|
|
 |
| (GMT+08:00)
2006-06-16 08:30:46
|
 |
|
ຊາວກະສິກອນທີ່ເຮັດວຽກໃນຕົວເມືອງໄດ້ຮັບຫຼຽນແຮງງານໜຶ່ງພຶດສະພາ
cri
Author: mo
|
ວັນແຮງງານສາກົນໜຶ່ງພຶດສະພາປີນີ້, ເວົ້າສຳລັບທ່ານຈູຈື້ເຊີ້ງ ກຳມະກອນຂອງບໍລິສັດກຸ່ມເຫຼັກກ້າຫາງໂຈວແຂວງເຈີ້ຈ່ຽງ ພາກຕາເວັນອອກຂອງຈີນແລ້ວ, ແມ່ນວັນທີ່ເປັນໜ້າລະລຶກ. ເພາະວ່າ, ໃນມື້ດັ່ງກ່າວ, ທ່ານໄດ້ຮັບຫຼຽນແຮງງານໜຶ່ງພຶດສະພາທົ່ວປະເທດຈີນ, ນີ້ແມ່ນນາມມະຍົດອັນສູງສົ່ງທີ່ຜູ້ອອກແຮງງານຈີນແຕ່ລະຄົນໄຝ່ຝັນຢາກໄດ້.
ທ່ານຈູຈື້ເຊີ້ງ ປີນີ້ອາຍຸ 37, ແມ່ນກຳມະກອນຫຼໍ່ຫຼອມເຫຼັກກ້າຂອງບໍລິສັດກຸ່ມເຫຼັກກ້າຫາງໂຈວ. ບໍລິສັດດັ່ງກ່າວແມ່ນບໍລິສັດເຫຼັກກ້າທີ່ມີປະຫວັດເກືອບ 50 ປີແລ້ວ, ເປັນທີ 94 ໃນການລຽງລຳດັບວິສາຫະກິດໃຫຍ່ 500 ແຫ່ງຂອງຈີນ. 10 ກວ່າປີກ່ອນ, ບໍລິສັດຮັບສະໝັກກຳມະກອນ, ໃນເວລານັ້ນ, ທ່ານຈູຈື້ເຊີ້ງໄດ້ຮຽນຈົບມັດທະຍົມປາຍເມື່ອຜ່ານການສອບເສັງ, ແລະຖືກຈັດເປັນກຳມະກອນຫຼໍ່ຫຼອມຢູ່ໜ້າເຕົາຂອງຫ້ອງຈັກຫຼໍ່ຫຼອມເຫຼັກກ້າ.
ການຫຼໍ່ຫຼອມເຫຼັກກ້າຢູ່ໜ້າເຕົາເປັນວຽກທີ່ອິດເມື່ອຍທັງເປິເບື້ອນຫຼາຍ, ກຳມະກອນທີ່ກຳເນີດໃນຕົວເມືອງບໍ່ໜ້ອຍທົນບໍ່ໄຫວຕໍ່ວຽກງານດັ່ງກ່າວນີ້. ແຕ່ທ່ານຈູຈື້ເຊີ້ງທີ່ດຳລົງຊີວິດຢູ່ຊົນນະບົດມາແຕ່ນ້ອຍ, ທ່ານໄດ້ຍຶດໝັ້ນເຮັດວຽກດັ່ງກ່າວຍ້ອນທົນທຸກທົນຍາກໄດ້.
ເວົ້າສຳລັບກຳມະກອນຫຼໍ່ຫຼອມເຫຼັກກ້າຢູ່ໜ້າເຕົາແລ້ວ, ກ່ອນອື່ນ, ຕ້ອງກຳເຕັກນິກເບິ່ງໄຟໃນເວລາຫຼໍ່ຫຼອມເຫຼັກກ້າ. ເພື່ອກຳເຕັກນິກດັ່ງກ່າວໃຫ້ໄດ້, ທ່ານຈູຈື້ເຊີ້ງໄດ້ຜ່ານຜ່າຄວາມຫຍຸ້ງຍາກຫຼວງຫຼາຍ. ຕໍ່ໜ້າອຸມຫະພູມເຕົາສູງເຖິງ 1700 ອົງສາແລະໄຟແຮງດາດ, ບໍ່ວ່າຈະແມ່ນຜູ້ໃດຢູ່ສອງສາມນາທີກໍຈະເຫື່ອໄຫຼໄຄຍ້ອຍ. ແຕ່ສຳລັບທ່ານຈູຈື້ເຊີ້ງແລ້ວເພື່ອກຳທຸກຂໍ້ປີກຍ່ອຍຂອງການຫຼໍ່ຫຼອມເຫຼັກກ້າ, ທ່ານໄດ້ສັງເກດຫຼາຍຊົ່ວໂມງເທື່ອດຽວຢູ່ຕໍ່ໜ້າເຕົາ. ເຄິ່ງປີຕໍ່ມາ, ທ່ານຈູຈື້ເຊີ້ງໄດ້ກຳເຕັກນິກເບິ່ງໄຟຂ້ອນຂ້າງດີ.
