|
ສະບາຍດີທ່ານຜູ່ຟັງທີ່ໂຄລົບ, ງານແຂ່ງຂັນປິ່ງປ່ອງຊິງຊະນະເລີດໂລກຄັ້ງທີ 48 ທີ່ຈັດຂຶ້ນຢູ່ຊຽງໄຮ້ຈີນເມື່ອຕົ້ນເດືອນພຶດສະພາປີນີ້ ໄດ້ດຶງດູດສາຍຕາຂອງບັນດາຜູ່ມັກກິລາປິ່ງປ່ອງໃນທົ່ວໂລກ, ສ່ວນຊາວຈີນນັ້ນພັດພາກັນຮ້ອງໂຮໂປປີບປານປ່ວງເອົາໂລດ. ຢູ່ຈີນ, ປິ່ງປ່ອງແມ່ນຖືກຖືເປັນ "ບານປະຈຳຊາດ", ບໍ່ພຽງແຕ່ມີຜູ່ມັກກິລາປິ່ງປ່ອງໄດ້ຫຼິ້ນປິ່ງປ່ອງຕະຫຼອດປີເກີນ 10 ລ້ານຄົນທໍ່ນັ້ນ, ແຕ່ໃນ 30 ກວ່າປີມານີ້, ທີມປິ່ງປ່ອງແຫ່ງຊາດຈີນກໍ່ຍັງຮັກສາຖານະນຳໜ້າໃນໂລກແລະບໍ່ຫວັ່ນໄຫວຄອນແຄນຈັກເທື່ອ. ໂດຍປະເຊີນກັບປະກົດການດັ່ງກ່າວ, ນັກກິລາປິ່ງປ່ອງປະເທດອື່ນແລະທ່ານຜູ່ຟັງຄົງຈະຢາກຮູ້ທີ່ສຸດວ່າ: ປັດໄຈທີ່ເປັນຂໍກະແຈເຮັດໃຫ້ນັກກິລາປິ່ງປ່ອງຈີນຊິງໄດ້ແຊມປຽນທຸກເທື່ອນັ້ນແມ່ນຫຍັງ? ຄວາມລັບຂອງກິລາປິ່ງປ່ອງຈີນຂະຫຍາຍຕົວໂດຍຕະຫຼອດນັ້ນແມ່ນຫຍັງ? ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ແກ້ຄວາມລັບແຫ່ງກິລາປິ່ງປ່ອງຈີນຂະຫຍາຍຕົວໂດຍຕະຫຼອດ.
ຢູ່ຈີນ, ກິລາປິ່ງປ່ອງແມ່ນກິລາປະເພດນຶ່ງທີ່ເຜີຍແຜ່ທົ່ວເຖິງກັນຫຼາຍກວ່າໝູ່, ກໍ່ແມ່ນກິລາປະເພດນຶ່ງຂອງຈີນທີ່ໂປໂລເດັ່ນຂຶ້ນໄວກວ່າເພິ່ນ ຮັກສາທ່າແຮງດົນນານກວ່າເພິ່ນ ຊີງໄດ້ແຊມປຽນຫຼາຍກວ່າເພິ່ນແລະມີຜົນສະທ້ອນກວ້າງຂວາງກວ່າເພິ່ນບົນເວທີກິລາຂອງໂລກ. ເລີ່ມແຕ່ທ່ານຢົງໂກຖວນ ນັກກິລາຈີນຊິງໄດ້ແຊມປຽນຕີດ່ຽວເພດຊາຍໃນງານກິລາປິ່ງປ່ອງຊີງຊະນະເລີດໂລກເມື່ອປີ 1959 ມາຮອດປະຈຸບັນ, ທີມປິ່ງປ່ອງແຫ່ງຊາດຈີນກໍຊິງໄດ້ແຊມປຽນໂລກລວມ 130 ກວ່າປະເພດ, ໄດ້ອົບຮົມບົ່ມສ້າງນັກກິລາແຊມປຽນໂລກງວດໜຶ່ງ. ຕົວຢ່າງຄື ທ່ານຢົງໂກຖວນ ນາງເຕິ້ງຢາຜິງ ທ່ານລິວໂກຫຼຽງແລະອື່ນໆ, ດາລາປິ່ງປ່ອງເຫຼົ່ານີ້, ລ້ວນແຕ່ກາຍເປັນ "ວິລະຊົນປິ່ງປ່ອງ" ທີ່ຄົນທັງຫຼາຍນິຍົມກັນທັງນັ້ນ.
