|
ທ່ານອານນານຈະແຕ່ງຂ້າຫຼວງໃຫຍ່ທີ່ຮັບຜິດຊອບວຽກງານສິດທິມະນຸດໄປປະກອບສ້າງຄະນະກຳມະການສຳຫຼວດທີ່ເປັນອິດສະຫຼະຂອງຕີມໍຕາເວັນອອກ
cri
ຕາມຂ່າວCRI, ວັນທີ13ມິຖຸນາ, ໃນເວລາທ່ານອານນານ ເລຂາທິການໃຫຍ່ສະຫະປະຊາຊາດຍື່ນບົດລາຍງານໃຫ້ສະພາຄວາມໝັ້ນຄົງນັ້ນ, ທ່ານກ່າວວ່າ, ໂດຍອີງຕາມຄຳຮ້ອງຂໍຂອງລັດຖະບານຕີມໍຕາເວັນອອກ, ທ່ານຈະແຕ່ງໃຫ້ທ່ານນາງລູອີສ ອາເບີ ຂ້າຫຼວງໃຫຍ່ສະຫະປະຊາຊາດທີ່ຮັບຜິດຊອບວຽກງານສິດທິມະນຸດໄປປະກອບສ້າງຄະນະກຳມະການສຳຫຼວດທີ່ເປັນອິດສະຫຼະ, ເພື່ອສຳຫຼວດເຫດການທີ່ພາໃຫ້ສະຖານະການຕີມໍຕາເວັນອອກຊຸດຮ້າຍລົງ.
ທ່ານອານນານກ່າວວ່າ, ສະຫະປະຊາຊາດໄດ້ເສີມຂະຫຍາຍບົດບາດອັນໃຫຍ່ຫຼວງໃນດ້ານຊ່ອຍເຫຼືອຕີມໍຕາເວັນອອກສ້າງກົນໄກປະຊາທິປະໄຕແລະດຳເນີນການສ້າງສາປະເທດ. ກ່ຽວກັບສະພາບການທີ່ສະຖານະການຕີມໍຕາເວັນອອກນັບມື້ນັບຊຸດຮ້າຍລົງແຕ່ເດືອນເມສາປີນີ້ເປັນຕົ້ນມາ, ປະຊາຄົມໂລກກໍມີໜ້າທີ່ຮັບຜິດຊອບຍ້ອນບໍ່ໄດ້ຊ່ອຍເຫຼືອຕີມໍຕາເວັນອອກຢ່າງບັງເກີດຜົນໃນການສ້າງສາປະເທດ.
ນອກນີ້, ທ່ານອານນານຍັງຈະແຕ່ງໃຫ້ທ່ານອີອານ ມາຕິນ ທູດພິເສດຂອງທ່ານກ່ຽວກັບບັນຫາຕີມໍຕາເວັນອອກນຳພາໜ່ວຍປະເມີນໄປຕີມໍຕາເວັນອອກເພື່ອປະເມີນສະຖານະການຢູ່ແຫ່ງນັ້ນ.
|
|
