|
ຮູບເງົາເລື່ອງອູຈີແມ່ນຮູບເງົາເລື່ອງໃໝ່ທີ່ທ່ານເສີນໄຂເກີ່ ຜູ້ກຳກັບການສະແດງທີ່ມີຊື່ສຽງໃນໂລກເປັນຜູ້ນຳສະເໜີໃນຫຼາຍເດືອນກ່ອນ,ໃນຍາມນັ້ນໄດ້ມີລາຍຮັບຈາກການຂາຍປີ້200ລ້ານຢວນ.ແຕ່ວ່າ,ຫວ່າງມໍ່ໆນີ້,ຝ່າຍຜະລິດຂອງຮູບເງົາເລື່ອງນີ້ພັດຖືກສື່ມວນຊົນຂອງຈີນຕຳໜິໂດຍທົ່ວໄປ.ສາຍເຫດແມ່ນ,ໃນເວລາຖ່າຍຮູບເງົາເລື່ອງນີ້ຢູ່ໜອງບີ້ກູ່ທ່ຽນສືຂອງແຂວງຢຸນນານພາກໃຕ້ຂອງຈີນ,ໄດ້ທຳລາຍສິ່ງແວດລ້ອມທຳມະຊາດຢູ່ແຫ່ງນັ້ນຢ່າງໜັກໜ່ວງ.ຄວາມເປັນມາຂອງເລື່ອງນີ້ເປັນແນວໃດ?ໃຜຈະລົບລ້າງໄພຊີວະພາບທີ່ຮູບເງົາເລື່ອງອູຈີກໍ່ໄວ້?ຂະແໜງການຮັບຜິດຊອບຄຸ້ມຄອງຂອງລັດຖະບານຈີນຈະມີວິທີແກ້ໄຂແນວໃດຕໍ່ເຫດການປະເພດນີ້?ໃນລາຍການຈີນປັດຈຸບັນພາກນີ້,ພວກເຮົາຈະລົມກັບທ່ານກ່ຽວກັບບັນຫາເຫຼົ່ານີ້.
ທ່ານຜູ້ຟັງທີ່ໂຄລົບ,ທ່ານພວມຟັງຢູ່ນີ້ແມ່ນບົດສົນທະນາຂອງຕົວສະແດງໃນຮູບເງົາເລື່ອງອູຈີ,ຈຸດຂາຍໃຫຍ່ກວ່າໝູ່ທີ່ຮູບເງົາເລື່ອງນີ້ປະກາດໃນເວລາເລີ່ມສາຍນັ້ນແມ່ນພາບທີ່ສວຍງາມ.ຕາມໄດ້ຊາບ,ພາບສາກລະຄອນຂອງຮູບເງົາເລື່ອງນີ້ສ່ວນຫຼາຍຖ່າຍຢູ່ໜອງບີ້ກູ່ທ່ຽນສື ເຂດທີວທັດທີ່ມີຊື່ສຽງຂອງແຂວງຢຸນນານພາກຕາເວັນຕົກສຽງໃຕ້ຂອງຈີນ.ໜອງບີ້ກູ່ທ່ຽນສືຕັ້ງຢູ່ເຂດພູດອຍທີ່ສູງກວ່າໜ້ານ້ຳທະເລ4000ແມັດ,ນ້ຳໜອງເສາະໃສທີ່ສຸດ,ແຄມໜອງເຕັມໄປດ້ວຍດອກກາກະເລົາທີ່ຫາຍາກ,ຢູ່ອ້ອມແອ້ມໜອງປົກຫຸ້ມໄປດ້ວຍປ່າໄມ້ດຶກດຳບັນທີ່ຕຶບໜາແລະທົ່ງຫຍ້າທີ່ຂຽວອຸ່ມທຸ່ມ.
