|
|
 |
| (GMT+08:00)
2006-05-23 15:41:43
|
 |
|
ຈາກການບໍ່ຮູ້ຕົວໜັງສືຈີນຈັກໂຕຫັນໄປສູ່ການຈັດລາຍການດ້ວຍພາສາຈີນ
cri
|
ທີ່ຟັງມານັ້ນແມ່ນລາຍການສາຍຕາຂອງຊາວຕ່າງປະເທດຂອງວິທະຍຸCRIພວກເຮົາ,ເມື່ອໄດ້ຟັງໂຄສົກອຽກລັງທີ່ຊື່ວ່າຣີຊາດໂດຣັນເວົ້າພາສາຈີນຢ່າງຫຼ່ຽນໄຫຼດີ,ໃຜຊິຄິດອອກວ່າ,ບໍ່ເທົ່າໃດປີກ່ອນ,ທ່ານຍັງບໍ່ຮູ້ຕົວໜັງສືຈີນຈັກໂຕ.
ເມື່ອ8ປີກ່ອນ,ທ່ານຣີຊາດໂດຣັນຫາກໍຮຽນຈົບຈາກມະຫາວິທະຍາໄລ,ໄປພັກຜ່ອນຢ່ອນໃຈຢູ່ອົສຕຼາລີນຳໝູ່.ພວກເຂົາເຈົ້າພັກຢູ່ເຮືອນພັກສາກົນແຫ່ງໜຶ່ງທີ່ຊິດນີ,ແລະໄດ້ຮູ້ຈັກຊາວຈີນທີ່ດູດດື່ມຜູ້ໜຶ່ງຢູ່ຫັ້ນ. ຊາວຈີນຜູ້ນີ້ໄດ້ແນະນຳທ່ານຣີຊາດໂດຣັນກັບໝູ່ເພື່ອນອັງກິດສອງຄົນແລ້ວໄດ້ພ້ອມກັນມາສອນພາສາອັງກິດຢູ່ໂຮງຮຽນມັດທະຍົມແຫ່ງໜຶ່ງຂອງເມືອງລຽວຢາງແຂວງລຽວນິງພາກຕາເວັນອອກສຽງເໜືອຂອງຈີນ.
ໄລຍະສອນພາສາອັງກິດຢູ່ເມືອງລຽວຢາງໄດ້ເຮັດໃຫ້ທ່ານຣີຊາດໂດຣັນມີພາບປະທັບໃຈອັນດີງາມ.ບໍ່ວ່າເພື່ອນຮ່ວມງານຈີນໃນໂຮງຮຽນຫຼືວ່ານັກຮຽນທີ່ທ່ານເຄີຍສອນ,ລວນແຕ່ມັກຄູສອນຕ່າງປະເທດ.ນັກຮຽນໄດ້ຕັ້ງຊື່ຈີນທີ່ມີຄວາມໝາຍເລິກເຊິ່ງໃຫ້ທ່ານ ຄື ຕົງໂມ້ຮານ,ຕົງແມ່ນນາມສະກຸນ,ໂມ້ແປວ່າທະເລຊາຍ, ຮານແປວ່າເກັບໂຮມແລະຮັກສານ້ຳ.ພວກເຂົາເຈົ້າຫວັງໃຫ້ຄູສອນຂອງຕົນມີໃຈ ກວ້າງຄືທະເລຊາຍ,ມີຄວາມປາຖະໜາຕໍ່ຄວາມຮູ້ຄືທະເລຊາຍປາຖະໜາ ຢາກໄດ້ນ້ຳ.