ເປັນຫຍັງກິລາປິ່ງປ່ອງຈີນຈຶ່ງຂະຫຍາຍຕົວໄດ້ໂດຍຕະຫຼອດ? ທີ່ຈິງແລ້ວ, ຄົນຈີນເອງກໍ່ພວມຄົ້ນຄວ້າຢູ່. ໃນ "ງານສຳມະນາແຊມປຽນປິ່ງປ່ອງຈີນ" ທີ່ຈັດຂຶ້ນໃນໄລຍະຈັດງານແຂ່ງຂັນກິລາປິ່ງປ່ອງຊິງຊະນະເລີດໂລກຄັ້ງນີ້, ຜູ່ຊ່ຽວຊານຈີນກໍ່ເຫັນວ່າ, ໃນຫຼາຍສິບປີມານີ້, ການທີ່ກິລາປິ່ງປ່ອງຈີນໄດ້ມີການຂະຫຍາຍຕົວໂດຍຕະຫຼອດນັ້ນ, ມູນເຫດສຳຄັນກວ່າໝູ່ແມ່ນຍ້ອນລະບົບຄັດເລືອກຝຶກແອບແບບທາດ "ປິຣາມິດ" ໂຄງປະກອບແຂ່ງຂັນປະສົມເປັນອາຊີບກໍມີລະດັບສູງ ພື້ນຖານປວງຊົນກໍໜາແໜ້ນ ຖັນແຖວຄົ້ນຄວ້າວິທະຍາສາດກໍກ້າວໜ້າແລະມີບົດຮຽນຄຸ້ມຄອງທີກ້າວໜ້າເຊິ່ງປະເທດອື່ນຈະທຽບທັນຍາກ. ທ່ານຫວງປ່ຽວ ຫົວໜ້າທີມປິ່ງປ່ອງແຫ່ງຊາດຈີນເວົ້າວ່າ: ໃນສະເພາະໜ້ານີ້, ນັກກິລາໜຸ່ມທີ່ໄດ້ຮັບການຝຶກແອບແບບແຜນຂອງຈີນມີ 3 ໝື່ນກວ່າຄົນ, ນັກກິລາອາຊີບແລະຜູ່ສະໝັກຫຼິ້ນທີ່ຈົດທະບຽນຢູ່ສະມາຄົມປິ່ງປ່ອງຈີນກໍມີເກືອບ 2000 ຄົນ, ນັກກິລາທີມໜຶ່ງແລະທີມສຳຮອງແຫ່ງຊາດທີ່ມີລະດັບສູງສຸດມີປະມານ 100 ຄົນ. ຍ້ອນມີລະບົບຝຶກແອບນັກກິລາແບບທາດປິຣາມິດທີ່ໃຫຍ່ໂຕແນວນີ້, ຈຶ່ງຮັບປະກັນເຮັດໃຫ້ກິລາປິ່ງປ່ອງຈີນເໝືອນກັນກັບກິລາບານບ້ວງອາເມລິກາ ກາຍເປັນກິລາທີ່ນຳໜ້າໝູ່ໃນໂລກ.
