|
|
(GMT+08:00)
2006-06-06 14:59:18
|
|
ວິທີແກ້ຄວາມຊຸ່ມອຶນໃນເຮືອນ
cri
ໃນຊີວິດປະຈຳວັນຂອງພວກເຮົາ, ມີບາງເທື່ອເສື້ອຜ້າຕາກບໍ່ແຫ້ງ, ຜ້າຫົ່ມກໍ່ຊຸ່ມໆ, ຢູ່ຕາມຈອກແຈໃນເຮືອນຍັງມີບ່ອນຕົກໂໝກອີກ, ລະດູຮ້ອນໄດ້ວຽນມາເຖິງແລ້ວ, ເມືອງລາວກໍໄດ້ເຂົ້າສູ່ລະດູຝົນ, ອາກາດຊຸ່ມອຶນກໍນຳເອົາຄວາມບໍ່ສະດວກສະບາຍມາໃຫ້ຊີວິດຂອງຄົນທັງຫຼາຍ.
ຫວ່າງມໍ່ໆນີ້, ສະມາຄົມເຮືອນຢູ່ແຫ່ງຊາດອາເມລິກາໄດ້ແນະນຳວິທີກວດເບິ່ງວ່າໃນເຮືອນຊຸ່ມອຶນຫຼືບໍ່: ຄືສັງເກດເບິ່ງຝາເຮືອນ, ແກ້ວປ່ອງຢ້ຽມມີອກຫຼືບໍ່; ຕຽງໄມ້ແລະປະຕູໄມ້ຈະຕັ້ງຂຶ້ນຍ້ອນດູດເອົາອາຍນ້ຳງ່າຍທີ່ສຸດ, ກໍແມ່ນໃຫ້ຕັ້ງເຄື່ອງວັດແທກຄວາມຊຸ່ມອຶນໃນເຮືອນ, ເພື່ອຕິດຕາມສະພາບຄວາມຊຸ່ມອຶນໃນເຮືອນໄດ້ທຸກເວລາ.
ຄັນຊັ້ນ, ມີວິທີໃດສາມາດເຮັດໃຫ້ໃນເຮືອນແຫ້ງສະບາຍແດ່? ທ່ານວາງລູ້ ຮອງເລຂາທິການຄະນະກຳມະການອະນຸລັກສິ່ງແວດລ້ອມຂອງສະມາຄົມຕົບແຕ່ງເຮືອນນະຄອນປັກກິ່ງໄດ້ແນະນຳຫຼາຍວິທີດັ່ງຕໍ່ໄປນີູ້:
ໃນຫ້ອງອາບນ້ຳ: ດີທີ່ສຸດແມ່ນໄຂປ່ອງຢ້ຽມໄວ້ບານໜຶ່ງຫຼືຕິດພັດລົມດູດໃສ່, ຖ້າບໍ່ມີຜັດລົມດູດ, ເມື່ອອາບນ້ຳແລ້ວເວລາອອກມາກໍຄວນປິດປະຕູຫ້ອງນ້ຳໄວ້, ເມື່ອອາຍນ້ຳຄ່ອຍເຫີຍໄປແລ້ວ, ຄ່ອຍເຂົ້າໄປເຊັດໃຫ້ແຫ້ງຫຼືໃຊ້ພັດລົມພັດໃຫ້ແຫ້ງ. ດີທີ່ສຸດແມ່ນໃຊ້ຜ້າກັງໃນຫ້ອງອາບນ້ຳ, ປ້ອງກັນບໍ່ໃຫ້ນ້ຳຟົ້ງໄປຊະຊາຍ. ໃນຫ້ອງອາບນ້ຳດີທີ່ສຸດຢ່າໃຊ້ຝາຫ້ອງປຼາສຕິກ, ຖ້າຊ່ອງຕໍ່ກາໂລມີຮອຍເປື້ອນໂໝກສີດຳ, ຄວນລ້າງຖູໃຫ້ກ້ຽງໃນທັນທີ.
ຢ່າໄຂມ້ຽນເຄື່ອງນຸ່ງໃນຕູ້ເສື້ອຜ້າໃນເວລາຝົນຕົກ, ເພື່ອບໍ່ໃຫ້ອາຍນ້ຳເຂົ້າໄປໃນຕູ້. ໃນເວລາມ້ຽນເກີບ, ໃຫ້ເອົາໜັງສືພິມຍ່ອງເປັນປຸ້ມຫຍັດໃສ່ໃນເກີບ, ໜຶ່ງແມ່ນເພື່ອໃຫ້ມັນດູດເອົາອາຍນ້ຳ, ສອງເພື່ອຮັກສາເກີບໃຫ້ຢູ່ໃນຊົງເກົ່າ.
