ຕາມ​ຂ່າວສານ​ຊິນ​ຮວາ: ກົມ​ຕິດຕາມຄຸ້ມ​ຄອງສະບຽງ​ອາຫານ​ແລະ​ຢຸກຢາ​ແຫ່ງ​ຊາດ​ຈີນ​ໄດ້​ອະ​ນຸ​ຍາດ​ການ​ຈົດ​ທະບຽນ​ຂອງ "ຕາ​ມີ​ຟຼູ" ​ເຊິ່ງ​ແມ່ນ​ຢາ​ຕ້ານ​ໄຂ້ຫວັດ​ໃຫຍ່​ມີ​ສັບ​ພະ​ຄຸນ​ພິ​ເສດ​ທີ່​​ຜະ​ລິດ​ໂດຍ​ຈີນ, ນີ້​ໝາຍ​ຄວາມ​ວ່າ ຢາ​ດັ່ງກ່າວ​ໄດ້​ຮັບ​ອະນຸຍາດ​ໃຫ້​ຂາຍ​ໃນ​ຕະ​ຫຼາດ​ແລ້ວ. ນີ້​ໄດ້​ສ້າງ​ພື້ນ​ຖານ​ອັນ​ໝັ້ນຄົງ​ໃຫ້ຈີນ​ໃນ​ການ​ປ້ອງ​ກັນ​ແລະ​ປິ່ນ​ປົວ​ໄຂ້​ຫວັດ​​ໃຫຍ່.

ຢາ "ຕາ​ມີ​ຟຼູ" ​ແມ່ນ​ຢາ​ຕ້ານ​ໄຂ້ຫວັດ​ໃຫຍ່​ທີ່​ມີ​ຜົນ​ສັກສິດ​ຂ້ອນ​ຂ້າງຫຼາຍ​ແລະ​ໄດ້​ຮັບ​ການ​ຮັບ​ຮອງ​ທົ່ວ​ໄປ​ໃນ​ປັດຈຸບັນ, ຜູ່​ຄົ້ນຄວ້າ​ຜະລິດ​ແມ່ນ​ບໍລິສັດ​ໂຣ​ເຊ​ສະ​ວິສ ​ເຊິ່ງ​ແມ່ນ​ບໍ​ລິ​ສັດ​ຜະ​ລິດ​ຢາ​ດັ່ງກ່າວ​ພຽງ​ແຫ່ງ​ດຽວ. ຢາ​ດິບ​ແລະ​ນ້ຳ​ຢາ​ທີ່​ໄດ້​ຮັບ​ການ​ອະ​ນຸ​ຍາດ​ເທື່ອ​ນີ້ ລ້ວນ​ແຕ່​ໄດ້​ຮັບ​ການ​ມອບ​ສິດ​​​ໃຫ້​ຜະລິດ​ຢູ່​ຈີນ​ຈາກ​ບໍລິສັດ​ໂຣ​ເຊ​ສະ​ວິສກ່ອນ​. ການ​ນຳ​ໃຊ້​ໄດ້​ພິ​ສູດ​ວ່າ, ​ໃນ​ດ້ານ​ຄຸນ​ນະພາ​ບ ຜົນ​ການ​ປິ່ນປົວ​ແລະ​ຄວາມ​ປອດ​ໄພ, ຢາ "ຕາ​ມີ​ຟຼູ" ທີ່​ຜະ​ລິດ​ໂດຍ​ວິ​ສາ​ຫະກິດ​ທີ່​ກ່ຽວຂ້ອງ​ຂອງ​ຈີນ​ນັ້ນ ​ໄດ້​ບັນລຸ​ລະດັບ​ເທົ່າ​ທຽມ​ກັບ​ຢາ "ຕາ​ມີ​ຟຼູ" ທີ່​ນຳ​ເຂົ້າ.

ຕາມ​ສະ​ເໜີ​ວ່າ, ຢາ "ຕາ​ມີ​ຟຼູ" ທີ່​ຜະລິດ​ໂດຍ​ຈີນ​ສາມາດ​ໃຊ້​ເຂົ້າ​ໃນ​ການ​ປ້ອງ​ກັນ​ແລະ​ປິ່ນ​ປົວ​ໄຂ້ຫວັດ​ໃຫຍ່​ແບບ ກ.​ແລະ​ແບບ ຂ. ຂອງ​ຜູ່​ໃຫຍ່​ແລະ​ເດັກ​ນ້ອຍ​ທີ່​ອາ​ຍຸ​​​ເຖິງ​ກຳ​ນົດ.