ເພື່ອຄັດເລືອກນັກກິລາຜູ່ດີເດັ່ນຈາກນັກກິລາໜຸ່ມທັງຫຼາຍ, ຈີນໄດ້ຈັດງານແຂ່ງຂັນປິ່ງປ່ອງປະສົມທຸກຂັ້ນ, ໄດ້ມ້າງວົງຈຳກັດລະຫວ່າງນັກກິລາອາຊີບກັບຜູ່ສະໝັກຫຼິ້ນ, ຖ້າຜູ່ສະໝັກຫຼິ້ນຫາກມີຝີມືເກັ່ງ, ກໍ່ສາມາດເຂົ້າຮ່ວມງານແຂ່ງຂັນປະສົມລະດັບສູງ. ຈີນຍັງມີຖັນແຖວຄູຝຶກລະດັບສູງພ້ອມທັງໂຄງປະກອບຄັດເລືອກແລະອົບຮົມທີ່ຈໍ່ຕົວມາເປັນເວລາດົນນານ, ທັງນີ້ເຮັດໃຫ້ນັກກິລາຜູ່ດີເດັ່ນສ່ວນຫຼາຍໄດ້ເຂົ້າຮ່ວມທີມຊາດຈີນ. ແຕ່ລະປີ, ສະມາຄົມປິ່ງປ່ອງຈີນມີທຶນໃຊ້ໃນງານແຂ່ງຂັນພຽງ 4 ແສນ 2 ໝື່ນຢວນທໍ່ນັ້ນ, ແຕ່ຍ້ອນສະໂມສອນແລະງານແຂ່ງຂັນປະສົມທຸກຂັ້ນມີດາລາປິ່ງປ່ອງເຂົ້າຮ່ວມຫຼາຍ, ສາມາດດຶງດູດເອົາການອຸປະຖຳຂອງນັກທຸລະກິດ, ເພາະສະນັ້ນທຶນສັງຄົມເປັນຈຳນວນຫຼວງຫຼາຍຈຶ່ງໄຫຼເຂົ້າ ອັນເປັນການຮັບປະກັນຄວາມຈະເລີນຮຸ່ງເຮືອງຂອງງານແຂ່ງຂັນປະສົມ, ໄດ້ສ້າງສະພາບແວດລ້ອມການຝຶກແອບແລະການແຂ່ງຂັນເປັນຢ່າງດີໃຫ້ແກ່ນັກກິລາ. ເມື່ອໄດ້ດຳເນີນມາເປັນເວລາຫຼາຍປີແລ້ວ, ປະຈຸບັນ ງານແຂ່ງຂັນປິ່ງປ່ອງປະສົມຈີນຈຶ່ງກາຍເປັນງານແຂ່ງຂັນປະສົມທີ່ມີລະດັບສູງກວ່າໝູ່ໃນໂລກ.
ນັກກິລາຜູ່ດີເດັ່ນທີ່ໂປໂລຂຶ້ນໃນງານແຂ່ງຂັນຕ່າງໆແລະເຂົ້າສູ່ທີມຊາດນັ້ນພຽງແຕ່ເປັນບາດກ້າວທຳອິດທໍ່ນັ້ນ. ໃນທີມຊາດ, ການຝຶກແອບຢ່າງວິທະຍາສາດແລະລຳບາກກາກກຳແມ່ນປັດໄຈສຳຄັນທີ່ຮັບປະກັນໃຫ້ນັກກິລາດີເດັ່ນໄດ້ຮັບຜົນສຳເລັດ. ທ່ານລີລິນ ຄູຝຶກທີມປິ່ງປ່ອງແຫ່ງຊາດຈີນເວົ້າວ່າ: ຢູ່ຈີນ, ນັກກິລາປິ່ງປ່ອງເຄີຍປະສົບຄວາມລຳບາກກາກກຳຈົນນັບບໍ່ຖ້ວນ. ຂໍຍົກເອົາການຝຶກແອບຂອງທີມເພດຊາຍໃນເວລາທີມຊາວໜຸ່ມແຫ່ງຊາດຈີນເຕົ້າໂຮມກັນຝຶກແອບຢ່າງຂະໜາດໃຫຍ່ໃນບໍ່ດົນນີ້ມາເປັນຕົວຢ່າງ, ໜ່ວຍຄູຝຶກໄດ້ຈັດວາງໃຫ້ຝຶກແອບສາມເທື່ອຕໍ່ມື້ ແຕ່ລະອາທິດສອງມື້, ແຕ່ລະເທື່ອຝຶກແອບເຖິງ 6 ຊົ່ວໂມງ; ພ້ອມກັນນັ້ນ ຍັງໃຫ້ແລ່ນທົນ ແລ່ນນອກສະໜາມແລະແລ່ນໜຶ່ງໝື່ນແມັດເປັນຕົ້ນ, ເພື່ອຍົກແຮງກາຍຂອງນັກກິລາໜຸ່ມເຫຼົ່ານີ້, ແລະອົບຮົມມານະຈິດຄວາມໝັ້ນໜຽວທົນທານຂອງພວກເຂົາເຈົ້າ. ຍັງໃຫ້ພວກເຂົາເຈົ້າແຂ່ງຂັນກັນຢ່າງດຸເດືອດຫຼາຍເທື່ອ, ເພື່ອຊຸກຍູ້ໃຫ້ພວກເຂົາເຈົ້າເຕີບໃຫຍ່ໂດຍໄວໃນພຶດຕິກຳ.
