|
ສະບາຍດີທ່ານຜູ່ຟັງທີ່ໂຄລົບ, ງານກິລາໂອລິມປິກລະດູຮ້ອນຄັ້ງທີ 29 ຈະຈັດຂຶ້ນຢູ່ຈີນໃນປີ 2008, ປັດຈຸບັນ, ວຽກງານກະກຽມງານກິລາໂອລິມປິກພວມຂຸ້ນຂ້ຽວດຳເນີນຢູ່. ນອກຈາກນະຄອນປັກກິ່ງ ຕົວເມືອງເຈົ້າພາບແລ້ວ, ບາງລາຍການງານກິລາໂອລິມປິກປັກກິ່ງກໍ່ຈະຈັດຂຶ້ນຢູ່ 6 ຕົວເມືອງ ຄື ນະຄອນຊຽງໄຮ້ ນະຄອນຊິ່ງຕາວ ນະຄອນເສິນຢາງ ນະຄອນສິນຫວງຕາວ ນະຄອນທຽນສິນແລະນະຄອນຮົງກົງ. ເພື່ອຮູ້ຈັກສະພາບກະກຽມງານກິລາໂອລິມປິກຂອງຕົວເມືອງດັ່ງກ່າວ, ຫວ່າງມໍ່ໆນີ້, ນັກຂ່າວ CRI ໄດ້ໄປເອົາຂ່າວຢູ່ນະຄອນຊຽງໄຮ້. ຕໍ່ໄປເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ນະຄອນຊຽງໄຮ້ເຮັດວຽກກະກຽມຢ່າງພຽນໃຈເພື່ອຈັດການແຂ່ງຂັນບາງລາຍການຂອງງານກິລາໂອລິມປິກປີ 2008.
ນະຄອນຊຽງໄຮ້ຕັ້ງຢູ່ພາກຕາເວັນອອກຂອງຈີນ, ແມ່ນບ່ອນຈັດການແຂ່ງຂັນບານເຕະຈຳນວນໜຶ່ງຂອງງານກິລາໂອລິມປິກຄັ້ງທີ 29, ຕາມການຈັດວາງ, ນະຄອນຊຽງໄຮ້ຈະຈັດການແຂ່ງຂັນບານເຕະຮອບຕົ້ນ 9 ນັດຂອງງານກິລາໂອລິມປິກແຕ່ວັນທີ 6 ຫາວັນທີ 15 ສິງຫາປີ 2008, ໃນນັ້ນລວມທັງການແຂ່ງຂັນບານເຕະເພດຊາຍ 6 ນັດເພດຍິງ 3 ນັດ.
ອົງການປົກຄອງນະຄອນຊຽງໄຮ້ເອົາໃຈໃສ່ໃນລະດັບສູງຕໍ່ວຽກງານກະກຽມງານກິລາໂອ ລິມປິກປີ 2008, ໃນລະດູໃບໄມ້ປົ່ງປີ 2005 ພຸ້ນ, ນະຄອນຊຽງໄຮ້ກໍ່ໄດ້ຕັ້ງໜ່ວຍນຳພາເຂດແຂ່ງຂັນຊຽງໄຮ້ເຊິ່ງແມ່ນທ່ານຢາງສຽວຕູ້ ຮອງເຈົ້າຄອງນະຄອນຊຽງໄຮ້ເປັນຫົວໜ້າ. ປັດຈຸບັນ, ອົງການປົກຄອງຊຽງໄຮ້ພວມປຸກລະດົມທຸກກ້ຳທຸກຝ່າຍ ດຳເນີນວຽກງານກະກຽມທຸກລາຍຢ່າງຕັ້ງໜ້າຕາມຄວາມຮຽກຮ້ອງຕ້ອງການຂອງຄະນະກຳມະການຈັດງານກິລາໂອລິມປິກ. ທ່ານສິ່ວເວິຍຊາງ ຮອງຫົວໜ້າພະແນກກິລານະຄອນຊຽງໄຮ້ເວົ້າວ່າ:
ເທື່ອນີ້ພວກຂ້າພະເຈົ້າໂຊກດີທີ່ຈະໄດ້ຈັດການແຂ່ງຂັນບານເຕະງານກິລາໂອລິມປິກ, ປັດຈຸບັນ ວຽກງານກະກຽມທຸກລາຍພວມດຳເນີນໄປຢ່າງມີລະບຽບ, ຈະປະຕິບັດຕາມຄວາມຮຽກຮ້ອງຕ້ອງການໃນທຸກດ້ານເຊິ່ງລວມທັງສະໜາມກິລາເປັນຕົ້ນ, ພະນັກງານທີ່ກ່ຽວຂ້ອງກໍ່ຂຶ້ນໜ້າວຽກເທື່ອລະກ້າວ. ເຖິງວ່ານະຄອນຊຽງໄຮ້ໄດ້ຮັບກຽດຈັດການແຂ່ງຂັນບານເຕະຮອບຕົ້ນຄື ຮອບຄັດເລືອກກໍຕາມ, ແຕ່ພວກຂ້າພະເຈົ້າກໍ່ຈະພະຍາຍາມຈັດການແຂ່ງຂັນໃຫ້ຢູ່ໃນອັນດັບໜຶ່ງ.
