|
|
 |
| (GMT+08:00)
2006-07-05 13:56:32
|
 |
|
ຈີນອອກແຮງສະໜັບສະໜູນການພັດທະນາຂອງຊົນເຜົ່າທີ່ມີປະຊາກອນຂ້ອນຂ້າງໜ້ອຍ
cri
Author: mo
|
ຈີນມີຫຼາຍຊົນເຜົ່າ, ນອກຈາກເຜົ່າຮັ້ນແລ້ວ, ຍັງມີ 55 ຊົນເຜົ່າສ່ວນໜ້ອຍ, ໃນນັ້ນ, 22 ຊົນເຜົ່າມີປະຊາກອນບໍ່ຮອດ 1 ແສນຄົນ, ສະນັ້ນຖືກເອີ້ນເປັນຊົນເຜົ່າທີ່ມີປະຊາກອນຂ້ອນຂ້າງໜ້ອຍ. ຊົນເຜົ່າເຫຼົ່ານີ້ສ່ວນຫຼາຍດຳລົງຊີວິດຢູ່ເຂດຫ່າງໄກສອກຫຼີກ, ລະດັບການພັດທະນາໃນດ້ານກວມລວມແລ້ວຂ້ອນຂ້າງຫຼ້າຫຼັງ. ເພື່ອປົວແປງສະພາບການພັດທະນາຂອງຊົນເຜົ່າເຫຼົ່ານີ້, ແຕ່ທ້າຍສະຕະວັດທີ່ແລ້ວເປັນຕົ້ນມາ, ຈີນໄດ້ໃຊ້ມາດຕະການຢ່າງເປັນລະບົບສະໜັບສະໜູນການພັດທະນາຂອງຊົນເຜົ່າເຫຼົ່ານີ້.
ເຜົ່ານູດຳລົງຊີວິດຢູ່ແຂວງຢຸນນານ ທາງພາກຕາເວັນຕົກສຽງໃຕ້ຂອງຈີນ. ເມື່ອນັກຂ່າວພວກເຮົາອອກເດີນທາງຈາກເມືອງຄຸນມິງ ເທດສະບານແຂວງຢຸນນານ, ໃຊ້ເວລາເກືອບ 20 ຊົ່ວໂມງ ຈຶ່ງໄປຮອດບ້ານເຜົ່ານູແຫ່ງໜຶ່ງທີ່ຊື່ວ່າ"ບ້ານເຈຍເສີ່ງ". ເບິ່ງຈາກທາງໄກ, ເຫັນແຕ່ທົ່ວບ້ານພູຫິມະອ້ອມ, ແຕ່ເສັ້ນທາງໃນບ້ານຮາບພຽງ, ຢູ່ແຄມທາງ ເຮືອນດິນຈີ່ທີ່ປຸກໃໝ່ຕັ້ງເປັນແຖວ. ສະພາບການນີ້ຕ່າງກັບສະພາບທຸກຍາກຫຼ້າຫຼັງທີ່ນັກຂ່າວໄດ້ເຫັນໃນເມື່ອກ່ອນຕັ້ງຫຼວງຫຼາຍ.
ຍ່າງເຂົ້າເຮືອນຂອງທ້າວລິວຢາງຫາຍ, ນັກຂ່າວໄດ້ເຫັນຫ້ອງຮັບແຂກກວ້າງຂວາງໃສແຈ້ງ, ມີເຄື່ອງໄຟຟ້າໃຊ້ໃນເຮືອນຕ່າງໆເຊັ່ນໂທລະພາບ ຕູ້ເຢັນ ແລະຈັກຊັກເຄື່ອງເປັນຕົ້ນ. ທ້າວລິວຢາງຫາຍບອກນັກຂ່າວດ້ວຍຄວາມດີໃຈວ່າ, ແຕ່ປີ 2000 ເປັນຕົ້ນມາ, ທາງບ້ານເຮັດທຸລະກິດການທ່ອງທ່ຽວ, ຊາວບ້ານທັງຫຼາຍໄດ້ມີແຫຼ່ງລາຍຮັບໃໝ່, ລາຍໄດ້ກໍເພິ່ມຂຶ້ນຫຼາຍ, ສະນັ້ນ, ຄົນທັງຫຼາຍພາກັນປຸກເຮືອນໃໝ່, ຊື້ເຄື່ອງໄຟຟ້າໃຊ້ໃນເຮືອນ. ລາວເວົ້າວ່າ, ເມື່ອ 5-6 ປີກ່ອນ, ຍ້ອນດິນປູກຝັງໜ້ອຍ, ສະພາບຊີວິດການເປັນຢູ່ຂອງເຜົ່ານູບໍ່ຄືປັດຈຸບັນ.
