|
ໃນລະດູຮ້ອນຕ້ອງລະວັງພະຍາດຍ້ອນແອເຢັນ
cri
|
ໃນລະດູຮ້ອນທີ່ອົບເອົ້າ, ຮຽນ, ການເຮັດວຽກຫຼືລົມກັນຢູ່ໃນຫ້ອງແອແມ່ນເລື່ອງທີ່ສະບາຍທີ່ສຸດ, ແຕ່ຢູ່ເບື້ອງຫຼັງແອເຢັນນັ້ນ, ພັດມີຄວາມອັນຕະລາຍແຝງຊ້ອນຢູ່, ຖ້າບໍ່ລະວັງ, ກໍຈະເກີດເປັນພະຍາດ. ຜູ້ຊ່ຽວຊານຊີ້ອອກວ່າ, ປະຈຸບັນ, ຜູ້ທີ່ເປັນພະຍາດແອເຢັນນັ້ນສ່ວນຫຼາຍແມ່ນຊາວໜຸ່ມ, ໂດຍສະເພາະແມ່ນຜູ້ທີ່ເຮັດວຽກໃນຫ້ອງແອເຢັນຂອງບໍລິສັດຕ່າງໆ. ແຕ່ໃນອາກາດທີ່ອົບເອົ້າ, ແອເຢັນກໍຂາດບໍ່ໄດ້, ສະນັ້ນ, ຮູ້ໃຊ້ແອເຢັນຕາມຫຼັກວິທະຍາສາດນັ້ນແມ່ນເລື່ອງທີ່ສຳຄັນທີ່ສຸດ.
ໃນຫ້ອງແອຄວນເອົາໃຈໃສ່ຮັກສາຄວາມຊຸ່ມ
ຫຼາຍໆຄອບຄົວລ້ວນແຕ່ຢ້ານວ່າຖືກລົມເຢັນພັດດົນໂພດຈະພາໃຫ້ຄົນເປັນຫວັດ, ສະນັ້ນ, ໃນເວລານອນ, ທັງເປີດແອທັງຫົ່ມຜ້າຫົ່ມໜາ, ເຫັນວ່າເຮັດແນວນີ້ຈະປ້ອງກັນບໍ່ໃຫ້ເປັນພະຍາດຍ້ອນແອເຢັນໄດ້. ທີ່ຈິງແລ້ວ, ຫຼອດລົມຫາຍໃຈແມ່ນອ່ອນແອທີ່ສຸດ, ຫົ່ມຜ້າຫົ່ມມີແຕ່ເຮັດໃຫ້ຮ່າງກາຍອຸ່ນຂຶນພັດປ້ອງກັນພະຍາດບໍ່ໄດ້. ເຖິງວ່າແອໃຊ້ໃນເຮືອນບໍ່ເໝາະແກ່ເຊື້ອພະຍາດເປັນກຸ່ມເຕີບໂຕ, ບໍ່ຫ່ອນຈະເຮັດໃຫ້ຄົນເປັນພະຍາດປອດອັກເສບ, ແຕ່ລົມເຢັນຜ່ານຫຼອດລົມຫາຍໃຈແລ້ວເຂົ້າໃນຮ່າງກາຍ, ເມື່ອຕື່ນນອນແລ້ວຮູ້ສຶກປາກແລະດັງແຫ້ງ, ກໍຈະເກີດມີອາການເປັນຫວັດຄືກັນ. ນອກນີ້, ສະພາບແວດລ້ອມແຫ້ງເໝາະແກ່ເຊື້ອພະຍາດແລະເຊື້ອໄວລັດຢູ່ລອດ.
