|
ຕາມຂ່າວCRI: ວັນທີ 6 ມິຖຸນາ ຢູ່ທີ່ປັກກິ່ງ, ທ່ານຖາງເຈຍສວນ ທີ່ປຶກສາແຫ່ງລັດຈີນກ່າວວ່າ, ຈີນຍິນດີເພີ່ມເນື້ອໃນຂອງການພົວພັນຄູ່ຂາຍຸດທະສາດລະຫວ່າງຈີນກັບອາຊຽນຕື່ມອີກ.
ທ່ານຖາງເຈຍສວນແມ່ນໃຫ້ທັດສະນະດັ່ງກ່າວໃນເວລາພົບປະທ່ານລິມຢົກເຊັງ ລັດຖະມົນຕີຜູ່ທີ່ສອງກະຊວງການຕ່າງປະເທດແລະການຄ້າບຼູໄນ ປະເທດສະມາຊິກອາຊຽນທີ່ມາຢ້ຽມຢາມ.
ທ່ານຖາງເຈຍສວນກ່າວວ່າ, ໃນຫຼາຍປີມານີ້, ການພົວພັນລະຫວ່າງຈີນກັບອາຊຽນມີທ່ວງທ່າຂະຫຍາຍຕົວເປັນຢ່າງດີ, ຝ່າຍຈີນຍິນດີເພີ່ມເນື້ອໃນຂອງການພົວພັນຄູ່ຂາຍຸດທະສາດລະຫວ່າງຈີນກັບອາຊຽນຕື່ມອີກ, ເປີດກວ້າງຂົງເຂດການຮ່ວມມືລະຫວ່າງສອງຝ່າຍ, ຍົກລະດັບການຮ່ວມມືໃຫ້ສູງຂຶ້ນ, ປະກອບສວນອັນໃໝ່ເຂົ້າໃນການຊຸກຍູ້ສັນຕິພາບ ສະຖຽນລະພາບ ການຮ່ວມມືແລະຄວາມຈະເລີນຮຸ່ງເຮືອງຂອງພາກພື້ນແຫ່ງນີ້.
|