"ແຕ່ກ່ອນບໍ່ໄດ້ພັດທະນາການທ່ອງທ່ຽວ, ແຫຼ່ງລາຍຮັບຂອງພວກເຮົາບໍ່ຫຼາຍ, ນອກຈາກການປູກຝັງແລ້ວ, ມີແຕ່ລ້ຽງໄກ່ໄກ່ເລັກໜ້ອຍທໍ່ນັ້ນ, ຊີວິດຫຍຸ້ງຍາກຫຼາຍ."
ລາຍຮັບໜ້ອຍທີ່ທ້າວລິວຢາງຫາຍເວົ້ານັ້ນແມ່ນສະພາບທົ່ວໄປທີ່ມີຢູ່ໃນຊົນເຜົ່າປະຊາກອນຂ້ອນຂ້າງໜ້ອຍຂອງຈີນໃນເມື່ອກ່ອນ. ນອກນັ້ນ, ໃນເວລານັ້ນ, ຊົນເຜົ່າເຫຼົ່ານີ້ຍັງປະເຊີນບັນຫາອື່ນຈຳນວນໜຶ່ງເຊັ່ນ: ພື້ນຖານໂຄງລ່າງຫຼ້າຫຼັງ, ບ້ານຊົນເຜົ່າປະຊາກອນຂ້ອນຂ້າງໜ້ອຍຫຼາຍສົມຄວນບໍ່ມີໄຟຟ້າແລະທາງຫຼວງ, ບໍ່ມີໂຮງຮຽນປະຖົມ, ຫ້ອງປິ່ນປົວ, ແລະນ້ຳກິນທີ່ສະອາດ; ປະຊາກອນປະມານ 1/4 ບໍ່ທັນໄດ້ແກ້ໄຂການກິນອີ່ມນຸ່ງອຸ່ນ.
ເພື່ອປົວແປງສະພາບດັ່ງກ່າວ, ແຕ່ທ້າຍສະຕະວັດທີ່ແລ້ວເປັນຕົ້ນມາ, ຈີນໄດ້ໃຊ້ມາດຕະການຕ່າງໆຢ່າງຕໍ່ເນື່ອງສະໜັບສະໜູນການພັດທະນາຂອງຊົນເຜົ່າປະຊາກອນຂ້ອນຂ້າງໜ້ອຍ. ຄືແຕ່ປີ 2002 ຮອດປີ 2004, ລັດໄດ້ລົງທຶນ 100 ກວ່າລ້ານຢວນ ປົວແປງເງື່ອນໄຂພື້ນຖານໂຄງລ່າງເຊັ່ນ ນ້ຳກິນ ໄຟຟ້າແລະເສັ້ນທາງຂອງບ້ານຊົນເຜົ່າປະຊາກອນຂ້ອນຂ້າງໜ້ອຍ; ນອກນີ້, ພາກສ່ວນທີ່ກ່ຽວຂ້ອງຂອງຈີນຍັງຊ່ອຍຊົນເຜົ່າປະຊາກອນຂ້ອນຂ້າງໜ້ອຍສັບຊ້ອນອົງປະກອບອຸດສາຫະກຳ, ພັດທະນາອຸດສາຫະກຳທ່າແຮງທີ່ມີເອກະລັກ, ເຮັດໃຫ້ພວກເຂົາເຈົ້າມີລາຍໄດ້ເພີ່ມຂຶ້ນ; ລັດຖະບານຊ່ອຍຊົນເຜົ່າເຫຼົ່ານີ້ພັດທະນາພາລະກິດສັງຄົມເຊັ່ນວິທະຍາສາດເຕັກນິກ ການສຶກສາ ສາທາລະນະສຸກແລະວັດທະນະທຳເປັນຕົ້ນ, ຊຸກຍູ້ໃຫ້ສັງຄົມໃນເຂດເຫຼົ່ານີ້ມີຄວາມກ້າວໜ້າ.
ເພື່ອເພີ່ມທະວີການສະໜັບສະໜູນຕື່ມອີກ, ປີ 2005, ຈີນຍັງໄດ້ວາງ"ແຜນການສະໜັບສະໜູນການພັດທະນາຂອງຊົນເຜົ່າທີ່ມີປະຊາກອນຂ້ອນຂ້າງໜ້ອຍ". ທ່ານເລີ້ສາງຫົງ ຮອງຫົວໜ້າກົມເສດຖະກິດຂອງຄະນະກຳມະການວຽກງານຊົນເຜົ່າແຫ່ງລັດຈີນແນະນຳວ່າ, ໃນ 5 ປີຂ້າງໜ້າ, ອົງການປົກຄອງຂັ້ນຕ່າງໆຂອງຈີນຈະລົງທຶນ 1 ຕື້ຢວນ, ໃຊ້ເຂົ້າໃນການປົວແປງສະພາບການຜະລິດແລະຊີວິດການເປັນຢູ່ຂອງຊົນເຜົ່າທີ່ມີປະຊາກອນຂ້ອນຂ້າງໜ້ອຍ.
