|
ຕາມຂ່າວ CRI: ຄາດວ່າຈະມີນັກທ່ອງທ່ຽວຕ່າງປະເທດ 2 ແສນ 5 ໝື່ນຄົນມາເບິ່ງງານກິລາໂອລິມປິກປີ 2008 ຢູ່ປັກກິ່ງ, ແຕ່ປັກກິ່ງກໍ່ບໍ່ຢາກສ້າງໂຮງແຮມໃໝ່ຢ່າງຂະໜາດໃຫຍ່, ຫາກກຽມຜ່ານຈາກການດັດສ້າງໂຮງແຮມທີ່ມີຢູ່ໃນປັດຈຸບັນມາຕອບສະໜອງຄວາມຕ້ອງການຂອງງານກິລາໂອລິມປິກ.
ໃນກອງປະຊຸມເທື່ອໜຶ່ງທີ່ຈັດຂຶ້ນຢູ່ທີປັກກິ່ງໃນວັນທີ 19 ພຶດສະພາ, ທ່ານຕູ້ຈ່ຽງ ຫົວໜ້າຜູ່ໃໝ່ຂອງພະແນກທ່ອງທ່ຽວນະຄອນປັກກິ່ງກ່າວວ່າ, ໃນຂະນະທີ່ອອກແຮງຍົກສູງລະດັບການບໍລິການຂອງໂຮງແຮມຕິດດາວນັ້ນ, ປັກກິ່ງຈະຊຸກຍູ້ການດັດສ້າງແລະຍົກສູງລະດັບດ້ານຮາດແວແລະຊອບແວຂອງໂຮງແຮມບໍ່ຕິດດາວ. ທ່ານກ່າວວ່າ, ການນຳໃຊ້ຊັບພະຍາກອນຮັບຕ້ອນການເຂົ້າພັກທີ່ປັກກິ່ງມີຢູ່ໃນປັດຈຸບັນຢ່າງເຕັມສ່ວນ, ແລະດັດສ້າງແລະປ່ຽນອຸປະກອນໂຮງແຮມບໍ່ຕິດດາວທີ່ມີຢູ່ໃນປັດຈຸບັນ, ຈະສາມາດຕອບສະໜອງຄວາມຕ້ອງການໃນການຮັບຕ້ອນງານກິລາໂອລິມປິກປັກກິ່ງຢ່າງສົມບູນ, ກໍ່ບໍ່ສິ້ນເປືອງຊັບພະຍາກອນແລະບໍ່ເຮັດໃຫ້ໂຮງແຮມເປົ່າຫວ່າງຫຼັງງານກິລາໂອລິມປິກ. ທ່ານຫວັງໃຫ້ວິສາຫະກິດໂຮງແຮມແລະນັກລົງທຶນທີ່ຊື່ດັງຂອງຈີນແລະຕ່າງປະເທດລົງທຶນເຂົ້າໃນການດັດສ້າງໂຮງແຮມທີ່ບໍ່ຕິດດາວຂອງປັກກິ່ງ.
ປັດຈຸບັນ ປັກກິ່ງມີໂຮງແຮມຕິດດາວ 650 ກວ່າຫຼັງ. ຕາມຄຳໝັ້ນສັນຍາຂອງປັກກິ່ງໃນເວລາຮ້ອງຂໍເປັນເຈົ້າພາບຈັດງານກິລາໂອລິມປິກ, ຮອດປີ 2008, ໂຮງແຮມຕິດດາວຂອງປັກກິ່ງຄວນມີ 800 ຫຼັງ.
|
