|
|
 |
| (GMT+08:00)
2006-06-13 10:46:35
|
 |
|
ເພື່ອຮັບໃຊ້ຄົນພິການດີກວ່າເກົ່າ
cri
|
ເດືອນເມສາປີນີ້,ຫຼາຍທ້ອງຖິ່ນຂອງຈີນໄດ້ເຂົ້າສູ່ລະດູທີ່ອາກາດອົບອຸ່ນແລະດອກໄມ້ບານເຮື່ອເຮືອງແລ້ວ,ແຕ່ຢູ່ທົ່ງຫຍ້າຂອງເມືອງກ່າງຊາກິ່ງແຂວງໄຫເປເຜົ່າຈ້າງປົກຄອງຕົນເອງຂອງແຂວງຊິ່ງໄຫ ພາກຕາເວັນຕົກຂອງຈີນ,ຍັງມີຫິມະເຫຼືອໄວ້.ໃນຫຼາຍມື້ມານີ້,ນາງມຽວຣຸ້ນຈື່ອາຍຸຊາວປີປາຍທີ່ເປັນສະມາຊິກໜ່ວຍສຳຫຼວດຄົນພິການຂອງເມືອງ,ທຸກໆມື້ໄດ້ຂີ່ລົດຈັກໄປຮອດແຕ່ລະຫຼັງເຮືອນ,ເພື່ອສຳຫຼວດຊາວລ້ຽງສັດທີ່ອາໄສຢູ່ເທິງທົ່ງຫຍ້າຢ່າງກະແຈກກະຈາຍ.
ຢູ່ແຕ່ລະຫຼັງເຮືອນຂອງຊາວລ້ຽງສັດ,ນາງມຽວຢຸ້ນຈື່ແລະຜູ້ສຳຫຼວດອື່ນໆໄດ້ສອບຖາມທັງບັນທຶກສະພາບຕ່າງໆຄືສະມາຊິກຄອບຄົວ ລາຍໄດ້ ສຸຂະພາບຂອງແຕ່ລະຄົນເປັນຕົ້ນ,ຢ່າງເອົາຈິງເອົາຈັງ.
ການສຳຫຼວດຂອງພວກເຂົາເຈົ້າແມ່ນການສຳຫຼວດຄົນພິການແບບຖອດຕົວຢ່າງຄັ້ງທີສອງທີ່ພວມດຳເນີນຢູ່ຈີນ.ແຕ່ວັນທີ1ເມສາເປັນຕົ້ນມາ,ຈີນໄດ້ດຳເນີນການສຳຫຼວດສະພາບການດັ່ງກາວຂອງປະມານ2ລ້ານ6ແສນຄົນໃນເຮືອນເຂົາເຈົ້າ,ຈຳນວນຄົນດັ່ງກ່າວກວມ2%ຂອງປະຊາກອນທົ່ວປະເທດ,ແມ່ນຖອດເອົາຕົວຢ່າງຈາກ31ແຂວງເຂດແລະກຳແພງນະຄອນ.
ການສຳຫຼວດຄົນພິການແບບຖອດຕົວຢ່າງຂອງຈີນຄັ້ງທຳອິດແມ່ນຈັດຂຶ້ນເມື່ອ 19ປີກ່ອນ,ຄຽງຄູ່ກັບເສດຖະກິດແລະສັງຄົມໄດ້ພັດທະນາແລະລະດັບສາທາລະນະສຸກໄດ້ຍົກສູງຂຶ້ນ,ສະພາບຄົນພິການຂອງຈີນເຊັ່ນ ຈຳນວນຄົນເຂດແຈກຢາຍ ການຟື້ນຟູສຸຂະພາບແລະປະກອບອາຊີບເປັນຕົ້ນລ້ວນແຕ່ມີການປ່ຽນແປງໃນລະດັບຕ່າງກັນ.
