ຕາມຂ່າວ CRI: ໜັງສືພິມຮາອາເລັສອິສຣາແອນສະບັບວັນທີ 3 ກໍລະກົດລາຍງານວ່າ, ຫວ່າງມໍ່ໆນີ້ ກະຊວງປ້ອງກັນປະເທດອິສຣາແອນໄດ້ຮ່າງສັນຍາສະບັບໜຶ່ງ, ຈະປ່ອຍຊາວປາເລັສຕິນຈຳນວນໜຶ່ງທີ່ຖືກຂັງຢູ່ໃນຄຸກອິສຣາແອນ, ເພື່ອແລກປ່ຽນກັບທະຫານອິສຣາແອນທີ່ຖືກຜູ່ປະກອບອາວຸດປາເລັສຕິນລັກພາຕົວນັ້ນຄືນ. ແຕ່ສັນຍາດັ່ງກ່າວຍັງຕ້ອງນຳສະເໜີໃຫ້ຄະນະລັດຖະບານອິສຣາແອນປຶກສາຫາລືກ່ອນ.
ຂ່າວແຈ້ງວ່າ, ຕາມສັນຍາສະບັບນີ້, ກອງທະຫານອິສຣາແອນຈະປ່ອຍຊາວປາເລັສຕິນທີ່ບໍ່ໄດ້ເຂົ້າຮ່ວມການວາງແຜນຫຼືດຳເນີນການເຄື່ອນໄຫວກໍ່ການຮ້າຍ ເຊັ່ນ ລັດຖະມົນຕີຂອງລັດຖະບານຮາມາສແລະສະມາຊິກນິຕິບັນຍັດທີ່ຖືກຈັບຕົວໃນຫວ່າງມໍ່ໆນີ້ເປັນຕົ້ນ, ແຕ່ຈະສືບຕໍ່ຂັງຊາວປາເລັສຕິນທີ່ເຂົ້າຮ່ວມການເຄື່ອນໄຫວກໍ່ການຮ້າຍໂດຍກົງ. ນອກນີ້, ກອງທະຫານອິສຣາແອນຈະເຊົາການເຄື່ອນໄຫວທາງການທະຫານຢູ່ເຂດກາຊາ, ແຕ່ຜູ່ປະກອບອາວຸດປາເລັສຕິນຕ້ອງຢຸດຕິການຫຼອນໂຈມຕີແລະລັກພາຕົວທະຫານອິສຣາແອນແລະຊາວອິສຣາແອນ.
|