|
|
 |
| (GMT+08:00)
2006-07-04 16:14:18
|
 |
|
ສະມາຊິກພັກກອມມູນິດຈີນໃນສາຍຕາຂອງຊາວຕ່າງປະເທດ
cri
|
ຄຽງຄູ່ກັບການໄຂປະຕູສູ່ພາຍນອກຂອງຈີນຂະຫຍາຍກວ້າງອອກຢ່າງບໍ່ຢຸດຢັ້ງ,ນັກ ວິສະວະກອນ ຕ່າງປະເທດນັບມື້ນັບຫຼາຍມາເຮັດວຽກຢູ່ຈີນ,ນັກຮຽນນັກສຶກສາຕ່າງປະເທດນັບມື້ນັບຫຼາຍມາຮຽນຢູ່ຈີນ,ກໍມີນັກກິລາເຕະບານນັບມື້ນັບຫຼາຍມາເຕະບານຢູ່ທິມຈີນ,ແຂກຕ່າງປະເທດທີ່ມາທ່ຽວຈີນກໍແຮ່ງຫຼາຍຈົນນັບບໍ່ຖ້ວນ.ໃນເວລາເຮັດວຽກດຳລົງຊີວິດຈົນກະທັ້ງແວ່ຢູ່ຈີນຊົ່ວ ຄາວ,ພວກເຂົາເຈົ້າໄດ້ສຳຜັດກັບຊາວຈີນສາມັນ,ໃນນັ້ນກໍມີສະມາຊິກພັກກອມມູນິດຈີນຢ່າງຫຼວງຫຼາຍ.
ໃນຊຸມປີ30ສະຕະວັດແລ້ວນີ້,ທ່ານເອັດກາ ສະໂນ ນັກຂ່າວອາເມລິກາໄດ້ມາຮອດເມືອງອຽນອ່ານພາກຕາເວັນຕົກສຽງເໜືອຂອງຈີນໃນແຫ່ງນັ້ນ,ທ່ານໄດ້ເຫັນສະມາຊິກ ພັກກອມມູນິດຈີນເປັນເທື່ອທຳອິດ.ທ່ານປະກົດເຫັນວ່າ,ຄົນເຫຼົ່ານັ້ນແມ່ນຫົວກະທິຂອງປະຊາຊາດຈີນ.ໃນປຶ້ມ"ດາວແດງຢູ່ເທິງທ້ອງຟ້າຈີນ"ທີ່ທ່ານແຕ່ງນັ້ນ,ທ່ານໄດ້ຕີລາຄາສະມາຊິກພັກກອມມູນິດຈີນທີ່ທ່ານໄດ້ພົບນັ້ນຄື ຊາວໜຸ່ມເປັນພັນເປັນໝື່ນເຫຼົ່ານີ້ມີຄາວມກະຕືລືລົ້ນຜ່ານເວລາດົນນານກໍບໍ່ອ່ອນລົງ,ມີຄວາມຫວັງຢ່າງສະໝີຕົ້ນສະເໝີປາຍ,ມີຈິດໃຈສຸຂະທັດປະຕິວັດທີ່ເຮັດໃຫ້ຄົນງຶດງໍ້,ທັງໝົດເຫຼົ່ານີ້ປານແປວໄຟລຸກວູ່ໆ.ບໍ່ວ່າຢູ່ຕໍ່ໜ້າກຳລັງຄົນ,ຫຼືຢ່ຕໍູ່ໜ້າທຳມະຊາດ ພະເຈົ້າຫຼຕໍ່ໜ້າຄວາມຕາຍ,ພວກເຂົາເຈົ້າເດັດຂາດກໍບໍ່ຍອມຈຳນົນ.
