບແທ້;ແຕ່ສຳລັບວິສາຫະກິດທີ່ຜະລິດຄອມພິວເຕີ,ບໍ່ວ່າຜະລິດຢູ່ຈີນຫຼືຕ່າງປະເທດ,ທະແນມແຕ່ຂາຍຄອມພິວເຕີໃນຕະຫຼາດຈີນ,ກໍຕ້ອງຕິດຕັ້ງລະບົບຄຸມຈັກ.
ວົງການວິສາຫະກິດເອີ້ນຂໍ້ກຳນົດເຫຼົ່ານີ້ເປັນ"ຄຳສັ່ງໃຫ້ໃຊ້ແບບແທ້ທີ່ເຂັ້ມງວດທີ່ສຸດ"ຂອງລັດຖະບານຈີນ.ແນ່ນອນແລ້ວ,ມັນແມ່ນຂ່າວດີທີ່ເຮັດໃຫ້ນັກທຸລະກິດຊອຟແວດີໃຈທີ່ສຸດ.ຫວ່າງມໍ່ໆນີ້,ວິສາຫະກິດຜະລິດຄອມພິວເຕີໃຫຍ່ກວ່າໝູ່ສີ່ແຫ່ງຂອງຈີນເຊິ່ງລວມທັງກຸ່ມເລໂນໂວໄດ້ເຊັນສັນຍາຈັດຊື້ລະບົບຄຸມຈັກwindowsກັບບໍລິສັດMicrosoftຂອງອາເມລິກາຢ່າງເປັນລຳດັບ,ຍອດມູນຄ່າຂອງຂໍ້ຜູກພັນສູງຮອດ700ລ້ານໂດລາສະຫະລັດ.
ແນ່ນອນແລ້ວ,ບໍ່ພຽງແຕ່ບໍລິສັດMicrosoftບໍລິສັດດຽວຮູ້ສຶກດີໃຈ,ລະບົບຄຸມຈັກLinuxທີ່ແກ່ງແຍ່ງກັບລະບົບຄຸມຈັກWindowsໃນຕະຫຼາດເປັນເລລາຍາວນານນັ້ນກໍ່ຊອກໄດ້ໂອກາດການຄ້າໃໝ່.ບໍລິສັດວິທະຍາສາດເຕັກນິກຊອຟແວຈົ່ງເຄີ່ຮົງຊີຈຳກັດແມ່ນບໍລິສັດຊອຟແວທີ່ຄົ້ນຄວ້າພັດທະນາລະບົບLinuxສະບັບພາສາຈີນ,ຍ້ອນວ່າເມື່ອທຽບກັບລະບົບWindowsແລ້ວລາຄາຂອງLinuxສະບັບພາສາຈີນມີທ່າແຮງຢ່າງເດັ່ນຊັດ,ສະນັ້ນ,ໃນວຽກງານຄອມພິວເຕີຂອງຂະແໜງການອົງການປົກຄອງໃຊ້ຊອຟແວແບບແທ້ທີ່ລັດຖະບານຈີນເຜີຍແຜ່ໃນຫຼາຍປີມໍ່ໆນີ້,ລະບົບLinuxໄດ້ຮັບຊ່ອງຫວ່າງພັດທະນາບໍ່ໜ້ອຍ.
ທ່ານວາງມິງຮວາ ຜູ້ຈັດການພະແນກພັດທະນາຕະຫຼາດຂອງບໍລິສັດຈົ່ງເຄີ່ຮົງຊີເວົ້າວ່າ,ຕະຫຼາດ90%ຂອງລະບົບLinuxສະບັບພາສາຈີນແມ່ນການຈັດຊື້ຂອງຂະແໜງການອົງການປົກຄອງ.ພາຍຫຼັງລັດຖະບານຈີນປະກາດໃຊ້ຂໍ້ກຳນົດທີ່ຮຽກຮ້ອງໃຫ້ວິສາຫະກິດຜະລິດຄອມພິວເຕີຕິດຕັ້ງລະບົບຄຸມຈັກແບບແທ້ແລ້ວ,ບໍລິສັດຫຼັງນີ້ຈະໄດ້ຮັບໂອກາດການຄ້າຫຼາຍກວ່າເກົ່າ.ທ່ານເວົ້າວ່າ:
"ພວກເຮົາເຫັນວ່າ,ເອກະສານທີ່ຫຼາຍກະຊວງຂອງລັດປະກາດໃຊ້ນັ້ນແມ່ນສຳຄັນທີ່ສຸດຕໍ່ການຊຸກຍູ້ການປົກປ້ອງສິດຊັບສິນທາງປັນຍາ.ປັດຈຸບັນລັດໄດ້ເພີ່ມທະວີການປົກປ້ອງສິດຊັບສິນທາງປັນຍາຢ່າງບໍ່ຢຸດຢັ້ງ,ປະຊາຊົນກໍມີທັດສະນະຄະຕິປົກປ້ອງສິດຊັບສິນທາງປັນຍານັບມື້ນັບເພີ່ມຂຶ້ນ,ວິສາຫະກິດກໍ່ສະໜັບສະໜູນທີ່ສຸດ.ເວົ້າສຳລັບພວກເຮົາ,ແລ້ວກໍ່ຈະມີໂອກາດຫຼາຍກວ່າເກົ່າໃນຕະຫຼາດ."
