ຕາມ​ຂ່າວ CRI: ​ໃນ​ງານ​ຊຸມນຸມ​ນັກ​ຂ່າວ​ທີ່​ຈັດ​ຂຶ້ນຢູ່​ທີ່​ປັກ​ກິ່ງ​ໃນ​ວັນ​ທີ 13 ມິຖຸນາ, ທ່ານ​ນາງ​ຈ່ຽງ​ອີ ​ໂຄສົກ​ກະຊວງ​ການ​ຕ່າງປະ​ເທດ​ຈີນ​ກ່າວ​ວ່າ, ​ຈີນ​ເຕືອນ​ໃຫ້​ສະ​ມາ​ຊິກ​ລັດ​ຖະ​ສະ​ພາ​ອາ​ເມ​ລິ​ກາ​ພິຈາລະນາ​ແກ້​ໄຂ​ປະກົດການ​ລະ​ເມີດ​ສິດທິ​ມະນຸດ​ທີ່​ຄົງ​ຕົວ​ຢູ່​ໃນ​ອາ​ເມ​ລິ​ກາ​ເອງ​ນັ້ນ​ໃຫ້ຫຼາຍກວ່າ​ເກົ່າ, ຢຸດຕິ​ການ​ສວຍໃຊ້ບັນຫາ​ສິດທິ​ມະ​ນຸດ​ແລະ​ສາ​ສະ​ໜາ​ມາ​ແຊກ​ແຊງ​ວຽກ​ງານ​ພາຍ​ໃນ​ຂອງ​ຈີນ.

ຫວ່າງ​ມໍ່ໆ​ນີ້ ສະພາ​ຕ່ຳ​ອາ​ເມ​ລິ​ກາ​ໄດ້​ຮັບຮອງ​ເອົາ​ມະຕິ​ທີ່​ກ່ຽວຂ້ອງ, ກ່າວ​ໂຈມ​ຕີ​ຢ່າງ​ໄຮ້​ສາ​ລະ​ແລະ​ໃສ່​ຮ້າຍ​ປ້າຍ​ສີ​ຕໍ່​ສະພາບ​ສິດທິ​ມະ​ນຸດ​ແລະ​ສາສະໜາ​ຂອງ​ຈີນ. ຕໍ່​ເລື່ອງ​ນີ້ ທ່ານ​ນາງ​ຈ່ຽງ​ອີ​ກ່າວ​ວ່າ, ການ​ກະທຳ​ດັ່ງກ່າວ​ໄດ້​ແຊກ​ແຊງ​ວຽກ​ງານ​ພາຍ​ໃນ​ຂອງ​ຈີນ​ຢ່າງ​ຮ້າຍ​ກາດ, ​ໄດ້​ລະ​ເມີດຫຼັກມາດຖານ​ການ​ພົວພັນ​ລະຫວ່າງ​ຊາດ, ຝ່າຍ​ຈີນ​ສະ​ແດງ​ຄວາມ​ບໍ່ພໍ​ໃຈ​ຢ່າງ​ຮຸນ​ແຮງ​ແລະ​ຄັດ​ຄ້ານ​ຢ່າງ​ເດັດ​​ດ່ຽວ. ທ່ານ​ນາງ​ຈ່ຽງອີ​ກ່າວ​ວ່າ, ລັດຖະ​ບານ​ຈີນ​ປົກ​ປັກ​ຮັກ​ສາ​ເສ​ລີ​ພາບ​​ໃນ​ການ​ເຊື່ອ​ຖື​ສາສະໜາຂອງ​ພົນລະ​ເມືອງຕາມ​ກົດໝາຍ, ພົນລະ​ເມືອງ​ຈີນ​ມີ​ເສ​ລີ​ພາບ​ໃນ​ການ​ເຊື່ອ​ຖື​ສາສະໜາ​ຢ່າງ​ກວ້າງຂວາງ​ແລະ​ເຕັມທີ່ຕາມ​ກົດ​ໝາຍ, ກ່ຽວ​ກັບ​ບັນ​ຫາ​ນີ້, ປະ​ຊາ​ຊົນ​ຈີນ​ມີ​ສິດ​ປະກອບ​ຄຳ​ຄິດ​ຄຳ​ເຫັນ​ຫຼາຍ​ກວ່າ​ໝູ່.