"ເປົ້າໝາຍຂອງແຜນການດັ່ງກ່າວແມ່ນຈະໃຊ້ເວລາ 5 ປີ, ແກ້ໄຂບັນຫາກິນອີ່ມນຸ່ງອຸ່ນຂອງປະຊາກອນທຸກຍາກຂອງຊົນເຜົ່າທີ່ມີປະຊາກອນຂ້ອນຂ້າງໜ້ອຍໂດຍພື້ນຖານ, ເຮັດໃຫ້ການພັດທະນາເສດຖະກິດແລະສັງຄົມຂອງຊົນເຜົ່າເຫຼົ່ານີ້ບັນລຸເຖິງລະດັບຜ້ານກາງຫຼືຜ້ານກາງຂຶ້ນໄປຂອງທ້ອງຖິ່ນນັ້ນໂດຍພື້ນຖານ."
ໃນຫຼາຍປີມານີ້, ໃຕ້ການສະໜັບສະໜູນຈາກລັດຖະບານ, ສະພາບການພັດທະນາຂອງບາງເຂດຊົນເຜົ່າທີ່ມີປະຊາກອນຂ້ອນຂ້າງໜ້ອຍໄດ້ຮັບການປົວແປງໃຫ້ດີຂຶ້ນຢ່າງຈະແຈ້ງ. ເຜົ່າຜູມີແມ່ນຊົນເຜົ່າທີ່ມີປະຊາກອນຂ້ອນຂ້າງໜ້ອຍໄດ້ດຳລົງຊີວິດຢູ່ພາກຕາເວັນຕົກສຽງເໜືອຂອງແຂວງຢຸນນານ, ຢູ່ບ້ານກ່ານຈູເຫີທີ່ມີຊົນເຜົ່າດັ່ງກ່າວດຳລົງຊີວິດນັ້ນ, ນັກຂ່າວໄດ້ເຫັນ, ທາງຫຼວງທີ່ຈາກບ້ານນີ້ເນັ່ງໄປຫາພາຍນອກໄດ້ສ້າງສຳເລັດແລ້ວ, ໃຕ້ການຊ່ອຍເຫຼືອຈາກອົງການປົກຄອງທ້ອງຖິ່ນ, ຊາວບ້ານທັງຫຼາຍຍັງໄດ້ລ້ຽງງົວ. ນາງເຫີຈູເຈີ່ນ ເຈົ້າໜ້າທີ່ທີ່ຮັບຜິດຊອບວຽກງານຊົນເຜົ່າຂອງທ້ອງຖິ່ນນັ້ນແນະນຳວ່າ, ອົງການປົກຄອງໄດ້ເອົາງົວສອງຕົວໃຫ້ທຸກໆຄອບຄົວເຜົ່າຜູມີໂດຍບໍ່ເສຍຄ່າ, ຫວັງໃຫ້ພວກເຂົາເຈົ້າມີລາຍໄດ້ເພີ່ມຂຶ້ນໂດຍຜ່ານຈາກການລ້ຽງງົວ.
"ພວກເຮົາຢູ່ແຫ່ງນີ້ສູງກວ່າລະດັບນ້ຳທະເລຂ້ອນຂ້າງຫຼາຍ, ພັດທະນາການລ້ຽງສັດຈະຂ້ອນຂ້າງໝັ້ນທ່ຽງ, ສະນັ້ນ, ພວກເຮົາໄດ້ຂໍຄວາມເຫັນນຳຊາວກະສິກອນ, ແລ້ວລົງທຶນ 1 ລ້ານຢວນເຂົ້າໃນການລ້ຽງສັດ. ດຽວນີ້, ຊາວກະສິກອນທຸກຄອບຄົວປີໜຶ່ງຈະມີລາຍໄດ້ເພິ່ມຂຶ້ນ 1 ພັນກວ່າຢວນ."
