|
|
 |
| (GMT+08:00)
2006-06-07 15:41:38
|
 |
|
ພໍ່ຄ້າແມ່ຂາຍເຜົ່າມົ້ງໃນຕະຫຼາດພານເຈ່ຍຢວນປັກກິ່ງ
cri
|
ຢູ່ພາກຕາເວັນອອກເຂດເທດສະບານເມືອງປັກກິ່ງມີຕະຫຼາດຂາຍວັດຖຸບູຮານ,ຮູບແຕ້ມ,ຮູບຕົວໜັງສືຂຽນງາມແລະເຄື່ອງສິລະປະຫັດຖະກຳຈຳເພາະ,ໃນບໍ່ເທົ່າໃດປີມານີ້,ມີພໍ່ຄ້າແມ່ຂາຍຊົນເຜົ່າສ່ວນໜ້ອຍຈຳນວນໜຶ່ງມາຕັ້ງ ຮ້ານວາງແຜງລອຍຢູ່ຕະຫຼາດນີ້,ພວກເຂົາເຈົ້ານຸ່ງຊຸດຊົນເຜົ່າທີ່ສວຍງາມ,ຍັງຮູ້ຕໍ່ລາຄາກັບລູກຄ້າຕ່າງປະເທດດ້ວຍພາສາອັງກິດອີກດ້ວຍ.ພວກເຂົາເຈົ້າສ່ວນຫຼາຍແມ່ນຊາວເຜົ່າມົ້ງທີ່ມາຈາກເຂດຕາເວັນຕົກສຽງໃຕ້ທີ່ໄກແສນໄກຂອງຈີນ,ນຳເອົາເຄື່ອງນຸ່ງເຜົ່າມົ້ງແລະຜ້າແສ່ວລວດລາຍທີ່ສວຍງາມ,ມາຂາຍຢູ່ຕະຫຼາດດັ່ງກ່າວຢູ່ປັກກິ່ງ.
"ຢູ່ແຜງລອຍຂາຍເຄື່ອງບ່ອນໜຶ່ງຂອງຄູ່ຜົວເມຍເຜົ່າມົ້ງໃນຕະຫຼາດພານເຈ່ຍຢວນ,ນັກຂ່າວໄດ້ເຫັນເຄື່ອງເອ້ທີ່ເຮັດດ້ວຍເງິນຫຼາຍຮູບຫຼາຍແນວ,ປອກຄໍ,ຕຸ້ມຫູ,ປອກແຂນ…ແຕ່ລະອັນລ້ວນແຕ່ມີຮູບແກະສະຫຼັກທີ່ງາມປານີດ,ໃນນັ້ນມີຮູບແມງກະເບື້ອທີ່ພືປີກ,ມີຮູບນົກຫົງທີ່ເງີຍຫົວຢ່າງສະຫງ່າ,ອັນໃດກໍເປັນໂຕຢົ້ງໆ."
ນາງຖາງເຊີ້ງໄມ ເຈົ້າຂອງແຜງລອຍຂາຍເຄື່ອງບອກນັກຂ່າວວ່າ,ໃນຍາມບຸນປະເພນີ,ແມ່ຍິງເຜົ່າມົ້ງລ້ວນແຕ່ມັກໃສ່ເຄື່ອງເອ້ທີ່ເຮັດດ້ວຍເງິນ,ມີປັກປິ່ນເກົ້າເງິນ,ປອກຄໍເງິນ,ຕຸ້ມຫູເງິນແລະອື່ນໆ,ເຄື່ອງເອ້ເຫຼົ່ານີ້ທີ່ໃສ່ໝົດຕົນໂຕນັ້ນຜູ້ຫຼາຍທີ່ສຸດໜັກ10ຫາ15ກິໂລ.ນາງເວົ້າວ່າ,ເວົ້າສຳລັບເຜົ່າມົ້ງແລ້ວ,ເຄື່ອງເອ້ທີ່ເຮັດດ້ວຍເງິນ,ນອກຈາກມີບົດບາດປະດັບເອ້ຍ້ອງແລ້ວ,ຍັງມີຄວາມໝາຍທີ່ວ່າປາສະຈາກຜີສາງນາງຮ້າຍ.
