|
ສະບາຍດີທ່ານຜູ່ຟັງທີ່ໂຄລົບ, ວັນທີ 2 ກໍລະກົດ, ທ່ານຈູມມະລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດແຫ່ງ ສປປ ລາວໄດ້ສຳເລັດການຢ້ຽມຢາມຈີນທາງລັດຖະກິດເປັນເວລາ 7 ມື້. ກ່ອນຈະສິ້ນສຸດການຢ້ຽມຢາມ, ທ່ານຈູມມະລີ ໄຊຍະສອນໄດ້ໃຫ້ສຳພາດທາງລາຍລັກອັກສອນຂອງນັກຂ່າວຈີນ. ຕໍ່ໄປເຊີນຟັງບົດສຳພາດອັນລະອຽດ.
ທ່ານຈູມມະລີ ໄຊຍະສອນແມ່ນມາຢ້ຽມຢາມຈີນໂດຍຕອບສະໜອງຄຳເຊີນຂອງທ່ານຫູຈິນທາວ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດແຫ່ງ ສປ ຈີນ. ໃນເວລາພົບປະໂອ້ລົມກັບຜູ່ນຳຈີນ ເຊັ່ນ ທ່ານຫູຈິນທາວ ທ່ານອູປ່າງໂກ ທ່ານເວິນເຈ່ຍປາວແລະທ່ານເຈິ່ງຊິ້ງຫົງນັ້ນ, ສອງຝ່າຍໄດ້ແລກປ່ຽນຄວາມເຫັນກ່ຽວກັບການພົວພັນລະຫວ່າງສອງຝ່າຍ ບັນຫາພາກພື້ນແລະສາກົນທີ່ສົນໃຈນຳກັນ, ໄດ້ກ້າວເຖິງຂັ້ນມີຄວາມຮັບຮູ້ຄືກັນທີ່ສຳຄັນໃນການລົງເລິກແລະຂະຫຍາຍການພົວພັນໄມຕີຈິດແລະຮ່ວມມືລະຫວ່າງສອງພັກລັດຈີນລາວຕື່ມອີກ.
ທ່ານຈູມມະລີ ໄຊຍະສອນກ່າວວ່າ: "ສອງປະເທດລາວຈີນມີມູນເຊື້ອສາມັກຄີຊ່ອຍເຫຼືອເຊິ່ງກັນແລະກັນມາແຕ່ດົນນານ, ມີອຸດົມການອັນດຽວກັນ. ຂ້າພະເຈົ້າເຊື່ອແນ່ວ່າ ການພົວພັນຮ່ວມມືລະຫວ່າງສອງປະເທດ ຈະສືບຕໍ່ຂະຫຍາຍຕົວຢ່າງແຂງແຮງດ້ວຍບາດກ້າວໃໝ່ ແລະເກີດດອກອອກຜົນນັບມື້ນັບຫຼາຍ, ທັງມີຄວາມໜັກແໜ້ນແລະໃຫຍ່ຫຼວງກວ່າເກົ່າ."
ທ່ານຈູມມະລີ ໄຊຍະສອນກ່າວວ່າ: "ການພົວພັນມິດຕະພາບອັນດູດດື່ມແລະການຮ່ວມມືຮອບດ້ານລະຫວ່າງສອງພັກ ສອງລັດແລະປະຊາຊົນສອງຊາດລາວຈີນມີການຂະຫຍາຍຕົວຢ່າງບໍ່ຢຸດຢັ້ງ, ມີຄວາມໜັກແໜ້ນ ເລິກເຊິ່ງ ເກີດດອກອອກຜົນນັບມື້ນັບຫຼາຍ, ເຊິ່ງໄດ້ຕອບສະໜອງກັບຜົນປະໂຫຍດ ກໍ່ຄືຄວາມມຸ່ງຫວັງຂອງສອງພັກ ສອງລັດແລະປະຊາຊົນສອງຊາດລາວຈີນພວກເຮົາ. ປະຊາຊົນສອງຊາດລາວຈີນຍາມໃດກໍມີຄວາມປາດຖະໜາຢ່າງແຮງກ້າ ທີ່ຈະເສີມສ້າງການພົວພັນຮ່ວມມືຖານອ້າຍນ້ອງທີ່ໃກ້ຊິດສະໜິດແໜ້ນໃຫ້ຈະເລີນງອກງາມຍິ່ງໆຂຶ້ນ ແລະນຳເອົາຜົນປະໂຫຍດ ຕົວຈິງມາໃຫ້ປະຊາຊົນສອງຊາດລາວຈີນ."
ທ່ານຈູມມະລີ ໄຊຍະສອນກ່າວວ່າ: "ໃນໂອກາດທີ່ໄດ້ຮັບໜ້າທີ່ໃໝ່ ເປັນເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ ແລະໃນໂອກາດຢ້ຽມຢາມສັນຖະວະໄມຕີຢ່າງເປັນທາງການ ສປ ຈີນ ເປັນຄັ້ງທຳອິດໃນເທື່ອນີ້, ຕາງໜ້າໃຫ້ຄະນະຜູ່ແທນ ກໍຄືປະຊາຊົນລາວບັນດາເຜົ່າ ຂ້າພະເຈົ້າຂໍສະແດງຄວາມຂອບອົກຂອບໃຈຢ່າງຈິງໃຈມາຍັງພັກ ລັດ ແລະປະຊາຊົນຈີນຜູ່ຍິ່ງໃຫຍ່ທີ່ຍາມໃດກໍ່ໃຫ້ການຮ່ວມມື ສະໜັບສະໜູນຊ່ອຍເຫຼືອການປະຕິວັດລາວ ກໍ່ຄືການປົກປັກຮັກສາແລະການສ້າງສາພັດທະນາປະເທດຊາດຂອງພວກຂ້າພະເຈົ້າມາໂດຍຕະຫຼອດ."
