|
ທີ່ທ່ານຫາກໍຟັງມານັ້ນແມ່ນການສະແດງຂອງຄະນະດົນຕີຂອງນັກສຶກສາອາຟຼິກາໃນງານວັດທະນະທຳສາກົນຢູ່ມະຫາວິທະຍາໄລຄົມມະນາຄົມປັກກິ່ງ.ເມື່ອນັກຂ່າວມາຮອດໂຮງຮຽນດັ່ງກ່າວ,ງານວັດທະນະທຳເທື່ອນີ້ພວມດຳເນີນຢູ່ຢ່າງຟົດຟື້ນ.ກ່ຽວກັບສະພາບຂອງການເຄື່ອນໄຫວຄັ້ງນີ້,ທ່ານນາງລິວອຽນຊິ່ງ ຮອງຫົວໜ້າພະແນກຮ່ວມມືແລກປ່ຽນກັບຕ່າງປະເທດຂອງມະຫາວິທະຍາໄລຄົມມະນາຄົມປັກກິ່ງແນະນຳວ່າ,
ພວກເຮົາຈັດງານວັດທະນະທຳຄັ້ງນີ້ຕົ້ນຕໍມີຈຸດປະສົງນຳເອົາວັດທະນະທຳຕ່າງປະເທດເຂົ້າມາໂຮງຮຽນ,ເຮັດໃຫ້ອາຈານແລະນັກສຶກສາໄດ້ຊົມຮີດຄອງປະເພນີຂອງຕ່າງປະເທດໃນໂຮງຮຽນ.ງານວັດທະນະທຳສາກົນເທື່ອນີ້ໄດ້ວາງສະແດງວັດທະນະທຳພິເສດຂອງ34ປະເທດ,ຂອງທະວີບອາຊີ ເອີລົບ ອາເມລິກາແລະອາຟຼິກາ,ເຮັດໃຫ້ຄົນທັງຫຼາຍໄດ້ຊົມວັດທະນະທຳຕ່າງກັນໃນໂລກເຊັ່ນຮີດຄອງປະເພນີຂອງປະຊາຊົນ ການຟ້ອນເຄື່ອງນຸ່ງຂອງຖືແລະເຄື່ອງກິນເປັນຕົ້ນ.
ນັກສຶກສາປະເທດເຫຼົ່ານີ້ໄດ້ຕັ້ງແທ່ນວາງສະແດງຂອງປະເທດຕົນ,ວາງສະແດງຮູບພາບທິວທັດເຄື່ອງນຸ່ງຊຸດຊົນເຜົ່າເຄື່ອງຫັດຖະກຳພິເສດ,ນອກນັ້ນຍັງມີເຄື່ອງກິນ,ໜັງສືຂຽນງາມແລະຮູບພາບເປັນຕົ້ນ,ສ່ວນສິ່ງທີ່ປະຈັກຕາຄົນທີ່ສຸດແມ່ນລາຍການສະແດງຂອງນັກສຶກສາປະເທດຕ່າງໆທີ່ມີເອກະລັກຊົນຊາດອັນເຂັ້ມຂຸ້ນ,ອັນໄດ້ເຮັດໃຫ້ຄູອາຈານແລະນັກສຶກສາທັງຫຼາຍເປີດຫູເປີດຕາ,ແລະໄດ້ສຳຜັດກັບຮີດຄອງປະເພນີຕ່າງປະເທດຢ່າງໃກ້ຊິດ.
ໃນງານວັດທະນະທຳຄັ້ງນີ້,ກໍມີແທ່ນວາງສະແດງຂອງນັກສຶກສາລາວ,ນອກຈາກໄດ້ວາງສະແດງຮູບພາບທິວທັດອັນສວຍງາມ,ອາຫານທີ່ປານີດ,ເຄື່ອງກິນອັນແຊບໆຂອງລາວແລ້ວ,ຍັງມີລາຍການຟ້ອນທີ່ດີເດັ່ນ.