ທ່ານເຊີນຊິ່ນມິນ ຮອງຫົວໜ້າຫ້ອງການສຳຫຼວດຄົນພິການແບບຖອດຕົວຢ່າງ ຂອງຈີນຄັ້ງທີສອງຂອງຈີນເວົ້າວ່າ,
ຕົວເລກແລະຂໍ້ມູນຂ່າວສານຂອງການສຳຫຼວດຄັ້ງທຳອິດບໍ່ສາມາດສ່ອງແສງເຖິງຄວາມຈິງທີ່ໄດ້ປ່ຽນແປງແລ້ວ,ນີ້ບໍ່ມີຜົນດີຕໍ່ການຕົກລົງ,ຈັດຕັ້ງປະຕິບັດແລະປະເມີນຜົນຂອງແຜນການແລະນະໂຍບາຍກ່ຽວກັບວຽກງານຮັບໃຊ້ຄົນພິການຂອງລັດຖະບານ,ແລະນຳເອົາຄວາມຫຍຸ້ງຍາກອັນຫຼວງຫຼາຍມາໃຫ້ວຽກງານຕົວຈິງ.
ນັກຂ່າວໄດ້ຕິດຕາມໜ່ວຍສຳຫຼວດແຫ່ງສະຫະພັນຄົນພິການຈີນໄປຮອດເມືອງກ່າງຊາແຂວງຊິ່ງໄຫທີ່ຫາກໍກ່າວເຖິງນັ້ນ.ຢູ່ເມືອງກ່າງຊາໄດ້ຖອດເອົາ4ຕາແສງແລະ8ບ້ານເປັນຕົວຢ່າງ.ຍ້ອນແຫ່ງນີ້ມີເນື້ອທີ່ກວ້າງຂວາງແລະປະຊາກອນໜ້ອຍ,ໄລຍະທາງລະຫວ່າງແຕ່ລະຫຼັງເຮືອນໄກກັນ5ກິໂລແມັດຂຶ້ນໄປ.ແລະສູງກວ່າໜ້ານ້ຳທະເລ4500ແມັດຂຶ້ນໄປ,ຄົມມະນາຄົມຫຍຸ້ງຍາກທີ່ສຸດ.
ແຕ່ວ່າເງື່ອນໄຂອັນຍາກລຳບາກບໍ່ໄດ້ກະທົບເຖິງຜູ້ສຳຫຼວດທີ່ເຮັດວຽກຢ່າງຕັ້ງໜ້າແລະລະອຽດ.ນາງມຽວຈື່ຣຸ້ນຜູ້ສຳຫຼວດເວົ້າວ່າ,ຜົນການສຳຫຼວດແມ່ນພາກສ່ວນໜຶ່ງຂອງການສຳຫຼວດສະພາບຕົວຈິງແຫ່ງຊາດຈີນ,ພົວພັນເຖິງຊີວິດການເປັນຢູ່ຂອງຄົນພິການເປັນພັນເປັນໝື່ນ,ເຮັດລວດໆໄປບໍ່ໄດ້.ນາງບອກນັກຂ່າວວ່າ,
ຂ້າພະເຈົ້າລົງພື້ນຖານຊົນນະບົດເປັນຄັ້ງທຳອິດ,ເຮັດວຽກຢ່າງລະອຽດລະອໍທີ່ສຸດ.ຂ້າພະເຈົ້າຮູ້ສຶກວ່າຮັບໃຊ້ຄົນພິການເປັນວຽກດີທີ່ສຸດ.
ໃນເຮືອນຂອງທ່ານເຢ້ຊິ່ງອາງເຈ ຊາວລ້ຽງສັດຜູ້ໜຶ່ງ,ໄດ້ສຳຫຼວດຮູ້ແລ້ວວ່າທ່ານກັບເມຍເປັນຄົນເສຍອົງຄະ,ລູກຜູ້ໜຶ່ງປາກເວົ້າບໍ່ໄດ້,ສະນັ້ນມື້ລຸນມານາງມຽວຈື່ຣຸ້ນຈຶ່ງເຊີນພວກເຂົາເຈົ້າໄປກວດຮ່າງກາຍຢູ່ສູນກວດແລະປິ່ນປົວຄົນພິການທີ່ຕັ້ງຢູ່ໃນເມືອງ.