ຫຼັງຈາກນັ້ນ70ກວ່າປີ,ທ່ານບີລ ມິເລວສກີ ຊາວອາເມລິກາທີ່ເຮັດວຽກຢູ່ໃນບໍລິສັດອິນເຕີເນັດແຫ່ງໜຶ່ງທີ່ປັກກິ່ງຂອງຈີນ,ໄດ້ພັນລະນາສະມາຊິກພັກກອມມູນິດຈີນທີ່ທ່ານຮູ້ຈັກນັ້ນວ່າ:ພວກເຂົາເຈົ້າມີຄຸນສົມບັດສູ້ທຸກທົນຍາກໂດຍທົ່ວໄປ.ໃນເວລາເຮັດວຽກ,ພວກເຂົາເຈົ້າຮັບຜິດຊອບຢ່າງຈົດຈໍ່,ທຸ່ມເທກຳລັງທັງກາຍໃຈ,ບໍ່ຍອມຈຳນົນຕໍ່ໜ້າຄວາມຫຍຸ້ງຍາກ.ຮ່ວມງານກັບສະມາຊິກພັກກອມມູນິດຈີນເຫຼົ່ານີ້ເຮັດໃຫ້ທ່ານດີໃຈທີ່ສຸດ.ທ່ານເວົ້າວ່າ,
ພະນັກງານທີ່ເປັນສະມາຊິກພັກໃນບໍລິສັດອິນເຕີເນັດ,ພວກເຮົາລ້ວນແຕ່ເປັນຄົນໜຸ່ມ,ພວກເຂົາເຈົ້າສ່ວນຫຼາຍຫາກໍຮຽນຈົບຈາກໂຮງຮຽນ,ມີຄຸນທາດທາງວິຊາສະເພາະສູງພໍສົມຄວນ,ກໍສະຫຼາດທີ່ສຸດ.ຂ້າພະເຈົ້າຮູ້ສຶກດີໃຈຫຼາຍທີ່ໄດ້ພ້ອມກັນກັບພວກເຂົາເຈົ້າພັດທະນາພາລະກິດຂອງພວກເຮົາ,ຂ້າພະເຈົ້າກໍຍິນດີຮ່ວມງານກັບພວກເຂົາເຈົ້າ.
ທ່ານບິລ ມີເລວສກີປີນີ້ອາຍຸ43ປີ,ໄດ້ເຮັດວຽກແລະດຳລົງຊີວິດຢູ່ຈີນເປັນເວລາ10ປີແລ້ວ.ທ່ານເວົ້າວ່າ,ທ່ານເກີດຢູ່ໃນຄອບຄົວກຳມະກອນຂອງອາເມລິກາ,ໃນຄອບຄົວມີ10ກວ່າຄົນ,ທັດສະນະການເມືອງບໍ່ເປັນເອກະພາບ,ມັກປະກອບຄວາມຄິດຄວາມເຫັນຂອງໃຜລາວແລະໂຕ້ຖຽງກັນເລື້ອຍໆ.ຢູ່ອາເມລິກາ,ບໍ່ມີພັກໃດຄືພັກກອມມູນິດຈີນ,ສາມາດເຮັດໃຫ້ຄົນຫຼາຍປານນີ້ມີຢູ່ມີກິນ,ມີການຮັບປະກັນດ້ານຊີວິດການເປັນຢູ່.ທັງນີ້ເຮັດໃຫ້ຄົນເຄົາລົບທີ່ສຸດ.ທ່ານເວົ້າວ່າ,ໃນເວລາທ່ານສະໂນໄປເມືອງອຽນອ່ານ,ທ່ານເໝົາເຈີຕົ່ງ ຜູ້ນຳຂອງພັກກອມມູນິດຈີນມີອາຍຸ43ປີ,ສ່ວນທ່ານໂຈ່ວເອີນໄລມີແຕ່37ປີທໍ່ນັ້ນ.ກໍແມ່ນພວກທ່ານໄດ້ປະກອບເປັນຄະນະນຳຮຸ້ນທຳອິດຂອງພັກກອມມູນິດຈີນ,ສາມັກຄີກ້າວໄປໜ້າ,ບໍ່ງໍ້ງ່ຽງຕໍ່ອຸປະສັກໃດໆ,ໄດ້ດຶງດູດເອົາຊາວໜຸ່ມຈາກແຫ່ງຕ່າງໆໃນທົ່ວປະເທດ.ຫຼັງຈາກນັ້ນ10ກວ່າປີ,ພັກນີ້ໄດ້ສ້າງສິ່ງມະຫັດສະຈັນຢ່າງແທ້ຈິງ,ຄືໄດ້ສະຖາປະນາປະເທດຈີນໃໝ່.ນ້ຳໃຈທີ່ຕັ້ງໜ້າກ້າວໄປໜ້າແລະຍຶດໝັ້ນຈົນເຖິງທີ່ສຸດນັ້ນໄດ້ສືບທອດມາຮອດຊູ່ມື້ນີ້.