ຍ້ອນແຕ່ກ່ອນເຜົ່າຜູມີບໍ່ເຄີຍລ້ຽງສັດເປັນຂະບວນ, ສະນັ້ນ, ພາກສ່ວນທີ່ກ່ຽວຂ້ອງຂອງທ້ອງຖິ່ນໄດ້ຮ່ວມມືກັບຂະແໜງການລ້ຽງສັດ ຈັດຊຸດອົບຮົມລ້ຽງງົວຢູ່ບ້ານເຜົ່າຜູມີ, ສອນພວກເຂົາເຈົ້າປ້ອງກັນພະຍາດງົວແນວໃດ? ລ້ຽງງົວແນວໃດ? ມາດຕະການເຫຼົ່ານີ້ໄດ້ຮັບຄວາມຊົມເຊີຍຈາກເຜົ່າຜູມີ, ກໍໄດ້ຊຸກຍູ້ໃຫ້ການລ້ຽງສັດພັດທະນາຢ່າງຟົດຟື້ນ. ນາງຢາງຊູ້ສຽງ ໄທບ້ານກ່ານຈູເຫີບອກນັກຂ່າວວ່າ:
"ຫຼາຍປີກ່ອນ, ຄອບຄົວເຮົາຫຍຸ້ງຍາກສົມຄວນ, ໃຕ້ການຊ່ອຍເຫຼືອຈາກຄະນະກຳມະການຊົນເຜົ່າ, ພວກເຮົາໄດ້ພັດທະນາການລ້ຽງສັດ, ສະພາບຂອງພວກເຮົາດີກວ່າແຕ່ກ່ອນຫຼາຍແລ້ວ. ການລ້ຽງງົວສາມາດເຮັດໃຫ້ຄອບຄົວເຮົາມີລາຍໄດ້ເພິ່ມຂຶ້ນ, ສາມາດກຸ້ມລູກສອງຄົນຂອງເຮົາໄປເຂົ້າຮຽນ."
ໃນເວລາສຳພາດ, ນັກຂ່າວໄດ້ຮູ້ວ່າ, ເຊັ່ນດຽວກັນກັບເຜົ່າຜູມີ, ເມື່ອທຽບກັບແຕ່ກ່ອນແລ້ວ, ສະພາບການຜະລິດແລະຊີວິດການເປັນຢູ່ຂອງບັນດາຊົນເຜົ່າທີ່ມີປະຊາກອນຂ້ອນຂ້າງໜ້ອຍໃນປັດຈຸບັນໄດ້ດີຂຶ້ນສົມຄວນ. ຕົວຢ່າງຄືເຜົ່າເຮີ້ເຈີແຂວງເຫີ່ຍລົງຈ່ຽງ ຢູ່ພາກຕາເວັນອອກສຽງເໜືອຂອງຈີນ, ປັດຈຸບັນ, ທຸກບ້ານໄດ້ມີໄຟຟ້າ ທາງຫຼວງແລະນ້ຳປະປາ, ບາງບ້ານຍັງໃຊ້ໂທລະສັບມືຖືໄດ້; ໃຕ້ການສົ່ງເສີມແລະການສະໜັບສະໜູນຂອງລັດ, ເຜົ່າເຮີ້ເຈີໄດ້ພັດທະນາການທ່ອງທ່ຽວ, ກ້າວເດີນຕາມເສັ້ນທາງສ້າງຮັ່ງຄູນມີພົ້ນທຸກພົ້ນຍາກແລ້ວ.
ທ່ານເລີ້ສາງຫົງ ຂອງຄະນະກຳມະການວຽກງານຊົນເຜົ່າແຫ່ງລັດຈີນກ່າວວ່າ, ຕໍ່ໄປພາຍໜ້າ, ຈີນຍັງຈະເພີ່ມທະວີການສະໜັບສະໜູນຊົນເຜົ່າທີ່ມີປະຊາກອນຂ້ອນຂ້າງໜ້ອຍຢ່າງບໍ່ຢຸດຢັ້ງ:
"ໜຶ່ງ ຕໍ່ໄປພາຍໜ້າ, ຄຽງຄູ່ກັບການເງິນຂອງລັດເພີ່ມຂຶ້ນ, ຈະພະຍາຍາມເພີ່ມການລົງທຶນຕໍ່ເຂດເຫຼົ່ານີ້ຕື່ມອີກ; ສອງ, ຈະຈັດຕັ້ງເຂດເສດຖະກິດພັດທະນາຊ່ອຍເຫຼືອເຂດຊົນເຜົ່າທີ່ມີປະຊາກອນຂ້ອນຂ້າງໜ້ອຍແບບໜຶ່ງຕໍ່ໜຶ່ງ, ເພິ່ມຄວາມແຮງສະໜັບສະໜູນໃຫ້ຫຼາຍຂຶ້ນຕື່ມ; ສາມປຸກລະດົມໃຫ້ວົງການຕ່າງໆໃນສັງຄົມສະໜັບສະໜູນຊ່ອຍເຫຼືອຊົນເຜົ່າທີ່ມີປະຊາກອນຂ້ອນຂ້າງໜ້ອຍຕື່ມອີກ."
(ຈົບ)
|
|
|