ຜູ້ຊ່ຽວຊານຊີ້ອອກວ່າ, ຜູ້ທີ່ເຂົ້າອອກຫ້ອງແອເລື້ອຍໆນັ້ນ, ຕ້ອງມີການຂ້າມຜ່ານດ້ານອຸນຫະພູມ, ຕົວຢ່າງຄືຄວນປັບອຸນຫະພູມໃຫ້ສູງຂຶ້ນຫຼືປິດແອກ່ອນ, ເມື່ອເຂົ້າປະຕູຕ້ອງເຊັດເຫື່ອໃຫ້ແຫ້ງກ່ອນ. ເມື່ອຢູ່ໃນຫ້ອງແອເປັນເວລາດົນນານ, ຄວນດື່ມນ້ຳໃຫ້ຫຼາຍ, ເອົາຜ້າປຽກຖູພື້ນເພື່ອຮັກສາຄວາມຊຸ່ມຢູ່ເລື້ອຍໆ. ນອກນັ້ນ, ເມື່ອອຸນຫະພູມນອກຫ້ອງຕ່ຳກວ່າ25ອົງສາກໍຢ່າເປີດແອ, ຫຼັງຈາກສອງໂມງກາງຄືນອາກາດຈະເຢັນລົງ, ກໍຄວນປັບແອໃຫ້ຢູ່ໃນສະພາວະເຂົ້ານອນ.
ຮັກສາໃຫ້ອາກາດລຸລ່ວງສາມາດປ້ອງກັນການວິນຫົວ
ພວກເຮົາເຫັນຢູ່ເລື້ອຍໆວ່າຊາວໜຸ່ມຫຼືຜູ້ທີ່ອ່າວຕຸ້ຍນັ້ນ, ມັກເປີດແອຕະຫຼອດມື້, ຫຼືວ່າເຫື່ອໄຫຼໄຄຍ້ອຍໃນເວລາກັບມາຈາກທາງນອກ, ຍັງກໍເປີດແອຮອດອຸນຫະພູມຕ່ຳສຸດ, ບາງຄົນຍັງໃຫ້ແອພັດໃສ່ໂດຍກົງ, ຮູ້ສຶກສະບາຍໃຈທີ່ສຸດໃນຄາວນັ້ນ, ພັດບໍ່ຮູ້ວ່າ, ອຸນຫະພູມຕ່ຳລົງ3ຫາ4ອົງສາບາດດຽວ, ຈະເຮັດໃຫ້ວິນຫົວ. ນອກນີ້, ອາກາດເຢັນທີ່ພັດມາກະທັນຫັນຈະເຮັດໃຫ້ຮູເຫື່ອຫົດເຂົ້າຢ່າງກະທັນຫັນ, ແລະພາໃຫ້ເຈັບຫົວ.
ຜູ້ຊ່ຽວຊານແພດສາດຊີ້ອອກວ່າ, ນອກຈາກເຮັດໃຫ້ຄົນເປັນຫວັດແລ້ວ, ແອກໍໄດ້ທຳລາຍສະໝອງຢ່າງຮ້າຍແຮງ, ຄວນພະຍາຍາມຫຼີກເວັ້ນຢ່າຢູ່ໃນຫ້ອງແອເປັນເວລາດົນນານ, ຖ້າມີເງື່ອນໄຂດີທີ່ສຸດໃຫ້ຮັກສາອຸນຫະພູມໃນຫ້ອງຢູ່ປະມານ25ອົງສາ, ຄວາມຫຼຸດລື່ນກັນລະຫວ່າງອຸນຫະພູມໃນຫ້ອງແລະນອກຫ້ອງຢ່າໃຫ້ເກີນ7ອົງສາດ ຍັງຕ້ອງເປີດປ່ອງຢ້ຽມປ່ຽນອາກາດເລື້ອຍໆ, ຮັບປະກັນໃຫ້ອາກາດລຸລ່ວງດີ, ເມື່ອເປີດແອ1ຫາ3ຊົ່ວໂມງແລ້ວຕ້ອງປິດແອຊົ່ວໄລຍະໜຶ່ງ, ເປີດຫ້ອງເພື່ອເຮັດໃຫ້ອາກາດສົດຊື່ນ, ລົມເຢັນທຳມະຊາດແມ່ນດີທີ່ສຸດ. ຖ້າເງື່ອນໄຂບໍ່ອະນຸຍາດ, ດີທີ່ສຸດຫ່າງກັນຊົ່ວໂມງໜຶ່ງຕົນເອງຄວນໄປຫາຍໃຈເອົາອາກາດຢູ່ບ່ອນທີ່ມີປ່ອງຢ້ຽມເຊັ່ນລະບຽງນອກເຮືອນເປັນຕົ້ນ.
