ຕາມ​ຂ່າວCRI: ວັນ​ທີ 8 ມິຖຸນາ ຢູ່​ທີ່​ປັກ​ກິ່ງ, ທ່ານ​ຈ່າງ​ໂກ​ປາວ ຮອງ​ປະທານ​ຄະ​ນະ​ກຳ​ມະ​ການ​ພັດ​ທະນາ​ແລະ​ປະຕິ​ຮູບ​ແຫ່ງ​ຊາດ​ຈີນ​ກ່າວ​ວ່າ, ​ໃນ 6 ​ເດືອນທ້າຍ​ປີ​ນີ້, ສະ​ພາບ​ການ​ສະ​ໜອງ​ແລະ​ຄວາມຕ້ອງການ​ໄຟຟ້າ​ຂອງ​ຈີນ​ຈະ​ສົມ​ດຸນ​ກັນ​ໃນ​ດ້ານ​ກວມ​ລວມ, ​ໄດ້​ປ່ຽນ​ແປງ​ສະ​ພາບ​ເຄັ່ງ​ຕຶງ​ດ້ານ​ການ​ສະໜອງ​ໄຟຟ້າ​ທີ່​ປະກົດ​ອອກ​ແຕ່​ເດືອນ​ມິ​ຖຸ​ນາ​ປີ 2002 ​ເປັນ​ຕົ້ນ​ມາ.

ທ່ານ​ຈ່າງ​ໂກ​ປາວ​​ໄດ້ກ່າວ​ຄວາມນີ້ໃນ​ງານ​ຖະ​ແຫຼງຂ່າວ​ທີ່​ຫ້ອງການ​ຖະ​ແຫຼງ​ຂ່າວ​ຄະ​ນະ​ລັດ​ຖະ​ບານ​ຈີນ​ຈັດ​ຂຶ້ນ.

ທ່ານ​ກ່າວ​ວ່າ, ​ໃນ 4 ປີຜ່ານມາ, ບໍລິ​ມາດ​​ຜະລິດ​ໄຟຟ້າ​ຂອງ​ຈີນ​ໄດ້​ຮັກສາ​ການ​ເຕີບ​ໂຕ​ຢ່າງ​ວ່ອງ​ໄວ​ແຕ່​ສອງ​ຫົວໜ່ວຍ​ຕົວ​ເລກຂຶ້ນ​ໄປ​ໂດຍ​ຕະຫຼອດ, ສູງ​ກວ່າ​ຈັງ​ຫວະ​ເຕີບ​ໂຕ​ຂອງ GDP.

ທ່ານ​ຈ່າງ​ໂກ​ປາວ​ຍັງ​ສະ​ເໜີ​ວ່າ, ກຳລັງ​ຕິດຕັ້ງ​ເຄື່ອງ​ຈັກຜະລິດ​ໄຟຟ້າ​ຂອງ​ຈີນ​ໄດ້​ບັນ​ລຸ​ເຖິງ 531 ລ້ານ​ກິ​ໂລ​ວັດ​ແລ້ວ. ຕໍ່​ໄປ​ພາຍ​ໜ້າ, ຈີນ​ຈະ​ເພີ່ມ​ຄວາມ​ແຮງ​ໃນ​ການ​ປັບ​ປຸງ​ອົງ​ປະ​ກອບ​ພະລັງ​ໄຟຟ້າ, ​ເລັ່ງລັດ​ພັດທະນາ​ພະລັງ​ໄຟຟ້າ​ສະອາດ. ຄາດ​ວ່າ​ຮອດ​ປີ 2010, ກຳ​ລັງ​ຕິດ​ຕັ້ງ​ເຄື່ອງ​ຈັກ​ຜະລິດ​ໄຟຟ້າ​ຂອງ​ຈີນ​ຈະ​ບັນລຸ​ປະມານ 800 ລ້ານ​ກິ​ໂລ​ວັດ, ​ໃນ​ນັ້ນ ອັດ​ຕາ​ໄຟ​ຟ້າ​ສະ​ອາດ ​ເຊັ່ນ ​ໄຟຟ້າ​ນ້ຳຕົກ ​ໄຟຟ້າ​ນິວ​ເຄຼຍ​​ແລະ​ໄຟຟ້າ​ພະລັງງານ​ໃໝ່​ເປັນ​ຕົ້ນ​ຈະ​ລື່ນ​ກາຍ 35%.