ຢູ່ບ່ອນຈັດການເຄື່ອນໄຫວ,ນັກຂ່າວຍັງໄດ້ພົບທ້າວແດງ ນັກສຶກສາລາວທີ່ຮຽນວິຊາວິສະວະກຳໄຟຟ້າຢູ່ມະຫາວິທະຍາໄລຄົມມະນາຄົມປັກກິ່ງ ລາວເປັນຜູ້ຮັບຜິດຊອບລາຍການຂອງນັກສຶກສາລາວ,ລາວກໍ່ມີຄວາມຮູ້ສຶກອັນເລິກເຊິ່ງຕໍ່ການເຄື່ອນໄຫວເທື່ອນີ້,ລາວເວົ້າວ່າ,
ຂໍສະບາຍດີໝົດທຸກຄົນ,ຂ້າພະເຈົ້າແມ່ນຕົວແທນຂອງນັກສຶກສາລາວທີ່ຮຽນຢູ່ມະຫາວິທະຍາໄລຄົມມະນາຄົມປັກກິ່ງ,ເຊິ່ງໃນງານຄັ້ງນີ້,ພວກເຮົາຮູ້ສຶກດີໃຈແລະພາກພູມໃຈຫຼາຍເປັນສ່ວນໜຶ່ງໃຫ້ແກ່ປະເທດຊາດທີ່ໄດ້ເຜີຍແຜ່ຊຸກຍູ້ສະໜັກສະໜູນສິລະປະວັດທະນະທຳແລະການທ່ອງທ່ຽວຂອງປະເທດເຮົາໃຫ້ແກ່ນັກສຶກສາຕ່າງປະເທດແລະຄົນຕ່າງປະເທດຮັບຮູ້ກັນ.ໃນງານຄັ້ງນີ້,ພວກເຮົາແມ່ນກຽມພ້ອມແລະກະກຽມກັນມາເປັນເວລາພໍສົມຄວນ,ສະນັ້ນພວກເຮົາຕັ້ງໃຈເຮັດວຽກຕົວນີ້ຫຼາຍ,ພວກເຮົາຄິດວ່າຈະເຮັດໃຫ້ວຽກງານຕົວນີ້ອອກມາຮູບແບບທີ່ສົມບູນທີ່ສຸດ,ເປັນຈິງທີ່ພໍໃຈໜ້າທີ່ສຸດ,ໝາຍເຖິງວ່າໃຫ້ຄົນຕ່າງປະເທດໄດ້ຮັບຮູ້ທົ່ວເຖິງກັນຫຼາຍທີ່ສຸດ,ເຮັດໃຫ້ການເຜີຍແຜ່ເຮົາໝາຍເຖິງວ່າຂໍ້ມູນພວກເຮົາເຜີຍແຜ່ໃຫ້ພຽງພໍຕໍ່ຄວາມຕ້ອງການແລະຄວາມຢາກຮູ້ຂອງແຕ່ລະຄົນທີ່ສົນໃຈກັບປະເທດເຮົາ.
ຕາມໄດ້ຊາບ,ຢູ່ມະຫາວິທະຍາໄລຫຼາຍແຫ່ງຂອງປັກກິ່ງເຊັ່ນມະຫາວິທະຍາໄລປັກກິ່ງ,ແລະມະຫາວິທະຍາໄລພາສາຕ່າງປະເທດປັກກິ່ງເປັນຕົ້ນ,ກໍເຄີຍຈັດການເຄື່ອນໄຫວວັດທະ ນະທຳສາກົນປະເພດນີ້ມາຫຼາຍເທື່ອແລ້ວ.ທີ່ຈິງແລ້ວ,ການຈັດງານວັດທະນະທຳສາກົນແນວນີ້ກໍແມ່ນຂະບວນການທີ່ວັດທະນະທຳຫຼາຍປະເທດແລກປ່ຽນກັນ.ສະນັ້ນ,ໃນງານວັດທະນະທຳຄັ້ງນີ້,ຝ່າຍໂຮງຮຽນໄດ້ສະເໜີຫົວຂໍ້ທີ່ວ່າ"ເປີດປະຕູຕໍ່ພາຍນອກ,ຮ່ວມມືແລະພັດທະນາ",ກ່ຽວກັບເລື່ອງນີ້,ທ່ານນາງວາງຮົງຢິ່ງ ຮອງຫົວໜ້າພະແນກໂຄສະນາຂອງມະຫາວິທະຍາໄລຄົມມະ ນາຄົມປັກກິ່ງອະທິບາຍວ່າ,
ປັດຈຸບັນ,ຈີນໄດ້ມີທ່າທີເປີດປະຕູຕໍ່ພາຍນອກຫຼາຍກວ່າເກົ່າຢູ່ຕໍ່ໜ້າຊາວໂລກ,ໃຕ້ເບື້ອງຫຼັງໃຫຍ່ທີ່ຈີນແລະຕ່າງປະເທດພັດທະນາຢ່າງກວມລວມ,ເທື່ອນີ້ພວກເຮົາຈຶ່ງໄດ້ເລືອກເອົາຫົວຂໍ້ຄື "ເປີດປະຕູຕໍ່ພາຍນອກ ຮ່ວມມື ແລະພັດທະນາ",ມີແຕ່ເປີດປະຕູຕໍ່ພາຍນອກຈຶ່ງໂອກາດຮ່ວມມືຫຼາຍກວ່າເກົ່າ,ແລະມີແຕ່ການຮ່ວມມືຈຶ່ງຈະໄດ້ແລກປ່ຽນກັນ ຈະເລີນຮຸ່ງເຮືອງແລະພັດທະນາພ້ອມກັນ.
