|
|
 |
| (GMT+08:00)
2006-06-02 18:23:34
|
 |
|
ຈີນເຊົາຊອກຫາກອບກູ້ຊາວປະມົງສັນຊາດຫວຽດນາມຢ່າງຂະໜາດໃຫຍ່(ສຽງ)
cri
Author: lingshuoca
|
ພາຍຫຼັງຈີນຊອກຫາກອບກູ້ເຮືອຫາປາແລະຊາວປະມົງສັນຊາດຫວຽດນາມທີ່ປະສົບຄວາມອັນຕະລາຍໃນພາຍຸໄຕ້ຝຸ່ນຊື້"ຈັ່ນຈູ່"ຢູ່ທະເລຈີນໃຕ້ເປັນເວລາ 16 ມື້ແລ້ວ,ວັນທີ 2 ມິຖຸນາ,ຈີນປະກາດວ່າ, ແຕ່ວັນທີ 2 ມິຖຸນາເປັນຕົ້ນໄປຢຸດຕິການເຄື່ອນໄຫວຊອກຫາກອບກູ້.ຕາມຊາບວ່າ,ການກອບກູ້ເທິງທະເລທີ່ຫາກໍສິ້ນສຸດລົງເທື່ອນີ້ແມ່ນການເຄື່ອນໄຫວຊອກຫາກອບກູ້ເທິງທະເລທີ່ຈີນຊ່ອຍກູ້ເຮືອຫາປາແລະຊາວປະມົງຂອງຕ່າງປະເທດຫຼາຍກວ່າໝູ່ນັບມາຮອດປັດຈຸບັນ.
ທ່ານໄຈຈິວກາງ ຫົວໜ້າໃຫຍ່ຫ້ອງການຢູ່ເວັນຂອງສູນຊອກຫາກອບກູ້ເທິງທະເລກະຊວງຄົມມະນາຄົມຈີນເວົ້າວ່າ,ຜູ້ກອບກູ້ໄດ້ດຳເນີນການຊອກຫາກອບກູ້ຢູ່ເຂດທະເລທີ່ກວ້າງ2ແສນກວ່າກິໂລແມັດຕາຂອງທະເລຈີນໃຕ້, ໄດ້ສະໜອງການຊ່ອຍເຫຼືອໃນດ້ານຊີວິດການເປັນຢູ່ແລະການປິ່ນປົວແກ່ເຮືອຫາປາ22ລຳແລະຊາວປະມົງ 300 ກວ່າຄົນທີ່ປະສົບຄວາມອັນຕະລາຍ,ທ່ານເວົ້າວ່າ:"ຍ້ອນກະຊວງຄົມມະນາຄົມຈີນໄດ້ຈັດຕັ້ງການຊອກຫາເທິງທະເລແລະທາງອາກາດຕໍ່ເຂດທະເລທີ່ເຮືອຫາປາຫວຽດນາມອາດຈະປະສົບຄວາມອັນຕະລາຍນັ້ນ 2 ເທື່ອຂຶ້ນໄປ, ການເຄື່ອນໄຫວດັ່ງກ່າວໄດ້ດຳເນີນໄປ 16 ມື້ແລ້ວ,ແລະໄດ້ກອບກູ້ເຮືອຫາປາຂອງຫວຽດນາມທັງໝົດທີ່ພົບເຫັນ,ຕາມສົນທິສັນຍາສາກົນ,ສູນຊອກຄົ້ນແລະກອບກູ້ເທິງທະເລຈີນຕົກລົງເຊົາກອບກູ້ເຮືອຫາປາຫວຽດນາມແຕ່ 12 ໂມງຂອງວັນທີ 2 ມິຖຸນາເປັນຕົ້ນໄປ."
ທ່ານເວົ້າວ່າ,ຫຼັງຈາກການກອບກູ້ຢຸດເຊົາແລ້ວ,ພາກສ່ວນຮັບຜິດຊອບການທະເລຂອງຈີນຈະສືບຕໍ່ປະກາດຄຳເຕືອນການເດີນທະເລ,ແລະຮ້ອງຂໍໃຫ້ກ່ຳປັ່ນການຄ້າທີ່ເດີນຜ່ານທະເລຈີນໃຕ້ເພີ່ມທະວີການສອດຊ່ອງແລະຊອກຄົ້ນ,ຕາບໃດໄດ້ຮັບຂ່າວທີ່ກ່ຽວຂ້ອງແລ້ວ,ຝ່າຍຈີນຈະຈັດຕັ້ງກຳລັງໄປກອບກູ້ອີກເທື່ອໜຶ່ງ.