ຢູ່ທີ່ນີ້,ທ່ານຍັງໄດ້ພົບນາງສາວທີ່ມີຈິດໃຈເຫຼື້ອມໄສສັດທາຄື ນາງຫຼີຢິງ ຄູສອນຂອງຈີນທີ່ສອນພາສາອັງກິດໃນໂຮງຮຽນແຫ່ງດຽວກັນ.ເວລາຜ່ານໄປໄວທີ່ສຸດ,ທຳອິດທ່ານຣີຊາດໂດຣັນມີແຜນຢູ່ຈີນພຽງແຕ່ເດືອນໜຶ່ງທໍ່ນັ້ນ,ແຕ່ໃນທີ່ສຸດໄດ້ຢູ່ຈີນເກືອບປີໜຶ່ງ.ເມື່ອຂໍ້ຜູກພັນຈຸບກຳນົດແລ້ວ,ທ່ານໄດ້ກັບຄືນສູ່ອຽກລັງ,ແຕ່ດວງໃຈຂອງທ່ານໄດ້ຖືກປະເທດຈີນແລະນາງສາວຈີນຜູ້ສວຍງາມຜູ້ນັ້ນຍຶດຄອງແລ້ວ.
ເມື່ອໄດ້ສຳນຶກກຶກກອງຢ່າງທຸ່ນທ່ຽງແລ້ວ,ທ່ານຣີຊາດໂດຣັນຕົກລົງມາຈີນອີກ.ເທື່ອນີ້,ທ່ານໄດ້ສະເໜີຕົວເສັງເຂົ້າມະຫາວິທະຍາໄລພາສາສາດປັກກິ່ງ,ແລະຮຽນພາສາຈີນເປັນເວລາສາມປີເຄິ່ງ.
ທ່ານຣີຊາດໂດຣັນເປັນຄົນສະຫຼາດ,ຮຽນພາສາຈີນກໍໄວທີ່ສຸດ,ທ່ານໄດ້ໃຊ້ເວລາບໍ່ດົນກໍໄດ້ກຳພາສາຈີນທີ່ຖືເປັນພາສາຮຽນຍາກກວ່າໝູ່ໂດຍທົ່ວໄປ.ໃນການເຄື່ອນໄຫວສະແດງເທື່ອໜຶ່ງໃນໂຮງຮຽນ,ທ່ານກັບນັກສຶກສາອາຟຼິກາຜູ້ໜຶ່ງໄດ້ສະແດງລາຍການຊ້ຽງເຊິ່ງຈີນ,ຕໍ່ມາໃນການແຂ່ງຂັນຄວາມສາມາດແລະສິລະປະການສະແດງຂອງຊາວຕ່າງປະເທດທີ່ໂທລະພາບປັກກິ່ງຈັດຂຶ້ນປີລະເທື່ອນັ້ນ,ທ່ານຣີຊາດໂດຣັນກັບຄູ່ປະສານງານຊີງໄດ້ຊະນະເລີດ.
ທ່ານຕິ່ງກວງຊວນ ນັກສິລະປິນຊ້ຽງເຊິ່ງທີ່ມີຊື່ສຽງຂອງຈີນໄດ້ເຫັນໄປໃນແງ່ດີຕໍ່ຄວາມສາມາດສະແດງຊ້ຽງເຊິ່ງຂອງທ່ານຣີຊາດໂດຣັນ,ແລະຮັບເອົາທ່ານໂດ ຣັນເປັນລູກສິດ.ທ່ານຕິ່ງກວງຊວນກໍຍ້ອງຍໍທີ່ສຸດຕໍ່ລູກສິດຕ່າງປະເທດຜູ້ນີ້,ເອີ້ນທ່ານ"ສຽວຕົງ"ຄືທ້າວຕົງນ້ອຍຢ່າງສະໜິດສະໜົມ,ທ່ານໂດຣັນກໍເອີ້ນຄູວ່າ"ຕິ່ງເຢ"ຢ່າງສະໜິດສະໜົມຕາມຮີດຄອງປະເພນີຂອງຈີນ.ເທື່ອໃດເວົ້າເຖິງທ່ານຣີຊາດໂດຣັນ,ທ່ານຕິງກວງຊວນກໍ່ຕ້ອງຍ້ອງຍໍ.ທ່ານເວົ້າວ່າ,
ລາວມີຄຸນທາດຕະຫຼົກຫຼາຍ,ໄດ້ສະແດງຄວາມຕະຫຼົກຢູ່ທຸກໆບ່ອນໃນຊີວິດການເປັນຢູ່,ແລະກໍສຸດທີ່ເອົາໃຈໃສ່ນຳການຖອດຖອນເອົາເລື່ອງຕະຫຼົກຂອງຈີນ ໃນເວລາແລກປ່ຽນກັບຊາວຈີນ,ແລະເສີມຂະຫຍາຍຄວາມຕະຫຼົກຂອງອຽກລັງ. ການສະແດງຂອງລາວສາມາດເຮັດໃຫ້ຜູ້ຊົມຫົວເປັນພິເສດ,ສາມາດເຊື່ອມໂຍງກັບຜູ້ຊົມ,ພວກເຮົາເວົ້າວ່າລາວເໝາະກັບການສະແດງຢູ່ເທິງເວທີທີ່ສຸດ.