ແຕ່ວ່າ,ຍ້ອນວ່າໜ່ວຍຖ່າຍຮູບເງົາເລື່ອງອູຈີໄປແຫ່ງນັ້ນ,ໜອງທ່ຽນສືອັນສວຍງາມໄດ້ປະສົບໄພຖືກທຳລາຍ.ນັກຂ່າວໄດ້ເຫັນວ່າ,ປະຈຸບັນ,ຢູ່ແຫ່ງນັ້ນບໍ່ພຽງແຕ່ເຕັມໄປດ້ວຍຂີ້ເຫຍື້ອຄືແອບເຂົ້າ,ຂວດເຫຼົ້າ,ຖົງປຼາສະຕິກ,ເສື້ອກັນຝົນເປັນຕົ້ນເທົ່ານັ້ນ,ພ້ອມກັນນັ້ນ,ເພື່ອຄວາມຕ້ອງການໃນການຈັດວາງສາກຫຼັງ,ໃນໜອງທ່ຽນສືຍັງຖືກຕອກຫຼັກ100ກວ່າເສົາ;ດອກກາກະເລົາພູສູງແຜ່ນໜຶ່ງໃນເຂດຫ້າມປ້ຳຂອງໜອງທ່ຽນສືຖືກຊວ້ານໃຫ້ຮາບພຽງ;ໂຄງຮ່າງເບຕົງແຫ່ງໜຶ່ງທີ່ສູງ10ກວ່າແມັດ,ລວງກວ້າງ40ກວ່າແມັດຕັ້ງຢູ່ແຄມໜອງ.
ການປ່ຽນແປງຂອງເຂດທີວທັດທ່ຽນສື,ພາໃຫ້ຂອງຊາວບ້ານຢູ່ແຫ່ງນັ້ນບໍ່ພໍໃຈຢ່າງຮຸນແຮງ.ພາຍຫຼັງສື່ມວນຊົນລາຍງານຂຈ່າວນີ້ແລ້ວ,ມວນຊົນແຫ່ງຕ່າງໆກໍ່ພາກັນເຂົ້າຮ່ວມຖັນແຖວຕຳໜິໜ່ວຍອູຈີທຳລາຍສິ່ງແວດລ້ອມທຳມະຊາດ.ທ່ານນາງຫຼີຮ້າວ ໄທເມືອງປັກກິ່ງຜູ້ໜຶ່ງເວົ້າວ່າ:
"ໜອງບີ້ກູ່ທ່ຽນສືແມ່ນໜອງທຳມະຊາດ,ດຽວນີ້ເຈົ້າໄປທຳລາຍມັນ,ຈະຟື້ນຟູເປັນສະພາບເດີນດ້ວຍກຳລັງຄົນບໍ່ໄດ້ດອກ.ຂ້າພະເຈົ້າຄຽດແຄ້ນທີ່ສຸດນັ້ນແມ່ນທ່າທີຕໍ່ທຳມະຊາດຂອງໜ່ວຍຖ່າຍຮູບເງົາໜ່ວຍນີ້,ພວກເຂົາເຈົ້າໃຊ້ທິວທັດທຳມະຊາດພຽງແຕ່ເພື່ອຮັບໃຊ້ໜ້າກ້ອງຂອງຕົນເທົ່ານັ້ນ,ເຫັນແກ່ຕົວແທ້ໆ!"
ຕາມໄດ້ຊາບ,ພາຍຫຼັງໜ່ວຍຖ່າຍຮູບເງົາອູຈີຖ່າຍຮູບເງົາແລ້ວໆ,ບໍ່ໄດ້ບູລະນະເຂດທີວທັດທີ່ຖືກທຳລາຍ,ພຽງແຕ່ມອບໝາຍໃຫ້ຂະແໜງການອົງການປົກຄອງຢູ່ແຫ່ງນັ້ນເຮັດວຽກຊຳລະຕາມຫຼັງເທົ່ານັ້ນ,ສ່ວນວ່າທຶນຮອນທີ່ຕ້ອງການນັ້ນກໍ່ແມ່ນມາຈາກໄມ້ທ່ອນ,ອຸປະກອນເຫຼັກກ້າແລະອຸປະກອນທີ່ກ່ຽວຂ້ອງເປັນຕົ້ນທີ່ໃຊ້ໄດ້ພາຍຫຼັງມ້າງສາກຫຼັງແລ້ວ.