ນາງເຮເລນາ ດາກເປັນສາວຝຣັ່ງທີ່ເຮັດວຽກຢູ່ໃນສື່ມວນຊົນແຫ່ງໜຶ່ງຂອງປັກກິ່ງ,ນາງໜຸ່ມກວ່າທ່ານບິວ ມີເລວສະກີ20ປີ,ພາບປະທັບໃຈຂອງນາງຕໍ່ສະມາຊິກພັກກອມມູນິດຈີນສ່ວນຫຼາຍມາຈາກເລື່ອງມະຍິກມະຍ່ອຍທີ່ເພື່ອນມິດຜູ້ເປັນສະມາຊິກພັກເອົາໃຈໃສ່ແລະຊ່ອຍເຫຼືອຕົນເອງ.ນາງສາວຜູ້ນີ້ທີ່ມາເຮັດວຽກຢູ່ປັກກິ່ງຫາກໍ່ປີໜຶ່ງຈົນກະທັ້ງເວົ້າວ່າ,ພວກເຈົ້າບໍ່ຕ້ອງບອກຂ້າພະເຈົ້າວ່າຜູ້ໃດແມ່ນສະມາຊິກພັກກອມມູນິດ,ຂ້າພະເຈົ້າເອງຈະເບິ່ງອອກ.ຜູ້ທີ່ມີໄມຕີຈິດຕໍ່ຜູ້ອື່ນແລະເຮັດວຽກຢ່າງຕັ້ງໜ້າແລະຮັບຜິດຊອບນັ້ນຍ່ອມແມ່ນສະມາຊິກພັກຢ່າງແນ່ນອນ.ນາງເວົ້າວ່າ,
ຂ້າພະເຈົ້າເຮັດວຽກໃນຕອນຄ່ຳເລື້ອຍໆ,ມີເອື້ອຍຜູ້ໜຶ່ງເອົາໃຈໃສ່ນຳຂ້າພະເຈົ້າທີ່ສຸດ,ເພິ່ນເຮັດວຽກຢ່າງຕັ້ງອົກຕັ້ງໃຈ.ເພິ່ນມັກລົມກັບຂ້າພະເຈົ້າ,ຖາມຂ້າພະເຈົ້າວ່າມີຄວາມຫຍຸ້ງຍາກຫຍັງບໍ່ໃນການເຮັດວຽກແລະດຳລົງຊີວິດຢູ່ຈີນ.ຂ້າພະເຈົ້າໄດ້ສັງເກດເຫັນວ່າເພິ່ນກໍເອົາໃຈໃສ່ນຳຜູ້ອື່ນເຊັ່ນດຽວກັນ,ເຮັດໃຫ້ພວກເຮົາຮູ້ສຶກອົບອຸ່ນທີ່ສຸດ.ຕໍ່ມາຂ້າພະເຈົ້າຈຶ່ງຮູ້ວ່າເພິ່ນແມ່ນສະມາຊິກພັກກອມມູນິດ.ທຳອິດຂ້າພະເຈົ້າບໍ່ຮູ້ວ່າຜູ້ໃດແມ່ນສະມາຊິກພັກ,ຕໍ່ມາຈຶ່ງຮູ້ວ່າຢູ່ຄຽງຂ້າງມີຫຼາຍຄົນແມ່ນສະມາຊິກພັກກອມມູນິດ.