ທ່ານຈູຈື້ເຊີ້ງຍັງບໍ່ພໍໃຈ, ຕາມຄວາມຄິດຂອງທ່ານ, ກຳມະກອນບໍ່ຄືຊາວນາ, ພຽງແຕ່ມີກຳລັງແລະບົດຮຽນພຶດຕິກຳຍັງບໍ່ພໍເທື່ອ, ຄວນມີວັດທະນະທຳ. ທ່ານເວົ້າວ່າ:
"ເປັນກຳມະກອນແລ້ວຕ້ອງມີຄວາມຮູ້ອັນແນ່ນອນ, ມີຄວາມສາມາດທຸລະການແລະຄວາມສາມາດຄຸ້ມຄອງອັນແນ່ນອນ, ນີ້ແມ່ນເງື່ອນໄຂເບື້ອງຕົ້ນຂອງກຳມະກອນທີ່ດີ."
ທ່ານຈູຈື້ເຊີ້ງເຮັດວຽກເອົາຈິງເອົາຈັງບໍ່ພໍໃຈນຳການຮູ້ແຕ່ວຽກຫຼໍ່ຫຼອມເຫຼັກກ້າທໍ່ນັ້ນ, ທ່ານຍັງຊອກວິທີຫຼໍ່ຫຼອມໄດ້ເຫຼັກກ້າທີ່ມີຄຸນນະພາບດີອີກດ້ວຍ. ເພື່ອກຳເຕັກນິກຫຼໍ່ຫຼອມເຫຼັກກ້າໃຫ້ໄດ້ຫຼາຍກວ່າເກົ່າ, ແລະແກ້ໄຂຄວາມຮູ້ທິດສະດີບໍ່ຫຼາຍ, ທ່ານໄດ້ຊື້ໜັງສືວິຊາສະເພາະກ່ຽວກັບການຫຼໍ່ຫຼອມເຫຼັກກ້າຢ່າງຫຼວງຫຼາຍ. ເວລານອກໂມງການຂອງທ່ານສ່ວນຫຼາຍໄດ້ໃຊ້ມາອ່ານໜັງສື, ໜອງສີ່ຫູ ເຊິ່ງເປັນທິວທັດສວຍງາມທີ່ມີຊື່ສຽງໃນໂລກກໍຢູ່ໃນຕົວເມືອງທີ່ທ່ານເຮັດວຽກ, ແຕ່ທ່ານກໍບໍ່ມີເວລາໄປທ່ຽວຊ້ຳ.
ໃນເວລາຫຼໍ່ຫຼອມເຫຼັກກ້າ, ທ່ານຈູຈື້ເຊີ້ງປະກົດເຫັນວ່າ, ເຫຼັກກ້າແຕ່ລະງວດທີ່ຫຼໍ່ຫຼອມອອກນັ້ນ, ຄຸນນະພາບຕ່າງກັນ, ລາງເທື່ອ, ຍັງມີຮອຍແຕກ, ຖ້ານ້ຳຫຼອມເຫຼັກກ້າໄຫຼບໍ່ເປັນລະບຽບໃນເຕົາປີ່ນ, ກໍຈະມີສະພາບການຕ້ອງຫຼໍ່ຄືນອີກ. ທ່ານຈູຈື້ເຊີ້ງຄິດວ່າ, ນີ້ແມ່ນຍ້ອນມູນເຫດຫຍັງແທ້?
