|
ເອົາແນວປູກອັນສວຍງາມຝັງໄວ້ໃນດວງໃຈຂອງເດັກນ້ອຍ
cri
Author: min
|
ສະບາຍດີ, ທ່ານຜູ້ຟັງທີ່ເຄົາລົບ, ຂ້າພະເຈົ້າແມ່ນອຸດົມ, ຊົມເຊີຍທ່ານເຂົ້າສູ່ລາຍການ "ຄາລົມຄົມຄາຍ".
ໃນລາຍການພາກນີ້, ກ່ອນອື່ນ, ຂ້າພະເຈົ້າຈະເລົ່າເລື່ອງຂອງທ່ານນາງຈ່າງສຽວເຟິ່ງ ນັກປະພັນທີ່ມີຊື່ສຽງໃນສະໄໝປະຈຸບັນຂອງຈີນກັບລູກສາວຂອງເພິ່ນສູ່ ຟັງ:
ກ່ອນຈະໄປນອນ, ລູກສາວປະຕີນເປົ່າຢືນຢູ່ຕໍ່ໜ້າຂ້າພະເຈົ້າແລະເວົ້າວ່າ:
"ແມ່, ລູກມັກໆລົມໃຕ້ຝຸ່ນທີ່ສຸດ."
ເມື່ອຂ້າພະເຈົ້າຟັງແລ້ວ, ກໍຄຶດຢາກຮ້າຍລູກ. ອຸ້ຍ, ອີ່ນ້ອຍນີ້, ສັງມາຄຶດແບບນີ້, ຈັ່ງແມ່ນບໍ່ຮູ້ຄວາມທຸກທໍລະມານໃນເມືອງຄົນຈັກເມັດ, ລົມໃຕ້ຝຸ່ນພັດມາເທື່ອໃດ, ບໍ່ຈັກວ່າມີເຮືອນຊານບ້ານຊ່ອງຫຼາຍປານໃດຖືກພັດເພພັງ, ມີບ້ານເມືອງຫຼາຍປານໃດຖືກນ້ຳຖ້ວນ, ທາງລົດໄຟຖືກນ້ຳຊຸເພ, ນຳເອົາຄວາມຫຍຸ້ງຍາກຫຼາຍປານໃດມາໃຫ້ຊີວິດການເປັນຢູ່ຂອງຄົນທັງຫຼາຍ……ແຕ່ລູກສາວໂຕພັດເວົ້າວ່າ, ໂຕມັກລົມໃຕ້ຝຸ່ນ.
ຂ້າພະເຈົ້າອົດໄວ້, ບໍ່ຮ້າຍລູກ, ແລະຖາມວ່າ, "ເປັນຫຍັງລູກຈຶ່ງຄຶດແບບນີ້?"
ລູກຕອບວ່າ: "ເພາະວ່າ, ມີເທື່ອໜຶ່ງເກີດລົມໃຕ້ຝຸ່ນ, ໄຟຟ້າຂາດ."
"ຊັ້ນລູກມັກໄຟຟ້າຂາດຊັ້ນຫວາ?"
"ເວລາໄຟຟ້າຂາດ, ລູກກໍໄປຫາທຽນໄຂມາໄຕ້."
"ໄຕ້ທຽນໄຂຊິມີຫຍັງພິເສດ?" ອາລົມຂ້າພະເຈົ້າຄ່ອຍໆສະຫງົບລົງ.
ລູກສາວເວົ້າຕໍ່ວ່າ, "ຕອນນັ້ນລູກຖືທຽນໄຂຍ່າງໄປຍ່າງມາຢູ່ໃນເຮືອນ, ແລ້ວແມ່ເວົ້າວ່າ, ລູກຄືກັບນາງເທວະດານີ້ແຫຼະ……"
ນັ້ນແມ່ນເລື່ອງທີ່ກາຍມາຫຼາຍປີແລ້ວ. ໃນທີ່ສຸດ, ຂ້າພະເຈົ້າໄດ້ສະຫງົບລົງໃນທ່າມກາງຄວາມຕົກສະເງີ້, ລູກຍັງຈື່ຄວາມນັ້ນທີ່ຂ້າພະເຈົ້າເຄີຍເວົ້າ, ແລະຍ້ອນວ່າມັກຄວາມຮູ້ສຶກທີ່ຕົນເອງຄືກັບນາງເທວະດາໃນເວລາຢືມຢູ່ໃນແສງທຽນ, ນາງຈົນວ່າມັກຍາມຄ່ຳຄືນທີ່ມີລົມໃຕ້ຝຸ່ນ. ຄວາມຊົມເຊີຍທີ່ບໍ່ໃສ່ໃຈໄດ້ເຮັດໃຫ້ກາລະເວລາແລະສະພາບແວດລ້ອມກາຍເປັນເລື່ອງທີ່ເປັນໜ້າຫວນຄືນ. ຄືນມື້ນັ້ນ, ມີເດັກຍິງຜູ້ໜຶ່ງເຊື່ອວ່າຕົນເອງຄືກັບນາງເທວະດາ, ຄືນມື້ນັ້ນ, ມີຜູ້ເປັນແມ່ໜຶ່ງໄດ້ສ້າງນາງເທວະດາອົງໜຶ່ງຍ້ອນໄດ້ຍ້ອງຍໍແບບຈາງໆ.
