|
|
 |
| (GMT+08:00)
2006-05-25 18:35:34
|
 |
|
ຈີນຕັ້ງໜ້າເຮັດວຽກງານປ້ອງກັນແລະປິ່ນປົວວັນນະໂຣກ(ສຽງ)
cri
Author: shuo
|
ໃນປະຫວັດສາດ,ວັນນະໂຣກເຄີຍລະບາດຢ່າງກວ້າງຂວາງໃນທົ່ວໂລກ,ແລະພາໃຫ້ຫຼາຍ ຮ້ອຍລ້ານຄົນເສຍຊີວິດ.ແຕ່ຊຸມປີ50ສະຕະວັດທີ20ເປັນຕົ້ນມາ,ຄຽງຄູ່ກັບຄວາມກ້າວໜ້າຂອງແພດສາດແລະຢຸກຢາພ້ອມດ້ວຍການປົວແປງເງື່ອນໄຂສາທາລະນະສຸກໃຫ້ດີຂຶ້ນ,ການລະບາດວັນນະໂຣກໄດ້ຮັບການຄວບຄຸມໄວ້ໃນລະດັບໃດໜຶ່ງ.
ປະຈຸບັບນີ້,ພໍເວົ້າເຖິງພະຍາດຕິດແປດ,ຄົນທັງຫຼາຍຈະຄິດຮອດພະຍາດໄຂ້ຫວັດໃຫຍ່ຫຼືພະຍາດຕັບອັກເສບເປັນຕົ້ນ.ແຕ່ວ່າ,ມີຄົນໜ້ອຍທີ່ສຸດທີ່ຈະຄິດຮອດວັນນະໂຣກ.ທີ່ຈິງແລ້ວ,ວັນນະໂຣກແມ່ນພະຍາດຕິດແປດຊະນິດໜຶ່ງທີ່ເກີດຂຶ້ນຍ້ອນປອດຕິດເຊື້ອວັນນະໂຣກ,ເຄີຍລະບາດຢູ່ຈີນຢ່າງໜັກໜ່ວງທີ່ສຸດ,ໄດ້ທຳລາຍຄວາມປອດໄພດ້ານຊີວິດຂອງປະຊາຊົນຈີນຢ່າງຮ້າຍແຮງ.ແຕ່ຊຸມປີ50ຫາຊຸມປີ60ສະຕະວັດແລ້ວນີ້,ລັດຖະບານຈີນໄດ້ເພີ່ມທະວີວຽກງານປ້ອງກັນແລະປິ່ນປົວວັນນະໂຣກ,ໃຊ້ມາດຕະການປ້ອງກັນແລະປິ່ນປົວຢ່າງຫຼວງຫຼາຍ,ເຮັດໃຫ້ສະພາບລະບາດຂອງວັນນະໂຣກໄດ້ຮັບການຄວບຄຸມໄວ້ໃນລະ ດັບໃດໜຶ່ງ.
ແຕ່ໃນບໍ່ເທົ່າໃດປີມານີ້,ຍ້ອນສາເຫດຕ່າງໆ,ວັນນະໂຣກໄດ້ປະກົດມີທ່ວງທ່າລະບາດຄືນໃໝ່ຢູ່ຈີນ.ທ່ານວາງຫຼົງເຕີ ຮອງລັດຖະມົນຕີກະຊວງສາທາລະນະສຸກຈີນເວົ້າວ່າ:"ປະຈຸບັນນີ້,ຢູ່ຈີນຄວນເວົ້າວ່າ,ວັນນະໂຣກໄດ້ລະບາດຢ່າງຮ້າຍແຮງຫຼາຍ,ແລະປະເທດພວກເຮົາແມ່ນໜຶ່ງໃນ22ປະເທດໃນໂລກທີ່ມີການຫາບແບກອັນໜັກໜາໃນດ້ານວັນນະໂຣກ,ຈຳນວນຜູ້ຕິດວັນນະໂຣກຂອງຈີນເປັນທີສອງໃນໂລກ ຄືພຽງແຕ່ໜ້ອຍກວ່າອິນເດຍທໍ່ນັ້ນ."
