|
ຕາມຂ່າວສານຊິນຮວາ: ວັນທີ 12 ມິຖຸນາ ຢູ່ທີ່ປັກກິ່ງ, ທ່ານເວິນເຈຍປາວ ນາຍົກລັດຖະມົນຕີຈີນກ່າວເນັ້ນວ່າ, ຈີນຕ້ອງປ້ອງກັນແລະດັດແປງດິນຊາຍຢ່າງບໍ່ລົດລະ, ຊຸກຍູ້ໃຫ້ເສດຖະກິດສັງຄົມພັດທະນາແບບຍືນໂຍງ.
ວັນທີ 12 ມິຖຸນາ, ທ່ານເວິນເຈຍປາວໄດ້ເປັນປະທານງານສົນທະນາຜູ່ຊ່ຽວຊານປ້ອງກັນແລະດັດແປງພາຍຸຊາຍ. ພາຍຫຼັງຮັບຟັງຄຳຄິດຄຳເຫັນຂອງຜູ່ຊ່ຽວຊານແລ້ວ, ທ່ານເວິນເຈຍປາວກ່າວວ່າ, ສະຖານະການປ້ອງກັນແລະດັດແປງດິນຊາຍຂອງຈີນໃນປັດຈຸບັນຍັງຂ້ຽວຂາດທີ່ສຸດຢູ່ຄືເກົ່າ. ເນື້ອທີ່ທີ່ດິນຫັນເປັນດິນຊາຍຢູ່ບາງທ້ອງຖິ່ນຍັງເປີດກວ້າງຢູ່, ພື້ນດິນຊາຍທີ່ໄດ້ຮັບການດັດແປງແລ້ວນັ້ນກໍຂ້ອນຂ້າງອ່ອນແອ.
ທ່ານຊີ້ອອກວ່າ, ຕ້ອງເອົາການດັດແປງດ້ວຍແຮງງານຕິດພັນກັບການຟື້ນຟູແບບທຳມະຊາດ, ມາດຕະການຊີວະພາບຕິດພັນກັບມາດຕະການໂຄງການ, ການປ້ອງກັນແລະດັດແປງຢູ່ເຂດແຄວ້ນຕິດພັນກັບການປ້ອງກັນແລະດັດແປງບ່ອນຈຸດໜັກ, ສ້າງແລະປັບປຸງລະບົບຄວາມປອດໄພທາງຊີວະພາບຢູ່ເຂດທະເລຊາຍເຊິ່ງຖືຕົ້ນໄມ້ຕົ້ນຫຍ້າເປັນອັດຕະພາບ. ອະນຸລັກຕົ້ນໄມ້ຕົ້ນຫຍ້າໃນເຂດດິນຊາຍຢ່າງເຄັ່ງຄັດ, ຂີດເອົາເຂດອະນຸລັກຕົ້ນໄມ້ຕົ້ນຫຍ້າຢູ່ເຂດທີ່ດິນທີ່ຫັນເປັນດິນຊາຍຕາມກົດໝາຍ, ນຳໃຊ້ຊັບພະຍາກອນນ້ຳຢ່າງສົມເຫດສົມຜົນ. ສືບຕໍ່ປະຕິບັດໂຄງການສ້າງສາຊີວະພາບ ເຊັ່ນ ເຊົາເຮັດໄຮ່ເຮັດນາແລະປູກຕົ້ນໄມ້ຕົ້ນຫຍ້າເພື່ອສ້າງປ່າເປັນຕົ້ນ, ແລະເພີ່ມເນື້ອໃນກໍ່ສ້າງໃຫ້ເຕັມທີ່ໂດຍອີງຕາມສະພາບຕົວຈິງ, ຮັບປະກັນຄວາມຄືບໜ້າແລະຄຸນນະພາບຂອງໂຄງການກໍ່ສ້າງ.
|