ທ່ານຜູ້ຟັງທີ່ຮັກແພງ, ມີຄົນເວົ້າວ່າ, ໃຈຂອງເດັກນ້ອຍຂາວສະອາດເໝືອນດັ່ງເຈ້ຍຂາວໃບໜຶ່ງ, ຍ້ອນສະພາບແວດລ້ອມແລະຜົນສະທ້ອນໃນພາຍລຸນແຕ້ມຫຍັງໃສ່, ມັນກໍກາຍເປັນອັນນັ້ນ, ແລະຄືກັບດິນຕອນໜຶ່ງ, ພວກເຮົາຫວ່ານແນວປູກຫຍັງໃສ່, ມັນກໍ່ເກີດເປັນຜົນແນວນັ້ນ. ຄວາມເວົ້າຄວາມໜຶ່ງຫຼືການກະທຳໃດໜຶ່ງຂອງຄົນທີ່ຢູ່ອ້ອມຂ້າງກໍ່ອາດຈະເກີດຜົນສະທ້ອນອັນມະຫາສານຕໍ່ເດັກນ້ອຍໃນເວລາສັງເກດເບິ່ງໂລກແລະຊີວິດ. ຕໍ່ໄປ, ຂ້າພະເຈົ້າຈະເລົ່າອີກເລື່ອງໜຶ່ງສູ່ທ່ານຟັງ.
ມີເດັນຊາຍຜູ້ໜຶ່ງ, ມີແປ້ວທີ່ເຮິຮ້າຍທີ່ສຸດຢູ່ຫຼັງຍ້ອນເຄີຍເປັນພະຍາດ. ໃນໂມງຮຽນລອຍນ້ຳຢູ່ໂຮງຮຽນອະນຸບານທຸກໆເທື່ອ, ນ້ອງຖືກໝູ່ຫົວຂວັນເລື້ອຍໆ, ວ່ານ້ອງແມ່ນສັດປະຫຼາດ. ສະນັ້ນ, ນ້ອງຈຶ່ງບໍ່ຍອມໄປໂຮງຮຽນ. ເມື່ອແມ່ນ້ອງຮູ້ເລື່ອງນີ້ແລ້ວ, ກໍ່ໄປຫາຄູ່ຢູ່ໂຮງຮຽນ. ເລົ່າເລື່ອງໃນເວລາຍັງນ້ອຍຂອງເດັກຊາຍຜູ້ນີ້ໃຫ້ຄູຟັງ, ເພິ່ນເວົ້າວ່າ: ແປ້ວຢູ່ຫຼັງຂອງລູກຊາຍແມ່ນຮອບແຜທີ່ລູກເອົາຊີວິດຕໍ່ສູ້ກັບໂຣກໄພໄຂ້ເຈັບ, ນີ້ແມ່ນບາດແຜທີ່ສະແດງໃຫ້ເຫັນຄວາມກ້າຫານແລະຄວາມບໍ່ອ່ອນຍອມ, ບໍ່ຄວນຖືກຫົວຂວັນແລະດູໝິ່ນ.
ມື້ລຸນມາ, ແມ່ນໂມງຮຽນລອຍນ້ຳ, ຄູຜູ້ນີ້ໄດ້ເອີ້ນເດັກຊາຍຜູ້ນີ້ມາຢືນຢູ່ຕໍ່ໜ້າ, ໃຫ້ນ້ອງຫັນຫຼັງໃສ່ໝູ່, ໃຫ້ໝູ່ເຫັນແປ້ວຢູ່ຫຼັງຂອງນ້ອງ. ເດັກຊາຍຮູ້ສຶກຢ້ານຫຼາຍ, ແຕ່ເມື່ອຫຼຽວເຫັນສາຍຕາຂອງຄູ, ນ້ອງກໍກ້າຫານຂຶ້ນໜ້ອຍໜຶ່ງ. ແຕ່ວ່າ, ໃນເວລານ້ອງປິ້ນຫຼັງໃສ່ໝູ່ນັ້ນ, ກໍຍັງມີສຽງຫົວອິກອິກຢູ່, ຈົນເດັກຊາຍຜູ້ນີ້ສັ່ນເຊັນຂຶ້ນ, ຕໍ່ມາ, ນ້ອງໄດ້ຍິນຄູເວົ້າວ່າ: "ເດັກນ້ອຍທຸກຄົນລ້ວນແຕ່ປ່ຽນແປງມາຈາກຫ່ານຟ້າ, ແຕ່ກ່ອນ, ພວກເຈົ້າທຸກຄົນໃຜກໍ່ເຄີຍມີປີກອັນສວຍງາມຄູ່ໜຶ່ງ, ແຕ່ເມື່ອເກີດມາສູ່ໂລກ, ປີກຂອງພວກເຈົ້າສຶ່ງຄ່ອຍໆເສື່ອມໄປ. ແຕ່ວ່າ, ປີກຂອງລາວບໍ່ໄດ້ເສື່ອມໄປໝົດ, ຈຶ່ງກາຍເປັນແບບນີ້." ເມື່ອຄູເວົ້າຈົບລົງ, ພວກເດັກນ້ອຍກໍແລ່ນມາເບິ່ງຫຼັງຂອງເດັກຊາຍຜູ້ນີ້ໃນທັນທີ, ໃນຂະນະນີ້, ຢູ່ໃນຕາຂອງເດັກນ້ອຍຜູ້ໃດກໍເຕັມໄປດ້ວຍຄວາມອອນຊອນ.