ເຊັ່ນດຽວກັນກັບນາງເຮເລນາດາກ,ຊາວຕ່າງປະເທດຫຼາຍຄົນປາກເວົ້າກົງໄປກົງມາ, ພວກເຂົາເຈົ້າບໍ່ຈຳເປັນຍົກຍໍຜູ້ໃດ.ແຕ່ເມື່ອເວົ້າເຖິງສະມາຊິກພັກກອມມູນິດທີ່ເຮັດວຽກຫຼືຮຽນນຳກັນກັບພວກເຂົາເຈົ້ານັ້ນ,ຫາກໄດ້ຍ້ອງຍໍດ້ວຍຄວາມຈິງໃຈ.
ທ້າວຊູໂບແມ່ນນັກສຶກສາຂອງສາທາລະນະລັດມົງໂກລີ,ດຽວນີ້ພວມຮຽນປະລິນຍາໂທວິຊາການຕ່າງປະເທດຢູ່ມະຫາວິທະຍາໄລປະຊາຊົນຈີນ.ທ້າວຊູໂບໄດ້ມາຈີນ5ປີແລ້ວ.ໃນ5ປີທີ່ຜ່ານມາ,ລາວໄດ້ຮູ້ຈັກສະມາຊິກພັກກອມມູນິດຈີນຫຼາຍຄົນ,ໃນນັ້ນມີເພື່ອນຮຽນ ອາຈານແລະໝູ່ເພື່ອນ.ທຳອິດ,ທ້າວຊູໂບຍັງບໍ່ໄດ້ເອົາໃຈໃສ່ເຖິງຖານະພິເສດຂອງພວກເຂົາເຈົ້າ,ພຽງແຕ່ຮູ້ສຶກວ່າກຸ່ມຄົນນີ້ສຸກງອມກວ່າຜູ້ອື່ນ.ຫຼັງຈາກນັ້ນ,ທ້າວຊູໂບຈຶ່ງຄ່ອຍໆຮູ້ວ່າ,ເພື່ອນມິດຈີນທີ່ສຸກງອມເຫຼົ່ານີ້ລ້ວນແຕ່ແມ່ນສະມາຊິກຂອງພັກກອມມູນິດຈີນ.ທ້າວຊູໂບເວົ້າວ່າ,ແຕ່ກ່ອນຄິດວ່າສະມາຊິກພັກກຳອຳນາດຂອງປະເທດໃຫຍ່ແນ່ນອນແລ້ວຈະອວດອົ່ງກວ່າຄົນທຳມະດາ,ແຕ່ກຸ່ມຄົນນີ້ຫາກບໍ່ເປັນແນວນັ້ນ.ພວກເຂົາເຈົ້າບໍ່ພຽງແຕ່ເຂົ້າຄົນງ່າຍ,ແລະເມື່ອຜູ້ອື່ນປະສົບຄວາມຫຍຸ້ງຍາກ,ພວກເຂົາເຈົ້າຈະໃຫ້ການຊ່ອຍເຫຼືອຢ່າງເອື້ອເຟື້ອເຜື່ອແຜ່.
ທ້າວຊູໂບຫວນຄືນວ່າ,ໃນເວລາຫາກໍ່ມາຈີນ,ພື້ນຖານພາສາຈີນຂອງຕົນຍັງບໍ່ທັນໝັ້ນແກ່ນເທື່ອ,ຮຽກຍາກຫຼາຍ.ໃນຄາວນັ້ນ,ເພື່ອນຮຽນແລະອາຈານຜູ້ເປັນສະມາຊິກພັກກອມມູນິດຈີນຈຳນວນໜຶ່ງໄດ້ໃຫ້ກຳລັງໃຈແລະຊ່ອຍເຫຼືອລາວຢ່າງຫຼວງຫຼາຍ.ລາວເວົ້າວ່າ,
ຕົວຢ່າງຄື,ໃນເວລາຂຽນບົດນິພົນພາສາຈີນທີ່ອາຈານຈັດວາງໃຫ້ເທື່ອໃດ,ຂ້າພະເຈົ້າລ້ວນແຕ່ຈະພົບຄວາມຫຍຸ້ງຍາກດ້ານພາສາ.ໃນເວລານີ້,ພວກເຂົາເຈົ້າຈະໃຫ້ການຊີ້ນຳໃນດ້ານນີ້ຢ່າງພຽນໃຈ.ໂດຍມີການຊ່ອຍເຫຼືອຂອງພວກເຂົາເຈົ້າ,ແຕ່ລະເທື່ອຂ້າພະເຈົ້າກໍຂຽນສຳເລັດເປັນຢ່າງດີ.