ເພື່ອແກ້ຂໍ້ຂ້ອງໃຈດັ່ງກ່າວ, ນອກຈາກຊອກຫາຄຳຕອບຢູ່ໃນໜັງສືທໍ່ນັ້ນ, ທ່ານຍັງໄດ້ບັນທຶກ ປຽບທຽບຕົວເລກການຫຼໍ່ຫຼອມເຫຼັກກ້າ, ຖ້າມີບ່ອນໃດບໍ່ເຂົ້າໃຈກໍໄປຂໍຮຽນນຳຜູ້ອາວຸໂສທີ່ມີບົດຮຽນ, ພາຍລຸນມາ, ຜູ້ອາວຸໂສໃນຫ້ອງຈັກຫຼໍ່ຫຼອມເຫຼັກກ້າບໍ່ມີຜູ້ໃດບໍ່ຮູ້ຈັກທ່ານ. ທ່ານໂລ້ກ່າງເສິ່ງທີ່ເຄີຍເຮັດວຽກໃນຫ້ອງຈັກເຕົາປິ່ນກໍແມ່ນຜູ້ທີ່ທ່ານຈູຈື້ເຊີ້ງມັກໄປສຳພາດ.
"ເລີກການແລ້ວ, ທ່ານຈູຈື້ເຊີ້ງກໍມັກມາລົມກັນຢູ່ເຮືອນເຮົາ, ຖ້າພົບບັນຫາຫຍັງ, ໃນວິທີໄລ່ອອກຊີນັ້ນມີບັນຫາຫຍັງ, ທ່ານແກ້ໄຂແນວໃດແລ້ວ, ເຫຼົ່ານີ້ເປັນຕົ້ນ, ທ່ານມັກເອົາມາຖາມເລື້ອຍໆ."
ໃຕ້ຄວາມພະຍາຍາມຄົ້ນຄວ້າຂອງທ່ານຈູຈື້ເຊີ້ງ, ເຫຼັກກ້າທີ່ທ່ານຫຼໍ່ອອກມານັ້ນຮອຍແຕກກໍຫຼຸດໜ້ອຍລົງ, ບັນຫານ້ຳເຫຼັກໄຫຼບໍ່ສະດວກກໍໄດ້ຮັບການແກ້ໄຂ. ປັດຈຸບັນ, ວິທີກ້າວໜ້າຫຼາຍຢ່າງທີ່ໃຊ້ໃນເວລາຫຼໍ່ຫຼອມເຫຼັກກ້າຂອງບໍລິສັດເຫຼັກກ້າຫາງໂຈວໂດຍທົ່ວໄປນັ້ນ, ລ້ວນແຕ່ແມ່ນທ່ານຈູຈື້ເຊີ້ງເປັນຜູ້ປະດິດສ້າງ, ບາງອັນຍັງຕັ້ງຊື່ດ້ວຍທ່ານຈູຈື້ເຊີ້ງ. ວິທີເຫຼົ່ານີ້ບາງອັນໄດ້ຍົກລະດັບສຸດທິຂອງເຫຼັກກ້າໃຫ້ສູງຂຶ້ນຢ່າງຫຼວງຫຼາຍ, ບາງອັນໄດ້ເຮັດໃຫ້ເວລາຫຼອມສັ້ນກວ່າເກົ່າ. ໃນນັ້ນມີເຕັກນິກໜຶ່ງ, ເມື່ອເຜີຍແຜ່ໃຊ້ໃນທົ່ວຫ້ອງຈັກແລ້ວ, ປະລິມານຜະລິດເຫຼັກກ້າສະເລ່ຍແລ້ວໄດ້ເພີ່ມຂຶ້ນ 2 ພັນໂຕນຕໍ່ເດືອນ, ປະຢັດຕົ້ນທຶນເກືອບ 8 ແສນຢວນ, ນີ້ໄດ້ສ້າງປະສິດທິຜົນອັນດີງາມໃຫ້ແກ່ວິສາຫະກິດ.