ໃນເວລາທ່ານຈູມມະລີ ໄຊຍະສອນຢ້ຽມຢາມຢູ່ຈີນ, ຈີນລາວໄດ້ອອກຖະແຫຼງການຮ່ວມ, ກ່າວວ່າຈະສືບຕໍ່ເພີ່ມທະວີການແລກປ່ຽນແລະການຮ່ວມມືລະຫວ່າງສອງປະເທດໃນຂົງເຂດປ້ອງກັນປະເທດ ປ້ອງກັນຄວາມສະຫງົບ ຍຸດຕິທຳ ວັດທະນະທຳ ການສຶກສາ ສາທາລະນະສຸກແລະກິລາເປັນຕົ້ນ, ພ້ອມກັນອອກແຮງຊຸກຍູ້ການພົວພັນຮ່ວມມືຮອບດ້ານລະຫວ່າງສອງພັກລັດຈີນລາວໃຫ້ຂະຫຍາຍຕົວຢ່າງບໍ່ຢຸດຢັ້ງ ບົນພື້ນຖານຫຼັກຫ້າປະການຢູ່ຮ່ວມກັນໂດຍສັນຕິ ແລະອີງຕາມທິດທາງ "ມີຄວາມໝັ້ນຄົງຖາວອນ ມີໄມຕີຈິດຖານບ້ານໃກ້ເຮືອນຄຽງ ໄວ້ເນື້ອເຊື່ອໃຈເຊິ່ງກັນແລະກັນ ຮ່ວມມືຢ່າງຮອບດ້ານ", ຈີນລາວເປັນບ້ານໃກ້ເຮືອນຄຽງທີ່ດີ ເປັນເພື່ອນມິດທີ່ດີ ເປັນສະຫາຍທີ່ດີແລະເປັນຄູ່ຂາທີ່ດີຖາວອນ.
ທ່ານຈູມມະລີ ໄຊຍະສອນບອກນັກຂ່າວຈີນວ່າ, ທ່ານມີຄວາມປິຕິຊົມຊື່ນແລະເປັນກຽດຢ່າງສູງທີ່ໄດ້ນຳພາຄະນະຜູ່ແທນຂັ້ນສູງພັກແລະລັດແຫ່ງ ສປປ ລາວມາຢ້ຽມຢາມສັນຖະວະໄມຕີຢ່າງເປັນທາງການ ສປ ຈີນ ໃນບັນຍາກາດທີ່ການສ້າງສາສັງຄົມນິຍົມຕາມສີສັນຂອງຈີນມີຜົນສຳເລັດໃຫຍ່ຫຼວງແລະໜັກແໜ້ນ ທົ່ວພັກແລະທົ່ວປວງຊົນຈີນພວມກະກຽມສະເຫຼີມສະຫຼອງວັນສ້າງຕັ້ງພັກກອມມູນິດຈີນຄົບຮອບ 85 ປີຢ່າງຕັ້ງໜ້າຟົດຟື້ນ ແລະກໍ່ຢູ່ໃນເງື່ອນໄຂທີ່ການພົວພັນຮ່ວມມືຮອບດ້ານຖານເພື່ອນສະຫາຍທີ່ໃກ້ຊິດລາວຈີນ ພວມຂະຫຍາຍຕົວເຂົ້າສູ່ລວງເລິກແລະເກີດດອກອອກຜົນຂຶ້ນຢ່າງບໍ່ຢຸດຢັ້ງ.
ທ່ານຈູມມະລີ ໄຊຍະສອນໄດ້ສະແດງຄວາມອວຍພອນອັນປະເສີດຕໍ່ປະຊາຊົນຈີນແລະການພົວພັນລະຫວ່າງລາວຈີນ. ທ່ານກ່າວວ່າ: "ຂໍອວຍພອນໃຫ້ປະຊາຊົນຈີນຈົ່ງປະສົບຜົນສຳເລັດອັນໃຫຍ່ຫຼວງໜັກແໜ້ນຍິ່ງໆຂຶ້ນ ໃນພາລະກິດສ້າງສາສັງຄົມນິຍົມຕາມສີສັນຂອງຈີນ ແລະອວຍພອນໃຫ້ສາຍພົວພັນມິດຕະພາບອັນໃກ້ຊິດແລະການຮ່ວມມືຮອບດ້ານລະຫວ່າງສອງພັກ ສອງລັດ ແລະປະຊາຊົນສອງຊາດລາວແລະຈີນໃຫ້ນັບມື້ນັບໝັ້ນຄົງທະນົງແກ່ນຕະຫຼອດໄປ.
ທ່ານຜູ່ຟັງທີ່ໂຄລົບ, ທີ່ຟັງມານັ້ນແມ່ນບົດສຳພາດທີ່ພາດຫົວເລື່ອງວ່າ: ການຮ່ວມມືລະຫວ່າງລາວກັບຈີນຢ່ວງບາດກ້າວໃໝ່--ສຳພາດທ່ານຈູມມະລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດລາວ.
|
