|
ທ່ານຜູ້ຟັງທີ່ໂຄລົບ,ຫວ່າງມໍ່ໆນີ້,ໄລເຟິ່ງ ບຸກຄົນວິລະຊົນທີ່ມີຊື່ສຽງຂອງຈີນໄດ້ປະກົດຕົວໃນເກມອິນເຕີເນັດດ້ວຍຮູບກາຕຸນ,ກາຍເປັນພະເອກຂອງເກມອິນເຕິເນັດ,ໄດ້ສ້າງຄວາມລື່ນເລີງແລະສຶກສາຄົນຮຸ່ນໃໝ່ທີ່ມັກເກມຄອມພິວເຕີ,ແລະກໍ່ໄດ້ກະຕຸກຄົນຮຸ້ນເກົ່າທີ່ຖືໄລເຟິ່ງເປັນຂວັນໃຈ.ພໍເກມອິນເຕີເນັດອັນນ້ອຍໆນີ້ເລີ່ມປະກົດຕົວກໍ່ພາໃຫ້ມີການໂຈຕະນາກັນໃນວົງການຕ່າງໆຂອງຈີນໃນທັນທີ,ຫຼາຍເວບໄຊຍັງໄດ້ເປີດຄໍລຳພິເສດໂດຍຈຳເພາະເພື່ອໃຫ້ຄົນທັງຫຼາຍປະກອບຄວາມເຫັນຂອງຕົນ.ໃນລາຍການຈີນປະຈຸບັນພາກນີ້,ເຊີນທ່ານພ້ອມກັນກັບພວກເຮົາໄປເບິ່ງປະຕິກິລິຍາຕ່າງໆຂອງສັງຄົມຈີນ.
ໄລເຟິ່ງ,ແມ່ນທະຫານທຳມະດາສາມັນຜູ້ໜຶ່ງຂອງຈີນ,ປີ1962,ເພິ່ນເສຍຊີວິດໃນຍາມປະຕິບັດໜ້າທີ່ມີອາຍຸພຽງແຕ່26ປີເທົ່ານັ້ນ.ເພິ່ນມັກອາຊີບຂອງຕົນທີ່ສຸດ,ຍັງມັກຊ່ອຍເຫຼືອຜູ້ອື່ນ,ສະນັ້ນ,ຜູ້ນຳຈີນໄດ້ຮຽກຮ້ອງໃຫ້ຄົນຈີນຮຽນນຳໄລເຟິ່ງ.ແຕ່ນັ້ນມາ,ໄລເຟິ່ງກໍໄດ້ກາຍເປັນແບບຢ່າງທີ່ມີຊື່ສຽງ,ໃນ40ກວ່າປີທີ່ຜ່ານມາ,ເດັກນ້ອຍຫຼາຍຮຸ້ນໄດ້ເຕີບໃຫຍ່ຂຶ້ນໃນຂະບວນການຮຽນນຳອາວໄລເຟິ່ງ.ປະຈຸບັນ,ໃນເກມອິນເຕີເນັດ,ທ່ານໄລເຟິ່ງໄດ້ຊ່ອຍເຫຼືອຜູ້ອື່ນອີກພາຍໃຕ້ການຄວບຄຸມຂອງຜູ້ຫຼິ້ນເກມ.