ຍ້ອນວຽກງານດີເດັ່ນ, 6 ປີກ່ອນ, ທ່ານຈູຈື້ເຊີ້ງເລີ່ມເປັນຫົວໜ້າເຕົາເລກໜຶ່ງຂອງໜ່ວຍຫຼໍ່ຫຼອມເຫຼັກກ້າຂອງຫ້ອງຈັກ. ເຕົາດັ່ງກ່າວເຄີຍຫຼ້າຫຼັງດ້ານຕົວເລກຄາດໝາຍການຜະລິດທຸກລາຍ. ພາຍຫຼັງທ່ານຈູຈື້ເຊີ້ງຂຶ້ນຮັບຕຳແໜ່ງແລ້ວ, ບໍ່ພຽງແຕ່ເອົາໃຈໃສ່ນຳການຄຸ້ມຄອງກຳມະກອນທໍ່ນັ້ນ, ຍັງເອົາໃຈໃສ່ນຳການສາມັກຄີຄົນທັງຫຼາຍ, ເສີມຂະຫຍາຍສະຕິປັນຍາຂອງແຕ່ລະຄົນ. ໃຕ້ການນຳພາຂອງທ່ານ, ກຳມະກອນທຸກຄົນລ້ວນແຕ່ມີຄວາມຫ້າວຫັນເຮັດວຽກ. ທ່ານໂລຈີ້ລາຍເຄີຍເຮັດວຽກຢູ່ໜ່ວຍນີ້, ທ່ານເວົ້າວ່າ:
"ທ່ານມັກເອົາຕົວເອງເປັນແບບຢ່າງ, ກໍປຸກລະດົມຄວາມຫ້າວຫັນຂອງກຳມະກອນພວກເຮົາທຸກຄົນ, ເຮັດວຽກນຳເພີ່ນ, ພວກເຮົາຍິນຍອມທີ່ສຸດ, ກໍຮູ້ສຶກສະບາຍໃຈຫຼາຍ."
ເພື່ອນຳພາໜ່ວຍດັ່ງກ່າວໃຫ້ດີ, ທ່ານຈູຈື້ເຊີ້ງເຫັນວ່າ, ຕົນເອງຍັງຄວນຮຽນຄວາມຮູ້ຄຸ້ມຄອງຫຼາຍກວ່າເກົ່າ, ສະນັ້ນ, 3 ປີກ່ອນ, ທ່ານໄດ້ໄປຮຽນວິຊາບໍລິຫານຄຸ້ມຄອງຢູ່ມະຫາວິທະຍາໄລແຫ່ງໜຶ່ງຂອງຈີນດ້ວຍທຶນຕົວເອງ, ແລະໃຊ້ເວລາສອງປີເຄິ່ງກໍຮຽນຈົບ ໄດ້ຮັບໃບປະກາດສະນີຍະບົດຊັ້ນປະລິນຍາເອກຂອງວິຊາດັ່ງກ່າວ.
ໃຕ້ການນຳພາຂອງທ່ານຈູຈື້ເຊີ້ງ, ໂສມໜ້າເຕົາເລກໜຶ່ງຂອງໜ່ວຍ.ໄດ້ຮັບປ່ຽນແປງໃໝ່, ໃນ 6 ປີມານີ້, ຕົວເລກຄາດໝາຍກວດສອບທຸກລາຍຂອງໜ່ວຍດັ່ງກ່າວໄດ້ເປັນທີ 1 ຂອງ 12 ໜ່ວຍຂອງບໍລິສັດ.
ເຕັກນິກຫຼໍ່ຫຼອມເຫຼັກກ້າທີ່ດີເດັ່ນແລະຜົນງານການຄຸ້ມຄອງ, ໄດ້ເຮັດໃຫ້ທ່ານຈູຈື້ເຊີ້ງໄດ້ຮັບນາມມະຍົດປະເພດຕ່າງໆຄື: ເປັນຕົວເດັ່ນຫຼາຍເທື່ອເປັນລຳດັບ, ປີ 2003 ໄດ້ເປັນ"ຊາວໜຸ່ມດີເດັ່ນຕ່າງຖິ່ນທີ່ມາເຮັດວຽກຢູ່ເມືອງຫາງໂຈວ 10 ຄົນ". ວັນທີ 1 ພຶດສະພາປີນີ້, ທ່ານຈູຈື້ເຊີ້ງໄດ້ມາຮອດນະຄອນຫຼວງປັກກິ່ງ, ໄດ້ຮັບຫຼຽນແຮງງານໜຶ່ງພຶດສະພາທົ່ວປະເທດ ເຊິ່ງເປັນຫຼຽນທີ່ກຳມະກອນທຸກຄົນຢາກໄດ້ທີ່ສຸດ.
|
|
|