ທີ່ຈິງແລ້ວ,ໃນບໍ່ເທົ່າໃດປີມານີ້,ເຫດການກ່ຽວກັບໜ່ວຍຖ່າຍຮູບເງົາທຳລາຍຊີວະພາບທຳມະຊາດໄດ້ເກີດຂຶ້ນຢູ່ຈີນເລື້ອຍໆ:ປີ2004,ໜ່ວຍຖ່າຍລະຄອນໂທລະພາບ"ເຊັນຕຽວເຊ່ຍລີ"ຖືກກ່າວຟ້ອງວ່າໃນເວລາຖ່າຍຢູ່ສວນປ່າໄມ້ຈິວໄຈ້ກ່າວ ເຂດທີວທັດທີ່ມີຊື່ສຽງຢູ່ພາກຕາເວັນຕົກຂອງຈີນນັ້ນ,ໄດ້ທຳລາຍຄັນຄູ ການຊີອົມຂອງໜອງເທວະດາຢູ່ແຫ່ງນັ້ນ;ປີ2005,ເລື່ອງ"ຄວາມຮັກຢູ່ເສີນນົງເຈ້ຍ"ຖືກຕຳໜິວ່າຖິ້ມຂີ້ເຫຍື້ອທົ່ວທີບຢູ່ບ່ອນຖ່າຍສາກທຳມະຊາດ;ປີດຽວກັນ,ໜ່ວຍຖ່າຍຮູບເງົາເລື່ອງ"ຊິງຕ່ຽນຕ້າເຊິ້ງ"ໄດ້ສ້າງຮູບເຫັດດ້ວຍຊີມັງຢູ່ເຂດທີວທັດເສີນນົງເຈ້ຍ,ເຮັດໃຫ້ຮູບໜ້າດິນຟື້ນຟູຄືນບໍ່ໄດ້.
ຕໍ່ປະກົດການທີ່ການຖ່າຍຮູບເງົາແລະລະຄອນໂທລະພາບທຳລາຍຊີວະພາບທຳມະຊາດໄດ້ເຫັນຢູ່ເລື້ອຍໆໃນປັດຈຸບັນ,ໂດຍສະເພາະແມ່ນເຫດການທີ່ເຂດທີວທັດທຳມະຊາດໜອງບີ້ກູ່ທ່ຽນສືຖືກທຳລາຍ,ໃນເວລາໃຫ້ສຳພາດຕໍ່ນັກຂ່າວ,ທ່ານເບທ່າວ ຮອງຫົວໜ້າພະແນກນະໂຍບາຍກົດບັນຍັດຂອງກົມໃຫຍ່ການອະນຸລັກສິ່ງແວດລ້ອມແຫ່ງຊາດຈີນກ່າວວ່າ,
"ເຫດການນີ້ໄດ້ສ້າງອຸທາຫອນສອນໃຈຫຼາຍຢ່າງໄວ້ໃຫ້ແກ່ພວກເຮົາ,ເວົ້າສຳລັບຂະແໜງການອະນຸລັກສິ່ງແວດລ້ອມແລ້ວ,ພວກເຮົາຄວນເຂົ້າແຊກລ່ວງໜ້າຢ່າງເປັນເຈົ້າການກວ່າເກົ່າ.ດ້ານອື່ນອີກແມ່ນຫົວໜ່ວຍຖ່າຍທຳ,ພວກເຂົາເຈົ້າຕ້ອງເພີ່ມທະວີສະຕິອະນຸລັກສິ່ງແວດລ້ອມ,ຂ້າພະເຈົ້າເຫັນວ່ານີ້ແມ່ນສຳຄັນທີ່ສຸດ.ໃນຖານເປັນຂະແໜງການຮັບຜິດຊອບຄຸ້ມຄອງຂອງລັດ,ພວກເຮົາຍັງຕ້ອງຄົ້ນຄວ້າແລະວາງມາດຕະການຄຸ້ມຄອງທີ່ມີລັກສະນະແນໃສ່ບາງຢ່າງ."
ແຕ່ວ່າ,ທ່ານເບທ່າວຍັງເວົ້າຢ່າງກົງໄປກົງມາວ່າ,ສຳລັບການກະທຳທີ່ໜ່ວຍຖ່າຍຮູບເງົາແລະລະຄອນໂທລະພາບຖ່າຍຢູ່ເຂດທີວທັດ,ແລະເຂດອະນຸລັກທຳມະຊາດ,ບໍ່ມີຂໍ້ກຳນົດລະອຽດໃນກົດບັນຍັດອະນຸລັກສິ່ງແວດລ້ອມຕະຫຼອດມາ,ຂາດກົນໄກປະເມີນຜົນສະທ້ອນສິ່ງແວດລ້ອມ.ເຖິງວ່າເປັນແນວນີ້ກໍ່ຕາມ,ປະຈຸບັນ,ຜູ້ຮັບຜິດຊອບຂອງກົມໃຫຍ່ອະນຸລັກສິ່ງແວດລ້ອມແຫ່ງຊາດຈີນແລະກົມອະນຸລັກສິ່ງແວດລ້ອມແຂວງຢຸນນານແລະຜູ້ຊ່ຽວຊານດ້ານອະນຸລັກສິ່ງແວດລ້ອມທີ່ຊົງອິດທິພົນກໍໄດ້ໄປສຳຫຼວດຢູ່ໜອງບີ້ກູ່ທ່ຽນສືແລ້ວ,ເພື່ອກວດກາແລະປະເມີນສະພາບທຳລາຍຊີວະພາບຢູ່ແຫ່ງນັ້ນ.