ທ່ານຣີຊາດໂດຣັນທີ່ຊ່າງສະແດງຍັງໄດ້ເປັນຜູ້ຈັດລາຍການຄື້ນພາສາຈີນຕໍ່ພາຍໃນປະເທດຂອງວິທະຍຸພວກເຮົາແລະເປັນຜູ້ຈັດລາຍການຂອງວິທະຍຸປັກກິ່ງ.ທ່ານເວົ້າວ່າເລືອກເອົາວຽກງານຜູ້ຈັດລາຍການແມ່ນຍ້ອນວ່າເຮັດວຽກລາຍນີ້ມີຜົນດີຫຼາຍຕໍ່ຕົນເອງ.ທ່ານເວົ້າວ່າ,
ສອງລາຍການນີ້ລ້ວນແຕ່ມ່ວນຫຼາຍ,ໄດ້ເຮັດໃຫ້ຂ້າພະເຈົ້າມີໂອກາດຫຼາຍກວ່າເກົ່າເພື່ອໄປຊອກຮູ້ຊີວິດການເປັນຢູ່ຂອງປະຊາຊົນສາມັນຂອງຈີນ,ໂດຍສະເພາະແມ່ນປະຊາຊົນຈີນທີ່ດຳລົງຊີວິດຢູ່ໃນຕົວເມືອງໃຫຍ່.
ໃນລາຍການ "ສາຍຕາຂອງຊາວຕ່າງປະເທດ"ຂອງວິທະຍຸພວກເຮົາ,ທ່ານຣີຊາດໂດຣັນກັບທ່ານຈູລຽນທີ່ມາຈາກຝຣັ່ງແລະນາງຫຼີຊິ່ນທີ່ມາຈາກເມືອງທຽນສິນຈີນສາມຄົນປະສານງານກັນຢ່າງເປັນປະຈຳ,ປະກອບຄຳຄິດຄຳເຫັນຂອງໃຜລາວກ່ຽວກັບບາງຫົວຂໍ້ຈຸດຮ້ອນໃນສັງຄົມຈີນດ້ວຍພາສາຈີນກາງແລະຫາລືກັນຈາກສາຍຕາຕ່າງກັນລະຫວ່າງຝ່າຍຕາເວັນອອກກັບຝ່າຍຕາເວັນຕົກ.
ນາງຫຼີຊິ່ນຜູ້ຈັດລາຍການຜູ້ໜຶ່ງບອກນັກຂ່າວວ່າ,ຍ້ອນວ່ານາງກັບທ່ານ ຣີຊາດໂດຣັນແລະທ່ານຈູລຽນມີເບື້ອງຫຼັງດ້ານການເຕີບໃຫຍ່ທີ່ຕ່າງກັນ,ສະນັ້ນ ຈຶ່ງມີທັດສະນະຕ່າງກັນ,ໃນເວລາຈັດລາຍການ,ພວກເຂົາເຈົ້າຈະໂຕ້ຖຽງກັນເລື້ອຍໆ,ບາງເທື່ອຍັງດຸເດືອດຫຼາຍ.ແຕ່ບໍ່ມີຜົນສະທ້ອນຕໍ່ປະສານງານກັນຂອງພວກເຂົາເຈົ້າໃນວຽກງານ,ສາມຄົນຢູ່ຮ່ວມກັນຢ່າງເບີກ ບານມ່ວນຊື່ນ.ນາງຫຼີຊິ່ນເວົ້າວ່າ,ນາງຮູ້ສຶກວ່າທ່ານອີຊາດໂດຣັນເປັນເດັກຊາຍທີ່ມີບຸກຄະລິກລັກສະນະ ແລະໜ້າຮັກ.ນາງເວົ້າວ່າ,
ໃນເວລາຈັດລາຍການ,ລາວໄດ້ສະແດງໃຫ້ເຫັນຄວາມສະຫຼາດແລະຕະຫຼົກຊວນຫົວ,ບາງເທື່ອຄືເດັກນ້ອຍ,ຢາກເວົ້າຫຍັງກໍເວົ້າໂລດ,ລາວຈະບອກຄວາມເຫັນຂອງຕົນຢ່າງກົງໄປກົງມາ,ບາງເທື່ອເຮັດໃຫ້ຄົນຮູ້ສຶກໜ້າຮັກເປັນພິເສດ.