ຕາມແນະນຳວ່າ,ການກອບກູ້ເທິງທະເລເທື່ອນີ້ແມ່ນການຊອກຄົ້ນແລະກອບກູ້ເທິງທະເລທີ່ຈີນຊອກຄົ້ນແລະກອບກູ້ເຮືອຫາປາແລະຊາວປະມົງຫຼາຍກວ່າໝູ່ນັບມາຮອດປັດຈຸບັນ.ທ່ານເຈີນດຶກເລື່ອງ ປະທານປະເທດຫວຽດນາມໄດ້ສົ່ງໂທລະເລກມາຍັງທ່ານຫູຈິນທາວ ປະທານປະເທດຈີນ,ເພື່ອສະແດງຄວາມຂອບອົກຂອບໃຈນຳຝ່າຍຈີນທີ່ໄດ້ກອບກູ້ຊາວປະມົງຫວຽດນາມທີ່ປະສົບຄວາມອັນຕະລາຍຢ່າງທັນການ.ທ່ານໄຈຈິວກ່າງເວົ້າວ່າ,ການກອບກູ້ເທື່ອນີ້ໄດ້ຮັບຄວາມເອົາໃຈໃສ່ໂດຍທົ່ວໄປຈາກປະຊາຄົມໂລກ,ແລະໄດ້ຮັບຄວາມຍ້ອງຍໍຈາກຄົນທັງຫຼາຍຢ່າງເປັນເອ ກະພາບກັນ.ທ່ານມີໂຕຼພູລົສ ເລຂາທິການໃຫຍ່ອົງການການທະເລສາກົນກໍໄດ້ຕີລາຄາສູງຕໍ່ເລື່ອງນີ້.ທ່ານໄຈຈິວກ່າງເວົ້າວ່າ:"ອົງການການທະເລສາກົນກໍພວມຄົ້ນ ຄວ້າກະຕິກາກ່ຽວກັບການເຮັດແນວໃດດຳເນີນການກອບກູ້ຢ່າງຂະໜາດໃຫຍ່.ຈີນ ກອບກູ້ຢ່າງສຳເລັດຜົນເທື່ອນີ້ໄດ້ສະໜອງຕົວຢ່າງໃຫ້ແກ່ອົງການການທະເລສາກົນນຳໄປຄົ້ນຄວ້າ,ພວກເຮົາຈະສະເໜີບົດລາຍງານໃຫ້ອົງການດັ່ງກ່າວ,ທັງນີ້ກໍແມ່ນເພື່ອເຜີຍແຜ່ບົດຮຽນສຳເລັດຜົນເຫຼົ່ານີ້ຂອງພວກເຮົາ."
ທ່ານຖ່າງຈົ່ງຝາ ເຈົ້າໜ້າທີ່ກົມກອບກູ້ທະເລຈີນໃຕ້ກະຊວງຄົມມະນາຄົມຈີນແນະນຳວ່າ,ໃນບໍ່ເທົ່າໃດປີມານີ້,ກຳລັງກອບກູ້ເທິງທະເລຂອງຈີນໄດ້ພັດທະນາຢ່າງວ່ອງໄວ,ປັດຈຸບັນ,ພຽງແຕ່ຖັດຈາກຍີ່ປຸ່ນໃນບັນດາປະເທດອາຊີ.ທ່ານເວົ້າວ່າ: "ປັດຈຸບັນ,ພວກເຮົາໄດ້ຈັດວາງກຳລັງກອບກູ້ວິຊາສະເພາະແຕ່ເໜືອຮອດໃຕ້,ພວກເຮົາໄດ້ຈັດວາງເຮືອຢູ່ເວນທັງໝົດ38ລຳຖ້າຄຳສັ່ງ,ນອກນີ້ຍັງມີຍົນເຮລີກົບກອບກູ້8ລຳພວມລໍຖ້າຄຳສັ່ງ.ນອກນັ້ນ,ພວກເຮົາໄດ້ສ້າງຖານກອບກູ້18ແຫ່ງຢູ່ເຂດແຄມທະເລ,ຍັງໄດ້ສ້າງ17ກອງກອບກູ້ສຸກເສີນ,ຢູ່ເວນຢູ່ເຂດແຄມທະເລຂອງຈີນຕະຫຼອດປີ."
ທ່ານກ່າວວ່າ,ລັດຖະບານຈີນຈະເພີ່ມການລົງທຶນເຂົ້າໃນການກອບກູ້ເທິງທະເລ,ໃນ5ປີຂ້າງໜ້ານີ້,ຈະສ້າງເຄື່ອງປະກອບກອບກູ້ຫຼາຍກວ່າເກົ່າ,ຊື້ຍົນເຮລີກົບມາເພິ່ນຫຼາຍກວ່າເກົ່າ.ເພື່ອເຮັດວຽກກອບກູ້ເທິງທະເລໃຫ້ດີ,ຈີນຍັງຈະຕັ້ງໜ້າຮ່ວມມືກັບປະເທດທີ່ກ່ຽວຂ້ອງ.
|
|
|