ສະຖິຕິຂອງກະຊວງສາທາລະນະສຸກຈີນສະແດງໃຫ້ເຫັນວ່າ,ປະຈຸບັນນີ້,ຢູ່ຈີນມີຜູ້ຕິດວັນ ນະໂຣກປະມານ4ລ້ານ5ແສນຄົນ,ກວມ0,34%ຂອງຍອດປະຊາກອນທົ່ວປະເທດ.ແຕ່ລະປີ,ໃນທົ່ວປະເທດມີປະມານ1ແສນ3ໝື່ນຄົນຕາຍຍ້ອນວັນນະໂຣກ,ຫຼາຍກວ່າຍອດຈຳ ນວນຄົນທີ່ຕາຍຍ້ອນພະຍາດຕິດແປດອື່ນໆ.
ແຕ່ຊຸມປີ50ສະຕະວັດທີ20,ການສັກຢາວັກແຊງກັນວັນນະໂຣກກໍໄດ້ຖືກຈັດເຂົ້າໃນແຜນ ການປ້ອງກັນພະຍາດແຫ່ງຊາດຈີນ,ໄດ້ເຮັດເຖິງຂັ້ນທີ່ເດັກແດງໝົດທຸກຄົນພໍເກີດອອກ ມາກໍໄດ້ສັກຢາວັກແຊງດັ່ງກ່າວໃນຂັ້ນພື້ນຖານ.ຄັນຊັ້ນ,ເປັນຫຍັງຍັງມີຜູ້ຕິດວັນນະໂຣກ ເພີ່ມຂຶ້ນຫຼາຍປານນັ້ນ?ຜູ້ຊ່ຽວຊານອະທິບາຍວ່າ,ການສັກຢາວັກແຊງກັນວັນນະໂຣກພຽງແຕ່ປ້ອງກັນແລະເຮັດໃຫ້ເດັກນ້ອຍທີ່ຕິດວັນນະໂຣກນັ້ນຫຼຸດໜ້ອຍລົງທໍ່ນັ້ນ,ບໍ່ມີບົດບາດຫຍັງໃນການປົກປ້ອງຜູ້ໃຫຍ່.ສະນັ້ນ,ມາດຕະການກົກຮາກກວ່າໝູ່ຂອງການປ້ອງກັນວັນ ນະໂຣກແມ່ນຕັ້ງໜ້າຄົ້ນພົບແລະປິ່ນປົວຜູ້ຕິດວັນນະໂຣກປະເພດຕິດແປດນັ້ນໃຫ້ຫາຍ, ຫຼຸດແຫຼ່ງຕິດແປດໃຫ້ໜ້ອຍລົງ.
ສະນັ້ນ,ບາດກ້າວທຳອິດຂອງການປ້ອງກັນແລະປິ່ນປົວວັນນະໂຣກກໍແມ່ນຕ້ອງຍົກອັດຕາຄົ້ນພົບຜູ້ຕິດວັນນະໂຣກນັ້ນໃຫ້ສູງຂຶ້ນ.ເພື່ອຊອກຫາຜູ້ຕິດວັນນະໂຣກທີ່ປະກົດຕົວຢູ່ທ້ອງຖິ່ນຕ່າງໆ,ລັດຖະບານຈີນໄດ້ໃຊ້ຫຼາຍມາດຕະການ,ເຊິ່ງລວມທັງການກໍ່ສ້າງອຸປະກອນ ກວດກາວັນນະໂຣກ,ອົບຮົມພະນັກງານວິຊາສະເພາະ,ແລະເພີ່ມທະວີການໂຄສະນາຄວາມຮູ້ຮອບຕົວກ່ຽວກັບການປ້ອງກັນແລະປິ່ນປົວວັນນະໂຣກເປັນຕົ້ນ.ເດືອນມັງກອນປີ2004,ຈີນໄດ້ເລີ່ມໃຊ້ລະບົບລາຍງານພະຍາດຕິດແປດທາງອິນເຕີເນັດ ເຊິ່ງລວມທັງວັນ ນະໂຣກຢູ່ທົ່ວປະເທດ.