ສູນກວດແລະປິ່ນປົວຄົນພິການທີ່ຕັ້ງຢູ່ເມືອງນ້ອຍຊ່າຫຼິວເຮີຂອງເມືອງກ່າງຊາຟົດຟື້ນທີ່ສຸດ,ຜູ້ທີ່ສົງໄສເປັນຄົນພິການໃນຂອບເຂດຫຼາຍສິບກິໂລແມັດລ້ວນແຕ່ມາກວດຢູ່ນີ້,ຄອຍຖ້າກວດສອບເປັນຄົນພິການແທ້ຫຼືບໍ່.ທ່ານວ່າງຫູເສິ່ງ ຜູ້ຮັບຜິດຊອບບ່ອນກວດແລະປິ່ນປົວດັ່ງກ່າວບອກນັກຂ່າວວ່າ,ໃນຈຸດປິ່ນປົວນີ້ລວມມີພະນັກງານ8ຄົນ,ນອກ ຈາກທ່ານເອງທີ່ເປັນຫົວໜ້າແລ້ວ,ອີກ7ຄົນລ້ວນແຕ່ເປັນແພດຫຼັກແຫຼ່ງທີ່ມາຈາກໂຮງໝໍແລະສຸກສາລາຂັ້ນຕາແສງແລະຂັ້ນເມືອງ,ໃນນັ້ນມີແພດຂອງ6ພະແນກຄື ຕາ ຫູ ປາກເວົ້າ ອົງຄະ ສະຕິປັນຍາແລະໂລກຈິດ,ສະຫະພັນຄົນພິການຈີນຍັງໄດ້ສົ່ງອຸປະກອນປິ່ນປົວທີ່ຕົກເປັນມູນຄ່າ2ໝື່ນຢວນໃຫ້ແກ່ຈຸດກວດກາດັ່ງກ່າວ.
ທ່ານວ່າງຫູເສິ່ງແນະນຳວ່າ,ຫຼາຍມື້ມານີ້,ມື້ໃດກໍມີຊາວລ້ຽງສັດຫຼາຍສິບຄົນທີ່ສົງໄສເປັນຄົນພິການມາກວດກາຢູ່ນີ້,ສ່ວນຜູ້ທີ່ເດີນທາງຍາກນັ້ນ,ໜ່ວຍປິ່ນປົວຍັງເອົາອຸປະກອນປີ່ນປົວໄປກວດກາຢູ່ເຮືອນຊາວລ້ຽງສັດ.ທ່ານວ່າງຫູເວົ້າວ່າ,
ຕໍ່ຜູ້ທີ່ມາບໍ່ໄດ້ນັ້ນ,ພວກເຮົາໄປກວດກາຢູ່ເຮືອນພວກເຂົາເຈົ້າ,ບໍ່ວ່າຈະໄກເທົ່າໃດ,ພວກເຮົາຕ້ອງຂີ່ລົດຈັກໄປ.ຜູ້ເປັນໂຣກຕາກໍໃຫ້ແພດພະແນກຕາໄປ,ຜູ້ມີພະຍາດອົງຄະກໍໃຫ້ແພດກວດກາອົງຄະໄປ.ມີບາງແຫ່ງລົດຈັກໄປບໍ່ເຖິງ,ພວກເຮົາກໍຍ່າງໄປ.
ທ່ານຍັງບອກນັກຂ່າວວ່າ,ປັດຈຸບັນ,ລັດຖະບານມີນະໂຍບາຍພິເສດທີ່ກ່ຽວພັນກັບຄົນພິການ,ຄືຄົນພິການປົວພະຍາດແລ້ວເສຍຄ່າປົວໜ້ອຍກວ່າຄົນທຳມະດາ3%.ແຕ່ລະປີ,ລັດຖະບານຍັງຈະອອກທຶນໃຫ້ຜູ່ເປັນພະຍາດຕາເຂົ້າເຝື້ອທີ່ເສດຖະກິດຝືດເຄືອງຈຳນວນໜຶ່ງຜ່າຕັດ,ຄົນຫູໜວກປາກກືກກໍຈະໄດ້ຮັບການອົບຮົມພາສາມື.ຄົນພິການບໍ່ໜ້ອຍກໍໄດ້ຟື້ນຟູສຸຂະພາບໂດຍຜ່ານຈາກການປິ່ນປົວທີ່ທັນສະໄໝ,ແລະສາມາດອອກແຮງງານກຸ້ມຕົນເອງໄດ້.