ພັດແອເຢັນເປັນເວລາດົນນານຕ້ອງຮັກສາຄວາມອົບອຸ່ນ
ໃນລະດູຮ້ອນ, ອາກາດນອກເຮືອນອົບເອົ້າ, ຄົນທັງຫຼາຍນຸ່ງເສື້ອໜ້ອຍ, ແຕ່ເມື່ອອຸນຫະພູມໃນຫ້ອງແອຕ່ຳໂພດ, ແລະນຸ່ງເສື້ອໜ້ອຍ, ອຸນຫະພູມຕ່ຳຈະກະຕຸກໃຫ້ເສັ້ນເລືອດຫົດເຂົ້າຢ່າງກະທັນຫັນ, ເລືອດແລ່ນບໍ່ລຸລ່ວງ, ແລ້ວພາໃຫ້ເຈັບຄໍ່ກະດູກ, ຄໍແລະກະດູກສັນຫຼັງແຂງກະດ້າງ, ມັກເຈັບແອວແລະຕີນມືເຢັນເລື້ອຍໆ. ຜູ້ທີ່ເຮັດວຽກໃນຫ້ອງການແລະຕຶກໂດຍສະເພາະແມ່ນຜູ້ທີ່ນັ່ງຕະຫຼອດມື້ນັ້ນ, ດີທີ່ສຸດແມ່ນກຽມສົ້ງເສື້ອຂາຍາວແຂນຍາວໃນຫ້ອງການ, ໂດຍສະເພາະແມ່ນຜູ້ຍິງ, ຄວນເອົາຜ້າຂົນໜູນຫຼືເສື້ອໜາມາປົກຫົວເຂົ່າ, ພ້ອມກັນນັ້ນ, ເມື່ອນັ່ງໄລຍະໜຶ່ງແລ້ວຄວນຢືນຂຶ້ນມາຫັດກາຍ, ເພື່ອເຮັດໃຫ້ເລືອດໝູນວຽນດີກວ່າເກົ່າ.
ເຄັດລັບໃນການໃຊ້ແອ
ອຸນຫະພູມຂອງແອບໍ່ຄວນຕ່ຳຫຼາຍ, ທຳມະດາໃຫ້ຄວບຄຸມໄວ້ຢູ່ປະມານ25ອົງສາ, ອຸນຫະພູມໃນຫ້ອງຕ່ຳກວ່ານອກຫ້ອງ3ຫາ5ອົງສາແມ່ນດີທີ່ສຸດ.
ຜູ້ເຮັດວຽກໃນຫ້ອງແອຄວນດື່ມນ້ຳໃຫ້ຫຼາຍ. ຄວນຕົ້ມນ້ຳຊາດອກເບັນຈະມາດເປັນຕົ້ນ, ເພື່ອແກ້ຮ້ອນໃນແລະແກ້ພິດ.
ຈຳກັດເວລາເປີດແອ. ຄືອາກາດຮ້ອນເອົ້າ, ກໍຢ່າເປີດແອຕະຫຼອດມື້, ຍິ່ງບໍ່ຄວນໃຫ້ແອພັດໃສ່ໂດຍກົງ.
ຄວນຮັກສາໃຫ້ອາກາດໃນຫ້ອງສົດໃສ. ຄວນເປີດປ່ອງຢ້ຽມເປັນປະຈຳ, ຢ່າງໜ້ອຍຕອນເຊົ້າແລະຕອນຫົວຄ່ຳເປີດເທື່ອໜຶ່ງ, ເທື່ອໜຶ່ງປະມານ10ຫາ20ນາທີ. ພ້ອມກັນນັ້ນ, ຫຼີກເວັ້ນບໍ່ໃຫ້ສູບຢາໃນຫ້ອງແອ, ເຖິງວ່າເປີດແອຢູ່, ກໍຄວນເປີດປ່ອງຢ້ຽມໜ້ອຍໜຶ່ງ.
ເວລາເຂົ້າອອກຫ້ອງແອ, ຄວນນຸ່ງເສື້ອຕື່ມຫຼືແກ້ອອກຕາມອຸນຫະພູມ. ໃນຍາມນອນກາງຄືນ, ໃຫ້ຫຸ້ມຜ້າຫົ່ມບາງຫຼືຜ້າຫົ່ມຂົນໜູນ, ໂດຍສະເພາະແມ່ນປົກຫຸ້ມທ້ອງໃຫ້ດີ.
|
|