ໃນຂະນະດຽວກັນນັ້ນ,ທ່ານວາງຈີ້ຊຽງ ໂຄສົກກົມລິຂະສິດແຫ່ງຊາດຈີນກໍຮັບຮອງວ່າ,ເຖິງວ່າອົງການປົກຄອງຂັ້ນເມືອງຂຶ້ນໄປຂອງຈີນໄດ້ໃຊ້ຊອຟແວແບບແທ້ໂດຍພື້ນຖານແລ້ວ,ແຕ່ຖ້າຢາກເຜີຍແຜ່ໃຊ້ແບບແທ້ໃນວິສາຫະກິດທັງໝົດ,ກໍ່ມີຄວາມຫຍຸ້ງຍາກຫຼາຍສົມຄວນ.ທ່ານເວົ້າວ່າ:
"ເມື່ອເບິ່ງຈາກສະພາບກໍ່ສ້າງລະບອບກົດໝາຍແລະທັດສະນະຄະຕິຄຸນສົມບັດຂອງຄົນທັງຫຼາຍໃນປັດຈຸບັນແລ້ວເຫັນວ່າ,ສາທາລະນະຊົນຍັງເຮັດບໍ່ໄດ້ເທື່ອ.ປະຈຸບັນແມ່ນສົ່ງເສີມໃຫ້ວິສາຫະກິດໃຊ້ຊອຟແວແບບແທ້,ຈຸດໜັກຄວນຢູ່ໃນວິສາຫະກິດຂະໜາດໃຫຍ່,ແລ້ວຄ່ອຍໆເຜີຍແຜ່ໄປສູ່ວິສາຫະກິດຂະໜາດກາງແລະນ້ອຍ.ເມື່ອຜ່ານຈາກໄລຍະໃດໜຶ່ງແລ້ວ,ເຮັດໃຫ້ວຽກງານໃຊ້ຊອຟແວແບບແທ້ໃນວິສາຫະກິດກະເຕື້ອງດີຂຶ້ນໃນດ້ານກົກຮາກ."
ທ່ານວາງຈື້ຊຽງແນະນຳວ່າ,ປີນີ້,ຈຸດໜັກຂອງວຽກງານປົກປ້ອງລິກຂະສິດຂອງຈີນແມ່ນເຜີຍແຜ່ໃຊ້ຊອຟແວແບບແທ້ໃນວິສາຫະກິດຂະໜາດໃຫຍ່.ວິສາຫະກິດຂະໜາດໃຫຍ່ເຫຼົ່ານີ້ບໍ່ພຽງແຕ່ລວມທັງລັດວິສາຫະກິດຂະໜາດໃຫຍ່ທໍ່ນັ້ນ,ຍັງລວມທັງວິສາຫະກິດຂະໜາດໃຫຍ່ທີ່ນັກທຸລະກິດຕ່າງປະເທດລົງທຶນແລະເອກະຊົນ.ຫວ່າງກ່ອນນີ້ບໍ່ດົນ,ວິສາຫະກິດຂະໜາດໃຫຍ່300ກວ່າແຫ່ງໃນແດນຈີນໄດ້ຮ່ວມກັນລົງນາມໃນຂໍ້ລິເລີ່ມໃຫ້ວິສາຫະກິດໃຊ້ຊອຟແວແບບແທ້,ຮຽກຮ້ອງວິສາຫະກິດແລະໜ່ວຍງານຍິ່ງຫຼາຍໃຊ້ຊອຟແວແບບແທ້,ຂວ້ຳບາດຊອຟແວລັກລອກແບບ,ໂຄລົບແລະປົກປ້ອງສິດຊັບສິນທາງປັນຍາ.