ໃນຂະນະທີ່ນັກກິລາທັງຫຼາຍຝຶກແອບດ້ວຍຄວາມລຳບາກກາກກຳນັ້ນ, ທີມຈີນຍັງມີຖັນແຖວຄົ້ນຄວ້າວິທະຍາສາດເປັນຈຳນວນຫຼວງຫຼາຍ, ເຂົາເຈົ້າໄດ້ເອົາໃຈໃສ່ຕິດຕາມທ່ວງທ່າຂະຫຍາຍຕົວຫຼ້າສຸດຂອງເວທີປິ່ງປ່ອງໃນໂລກ, ຄົ້ນຄວ້າຝີມືຂອງນັກກິລາບັນດາປະເທດ, ວິເຄາະການປ່ຽນແປງຂອງກະຕິກາງານແຂ່ງຂັນປິ່ງປ່ອງຈາກເກມລະ 21 ຄະແນນມາເປັນ 11 ຄະແນນ ການໃຊ້ລູກປິ່ງປ່ອງປ່ຽນຂະໜາດຈາກ 40 ມີລີແມັດມາເປັນ 42 ມີລີແມັດ, ຈະມີຜົນກະທົບແນວໃດຕໍ່ກິລາປິ່ງປ່ອງຈີນ, ແລ້ວຮັບປະກັນໃຫ້ຝີມືຂອງນັກກິລາປິ່ງປ່ອງຈີນບໍ່ຫຼ້າຫຼັງ, ເດີນໄປຕາມກະແສຫຼ້າສຸດຂອງເວທີປິ່ງປ່ອງສາກົນ. ທ່ານຈາງສຽວເຝິງ ນັກຄົ້ນຄວ້າທີມປິ່ງປ່ອງຈີນເວົ້າວ່າ: ເກືອບໜຶ່ງສະຕະວັດມານີ້, ໝາກຜົນການລິເລີ່ມເຕັກນິກປິ່ງປ່ອງແລະອຸປະກອນປິ່ງປ່ອງຂອງໂລກທີ່ພົ້ນເດັ່ນກວ່າໝູ່ນັ້ນມີ 46 ລາຍ, ໃນນັ້ນເປັນໝາກຜົນຂອງຈີນມີ 27 ລາຍ, ເກີນເຄິ່ງໜຶ່ງຂອງຈຳນວນລວມ. ໂດຍພິຈາລະນາເຖິງຄວາມດຸເດືອດ ຄວາມໂຫດຫ້ຽມ ຈະພາດໂອກາດງ່າຍໃນການແຂ່ງຂັນປິ່ງປ່ອງໃນປະຈຸບັນ, ເຮັດແນວໃດກໍ່ຕ້ອງກຳໂອກາດໄດ້ກ່ອນເພິ່ນໃນການແຂ່ງຂັນ, ແມ່ນບັນຫາໃໝ່ທີ່ທີມປິ່ງປ່ອງຈະປະເຊີນໃນການຄົ້ນຄວ້າເຕັກນິກແລະການຝຶກແອບ.
ເຖິງວ່າກິລາປິ່ງປ່ອງຈີນໄດ້ຮັບຜົນງານດີເດັ່ນຈົນນັບບໍ່ຖ້ວນໃນເມື່ອກ່ອນກໍ່ຕາມ, ແຕ່ທີມປິ່ງປ່ອງຈີນກໍຍັງຄົງສຳນຶກຮູ້ດ້ວຍສະໝອງປອດໂປ່ງວ່າ: ເມື່ອສັງເກດຈາກແຊມປຽນຕີດ່ຽວເພດຊາຍຂອງງານແຂ່ງຂັນປິ່ງປ່ອງຊິງຊະນະເລີດໂລກປີ 2003 ທີ່ຈັດຂຶ້ນຢູ່ປາຣີແລະຂອງງານກິລາໂອລິມປິກອາແຕນປີ 2004 ແລ້ວ ກໍເຫັນໄດ້ວ່າ, ລະດັບຂອງນັກກິລາປິ່ງປ່ອງຂອງປະເທດອື່ນກໍ່ພວມສູງຂຶ້ນຢ່າງໄວວາ, ສະນັ້ນ ທີມປິ່ງປ່ອງຈີນຕ້ອງພະຍາຍາມ ຫຼາຍກວ່າເກົ່າ, ຈຶ່ງເຮັດໃຫ້ກິລາປິ່ງປ່ອງຈີນຂະຫຍາຍຕົວໂດຍຕະຫຼອດໄດ້ຢ່າງແທ້ຈິງ.
|