ພ້ອມກັນນັ້ນ,ລັດຖະບານຈີນຍັງໄດ້ເບີກເງິນລາງວັນໃຫ້ນາຍໝໍຊົນນະບົດທີ່ຄົ້ນພົບຜູ້ເປັນວັນນະໂຣກ,ສົ່ງເສີມໃຫ້ພວກເຂົາເຈົ້າລາຍງານຜູ້ຖືກສົງໄສເປັນວັນນະໂຣກ.ມາດຕະການລາຍນີ້ໄດ້ຍົກຄວາມຫ້າວຫັນຂອງນາຍໝໍຊົນນະບົດໃຫ້ສູງຂຶ້ນໃນການລາຍງານຜູ້ເປັນວັນນະໂຣກ,ອັດຕາຄົ້ນພົບຜູ້ເປັນວັນນະໂຣກຂອງຈີນໄດ້ສູງຂຶ້ນຢ່າງວ່ອງໄວ.ປີ2003,ມີແຕ່39%ທໍ່ນັ້ນ,ແຕ່ຮອດປີ2005ໄດ້ສູງຂຶ້ນຮອດປະມານ79%.
ນອກຈາກຍົກອັດຕາຄົ້ນພົບຜູ້ເປັນວັນນະໂຣກໃຫ້ສູງຂຶ້ນແລ້ວ,ມາດຕະການປ້ອງກັນວັນ ນະໂຣກທີ່ສຳຄັນອີກລາຍໜຶ່ງແມ່ນປິ່ນປົວຜູ້ເປັນວັນນະໂຣກ.
ແຕ່ປີ2001ເປັນຕົ້ນມາ,ຈີນໄດ້ເລີ່ມປະຕິບັດນະໂຍບາຍກວດກາແລະປິ່ນປົວວັນນະໂຣກຟີຼເທື່ອລະກ້າວໃນທົ່ວປະເທດ,ສະໜອງການປິ່ນປົວແລະຢຸກຢາໃຫ້ຜູ້ເປັນວັນນະໂຣກໂດຍບໍ່ເກັບຄ່າ.ເພື່ອຮັບປະກັນຄ່າໃຊ້ຈ່າຍໃນການປິ່ນປົວວັນນະໂຣກ,ແຕ່ລະປີການເງິນສູນກາງຈີນຕ້ອງລົງທຶນ40ລ້ານຢວນໂດຍຈຳເພາະ,ແລະໄດ້ເພີ່ມຂຶ້ນຮອດປະມານ300ລ້ານຢວນໃນປີ2004.ເດືອນມັງກອນປີ2005,ຈີນກໍໄດ້ເລີ່ມໃຊ້ລະບົບຂໍ້ມູນຂ່າວສານຄຸ້ມຄອງວັນນະໂຣກ,ແລະໄດ້ສ້າງຕັ້ງທະນາຄານຂໍ້ມູນຂ່າວສານສຳເນົາຂອງຜູ້ເປັນວັນນະໂຣກທີ່ໄດ້ຄົ້ນພົບທັງໝົດ.ເມື່ອໃຊ້ລະບົບນີ້ແລ້ວ,ພາກສ່ວນສາທາລະນະສຸກຂອງຈີນສາມາດຕິດຕາມປິ່ນປົວຜູ້ເປັນວັນນະໂຣກທີ່ເຄື່ອນທີ່.