ຢູ່ເວບໄຊອິດເຕີເນັດນັກຂ່າວຂອງcriຊອກໄດ້ຫາເກມຊະນິດໜຶ່ງທີ່ຖືໄລເຟິ່ງເປັນພະເອກທີ່ພວມໄດ້ຮັບຄວາມນິຍົມຊົມຊອບໂດຍທົ່ວໄປໃນປະຈຸບັນ.ພາບເບື້ອງຫຼັງຂອງເກມແມ່ນທາງສີ່ແຍກທີ່ມີຄົນຍ່າງຢ່າງລຸດໆລ້າຍໆ,ບູລຸດໃນເກມມີຜູ້ ລ່ວງໄຟແດງຜູ້ຖິ້ມຂີ້ຫຍື້ອທົ່ວທີບແລະຜູ້ຜິດກົດລະບຽບອື່ນໆ,ກໍ່ມີບຸກຄົນບອບບາງຄືຜູ້ເຖົ້າ,ເດັກນ້ອຍເປັນຕົ້ນ,ຜູ້ຫຼິ້ນເກມໃນຖານເປັນ"ໄລເຟິ່ງ"ໃນເກມ,ຕ້ອງ ຜ່ານຈາກການກັ້ນກາງຜູ້ລະເມີດກົດລະບຽບແລະຊ່ອຍເຫຼືອບຸກຄົນບອບບາງ,ເຫຼົ່ານັ້ນຈິ່ງໄດ້ຄະແນນ,ກົງກັນຂ້າມ,ຖ້າບໍ່ໄດ້ກັ້ນກາງການກະທໍາທີ່ບໍ່ສຸພາບຢູ່ຄຽງຂ້າງຢ່າງທັນການ,ຫຼືບໍ່ໃຫ້ການຊ່ອຍເຫຼືອແກ່ຜູ້ທີ່ຕ້ອງການການຊ່ອຍເຫຼືອຢ່າງທັນການ,ກໍຈະຖືກຫັກຄະແນນ.ພາຍຫຼັງເກມສິ້ນສຸດລົງແລ້ວ,ຜູ້ຫຼິ້ນເກມຈະລຽງລຳດັບໃນໝູ່ຜູ້ຫຼິ້ນເກມອິນເຕີເນັດຕາມຄະແນນ,ແລະໄດ້ຮັບ"ດາວແດງນ້ອຍ"ເປັນລາງວັນທີ່ສົມຄູ່ກັນ.
ວິສາຫະກິດທີ່ຜະລິດເກມນີ້ຕັ້ງຢູ່ຊຽງໄຮ້ ເມືອງອຸດສາຫະກຳການຄ້າແຄມທະເລພາກຕາເວັນອອກຂອງຈີນ.ທ່ານຈູເກີຮຸ່ຍ ຮອງຜູ້ອຳນວນການພະແນກປະຊາສຳພັນຂອງວິສາຫະກິດແຫ່ງນີ້ເວົ້າວ່າ,ພວກເຂົາເຈົ້າອອກແບບເກມນີ້ແມ່ນຖືການນິຍົມຊ່ອຍເຫຼືອຜູ້ອື່ນເປັນຫົວຂໍ້. "ເກມບໍ່ພຽງແຕ່ແມ່ນເພື່ອຫຼິ້ນເທົ່ານັ້ນ,ພວກຂ້າພະເຈົ້າຮູ້ສຶກວ່າເກມຍັງມີບົດບາດສຶກສາ,ບົດບາດສຶກສາກໍບໍ່ໝາຍຄວາມວ່າແມ່ນແບບເທສະໜາ,ສະນັ້ນພວກຂ້າພະເຈົ້າກໍ່ມີຄວາມຄິດຊະນິດໜຶ່ງ,ໝາຍຄວາມວ່າເຮັດໃຫ້ບົດບາດສຶກສາສະແດງອອກໃນເນື້ອໃນຂອງການລື່ນເລີງລວມທັງເກມ."
ຕາມເວົ້າວ່າ,ຍັງມີວິສາຫະກິດຫຼາຍແຫ່ງພວມອອກແບບເກມອິນເຕິເນັດທີ່ຖືໄລເຟິ່ງເປັນພະເອກ,ພວກເຂົາເຈົ້າລ້ວນແຕ່ເວົ້າວ່າຈຸດປະສົງຂອງພວກເຂົາເຈົ້າກໍແມ່ນ"ແຊກຊ້ອນການສຶກສາໃນການລື່ນເລີງ".ແຕ່ວ່າ,ເຮັດໃຫ້ຂວັນໃຈຂອງຫຼາຍເຊັ່ນຄົນກາຍເປັນພະເອກຂອງເກມອິນເຕີເນັດ,ຄົນທັງຫຼາຍຈະຮັບເອົາການ"ແຊກຊ້ອນການສຶກສາໃນການລື່ນເລີງ"ທີ່ວິສາຫະກິດຍ້ອມແຕ່ງອ້າງນັ້ນໄດ້ຫຼືບໍ່?