ແຕ່ວ່າ,ເມື່ອທຽບກັບວິສາຫະກິດຂະໜາດໃຫຍ່ທີ່ມີກຳລັງຕົວຈິງຊື້ຊອຟແວແບບແທ້ແລ້ວ,ວິສາຫະກິດຂະໜາດກາງແລະນ້ອຍບາງແຫ່ງພ້ອມດ້ວຍຜູ້ໃຊ້ສ່ວນບຸກຄົນຍັງບໍ່ກ້າຊື້ຊອຟແວແບບແທ້ຍ້ອນລາຄາແພງ,ຄາດຄະເນໄດ້ວ່າ,ເຖິງວ່າລັດຖະບານຈີນໄດ້ປະກາດຄຳສັ່ງເຂັ້ມງວດທີ່ຕ້ອງຕິດຕັ້ງລະບົບຄຸມຈັກແບບແທ້ໃນເວລາຜະລິດຄອມພິວເຕີ,ແຕ່ວ່າຖ້າຢາກໃຊ້ຊອຟແວແບບແທ້ຢ່າງຮອບດ້ານແທ້ຈິງ,ຍັງແມ່ນໜ້າທີ່ໜັກໜາບົນເສັ້ນທາງຍາວໄກ.ທ່ານວາງຈື້ຊຽງ ໂຄສົກກົມລິຂະສິດແຫ່ງຊາດຈີນເຫັນວ່າ,ນີ້ຕ້ອງການຄວາມພະຍາຍາມສາມດ້ານ,ຄື:ລັດຖະບານປະຕິບັດກົດໝາຍຢ່າງແຂງແຮງກວ່າເກົ່າ,ວິສາຫະກິດຊອຟແວຕັ້ງໜ້າຮັກສາສິດຂອງຕົນແລະທົ່ວສັງຄົມຍົກທັດສະນະຄະຕິກ່ຽວກັບລິກຂະສິດໃຫ້ສູງຂຶ້ນ.
ບໍລິສັດຈີນຊ່ານແມ່ນວິສາຫະກິດຊອຟແວທີ່ມີຊື່ສຽງຂອງຈີນ,ຊອຟແວເຮັດການ,ຊອຟແວແປພາສາແລະຊອຟແວດັບໄວລັສທີ່ບໍລິສັດດັ່ງກ່າວຄົ້ນຄວ້າຜະລິດນັ້ນໄດ້ຮັບຄວາມນິຍົມຊົມຊອບຫຼາຍສົມຄວນ.ໃນເວລາໃຫ້ສຳພາດຕໍ່ນັກຂ່າວວິທະຍຸພວກເຮົາ,ທ່ານເກີເຄີ່ ຮອງຜູ້ອຳນວຍການໃຫຍ່ຂອງບໍລິສັດດັ່ງກ່າວເວົ້າວ່າ,ທ່ານມີທ່າທີເຫັນໄປໃນແງ່ດີຕໍ່ການປົກແປງສະພາບແວດລ້ອມໃຊ້ຊອຟແວຂອງຈີນໃຫ້ດີຂຶ້ນໃນອະນາຄົດ.ທ່ານເວົ້າວ່າ:
"ຂ້າພະເຈົ້າເຫັນໄປໃນແງ່ດີທີ່ສຸດ,ຈີນຊ່ານຜະລິດຊອຟແວມາ10ກວ່າປີແລ້ວ,ກໍ່ໄດ້ເຫັນສະພາບແວດລ້ອມຂອງອຸດສາຫະກຳຊອຟແວຂອງຈີນດີຂຶ້ນເທື່ອລະກ້າວ.ໂດຍສະເພາະແມ່ນລັດຖະບານຈີນໄດ້ນຳໜ້າຊື້ຊອຟແວແບບແທ້ໃນປີ2004,ເປັນການເລີ່ມຕົ້ນຂອງວຽກງານປົກປ້ອງສິດຊັບສິນທາງປັນຍາຂອງຈີນ,ຂ້າພະເຈົ້າກໍໄດ້ຍັງເຫັນວ່າ,ຜ່ານຈາກປີ2004,2005,ລວງທັງໄຕມາດທີ່ໜຶ່ງຂອງປີ2006,ລັດຖະບານຈີນໄດ້ໃຊ້ຊອຟແວແບບແທ້ໃນຂັ້ນພື້ນຖານແລ້ວ.ຂ້າພະເຂົ້າເຊື່ອວ່າ,ການປະກາດໃຊ້ນະໂຍບາຍໃໝ່ລາຍນີ້ກໍເປັນການເລີ່ມຕົ້ນທີ່ວິສາຫະກິດໃຊ້ຊອຟແວແບບແທ້.ຄວນເວົ້າວ່າ,ການປົກປ້ອງສິດຊັບສິນທາງປັນຍາຂອງຈີນຈະນັບມື້ນັບດີຂຶ້ນ."
|