ແປ້ນປູພື້ນ: ເມື່ອຖູພື້ນແລ້ວ, ດີທີ່ສຸດໃຫ້ເອົາຜ້າແຫ້ງເຊັດພື້ນໃຫ້ແຫ້ງ, ຫຼືໃຊ້ເຄື່ອງດູດທີ່ດູດໄດ້ທັງຂີ້ຟຸ່ນແລະອາຍນ້ຳນັ້ນດູດໃຫ້ແຫ້ງ.
ຖ້ວຍຊາມທີ່ຫາກໍລ້າງແລ້ວຍັງປຽກໆຢູ່ນັ້ນຢ່າຟ້າວເອົາເຂົ້າຕູ້ເທື່ອ, ຄວນເອົາຜ້າສະອາດມາເຊັດໃຫ້ແຫ້ງກ່ອນ, ຫຼືວ່າຕັ້ງໄວ້ໃຫ້ນ້ຳສະເດັດກ່ອນ, ຢູ່ລຸ່ມອ່າງລ້າງຖ້ວຍໃຫ້ປູຜ້າຂົນໜູໃສ່, ເພື່ອເຊັດໃຫ້ແຫ້ງໃນເວລາປຽກ.
ໃນຍາມອາກາດຊຸ່ມອຶນ, ເຄື່ອງໄຟຟ້າໃຊ້ໃນເຮືອນເຊັ່ນຄອມພິວເຕີເປັນຕົ້ນ, ມັກຕິດຂັດເລື້ອຍໆຍ້ອນຖືກອາຍນ້ຳ, ແຕ່ລະມື້ດີທີ່ສຸດໃຫ້ເປີດເຄື່ອງໄຟຟ້າເຫຼົ່ານີ້ຈັກ5ນາທີ. ເຮັດແນວນີ້, ຄວາມຮ້ອນທີ່ເກີດມາຈາກເຄື່ອງໄຟຟ້າເຫຼົ່ານີ້ສາມາດປ້ອງກັນບໍ່ໃຫ້ເຄື່ອງຕິດຄັດ, ທັງເຮັດໃຫ້ອາຍນ້ຳເຫືອດແຫ້ງ.
ວາລະສານຄ່າງຈ້ຽນ(ແປວ່າສຸຂະພາບ)ຂອງໄຕ້ຫວັນສະບັບມໍ່ໆນີ້ກໍໄດ້ແນະນຳຫຼາຍວິທີເພື່ອກຳຈັດຄວາມຊຸ່ມອຶນໃນເຮືອນ: ເຊັ່ນໃຊ້ຢາເຄມີເປັນເມັດກຳຈັດຄວາມຊຸ່ມອຶນທັງປ້ອງກັນ ແມງກັດ, ທັງມີກິ່ນຫອມ, ເໝາະໃຊ້ໃນຕູ້ເສື້ອຜ້າທີ່ບໍ່ໃຫຍ່ປານໃດ; ຢູ່ກ້ອງໂຖດອກໄມ້, ອ່າງລ້ຽງປາແລະຊາມລ້າງມື້, ເອົາຖ່ານໄມ້ວາງໄວ້ຈັກກ້ອນສອງກ້ອນ, ມັນກໍຈະດູດເອົາອາຍນ້ຳໄດ້, ແລະດັບກິ່ນຂິວໄປພ້ອມ, ຖ່ານເຫຼົ່ານີ້ຕາກແຫ້ງແລ້ວເອົາມາໃຊ້ໄດ້ອີກ.
ນອກນີ້, ໃນເຮືອນຄົວ, ມີຂອງບາງຢ່າງກໍແກ້ຄວາມຊຸ່ມໄດ້ຄືກັນ: ຄືແປ້ງໂຊດາສາມາດດູດເອົາອາຍນ້ຳໄດ້, ເມື່ອມັນແຂງເປັນກ້ອນ, ຍັງເອົາມາລ້າງອ່າງອາບນ້ຳ, ຊາມລ້າງມືແລະຊາມລ້າງໜ້າແລະອື່ນໆໄດ້ອີກ; ກາກກາເຟກໍດູດເອົາອາຍນ້ຳໄດ້, ທັງສາມາດດັບກິ່ນເໝັນ, ເອົາກາເຟໃສ່ຖົງຜ້ານ້ອຍໆ, ກໍເປັນຖົງຈຳກັດຄວາມຊຸ່ມນ້ອຍໆ; ຜົງຊັກຟອກກໍແມ່ນຢາດູດຄວາມຊຸ່ມທີ່ດີຊະນິດໜຶ່ງ, ເຈາະຮູໃສ່ຝາກັບຜົງຊັກຟອກຈັກຫຼາຍຮູ, ແລ້ວເອົາໄປວາງໄວ້ຢູ່ແຈເຮືອນບ່ອນໃດບ່ອນໜຶ່ງທີ່ປຽກຊຸ່ມ, ແຕ່ຕ້ອງລະວັງຢ່າວາງໄວ້ບ່ອນແປະກັບອາຫານ, ເພື່ອບໍ່ໃຫ້ອາຫານດູດເອົາກິ່ນຜົງຊັກຟອກ.
|
|
|