ນະຄອນຊຽງໄຮ້ໄດ້ກຳນົດຈຸດເລີ່ມຕົ້ນຂອງວຽກງານກະກຽມຄື"ບໍລິການງານກິລາໂອລິມປິກປັກກິ່ງ". ຜູ່ຮັບຜິດຊອບທີ່ກ່ຽວຂ້ອງຂອງເຂດແຂ່ງຂັນໄດ້ເຂົ້າຮ່ວມກອງປະຊຸມທີ່ຄະນະກຳມະການຈັດງານກິລາໂອລິມປິກປັກກິ່ງແລະຄະນະກຳມະການປະສານງານກິລາໂອລິມປິກຄັ້ງທີ 29 ຂອງຄະນະກຳມະການໂອລິມປິກສາກົນເປັນຜູ່ຈັດຂຶ້ນຫຼາຍເທື່ອ, ແລະໄດ້ສົ່ງພະນັກງານທີ່ກ່ຽວຂ້ອງໄປເຂົ້າຮ່ວມຊຸດອົບຮົມວິຊາການ ເຊັ່ນ ການຈັດການແຂ່ງຂັນ ການພັດທະນາຕະຫຼາດແລະການສະເໜີຊື່ຈົດທະບຽນເປັນຕົ້ນ ເຊິ່ງຈັດໂດຍຄະນະກຳມະການຈັດງານກິລາໂອລິມປິກປັກກິ່ງ. ນອກຈາກອົບຮົມພະນັກງານທີ່ກ່ຽວຂ້ອງແລ້ວ, ນະຄອນຊຽງໄຮ້ຍັງຕອບສະໜອງຕາມຄວາມຮຽກຮ້ອງຂອງຄະນະກຳມະການຈັດງານກິລາໂອລິມປິກ, ໂຄສະນາມາລະຍາດຕໍ່ໄທເມືອງແລະແຟນບານເຕະອັນໄພສານ ເຊັ່ນ ຊົມການແຂ່ງຂັນບານເຕະຢ່າງມີມາລະຍາດແລະເປັນເຈົ້າພາບທີ່ດີເປັນຕົ້ນ.
ຕາມແຜນການ, ການແຂ່ງຂັນບານເຕະຮອບຕົ້ນຂອງງານກິລາໂອລິມປິກປັກກິ່ງຈະຈັດຂຶ້ນຢູ່ສະໜາມກິລາຊຽງໄຮ້. ສະໜາມກິລາແຫ່ງນີ້ໄດ້ສ້າງສຳເລັດເມື່ອປີ 1997, ແມ່ນສະໜາມກິລາສັງລວມທີ່ໃຫຍ່ກວ່າໝູ່ຂອງຊຽງໄຮ້ໃນປັດຈຸບັນ, ສາມາດບັນຈຸຜູ່ຊົມ 8 ໝື່ນຄົນ. ປັດຈຸບັນ, ນະຄອນຊຽງໄຮ້ພວມສ້ອມແປງບາງສິ່ງກໍ່ສ້າງຂອງສະໜາມກິລາດັ່ງກ່າວ. ທ່ານຫູເສິນສີ ຜູ່ຮັບຜິດຊອບສະໜາມກິລາຊຽງໄຮ້ກ່າວວ່າ, ພາຍຫຼັງສ້ອມແປງເສັດສັບແລ້ວ, ສະໜາມກິລາຊຽງໄຮ້ຈະໄດ້ຕາມມາດຖານຂອງສະໜາມແຂ່ງຂັນບານເຕະງານກິລາໂອລິມປິກຢ່າງສົມບູນ.