ທ່ານລົງກຸ້ຍ ຜົວຂອງນາງຖາງເຊິ້ງໄມແນະນຳວ່າ,ເຄື່ອງເອ້ເງິນທັງໝົດເທິງແຜງລອຍລ້ວນແຕ່ແມ່ນເຮັດໂດຍຊ່າງຕີເງິນຂອງແຂວງກຸ້ຍໂຈ່ວ ບ້ານເກີດຂອງເຂົາເຈົ້າ,ເຂົາເຈົ້າໄດ້ຊື້ນຳຊ່າງຕີເງິນ.ໃນເຄື່ອງເອ້ເງິນຊະນິດຕ່າງໆ,ເວລາເຮັດປອກຄໍເງິນແມ່ນດົນກວ່າໝູ່,ທ່ານເວົ້າວ່າ:
"ລວດລາຍຂອງປອກຄໍແລບ,ລ້ວນແຕ່ແມ່ນຊ່າງຕີເງິນແກະສະຫຼັກດ້ວຍ ຈິນຕະນາການຂອງຕົນ.ຊ່າງຕີເງິນເຮັດປອກຄໍອ່າວໃຫຍ່ຕ້ອງໃຊ້ເວລາ7ຫາ8ມື້."
ທ່ານນາງເສິນເວີຍຕີ້ ລູກຄ້າຜູ່ໜຶ່ງທີ່ພວມເລືອກຊື້ເຄື່ອງເອ້ເງິນຢູ່ໜ້າແຜງລອຍຂອງທ່ານລົງກຸ້ຍໄດ້ເວົ້າວ່າ:
"ກະໂຕເຄື່ອງເງິນເຜົ່າມົ້ງເຫຼົ່ານີ້ຂ້ອນຂ້າງໃຫຍ່,ຕ່າງໝູ່,ເນື້ອດີ,ຮູບຊົງກໍງາມ."
ຢູ່ບ່ອນຫ່າງຈາກແຜງລອຍຂອງສອງຜົວເມຍທ່ານລົງກຸ້ຍບໍ່ໄກປານໃດ,ມີແມ່ເຖົ້າເຜົ່າມົ້ງຜູ່ໜຶ່ງທັງຂາຍເຄື່ອງທັງກົ້ມຫົວແສ່ວແຜ່ນຮອງເກີບ.ແມ່ເຖົ້າຜູ່ນີ້ຊື່ວ່າຈ່າງຕິ້ງລານ ກໍແມ່ນມາຈາກແຂວງກຸ້ຍໂຈ່ວຄືກັນ.
ແມ່ເຖົ້າຈ່າງຕິ້ງລານແມ່ນຂາຍຜ້າແສ່ວເຜົ່າມົ້ງເປັນຕົ້ນຕໍ,ຜ້າແສ່ວມີຜືນນ້ອຍຜືນໃຫຍ່,ບາງຜືນສີສົດໃສ,ບາງຜືນມີລວດລາຍງ່າຍໆທຳມະດາ.ແມ່ເຖົ້າເວົ້າວ່າ,ຜ້າແສ່ວຕ່າງກັນ,ກໍມີບົດບາດຕ່າງກັນ.ບາງຊະນິດຫຍິບໃສ່ເສື້ອ,ບາງຊະນິດປະດັບປະດາຝາເຮືອນ,ບາງຊະນິດແມ່ນສາຍເຈ່ຍລູກຂອງແມ່ຍິງເຜົ່າມົ້ງ.