ໃນໄລຍະທີ່ການປະຕິຮູບແລະການເປີດປະຕູຕໍ່ພາຍນອກຂະຫຍາຍລົງສູ່ລວງເລິກຢ່າງບໍ່ຢຸດຢັ້ງ,ໂຮງຮຽນຊັ້ນສູງຕ່າງໆຂອງຈີນກໍໄດ້ສະເໜີໂຄງຄວາມຄິດທີ່ສ້າງໂຮງຮຽນຢ່າງເປີດປະຕູຕໍ່ພາຍນອກແລະພະຍາຍາມປະຕິບັດຕົວຈິງ.ຄຽງຄູ່ກັບການຮ່ວມມືລະຫວ່າງຊາດດ້ານການສຶກສາເພີ່ມທະວີຂຶ້ນຢ່າງບໍ່ຢຸດຢັ້ງ,ນັກສຶກສາຕ່າງປະເທດໄດ້ມາຮຽນຢູ່ຈີນນັບມື້ນັບຫຼາຍຂຶ້ນ.ນັກສຶກສາບັນດາປະເທດໄດ້ເປັນຕົວແທນໃຫ້ແກ່ວັດທະນະທຳປະເທດຕົນແລະໄດ້ກາຍເປັນກຳລັງສຳຄັນແງ່ໜຶ່ງທີ່ຊຸກຍູ້ວັດທະນະທຳໃນເດີ່ນໂຮງຮຽນຫັນເປັນສາກົນ.ໂດຍສະເພາະຢູ່ປັກກິ່ງນະຄອນໃຫຍ່ທີ່ມີລັກສະນະສາກົນ,ໃນເດີ່ນໂຮງຮຽນທີ່ເປັນສັງຄົມນ້ອຍ,ສີສັນວັດທະນະທຳຫຼາຍເຄົ້າກໍຍິ່ງພົ້ນເດັ່ນຂຶ້ນ.ທ່ານນາງລິວອຽນຊິ່ງ ຮອງຫົວໜ້າພະແນກຮ່ວມມືແລກປ່ຽນກັບຕ່າງປະເທດຂອງມະຫາວິທະຍາໄລຄົມມະນາຄົມປັກກິ່ງເວົ້າວ່າ,
ນັກສຶກສາຕ່າງປະເທດໄດ້ນຳເອົາວັດທະນະທຳທີ່ອຸດົມສົມບູນແລະມີຫຼາຍສີຫຼາຍສັນມາໃຫ້ໂຮງຮຽນພວກເຮົາ,ທັງນີ້ບໍ່ເຄີຍມີມາກ່ອນໃນເດີ່ນໂຮງຮຽນ.ຄົນທັງຫຼາຍຈະຊອກຮູ້ນັກສຶກສາຕ່າງປະເທດຫຼາຍກວ່າເກົ່າ,ແລກປ່ຽນກັບພວກເຂົາເຈົ້າຢ່າງເລິກເຊິ່ງກວ່າເກົ່າ,ແລະຮັບຮູ້ວັດທະນະທຳຂອງຫຼາຍປະເທດ.ທ່ານນາງວາງຮົງຢິ່ງ ຮອງຫົວໜ້າພະແນກໂຄສະນາຂອງມະຫາວິທະຍາໄລຄົມມະນາຄົມປັກກິ່ງກ່າວວ່າ,ການຊຸກຍູ້ວັດທະນະທຳຫຼາຍເຄົ້າເຊື່ອມໂຍງເຂົ້າກັນເພື່ອສ້າງເດີ່ນໂຮງຮຽນທີ່ກົມກຽວກັນ,ທັງສອດຄ່ອງກັບກົດເກນທີ່ວັດທະນະທຳຫຼາຍເຄົ້າຢູ່ຮ່ວມກັນຢ່າງກົມກຽວກັນ,ທັງມີຜົນດີຕໍ່ການສ້າງສາວັດທະນະທຳໃນເດີ່ນໂຮງຮຽນ.ທ່ານນາງເຫັນວ່າ,
ໃຕ້ສະພາບແວດລ້ອມທີ່ສ້າງໂຮງຮຽນຢ່າງເປີດປະຕູຕໍ່ພາຍນອກ,ກໍເຮັດໃຫ້ວັດທະນະທຳໃນເດີ່ນໂຮງຮຽນຫັນເປັນສາກົນ.ເຊິ່ງໄດ້ເຮັດໃຫ້ບັນຍາກາດວັດທະນະທຳກວມລວມໃນໂຮງຮຽນອຸດົມສົມບູນແລະຂະຫຍາຍຕົວຕື່ມອີກ,ພວກເຮົາກໍຫວັງວ່າງານວັດທະນະທຳສາກົນເທື່ອນີ້ຈະວາງສະແດງໂຮງຮຽນພວກເຮົາຕໍ່ໂລກ,ນຳເອົາໂລກເຂົ້າມາໂຮງຮຽນຕື່ມອີກ,ເສີມຂະຫຍາຍ ບົດບາດອັນຕັ້ງໜ້າທີ່ເຮັດໃຫ້ວັດທະນະທຳຫຼາຍຢ່າງຊຸກຍູ້ກັນແລະເຊື່ອມໂຍງເຂົ້າກັນ.
|