ຕໍ່ຈາກນັ້ນ,ທ້າວຊູໂບຮູ້ສຶກວ່າການຮຽນຄ່ອຍໆເປັນປົກກະຕິແລ້ວ.ແຕ່ນັ້ນມາ,ທ້າວຊູໂບກໍໄດ້ມັກເພື່ອນມິດຜູ້ເປັນສະມາຊິກພັກກອມມູນິດຈີນເຫຼົ່ານີ້ຢ່າງຈິງໃຈ.ໃນການໄປມາຫາສູ່ກັນຕື່ມອີກ,ທ້າວຊູໂບຮູ້ສຶກວ່າສະມາຊິກພັກກອມມູນິດຈີນເຫຼົ່ານີ້ຍັງມີຄຸນສົມບັດພິເສດທີ່ຜູ້ອື່ນບໍ່ມີ.ໃນ5ປີທີ່ຢູ່ຈີນ,ສິ່ງທີ່ເຮັດໃຫ້ລາວດີໃຈທີ່ສຸດກໍແມ່ນໄດ້ຮູ້ຈັກກັບເພື່ອນມິດໝູ່ໜຶ່ງແນວນີ້.ລາວເວົ້າວ່າ,
ຂ້າພະເຈົ້າຮູ້ສຶກວ່າ,ສະມາຊິກພັກກອມມູນິດຈີນບໍ່ພຽງແຕ່ປະຕິບັດຕໍ່ຄົນອື່ນດ້ວຍຄວາມຈິງໃຈທໍ່ນັ້ນ,ໃນເວລາຊຳລະແກ້ໄຂບັນຫາ,ກໍມີຄວາມທ່ຽງທຳຢູ່ສະເໝີ.ໃນຖານເປັນສະມາຊິກຂອງພັກໃຫຍ່ປະເທດໃຫຍ່,ປະກົດການດັ່ງກ່າວດີທີ່ສຸດ.
ເຊັ່ນດຽວກັນກັບຄວາມຮູ້ສຶກຂອງເພື່ອນມິດຕ່າງປະເທດຄືທ້າວຊູໂບເປັນຕົ້ນ,ຊາວຕ່າງປະເທດຫຼາຍຄົນໄດ້ຢູ່ຮ່ວມກັນຢ່າງແໜ້ນແຟ້ນກັບສະມາຊິກພັກກອມມູນິດຈີນໃນເວລາເຮັດວຽກຮໍ່າຮຽນແລະດຳລົງຊີວິດ,ແລະໄດ້ຮູ້ພວກເຂົາເຈົ້າຢ່າງເລິກເຊິ່ງ.ເຖິງວ່າພວກເຂົາເຈົ້າແມ່ນສຳຜັດກັບສະມາຊິກພັກກອມມູນິດຈີນໂດຍຜ່ານຈາກຊ່ອງທາງຕ່າງກັນ,ແຕ່ພັດມີພາບປະທັບໃຈທີ່ເປັນເອກະສັນກັນ,ນັ້ນກໍແມ່ນຍ້ອນມີສະມາຊິກພັກທຳມະດາສາມັນທີ່ມີສຸຂະທັດ ຕັ້ງໜ້າແລະມີອຸດົມຄະຕິຈຶ່ງເຮັດໃຫ້ພັກກອມມູນິດຈີນເຂັ້ມແຂງແລະມີພະລັງຊີວິດແນວນີ້.
|
|
|