ປັດຈຸບັນ,ນາງຫຼີຢິງ ຄູນສອນໂຮງຮຽນມັດທະຍົມຜູ້ສວຍງາມທີ່ຮູ້ຈັກກັນຢູ່ແຂວງລຽວນິງໃນປີນັ້ນໄດ້ກາຍເປັນເມຍຂອງທ່ານຣີຊາດໂດຣັນແລ້ວ,ພວກເຂົາເຈົ້າຍັງມີລູກຊາຍຜູ້ໜຶ່ງທີ່ມີອາຍຸ1ປີເຄິ່ງ.ຍ້ອນວ່າຕ້ອງດູແລລູກ,ນາງຫຼີຢິງຈຶ່ງໄດ້ເຊົາເຮັດວຽກຊົ່ວຄາວ.ເມື່ອຜູ້ອື່ນຖາມເຖິງອາຊີບຂອງເມຍ,ທ່ານຣີຊາດໂດຣັນກໍຕອບຢ່າງຕະຫຼົກວ່າ ກຳລັງສະເຫວີຍຊີວິດຢູ່ໃນເຮືອນ.ໃນເວລານອກໂມງການ,ນອກຈາກອ່ານປຶ້ມຢູ່ໃນເຮືອນແລ້ວ,ຄວາມມ່ວນຊື່ນທີ່ໃຫຍ່ກວ່າໝູ່ຂອງທ່ານຣີ ຊາດໂດຣັນກໍແມ່ນຫຼິ້ນກັບລູກຊາຍນ້ອຍ.
ເວລາ6ໂມງເຊົ້າທຸກໆມື້,ທ່ານຣີຊາດໂດຣັນກໍຕ້ອງຂີ່ລົດເມແລະລົດໄຟໃຕ້ດິນໄປເຮັດການຢູ່ສະຖານີວິທະຍຸ.ທ່ານຍັງໄດ້ໃຫ້ສຳພາດຢູ່ໂທລະພາບເລື້ອຍໆ, ຂຸ້ນນຳວຽກທຸກໆມື້.
ທ່ານຣີຊາດໂດຣັນບໍ່ມັກຜູ້ອື່ນເອີ້ນຕົນເປັນ ຫຼາວວ້າຍ ແປວ່າຊາວຕ່າງປະເທດ,ກໍບໍ່ມັກຊາວຈີນທັກທາຍນຳທ່ານດ້ວຍພາສາອັງກິດ,ທ່ານມັກກິນອາຫານຈີນທີ່ເມຍແຕ່ງໃຫ້,ບໍ່ສູໄປກິນອາຫານຝ່າຍຕາເວັນຕົກຢູ່ພັດຕາຄານ,ທ່ານຮູ້ສຶກວ່າຕົນເອງຄວນເຮັດຕາມຄຳພັງເພີຍທີ່ວ່າ"ເຂົ້າເມືອງຕາຫຼິ່ວຕ້ອງຫຼິ່ວຕາຕາມ".ຊາວໜຸ່ມອຽກລັງຜູ້ນີ້ເວົ້າວ່າ,ທ່ານມັກດຳລົງຊີວິດຄືໄທປັກກິ່ງຢ່າງແທ້ຈິງ.
|
|
|