ຄົນພິການຢູ່ແຫ່ງຕ່າງໄດ້ຊົມເຊີຍການສຳຫຼວດດັ່ງກ່າວ.ທ່ານໄລຈິງຊຽງ ອາຍຸ63 ປີເປັນຄົນພິການຜູ້ໜຶ່ງທີ່ດຳລົງຊີວິດຢູ່ນະຄອນປັກກິ່ງ,ທ່ານເວົ້າຕໍ່ນັກຂ່າວຢ່າງກະຕຸ້ນໃຈວ່າ,
ລັດຖະບານດຳເນີນການສຳຫຼວດຄັ້ງນີ້,ແມ່ນເພື່ອຊອກຮູ້ສະພາບຊີວິດການເປັນຢູ່ຂອງພວກເຮົາ,ແລ້ວວາງນະໂຍບາຍທີ່ກ່ຽວຂ້ອງເພື່ອຊ່ອຍເຫຼືອພວກເຮົາ.ແນ່ນອນແລ້ວທັງນີ້ຈະປົວແປງຊີວິດການເປັນຢູ່ຂອງພວກເຮົາໃຫ້ດີຂຶ້ນຕື່ມອີກ,ເຮັດໃຫ້ຊີວິດການເປັນຢູ່ຂອງພວກເຮົານັບມື້ນັບດີຂຶ້ນ.
ທ່ານເຊີນຊິ່ນມິນ ຮອງຫົວໜ້າຫ້ອງການສຳຫຼວດຄົນພິການແບບຖອດຕົວຢ່າງຂອງຈີນຄັ້ງທີສອງບອກນັກຂ່າວວ່າ,ການສຳຫຼວດເທື່ອນີ້ໄດ້ຮັບການດັດແປງໃຫ້ດີຂຶ້ນຫຼາຍເມື່ອທຽບໃສ່ການສຳຫຼວດເມື່ອ19ປີກ່ອນ.ນອກຈາກຈັດຕັ້ງການສຳຫຼວດຢ່າງລະອຽດລະອໍກວ່າເກົ່າ,ວຽກງານອົບຮົມຜູ້ສຳຫຼວດກໍດຳເນີນມາດີກວ່າເກົ່າ,ອຸປະກອນກວດກາຄົນພິການຍິ່ງກ້າວໜ້າແລ້ວ,ມາດຖານສຳຫຼວດທີ່ກຳນົດໄວ້ກໍໄດ້ເຊື່ອມໂຍງເຂົ້າກັບສາກົນ.ທ່ານເວົ້າວ່າ,
ພວກເຮົາເຄີຍລາຍງານຕໍ່ອົງການອະນາໄມໂລກ,ພວກເຂົາເຈົ້າໄດ້ຕີລາຄາສູງຕໍ່ມາດຖານຄົນພິການເທື່ອນີ້,ເຫັນວ່າມັນສອດຄ່ອງກັບຂໍ້ກຳນົດຂອງອົງການອະນາໄມໂລກ,ທັງມີຈຸດພິເສດຂອງຈີນ.ເມື່ອສັງເກດຈາກສະພາບປະຕິບັດໃນປັດຈຸບັນ,ມາດຖານດັ່ງກ່າວໄດ້ປະຕິບັດຢ່າງສະດວກທີ່ສຸດໃນການສຳຫຼວດ.
ທ່ານເຊິນຊິ່ນມິນເວົ້າວ່າ,ໃນຕາລາງສຳຫຼວດຄົນພິການແບບຖອດເອົາຕົວຢ່າງເທື່ອນີ້,ໄດ້ກ່ຽວພັນເຖິງຄວາມຕ້ອງການຂອງຄົນພິການໃນດ້ານຕ່າງໆ,ເຊັ່ນຟື້ນຟູສຸຂະພາບ ດຳລົງຊີວິດການສ້າງຄອບຄົວແລະການເຄື່ອນໄຫວທີ່ບໍ່ມີອຸປະສັກເປັນຕົ້ນ.ເມື່ອມີຕົວເລກດັ່ງກ່າວແລ້ວ,ຈະມີຜົນດີຕໍ່ລັດຖະບານໃຊ້ມາດຕະການທີ່ມີລັກສະນະແນໃສ່,ແລະສະໜອງການບໍລິການແລະການຊ່ອຍເຫຼືອແກ່ຄົນພິການຫຼາຍກວ່າເກົ່າ.
|
|
|