ພວກເດັກນ້ອຍເວົ້າວ່າ,ບຸກຄົນຂອງເກມອິນເຕິເນັດທີ່ພວກເຂົາເຈົ້າຫຼິ້ນໃນເມື່ອກ່ອນບໍ່ແມ່ນ"ຜີສາງ"ກໍ່ແມ່ນ"ສັດປະຫຼາດ",ດຽວນີ້ໄດ້ເຫັນເກມທີ່ຖືໄລເຟິ່ງເປັນພະເອກ,ຮູ້ສຶກໃໝ່ອ່ຽມທີ່ສຸດ.ພ້ອມກັນນັ້ນ,ເກມຊະນິດນີ້ຖືການຊ່ອຍເຫຼືອຜູ້ອື່ນເປັນເນື້ອໃນຕົ້ນຕໍ,ສອດຄ່ອງກັບຄາດໝາຍຂອງພໍ່ແມ່ແລະໂຮງຮຽນທີ່ມີຕໍ່ເດັກນ້ອຍໃນດ້ານຈັນຍາບັນ.ທ້າວເຊ້ຍມູ້ອີ້ທີ່ຮຽນຢູ່ໂຮງຮຽນມັດທະຍົມປາຍຂອງເມືອງເຊີນເຈິ້ນພາກໃຕ້ຂອງຈີນເວົ້າວ່າ,ເພິ່ນຊົມເຊີຍເກມຊະນິດນີ້.
"ຂ້ອຍຮູ້ສຶກດີໃຈຫຼາຍ,ຄືເກມຂອງຕ່າງປະເທດ,ຖືໂຣບິນແຮນເປັນວິລະຊົນ, ເດັກນ້ອຍຫຼິ້ນເກມນີ້ກໍ່ໄດ້ຮັບຜົນສະທ້ອນໄປນຳ,ກໍ່ຈະຄ່ອຍໆສຳນຶກຮູ້ວ່າ,ໄລເຟິ່ງເປັນວິລະຊົນ.
ນາງຢາງໂປ່ ແມ່ຂອງທ້າວເຊ້ຍມູ້ອີ້ບໍ່ເຫັນດີນຳຄວາມເຫັນຂອງລູກ,ນາງສົງໄສບົດບາດສຶກສາຂອງເກມຊະນິດນີ້.
"ຂ້າພະເຈົ້າຮູ້ສຶກວ່າຄວາມໝາຍຂອງມັນມີຈຳກັດ.ຖ້າເດັກນ້ອຍຜູ້ໜຶ່ງໄປຫຼິ້ນເກມຂ້າຜີສາງ,ເຂົາເຈົ້າບໍ່ອາດຈະຂ້າອັນໃດອັນໜຶ່ງໃນຊີວິດຕົວຈິງ;ເຫດຜົນຄືກັນ,ເດັກໜ້ອຍຊ່ອຍເຫຼືອຜູ້ອື່ນໃນເກມບໍ່ໝາຍຄວາມວ່າເຂົາເຈົ້າກໍ່ຈະຊ່ອຍເຫຼືອຜູ້ອື່ນໃນຊີວິດຕົວຈິງ."
ໃນຖານເປັນຜູ້ປົກຄອງ,ນາງຢາງໂປ່ເປັນຫ່ວງນຳລູກຈະມົວເມົານຳເກມອິນເຕີເນັດຕະຫຼອດ,ປະຈຸບັນກໍຍັງຮັກສາສະຕິລະວັງຕົວຕໍ່ເກມທີ່ຖືທ່ານໄລເຟິ່ງເປັນພະເອກ,ນາງເວົ້າວ່າ,ຕົນບໍ່ອາດຈະອະນຸຍາດໃຫ້ລູກຫຼິ້ນເກມອິນເຕີເນັດຍ້ອນພະເອກຂອງເກມແມ່ນໄລເຟິ່ງ.