ເຄື່ອງແສ່ວຂອງແມ່ເຖົ້າຈ່າງຕິ້ງລານສ່ວນຫຼາຍແມ່ນແມ່ເຖົ້າແສ່ວເອົາເອງ,ສ່ວນໜ້ອຍແມ່ນຍ່າແສ່ວໄວ້ໃຫ້ແມ່ເຖົ້າ.ແມ່ເຖົ້າຈ່າງຕິ້ງລານທັງເວົ້າທັງເອົາຜ້າແສ່ວຂອງຕົນໃຫ້ນັກຂ່າວເບິ່ງ,ນັ້ນແມ່ນສາຍຜ້າເຈ່ຍລູກ,ຢູ່ເທິງຜ້າໄດ້ແສ່ວຈູມຸມດອກກຸຫຼາບດອກໜຶ່ງ.ເຮັດສາຍຜ້າເຈ່ຍລູກແນວນີ້,ເວົ້າສຳລັບແມ່ເຖົ້າຈ່າງຕິ້ງລານທີ່ຊຳນານແລ້ວ,ຍັງຕ້ອງການເວລາ2ຫາ3ປີ.ແມ່ເຖົ້າເວົ້າວ່າ,ຜ້າແສ່ວເຜົ່າມົ້ງໄດ້ຮັບຄວາມນິຍົມຊົມຊອບຫຼາຍຢູ່ປັກກິ່ງ.
"ຄົນຈີນມັກຜ້າແສ່ວເຜົ່າມົ້ງ,ຊາວຕ່າງປະເທດກໍມັກຄືນກັນ.ລາງຄົນແຂວນຜ້າແສ່ວຢູ່ເທິງຝາເຮືອນ,ລາງຄົນຊື້ໄປຕ້ອນໝູ່,ລາງຄົນແມ່ນເພື່ອເກັບຮັກສາໄວ້."
ໃນຂະນະທີ່ແມ່ເຖົ້າລົມກັບນັກຂ່າວ,ມີລູກຄ້າຜູ່ຍິງເອົາຜ້າແສ່ວຫຼາຍຜືນລອງທຽບໃສ່ເສື້ອຂອງຕົນ,ໃນທີ່ສຸດໄດ້ເລືອກຊື້ຜືນໜຶ່ງ.ນາງຜູ່ນີ້ຊື່ວ່າເຊ້ຍສຽວຢົງ ນາງບອກນັກຂ່າວວ່າ,ນາງມັກເຄື່ອງນຸ່ງຂອງຖືເຜົ່າມົ້ງໂດຍຕະຫຼອດ,ນາງໄດ້ສະສົມກະໂປ່ງເຜົ່າມົ້ງຫຼາຍໂຕແລ້ວ.ນາງເວົ້າວ່າ:
"ເຮົາຢາກເອົາຜ້າແສ່ວນີ້ຫຍິບໃສ່ເສື້ອເກົ່າທີ່ເຮົາບໍ່ມັກປານໃດ,ຕື່ມໃສ່ເຄື່ອງເອ້ຈຳນວນໜຶ່ງ,ກໍຈະກາຍເປັນເສື້ອໃໝ່.ຜ້າແສ່ວນີ້ສີງາມຫຼາຍ,ເຖິງວ່າເປັນສີຂີ້ເທົ່າກໍຕາມ,ແຕ່ເມື່ອຫຍິບໃສ່ເສື້ອແລ້ວຄືວ່າງາມຢູ່."