ພາຍຫຼັງມາ, ເມື່ອເດັກຊາຍຜູ້ນີ້ເຕີບໃຫຍ່ແລ້ວ, ນ້ອງໄດ້ເລືອກເອົາການລອຍແບບແມງກະເບື້ອ, ແລະໄດ້ກາຍເປັນນັກກິລາລອຍນ້ຳທີ່ດີເລີດຜູ້ໜຶ່ງ. ມີເທື່ອໜຶ່ງ, ນ້ອງໄດ້ຮັບລາງວັນ, ແລ້ວມີນັກຂ່າວມາສຳພາດ, ນ້ອງກໍໄດ້ເວົ້າເຖິງເລື່ອງນີ້, ນ້ອງເວົ້າວ່າ: "ແມ່ນອາຈານຜູ້ນີ້ໄດ້ເອົາປີກໃຫ້ຂ້າພະເຈົ້າຄູ່ໜຶ່ງ, ຂ້າພະເຈົ້າເລືອກເອົາວິທີລອຍແບບແມງກະເບື້ອ, ກໍ່ແມ່ນເພື່ອຢາກໃຫ້ປີກທີ່ສວຍງາມຂອງຂ້າພະເຈົ້າເຜີຍອອກໃຫ້ໝູ່ເຫັນ."
ທ່ານຜູ້ຟັງທີ່ຮັກແພງ, ບໍ່ຮູ້ວ່າທ່ານມີຄວາມຮູ້ສຶກແນວໃດເມື່ອໄດ້ຟັງເລື່ອງສອງເລື້ອງນີ້ແລ້ວ? ອີກບໍ່ທໍ່ໃດ້ມື້, ວັນເດັກສາກົນປະຈຳປີນີ້ກໍຈະວຽນມາເຖິງ. ພວກເຮົາຫວັງວ່າລາຍການມື້ນີ້ຄົງຈະພາໃຫ້ຜູ້ເປັນພໍ່ແມ່ທຸກຄົນ, ຄູອາຈານທຸກຄົນ, ຈົນກະທັ້ງທ່ານຜູ້ຟັງທຸກຄົນສຳນຶກຮູ້ວ່າ, ໃຈຂອງເດັກນ້ອຍແມ່ນໄຮ້ດຽງສາທີ່, ໃຈຂອງເດັກນ້ອຍແມ່ນເປັນໜ້າແພງທີ່ສຸດ, ພວກເຮົາທຸກຄົນຄວນເຮັດຄືກັບບຸກຄົນໃນເລື່ອງນີ້, ເອົາແນວປູກອັນສວຍງາມແຫ່ງຄວາມເມດຕາ, ກຽດສັກສີ, ຄວາມເຊື້ອໝັ້ນຕົນເອງແລະການສ້າງຕົນໃຫ້ເຂັ້ມແຂງຝັງໄວ້ໃນດວງໃຈຂອງເດັກນ້ອຍດ້ວຍການໃຫ້ກຳລັງໃຈ, ແລະຍ້ອງຍໍສໍລະເສີນ, ແລ້ວມື້ໃດມື້ໜຶ່ງ, ທ່ານກໍຈະປະກົດເຫັນວ່າ, ເມື່ອຄອງຄອຍຈົນລະດູໜາວອັນຍືດຍາວຜ່ານໄປແລ້ວ, ໃນທີ່ສຸດ, ແນວປູກເຫຼົ່ານີ້ກໍຈະແຕກໜໍ່ຈໍ່ໃບ, ເກີດດອກອອກຜົນອັນງອກງາມຢ່າງອຸດົມສົມບູນ.
|
|
