|
ຕອນຄ່ຳວັນທີ 9 ມິຖຸນາເວລາເຢຍລະມັນ, ງານແຂ່ງຂັນບານເຕະຊີງຂັນໂລກຄັ້ງທີ 18 ໄດ້ຈັດຂຶ້ນຢູ່ເມືອງມີວນິກ ທາງພາກໃຕ້ເຢຍລະມັນຢ່າງເປັນທາງການ. ໃນການແຂ່ງຂັນນັດທຳອິດຫຼັງພິທີເປີດສາກ, ທີມຊາດເຢຍລະມັນໄດ້ເອົາຊະນະທີມກົສຕາລີກາດ້ວຍຄະແນນ 4:2. ງານແຂ່ງຂັນເທື່ອນີ້ມີທີມຊາດ 32 ປະເທດເຂົ້າຮ່ວມ, ການແຂ່ງຂັນຈະຈັດຂຶ້ນຢູ່ 12 ຕົວເມືອງຂອງເຢຍລະມັນ. ເຖິງວ່າທີມຊາດຈີນບໍ່ໄດ້ເຂົ້າຮ່ວມກໍ່ຕາມ, ແຕ່ແຟນບານເຕະຈີນກໍເຕັມໄປດ້ວຍຄວາມກະຕືລືລົ້ນຕໍ່ການແຂ່ງຂັນບານເຕະຊີງຂັນໂລກເຊັ່ນດຽວກັນ. ແຟນບານເຕະຈີນສ່ວນຫຼາຍຈະເບິ່ງໂທລະພາບຖ່າຍທອດສົດໃນຍາມກາງຄືນ. ໃນເວລາພົບປະທ່ານນາງແອງເກລາ ແມກໂຄ ນາຍົກລັດຖະມົນຕີເຢຍລະມັນ ປະເທດເຈົ້າພາບງານແຂ່ງຂັນບານເຕະຊີງຂັນໂລກເທື່ອນີ້ທີ່ມາຢ້ຽມຢາມຢູ່ທີ່ປັກກິ່ງໃນຫວ່າງບໍ່ດົນນີ້, ທ່ານເວິນເຈຍປາວ ນາຍົກລັດຖະມົນຕີຈີນກໍ່ເຄີຍກ່າວວ່າ, ທ່ານເອງກໍແມ່ນແຟນບານເຕະ.
ໃນງານແຂ່ງຂັນກິລາແລ່ນແລະລານຊີງລາງວັນໃຫຍ່ອັງກິດທີ່ສະຫະພັນກິລາແລ່ນແລະລານສາກົນຈັດຂຶ້ນໃນວັນທີ 11 ມິຖຸນາ, ທ້າວອາຊາຟາ ໂພແວວ ນັກກິລາແລ່ນໄວຢາມາຍກາໄດ້ຜົນງານສະເໝີກັບສະຖິຕິໂລກເພດຊາຍທີ່ຕົນສ້າງຂຶ້ນຄື 9 ວິນາທີ 77. ສະຖິຕິນີ້ແມ່ນທ້າວໂພແວວເອງສ້າງຂຶ້ນຢູ່ທີ່ອາແຕນເມື່ອປີ 2005. ປັດຈຸບັນ, ທ້າວກັດລີນ ນັກກິລາອາເມລິກາ ແຊມປຽນງານກິລາໂອລິມປິກອາແຕນແລະທ້າວໂພແວວມີສະຖິຕິດັ່ງກ່າວພ້ອມກັນ.