ຢູ່ຕໍ່ໜ້າແຜງລອຍຂອງແມ່ເຖົ້າຈ່າງຕິ້ງລານ,ແມ່ຍິງທີ່ຂາຍເຄື່ອງເອ້ເຜົ່າມົ້ງຜູ່ໜຶ່ງພວມປາກພາສາອັງກິດທີ່ບໍ່ລ່ຽນໄຫຼປານໃດຕໍ່ລາຄາກັບລູກຄ້າຕ່າງປະເທດ.ແມ່ຍິງເຜົ່າມົ້ງຜູ່ນີ້ຊື່ວ່າລ້ຽວລຽງ,ພາຍຫຼັງລູກຄ້າຈາກໄປ,ນາງບອກນັກຂ່າວວ່າ,ການຄ້າຂາຍກັບລູກຄ້າຕ່າງປະເທດບໍ່ໄດ້ສຳເລັດຜົນ,ເພາະວ່າ,ລູກຄ້າຢາກໄດ້ເຄື່ອງເອ້ເຜົ່າມົ້ງທີ່ລ້ຳຄາທີ່ສຸດຂອງເຂົາດ້ວຍລາຄາຖືກໂພດ.ນາງເວົ້າວ່າ,
"ເສື້ອໂຕນີ້ແມ່ນສາວເຜົ່າມົ້ງພວກເຮົານຸ່ງໃນຍາມບຸນເອື້ອຍນ້ອງ.ແມ່ນຫຍິບໃນເມື່ອກ່ອນ,ປັດຈຸບັນ,ບໍ່ມີຄົນຫຍິບເສື້ອແບບນີ້ແລ້ວ,ຊາວເຜົ່າມົ້ງພວກເຮົາໃນປັດຈຸບັນກໍບໍ່ມີໃຜຮູ້ຫຍິບເສື້ອແບບນີ້,ສະນັ້ນ,ລາຄາຂອງເສື້ອໂຕນີ້ຈຶ່ງແພງ."
ຫ້າປີກ່ອນ,ໂດຍມີຄົນແນະນຳ,ນາງລ້ຽວລຽງໄດ້ມາຄ້າຂາຍຢູ່ປັກກິ່ງ.ໃນຫ້າປີທີ່ຜ່ານມາ,ນາງຍຶດໝັ້ນວາງແຜງລອຍຢູ່ຕະຫຼາດພານເຈ່ຍຢວນໃນວັນເສົາທຸກອາທິດ.ໃນມື້ທຳມະດາທີ່ບໍ່ວາງຂາຍເຄື່ອງ,ນາງກໍແສ່ວລວດລາຍໃນເຮືອນ,ເພື່ອ ກຽມເຄື່ອງຂາຍໃນວັນເສົາໜ້າ.ນາງບອກນັກຂ່າວວ່າ,ເຄື່ອງນຸ່ງຂອງຖືເຜົ່າມົ້ງແມ່ນແມ່ແລະລູກສາວຮ່ວມກັນແສ່ວສຳເລັດ,ລາງເທື່ອແມ່ນແມ່ຂ້ຽວແສ່ວສຳເລັດກ່ອນລູກສາວແຕ່ງດອງ,ໃນເຄື່ອງນຸ່ງຂອງຖືເຫຼົ່ານີ້ໄດ້ບັນທຶກຄວາມຫວັງແລະຄວາມປາ ຖະໜາຫາຂອງແມ່ແລະລູກສາວສອງເຊັ່ນຄົນທີ່ມີຕໍ່ຊີວິດການເປັນຢູ່ອັນຈົບງາມ.
ໃນຕະຫຼາດພານເຈ່ຍຢວນປັກກິ່ງ,ຍັງມີຊາວເຜົ່າມົ້ງທີ່ຄືດັ່ງຄູ່ຜົວເມຍລົງກຸ້ຍ,ແມ່ເຖົ້າຈ່າງຕິງລານແລະນາງລ້ຽວລາງທີ່ມາປັກກິ່ງເພື່ອຫາລ້ຽງຊີບ.ຖ້າທ່ານມີໂອກາດມາປັກກິ່ງ,ຢ່າລືມໄປເລາະຕະຫຼາດພານເຈ່ຍຢວນ,ໄປສຳຜັດຮູ້ສີສັນເຜົ່າມົ້ງອັນເຂັ້ມຂຸ້ນທີ່ພວກເຂົາເຈົ້າເພີ່ມຕື່ມໃຫ້ຕະຫຼາດພານເຈ່ຍຢວນ.
|
|
|