ໃນຂະນະດຽວກັນ,ທ່ານຊິວປາວຊິ່ງ ຮອງລັດຖະມົນຕີກະຊວງກໍ່ສ້າງຈີນໄດ້ບົ່ງຊື່ຕຳເໜິໜ່ວຍຖ່າຍຮູບເງົາເລື່ອງອູຈີທີ່ທຳລາຍເຂດທີວທັດທຳມະຊາດຂອງໜອງບີ້ກູ່ທ່ຽນສື,ແລະຮ້ອງຂໍໃຫ້ກວດກາບ່ອນຖ່າຍຮູບເງົາແລະລະຄອນໂທລະພາບຢູ່ເຂດທີວທັດແຫ່ງຕ່າງໆ;
"ຖ້າປະກົດເຫັນພວກເຂົາເຈົ້າມີບ່ອນໃດບໍ່ສອດຄ່ອງກັບແຜນຜັງລວມຂອງເຂດທີວທັດກໍ່ສົ່ງໃບແຈ້ງການ,ໃຫ້ພວກເຂົາເຈົ້າດັດແກ້,ຖ້າບໍ່ປະຕິບັດຕາມ,ພວກເຮົາກໍ່ແຈ້ງການຕຳໜິແລະແກ້ໄຂແລະມ້າງຖິ້ມສິ່ງກໍ່ສ້າງທີ່ຜິດຂໍ້ກຳນົດເຫຼົ່ານີ້,ເພື່ອຮັບປະກັນຊັບພະຍາກອນທີວທັດມໍລະດົກວັດທະນະທຳປະຫວັດສາດບໍ່ໃຫ້ຖືກທຳລາຍຍ້ອນນ້ຳມືຂອງພວກເຮົາໃນຂະບວນການຫັນເປັນຕົວເມືອງແລະຫັນເປັນອຸດສາຫະກຳຢ່າງວ່ອງໄວ.
ນອກນີ້,ຫວ່າງມໍ່ໆນີ້,ກະຊວງກໍ່ສ້າງຂອງຈີນໄດ້ອອກໃບແຈ້ງການສະບັບໜຶ່ງ,ກຳນົດຢ່າງຈະແຈ້ງວ່າ,ອົງການຄຸ້ມຄອງເຂດທີວທັດຂອງແຫ່ງຕ່າງໆຕ້ອງຫ້າມແລະຈຳກັດການເຄື່ອນໄຫວຕ່າງໆເຊັ່ນຖ່າຍຮູບເງົາ.ລະຄອນໂທລະພາບແລະການສະແດງຫົວຂໍ້ຕົ້ນຕໍຂະໜາດໃຫຍ່ຢູ່ເຂດທີວທັດເປັນຕົ້ນຢ່າງເຂັ້ມງວດ,ຖ້າຕ້ອງດຳເນີນການເຄື່ອນໄຫວປະເພດນີ້ແທ້,ກໍຕ້ອງດຳເນີນການປະເມີນແລະພິສູດຢ່າງຈິງຈັງ,ແລະວາງແຜນການອະນຸລັກ,ຮັບປະກັນຊັບພະຍາກອນແລະສິ່ງແວດລ້ອມຂອງເຂດທີວທັດໄດ້ຮັບການອະນຸລັກຢ່າງເຄັ່ງຄັດ.
ຕາມໄດ້ຊາບ,ປະຈຸບັນ,ບ່ອນຖືກທຳລາຍຂອງໜອງບີ້ກູ່ທ່ຽນສືພວມໄດ້ຮັບການບູລະນະ.ແຕ່ຜູ້ຊ່ຽວຊານທີ່ກ່ຽວຂ້ອງຄາດຄະເນວ່າ,ຖ້າເຮັດໃຫ້ແຫ່ງດັ່ງກ່າວໄດ້ຮັບການຟື້ນຟູເປັນທີວທັດສວຍງາມຄືເມື່ອກ່ອນ,ຕ້ອງການເວລາ3ຫາ5ປີ.
|
