|
ຕາມຂ່າວສານຊິນຮວາ: ແຕ່ວັນທີ 7 ຫາວັນທີ 9 ມິຖຸນາ, ກອງປະຊຸມເວທີປາໄສລົງທຶນເສັ້ນທາງຜ້າໄໝຄັ້ງທຳອິດຈະຈັດຂຶ້ນຢູ່ນະຄອນຊີອານ ຕົວເມືອງຕາເວັນຕົກສຽງເໜືອຂອງຈີນ-ເຊິ່ງເປັນຈຸດຕົ້ນທາງຜ້າໄໝບູຮານ. ຜູ່ແທນທີ່ມາຈາກບັນດາພາກສ່ວນ ວິສາຫະກິດແລະອົງການປະຊາຊົນຂອງຈີນແລະຂອງອາຊີກາງຈະພ້ອມກັນຄົ້ນຄວ້າໂອກາດລົງທຶນຢູ່ເຂດເສັ້ນທາງຜ້າໄໝ, ຊຸກຍູ້ການຮ່ວມມືໃນຂົງເຂດວັດທະນະທຳແລະການທ່ອງທ່ຽວລະຫວ່າງບັນດາປະເທດ.
ຕາມໄດ້ຊາບ, ກອງປະຊຸມເວທີປາໄສລົງທຶນເສັ້ນທາງຜ້າໄໝແມ່ນຫຼາຍອົງການຂອງສະຫະປະຊາຊາດແລະອົງການຮ່ວມມືພາກພື້ນຫຼາຍຈຳນວນໜຶ່ງເປັນຜູ່ລິເລີ່ມຈະຈັດຂຶ້ນປີລະເທື່ອ. ເວທິປາໄສດັ່ງກ່າວມີຈຸດປະສົງຊຸກຍູ້ການລົງທຶນ ການຄ້າແລະການທ່ອງທ່ຽວ, ເພີ່ມທະວີການຮ່ວມມືແລະການພັດທະນາຂອງພາກພື້ນທີ່ລຽບແຄມເສັ້ນທາງຜ້າໄໝໃນນັ້ນມີຈີນ ກາສັກສະຕັງ ກຽກກີສະຕັງ ຕາຊີກີສະຕັງແລະອຸສເບກີສະຕັງ.
ເສັ້ນທາງຜ້າໄໝແມ່ນຈາກເຂດໃນຈີນ, ຜ່ານເຂດຕາເວັນຕົກສຽງເໜືອຈີນ, ຂ້າມທົ່ວທະວີບອາຊີແລ້ວຕໍ່ກັບທາງຄົມມະນາຄົມທາງບົກບູຮາຍຂອງທະວີບເອີລົບແລະທະວີບອາຟຼິກາ, ໄດ້ມີປະຫວັດສອງພັນກວ້າປີແລ້ວ.
|