ໃນເວລາປິ່ນປົວ,ຈີນໄດ້ໃຊ້ວິທີທີ່ສະເໜີໂດຍອົງການອະນາໄມໂລກ,ເຊິ່ງມີຈຸດພິເສດຕົ້ນຕໍ ແມ່ນຜູ້ເປັນວັນນະໂຣກຕ້ອງກິນຢາປົວວັນນະໂຣກຢູ່ຕໍ່ໜ້າຜູ້ຕິດຕາມຊີ້ນຳ.ນາງຊິ່ວຊຸ້ຍລີ້ແມ່ນນາຍໝໍຂອງຫ້ອງແຍກທາດວັນນະໂຣກຂອງໂຮງໝໍແຫ່ງໜຶ່ງທີ່ປັກກິ່ງ,ນາງຍັງເປັນຜູ້ຕິດຕາມຊີ້ນຳການປິ່ນປົວວັນນະໂຣກ.ນາງເວົ້າວ່າ:"ຂ້າພະເຈົ້າຮຽກຮ້ອງໃຫ້ຜູ້ເປັນວັນ ນະໂຣກມາກິນຢາຢູ່ຫ້ອງປ້ອງກັນວັນນະໂຣກທຸກມື້,ແລະຂ້າພະເຈົ້າຕ້ອງເຫັນພວກເຂົາເຈົ້າກິນຢາ.ຖ້າເຊົາກິນຢາ,ບໍ່ພຽງແຕ່ຈະເຮັດໃຫ້ອາການພະຍາດໜັກໜ່ວງກວ່າເກົ່າທໍ່ນັ້ນ,ຍັງອາດຈະເຮັດໃຫ້ເຂົາກິນຢາອື່ນກໍບໍ່ມີຜົນຫຍັງ."
ກໍຄືທ່ານນາງຊິ່ວຊຸ້ຍລີ້ເວົ້ານັ້ນ,ຂໍ້ສຳຄັນກວ່າໝູ່ໃນການປິ່ນປົວຜູ້ເປັນວັນນະໂຣກແມ່ນເຊົາກິນຢາບໍ່ໄດ້.ໄລຍະປິ່ນປົວວັນນະໂຣກຂ້ອນຂ້າງຍາວນານ,ທຳມະດາແລ້ວຕ້ອງກິນເວລາປະມານເຄິ່ງປີ,ໃນໄລຍະນີ້ຖ້າເຊົາກິນຢາພຽງແຕ່ຈັກເທື່ອສອງເທື່ອທໍ່ນັ້ນ,ກໍອາດຈະບໍ່ໄດ້ ຜົນ.ສຳລັບຜູ້ເປັນວັນນະໂຣກທຳມະດາ,ການປິ່ນປົວເຄິ່ງປີພຽງແຕ່ເສຍຄ່າຢາຫຼາຍຮ້ອຍຢວນທໍ່ນັ້ນ,ແຕ່ເວົ້າສຳລັບຜູ້ເປັນວັນນະໂຣກທີ່ກິນຢາບໍ່ໄດ້ຜົນ,ການປິ່ນປົວກໍລຳຄານຫຼາຍ,ຄ່າຢາຢ່າງໜ້ອຍກໍຕ້ອງການຫຼາຍໝື່ນຢວນ.ປະຈຸບັນນີ້,ຜູ້ເປັນວັນນະໂຣກທີ່ກິນຢາບໍ່ໄດ້ຜົນຂອງຈີນກວມປະມານ1ສ່ວນ4ຂອງໂລກ,ສະນັ້ນ,ພາກສ່ວນສາທາລະນະສຸກຂອງຈີນຫວັງໃຫ້ປ່ຽນແປງສະພາບດັ່ງກ່າວໂດຍຜ່ານຈາກການເຜີຍແຜ່ລະບອບຜູ້ຕິດຕາມຊີ້ນຳການປິ່ນປົວພະຍາດ.
ເມື່ອເບິ່ງໃນດ້ານກວມລວມແລ້ວເຫັນວ່າ,ຄຽງຄູ່ກັບລັດຖະບານຈີນນັບມື້ນັບເອົາໃຈໃສ່ນຳ ການປ້ອງກັນແລະປິ່ນປົວວັນນະໂຣກ,ສະພາບການປ້ອງກັນແລະປິ່ນປົວວັນນະໂຣກຂອງຈີນໄດ້ປົວແປງໃຫ້ດີຂຶ້ນຢ່າງເດັ່ນຊັດ.ຮອດທ້າຍປີ2005,ອັດຕາປົວຫາຍຂອງຜູ້ເປັນວັນ ນະໂຣກປະເພດຕິດແປດທີ່ເພີ່ມໃໝ່ຂອງຈີນໄດ້ບັນລຸ91%,ຜົນງານດັ່ງກ່າວໄດ້ຮັບຄວາມຢືນຢັນຈາກອົງການອະນາໄມໂລກ.
|
|
|