ການຄົມມະນາຄົມລຸລ່ວງແມ່ນໜຶ່ງໃນບັນດາສິ່ງສຳຄັນທີ່ຮັບປະກັນການດຳເນີນຢ່າງສະດວກຂອງງານກິລາຂະໜາດໃຫຍ່ຕ່າງໆ, ສະນັ້ນ, ເຮັດແນວໃດຈະຮັບປະກັນໃຫ້ທີມບານເຕະແລະບຸກຄົນທີ່ກ່ຽວຂ້ອງທີ່ເຂົ້າຮ່ວມການແຂ່ງຂັນງານກິລາໂອລິມປິກໄປມາຢູ່ລະຫວ່າງໂຮງແຮມກັບສະໜາມແຂ່ງຂັນໃນເວລາສັ້ນທີ່ສຸດນັ້ນ ໄດ້ເປັນບັນຫາເອົາໃຈໃສ່ທີ່ສຸດຂອງຜູ່ຈັດຕັ້ງການແຂ່ງຂັນຊຽງໄຮ້. ທ່ານສິ່ວເວິຍຊາງ ຮອງຫົວໜ້າພະແນກກິລານະຄອນຊຽງໄຮ້ເຜີຍໃຫ້ຮູ້ວ່າ, ໃນໄລຍະຈັດການແຂ່ງຂັນບານເຕະງານກິລາໂອລິມປິກ, ເຂດອ້ອມຂ້າງສະໜາມກິລາຊຽງໄຮ້ຈະຄວບຄຸມການສົນຈອນຕາມເສັ້ນທາງຊົ່ວຄາວ, ຝ່າຍອົງການປົກຄອງສົ່ງເສີມໃຫ້ໄທເມືອງຢູ່ອ້ອມຂ້າງອອກເດີນທາງດ້ວຍລົດເມປະຈຳທາງ, ເພື່ອຫຼຸດຈຳນວນລົດຍົນແລ່ນຢູ່ເຂດນີ້.
ໃນເວລາເອົາຂ່າວຢູ່ຊຽງໄຮ້ ນັກຂ່າວຍັງໄດ້ຮູ້ວ່າ, ບໍ່ພຽງແຕ່ອົງການປົກຄອງນະຄອນຊຽງໄຮ້ສຸດທີ່ເອົາໃຈໃສ່ນຳວຽກງານກະກຽມງານກິລາໂອລິມປິກເທົ່ານັ້ນ, ໄທເມືອງຊຽງໄຮ້ກໍ່ຮູ້ສຶກດີໃຈຫຼາຍທີ່ການແຂ່ງຂັນບານເຕະຈຳນວນໜຶ່ງຈະຈັດຂຶ້ນຢູ່ນະຄອນຊຽງໄຮ້.ທ້າວກູ້ທ່າວ ນັກສຶກສາມະຫາວິທະຍາໄລກິລາຊຽງໄຮ້ເວົ້າວ່າ:
ງານກິລາໂອລິມປິກແມ່ນງານມະຫາກຳ, ສ່ວນການແຂ່ງຂັນບານເຕະກໍ່ແມ່ນລາຍການທີ່ໄດ້ຮັບຄວາມສົນໃຈທີ່ສຸດ, ເທື່ອນີ້ ການແຂ່ງຂັນບານເຕະຈຳນວນໜຶ່ງຈະຈັດຂຶ້ນຢູ່ຊຽງໄຮ້, ຂ້າພະເຈົ້າຮູ້ສຶກດີໃຈຫຼາຍ. ໃນໄລຍະງານກິລາໂອລິມປິກປີ 2008, ຂ້າພະເຈົ້າຍັງຮຽນຢູ່ໃນມະຫາວິທະຍາໄລ, ຫວັງວ່າຮອດເວລານັ້ນ ຂ້າພະເຈົ້າຈະມີໂອກາດເປັນຜູ່ອາສາສະໝັກ, ບໍລິການບັນດານັກກິລາທີ່ເຂົ້າຮ່ວມການແຂ່ງຂັນ, ອຸທິດກຳລັງຂອງຕົນເພື່ອງານກິລາໂອລິມປິກ.
|