ໃນງານແຂ່ງຂັນເທັນນິສຝຣັ່ງໂອເພັນ ເຊິ່ງແມ່ນ 1 ໃນ 4 ແກຼນດ໌ສະລາມປະຈຳປີນີ້ທີ່ສິ້ນສຸດລົງໃນວັນທີ 11 ມິຖຸນາ, ນາງເຈິ້ງເຈກັບນາງອ້ຽນຈື ນັກກິລາເທັນນິສຕີຄູ່ເພດຍິງຈີນໄດ້ຕີເຂົ້າຮອບ 4 ຄູ່ເພດຍິງ, ນີ້ເປັນຜົນງານດີກວ່າຍາມໃດໝົດໃນປະຫວັດນັກກິລາຈີນເຂົ້າຮ່ວມງານແຂ່ງຂັນເທັນນິສຝຣັ່ງໂອເພັນ. ພ້ອມກັນນັ້ນ ນາງເຈິ້ງເຈກັບນາງອ້ຽນຈືກໍແມ່ນແຊມປຽນຕີຄູ່ເພດຍິງຂອງງານແຂ່ງຂັນເທັນນິສອົສຕຼາລີໂອເພັນປະຈຳປີນີ້. ໃນການລຽງລຳດັບລະດັບໂລກຫຼ້າສຸດຂອງສະຫະພັນເທັນນິສອາຊີບເພດຍິງຫຼື WTA ທີ່ປະກາດໃນວັນທີ 12 ມິຖຸນາ, ນາງເຈິ້ງເຈ ນັກກິລາຈີນທີ່ເຂົ້າຮອບການຕີຄູ່ເພດຍິງ 4 ຄູ່ໃນງານແຂ່ງຂັນຝຣັ່ງໂອເພັນນັ້ນ ການລຽງລຳດັບຂອງເຂົາເຈົ້າໄດ້ເລື່ອນຂຶ້ນເປັນທີ 7, ເຊິ່ງໄດ້ສ້າງສະຖິຕິສູງສຸດຂອງນັກກິລາຕີຄູ່ຂອງຈີນໃນການລຽງລຳດັບລະດັບໂລກ. ການລຽງລຳດັບໃນລາຍການຕີດ່ຽວຂອງນາງລີນ້າ ນັກກິລາຈີນອີກຜູ່ໜຶ່ງກໍເລື່ອນຂຶ້ນເປັນທີ 32, ສະເໝີກັບສະຖິຕິດີທີ່ສຸດຂອງຕົນ.
ໃນງານແຂ່ງຂັນເທັນນິສຝຣັ່ງໂອເພັນ ເຊິ່ງແມ່ນ 1 ໃນ 4 ແກຼນດ໌ສະລາມທີ່ສິ້ນສຸດລົງໃນວັນທີ 11 ມິຖຸນາ, ທ້າວຣາຟາແອນ ນາດານ ນັກກິລາແອສປາຍໄດ້ເອົາຊະນະທ້າວໂຣເກີ ເຟເດເຣີ ນັກກິລາສະວິສທີ່ລຽງລຳດັບເປັນທີ 1 ຂອງໂລກດ້ວຍຄະແນນ 3:1 ໃນການແຂ່ງຂັນຕີດ່ຽວເພດຊາຍຊີງຊະນະເລີດ, ແລ້ວໄດ້ຄອງແຊມປຽນອີກ. ນາງຈັສຕິນ ເຮນິນ ຮາດແດນ ນັກກິລາແບນຊິກຊີງໄດ້ແຊມປຽນຕີດ່ຽວເພດຍິງ.
ໃນງານແຂ່ງຂັນບານສົ່ງລະດັບສູງສະວິສທີ່ສິ້ນສຸດລົງໃນວັນທີ 11 ມິຖຸນາ, ທີມບານສົ່ງເພດຍິງຈີນໄດ້ເສຍໃຫ້ທີມເບຼຊິນດ້ວຍຄະແນນ 2:3, ແລ້ວເປັນຮອງຊະນະເລີດ. ທີມເບຼຊິນຊີງໄດ້ແຊມປຽນອີກ. ຫຼັງຈາກການແຂ່ງຂັນສິ້ນສຸດລົງ, ທ່ານເສິນຈົ່ງເຫີ ຄູຝຶກໃຫຍ່ຂອງທີມຈີນກ່າວວ່າ, ຈຸດປະສົງຂອງຈີນທີ່ເຂົ້າຮ່ວມງານແຂ່ງຂັນເທື່ອນີ້ຕົ້ນຕໍແມ່ນເພື່ອຝຶກອົບຮົມນັກກິລາໜຸ່ມ.
ວັນທີ 12 ມິຖຸນາ, ຝ່າຍຈັດຕັ້ງປະກາດວ່າ, ງານແຂ່ງຂັນມາລາທອນສາກົນຕ້າຫຼຽນຄັ້ງທີ 20 ຈະຈັດຂຶ້ນຢູ່ສະໜາມຊິ່ງໄຫເມືອງຕ້າຫຼຽນໃນເວລາ 8 ໂມງເຊົ້າຂອງວັນທີ 18 ມິຖຸນາ. ງານແຂ່ງຂັນມາລາທອນດັ່ງກ່າວເລີ່ມມາແຕ່ປີ 1987, ມີນັກກິລາ 1 ໝື່ນ 500 ຄົນຂອງ 30 ກວ່າປະເທດແລະເຂດແຄວ້ນໄດ້ສະເໜີຊື່ເຂົ້າຮ່ວມການແຂ່ງຂັນປີນີ້. ທ້າວຊຸນຈີ້ໄຫ ນັກກິລາບານເຕະຈີນທີ່ເຕະບານຢູ່ທີມແມນເຊສ໌ເຕີ ຊີຕີ FC ພຼີເມຍລິກອັງກິດ ຈະແລ່ນນຳໜ້າໝູ່ໃນພິທີໄຂງານ.
|