ທີ່ຈິງແລ້ວ,ການຫາລືກ່ຽວກັບເກມນີ້ບໍ່ພຽງແຕ່ຈຳກັດຢູ່ລະຫວ່າງນັກຮຽນກັບຜູ້ປົກຄອງເທົ່ານັ້ນ,ຂົງເຂດຂອງການຫາລືໄດ້ລື່ນກາຍກະໂຕເກມເອງແລ້ວ,ການປະກົດຂຶ້ນຂອງເກມນີ້ພາໃຫ້ຄົນທັງຫຼາຍຮັບຮູ້ເກມອິເຕິເນັດໃນປະຈຸບັນ,ເອົາໃຈໃສ່ນຳບັນຫາຕ່າງໆຄືການຊອກຄົ້ນຮູບການສຶກສາຈັນຍາສືກສາແລະບັນຫາອື່ນໆ.
ແມ່ຕູ້ສົວທີ່ໃຫ້ສຳພາດຕໍ່ພວກເຮົາໃນຖະໜົນເວົ້າວ່າ,ເພິ່ນບໍ່ມ່ວນໃຈນຳເກມຊະນິດນີ້ທີ່ສຸດ.
"ຍ້ອນວ່າໄລເຟິ່ງໄດ້ສຶກສາມາຫຼາຍເຊັ່ນຄົນແລ້ວ,ດຽວນີ້,ພວກເຂົາເຈົ້າສ້າງເກມລື່ນເລີງຊະນິດນີ້,ກໍ່ແມ່ນບໍ່ໂຄລົບວິລະຊົນ.ພວກເຮົາຄວນໂຄລົບໄລເຟິ່ງ,ຄວນຖືເພິ່ນເປັນແບບຢ່າງ.ພວກເຮົາຄວນຮຽນນຳໄລເຟິ່ງດ້ວຍການເຄື່ອນໄຫວຕົວຈິງ,ບໍ່ຄວນກາຍເປັນການລື່ນເລີງ."
ກ່ຽວກັບທັດສະນະຄັດຄ້ານຢ່າງຮຸນແຮງຊະນິດນີ້,ກໍ່ມີຫຼາຍຄົນບໍ່ເຫັນດີນຳ.ທ່ານຊຸ່ນຢຸນສຽວ ຜູ້ຊ່ຽວຊານດ້ານບັນຫາຊາວໜຸ່ມເຍົາວະຊົນເຫັນວ່າ,ໄລເຟິ່ງກາຍເປັນພະເອກຂອງເກມອິນເຕີເນັດແມ່ນປະກົດການທີ່ວິລະຊົນສັງຄົມແລະບຸກຄົນແບບຢ່າງຂອງຈີນຫັນເປັນສາມັນຊົນ,ແມ່ນສັນຍະລັກຂອງຄວາມກ້າວໜ້າຊະນິດໜຶ່ງ.
"ໄລເຟິ່ງໃນຖານເປັນບຸກຄົນແບບຢ່າງທີ່ມີຊື່ສຽງຂອງຈີນ,ເພິ່ນສາມາດເຂົ້າໃນເກມແມ່ນປະກົດການສະເໝີພາບຊະນິດໜຶ່ງ.ຂ້າພະເຈົ້າເຫັນວ່ານີ້ອາດຈະແມ່ນເລື່ອງທີ່ເປັນສັນຍະລັກ,ແຕ່ນີ້ຕໍ່ໄປຍັງອາດຈະມີບຸກຄົນວິລະຊົນແບບຢ່າງຫຼາຍກ່ວາເກົ່າເຂົ້າໃນເກມ."
ຜູ້ຊ່ຽວຊານດ້ານການສຶກສາບາງຄົນຊີ້ອອກວ່າ,ຖືໄລເຟິ່ງເປັນພະເອກ,ຖືເກມອິນເຕິເນັດເປັນພາຫະນະຂອງ"ຈັນຍາສຶກສາ",ສຳລັບນັກທຸລະກິດແລ້ວ,ເຮັດໄດ້ແນວນີ້ລ້ຳຄ່າທີສຸດ,ບໍ່ວ່າເກມນີ້ມີບົດບາດຊຸກຍູ້ເດັກນ້ອຍຮຽນນຳໄລເຟິ່ງໄດ້ຫຼືບໍ່,ທິດຂອງການຊອກຄົ້ນຊະນິດນີ້ກໍເປັນຕາຢືນຢັນ.
|
